Mafaufau ki te tulaga tenei: Ne fesokotaki sāle a Heta mo Mika mō se lua masina, kae mafaufau tou fafine me ko leva eiloa ne iloa ne ia tou tagata. E aveave meli faeloa lāua i selefoni, e fai‵pati lāua i te telefoni mō se taimi leva ‵ki, kae e mafai foki o faka‵soko fakaoti ne lāua a pati a te suā tino! Kae nei la ko manako a Mika ki se mea telā e sili atu i te faiga fua o sau‵talaga.

I te lua masina ko ‵teka, ne pikilima kae sogi malie sāle a Mika mo Heta. Ne manako a Heta ke gata eiloa i konā. Kae e se manako foki ke tiakina a ia ne Mika. E seai eiloa se tino e fai ne ia tou fafine ke mafaufau me ko oko eiloa i tena matagali, kae tu ‵kese. ‘I tafa i ei,’ ne fai ifo tou fafine, ‘Māua mo Mika ko fia‵fai ‵ki . . . ’

Kafai ko matua ‵lei koe ke fai famau kae ko oko atu koe ki te tulaga o Heta, ne a au mea ka fai mai tua ifo?

Kafai e eva ifo koe mai i se lakau maluga kae taumafai o eva e pelā me se manu, ka logo‵mae eiloa koe i te ikuga mai i ei. E penā foki loa māfai e fakaseaoga ne koe se tulafono i mea tau amioga, e pelā mo te mea tenei e taku mai: “‵Kalo keatea mai i amioga fakatauavaga sē ‵tau.”—1 Tesalonia 4:3.

Ne a ikuga o te sē fakalogo ki te fakatonuga tenā? E fai mai te Tusi Tapu: “A ko ia telā e fai faeloa ne ia a amioga fakatauavaga sē ‵tau e agasala eiloa ki tena foitino.” (1 Kolinito 6:18) E pefea te ‵tonu o te manatu tenā?

 Ko oti ne iloa ne tino fai sukesukega me ne masani o fe‵paki a talavou e tokouke kolā ne fai penā mo se ikuga e tasi io me e uke atu mai mea konei mai lalo.

• LOTO MAFATIA. A te tokoukega o talavou kolā ne aofia i faifaiga fakatauavaga a koi tuai o a‵vaga ne fai mai me ne sala‵mo valevale latou mai tua ifo i ei.

• SĒ FAKATALITONUGINA. Mai tua o faifaiga fakatauavaga sē ‵tau, e kamata o mafau‵fau lāua, ‘Ko oi aka foki ne ‵moe mo ia?’

• FANOANOA. A te ‵tonuga loa, e ma‵nako a tamaliki fa‵fine ki se tino telā ka puipui ne ia latou, kae e se ko te fakaaoga valevale fua. Kae e iloa aka ne tamaliki tagata e tokouke me ko se fia‵fai malosi latou ki se tamaliki telā ko oti ne talia ne ia olotou taumafaiga.

• Manatu tonu: Kafai ko oti ne aofia koe i faifaiga fakatauavaga kae seki avaga, ko fakamasiasi ne koe a koe eiloa mai te fakaseaoga o se mea tāua ‵ki. (Loma 1:24) Ko tō tāua tou foitino ke tuku atu fua ki so se tino!

Fakaasi atu me e maua ne koe te malosi ke “kalo keatea mai i amioga fakatauavaga sē ‵tau.” (1 Tesalonia 4:3) Kae kafai ko avaga koe i se aso e tasi, ko mafai ei o aofia koe i ei. Kae ka mafai o fiafia katoatoa koe ki ei e aunoa mo te manavase, salamo, mo te mataku ki mea kolā e masani o fai mo ikuga o te aofia i ei kae seki avaga.—Faataoto 7:22, 23; 1 Kolinito 7:3.

• E mata, e isi se tino telā e alofa tonu ki a koe e mafai o fai ne ia se mea telā e fakamataku ki tou ‵lei i te feitu faka-te-foitino mo mea tau lagonaga?

• E mata, e isi se tino telā e alofa tonu ki a koe ka tofotofo ne ia koe ke fakamasei ei tou fesokotakiga mo te Atua?—Epelu 13:4.