1, 2. Ne a fesili e masani o fesili sāle ne tino?

E UKE a fesili e fai ne tama‵liki. E fakamatala atu ne koe se mea ki a latou, kae toe fesili mai latou, ‘Kaia?’ Kae kafai e taumafai koe o fai atu se tali ki a latou, ko toe fesili mai foki, ‘Kae kaia la?’

² Faitalia me koi fo‵liki tatou io me ko ma‵tua, e isi katoa ne fesili a tatou. Kāti ko fesili e uiga ki meakai ka ‵kai ki ei, gatu ka ‵pei ki ei io me ne mea e ‵tau o ‵togi. Io me kāti e isi ne ‵tou fesili tāua e uiga ki te olaga mo aso mai mua. Kae kafai e seai ne tali fakamalie loto e maua ne tatou, e mafai loa o taofi aka te ‵tou ‵sala atu ki tali ki fesili konā.

3. Kaia e mafau‵fau ei a tino e tokouke me e se mafai o maua a tali ki olotou fesili tāua?

³ E mata, e isi ne tali i te Tusi Tapu ki fesili tāua a tatou? E mafau‵fau eiloa penā a nisi tino, kae ma‵natu aka latou me ko tō faigata te Tusi Tapu ke malamalama i ei. Kāti ka mafau‵fau latou me ko faiakoga io me ko faifeau fua e maua ne latou a tali. Kae ko nisi tino ko tō ‵ma ke fakaasi ‵tonu atu me e se iloa ne latou a tali. Se a tau faka‵tau?

4, 5. Ne a fesili tāua a koe? Kaia e ‵tau ei o tumau koe i te salasala atu ki tali?

⁴ Kāti e fia iloa ne koe a tali ki vaegā fesili penei: Kaia e nofo ei au i konei? Se a te mea ka tupu ki a au māfai au ko mate? A te Atua se tino pefea? Ne fai mai a Iesu, te Faiakoga lauiloa, penei: “Tumau i te fakamolemole atu, kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou.” (Mataio 7:7) Ke mo a koe ma ‵fiu i te ‵sala malosi ki tali kolā e mafai o talitonu koe ki ei.

 ⁵ Ao, kafai koe e “tumau i te salasala atu,” ka maua eiloa ne koe a tali mai te Tusi Tapu. (Faataoto 2:1-5) A tali ki fesili konei e faigofie fua ke malamalama i ei. A mea e tauloto ne koe ka fai ei ke maua ne koe se olaga fiafia i te taimi nei mo se fakamoemoega gali i aso mai mua. Ke sau‵tala nei tatou ki se fesili telā ne ‵numi i ei a tino e tokouke.

6. Kaia e mafau‵fau ei a nisi tino i te Atua e se fia saga mai ki olotou logo‵maega?

⁶ E mafau‵fau a tino e tokouke me i te Atua e se atafai mai ki a tatou. E ma‵natu aka latou me kafai e atafai tonu mai te Atua, e ‵tau o ‵kese ‵ki a te lalolagi. E lavea ne tatou a taua, takalialiaga mo te fanoanoa i koga katoa. A tino e ma‵saki, e logo‵mae kae ‵mate. E mafau‵fau aka nisi tino, ‘Kafai e atafai mai te Atua ki a tatou, kaia e se fakagata ei ne ia a logo‵maega katoa konei?’

7. (a) Ne akoako atu pefea ne takitaki lotu i te Atua e masei? (e) Kaia e mautinoa ei i a tatou me e se ‵tau o ‵losi atu ki te Atua a mea ma‵sei konei e ‵tupu?

⁷ E fai ne takitaki lotu i nisi taimi ke tali‵tonu a tino me i te Atua e masei. Kafai e tupu se mea masei, e fai atu latou me ko te loto eiloa o te Atua. E fai atu latou me manako eiloa a ia ke tupu te mea tenā. Kafai e fai atu latou penā, ko ‵losi tonu atu ne latou me ko te Atua te pogai o te mea tenā. Kae e akoako mai te Tusi Tapu me e se māfua mai a mea ma‵sei i te Atua. E fai mai te Iakopo 1:13 ki a tatou me i te Atua e se tofotofo ne ia a tino ki mea ma‵sei. E fai mai penei: “Kafai e tofotofogina se tino, ke mo a ma fai mai a ia: ‘Au ko tofotofo [io me, fakaosoosogina] ne te Atua.’ Me e se mafai o tofotofogina te Atua ki mea ma‵sei io me e tofotofo ne ia se tino.” Ko tena uiga, e tiga eiloa e seki taofi aka ne te Atua a mea  masei, ne seki māfua mai i a ia a mea konā. (Faitau te Iopu 34:10-12.) Ke fai ne tatou se fakaakoakoga.

8, 9. Kaia e se ‵lei ei ke ‵losi atu me ko te Atua te pogai o ‵tou fakalavelave? Taku mai se fakaakoakoga.

⁸ Ke mafaufau ki se tamataene e ‵nofo mo ana mātua i te fale. E alofa malosi tena tamana ki a ia kae akoako a ia ke fai ne ia a fakaikuga ‵lei. Kae oti aka, ko ‵teke atu te tamataene tenā ki tena tamana kae fano kea‵tea mo te fale. E fai ne ia a mea ma‵sei kae fepaki mo fakalavelave e uke. E mata, ka ‵losi atu koe me ko te tamana ne māfua mai ei te fakalavelave tenā me ne seki taofi ne ia tena tama ke mo a ma fano kea‵tea? Ikai! (Luka 15:11-13) E pelā mo te tamana tenā, ne seki taofi aka ne te Atua a tino i te taimi ne filifili ei ne latou ke ‵teke atu kae fai a mea ma‵sei. Tela la, kafai e tupu se mea masei, e ‵tau o masaua ne tatou me e se ko te Atua ne fai ne ia ke tupu te mea tenā. E sē se mea ‵lei ke ‵losi atu a mea konā ki te Atua.

⁹ E isi se pogai tāua ne seki taofi aka ei ne te Atua a mea ma‵sei. I te Mataupu e 11 ka tauloto koe ki pati a te Tusi Tapu e uiga ki te mea tenei. Kae e mafai o mautinoa i a koe me i te Atua e alofa mai ki a tatou kae e se ‵tau eiloa o ‵losi atu ki a ia me ko te pogai o ‵tou fakalavelave. A te ‵tonuga loa, ko ia eiloa te Tino e mafai o faka‵lei ne ia a fakalavelave konā.—Isaia 33:2.

10. E mautinoa pefea i a tatou me ka faka‵lei ne te Atua a mea ma‵sei katoa ne fai ne tino ma‵sei?

¹⁰ A te Atua e tapu. (Isaia 6:3) A mea katoa e fai ne ia e ‵ma pakipaki kae ‵lei. Tela la, e mafai eiloa o tali‵tonu tatou ki a ia. E se penā eiloa a tino. E fai ne latou a mea ‵se i nisi taimi. Ke oko foki eiloa ki te ‵toe pule fakamaoni e se maua ne ia te malosi ke faka‵lei ne ia a mea ma‵sei ne fai ne tino. E seai se tino e ‵pau tena malosi mo te Atua. E mafai o faka‵lei ne ia a mea ma‵sei katoa ne fai ne tino. Ka tapale kea‵tea ne ia a  mea ma‵sei katoa ki te se-gata-mai.—Faitau te Salamo 37:9-11.

11. E pefea a lagonaga o te Atua māfai ko logo‵mae koe?

¹¹ E pefea lagonaga o te Atua māfai e lavea ne ia a mea e ‵tupu i te lalolagi mo mea e ‵tupu ki a koe? E akoako mai te Tusi Tapu me i te Atua “e fiafia ki te fakamasinoga tonu.” (Salamo 37:28) Ko tena uiga, e saga tonu mai eiloa a ia ki te mea tonu mo te mea ‵se. E se fiafia a ia māfai ko logo‵mae a tino. E fai mai te Tusi Tapu me ‘ne mafatia tena loto’ i te laveaga ne ia te lalolagi i aso mua ko ‵fonu i mea ma‵sei. (Kenese 6:5, 6) E seki mafuli eiloa a te Atua. (Malaki 3:6) E fai mai te Tusi Tapu me e atafai tonu mai eiloa te Atua ki a koe.—Faitau te 1 Petelu 5:7.

12, 13. (a) Kaia e a‵lofa kae atafai ei tatou ki nisi tino, kae e pefea ‵tou lagonaga e uiga ki logo‵maega i te lalolagi? (e) Kaia e mafai ei o mautinoa i a tatou me ka fakaseai ne te Atua a logo‵maega mo faifaiga sē fakamaoni?

¹² E fai mai foki te Tusi Tapu me ne faite ne te Atua tatou ki ana foliga. (Kenese 1:26) Ko tena uiga, ne faite ne te Atua tatou ke maua a uiga ‵gali kolā e maua ne ia. Tela la, kafai e se fiafia koe māfai e logo‵mae a tino fakaa‵lofa, kāti e sili atu te sē fiafia o te Atua māfai ko lavea ne ia a mea konā! E iloa pefea ne tatou te mea tenā?

¹³ E akoako mai te Tusi Tapu me i te “Atua ko te alofa.” (1 Ioane 4:8) A mea katoa e fai ne te Atua e fakamalosi aka ne te alofa. Tela la, a tatou e a‵lofa ona ko te Atua e alofa. Ke mafaufau ki te mea tenei: Kafai e isi sou malosi, e mata, ka fakaseai ne koe a logo‵maega mo faifaiga sē fakamaoni katoa i te lalolagi? Ao, kafai eiloa ne koe te mea tenā, me i a koe e alofa ki tino. Kae pefea la te Atua? E maua ne ia te malosi, kae ona ko tena alofa mō tatou, ka fakaseai ne ia a logo‵maega mo  faifaiga sē fakamaoni katoa. E mafai o mautinoa i a koe me i folafolaga katoa a te Atua kolā ne ‵sae mai i te kamataga o te tusi tenei ka fakataunu eiloa! Ko te mea ke talitonu koe ki folafolaga konei, e ‵tau o iloa ne koe a mea e uke atu e uiga ki te Atua.

14. Ko oi te igoa o te Atua, kae e iloa pefea ne tatou me e ‵tau o fakaaoga ne tatou tena igoa?

¹⁴ Kafai e fia fai koe mo taugasoa o se tino, se a te mea muamua e masani o fai atu ne koe ki a ia? Ko tou igoa. E a, e isi se igoa o te Atua? E fai mai a lotu e uke me i tena igoa ko te Atua io me ko te Aliki, kae ko mea konei e se ne igoa. Ne tofi fua e pelā mo te “tupu” io me ko te “pelesitene.” Ne fai mai te Atua me i tena igoa ko Ieova. E fai mai te Salamo 83:18: “Ke iloa ne tino me i a koe, telā ko Ieova tou igoa, ko koe tokotasi fua te Atua Tafasili i te Maluga i te lalolagi kātoa.” Ne fakaaoga ne tino ne tusi ne latou te Tusi Tapu a te igoa o te Atua i se fia afe taimi. E manako a Ieova ke iloa ne koe tena igoa kae ke fakaaoga foki ne koe. E fakailoa atu ne ia tena igoa ki a koe ko te mea ke fai a ia mo fai tou taugasoa.

15. Se a te uiga o te igoa o Ieova?

¹⁵ A te igoa o te Atua, ko Ieova, e ‵loto ‵ki tena uiga. E fakauiga i ei me e mafai ne te  Atua o fakataunu so se folafolaga e fai ne ia kae mafai o fakataunu ne ia tena fuafuaga. E seai se mea e mafai o taofi aka ei a ia. Ko Ieova fua e mafai o fakaigoa ki te igoa tenei. *

16, 17. Se a te uiga o (a) “te Atua Tafasili i te Maluga”? (e) “te Tupu o te se-gata-mai”? (i) “Mafuaga”?

¹⁶ E pelā mo mea ne fai‵tau tatou ki ei muamua, e fai mai  te Salamo 83:18 e uiga ki a Ieova: “Ko koe tokotasi fua te Atua Tafasili i te Maluga.” E fai mai foki te Fakaasiga 15:3: “E ‵lasi kae fakaofoofogia au galuega, e Ieova te Atua Malosi Katoatoa. E amiotonu kae ‵tonu ou auala, e te Tupu o te se-gata-mai.” Se a te uiga o te tofi ko “te Atua Tafasili i te Maluga”? E fakauiga i ei me i a Ieova e malosi atu i tino katoa i te iunivesi. Kae ko te tofi ko te “Tupu o te se-gata-mai” e fakauiga i ei me seai se kamataga o Ieova. E fakamatala mai te Salamo 90:2 me ne ola mai a ia mai te se-gata-mai ki te se-gata-mai. Ko oko eiloa te fakaofoofogia!

¹⁷ Ko Ieova fua tokotasi te Mafuaga. E fai mai te Fakaasiga 4:11: “E ‵tau eiloa o maua ne koe e Ieova, te motou Atua, te vikiga mo te ‵malu mo te malosi, me ne faite ne koe a mea katoa, kae ona ko tou loto ne ola mai ei a mea konā me ne faite ne koe.” Ao, mai i agelu ke oko ki fetū i te lagi ke oko ki fuagalakau i luga i lakau mo ika i te tai—ko Ieova ne faite ne ia a mea katoa e mafai o mafaufau koe ki ei!

18. Kaia e ma‵natu aka ei nisi tino me e se mafai latou o fai mo taugasoa o te Atua? Ne a pati a te Tusi Tapu e uiga ki te mea tenā?

¹⁸ Kafai e fai‵tau nisi tino ki uiga ‵gali o Ieova, e ma‵taku latou kae ma‵natu aka, ‘A te Atua ko tō malosi, ko tō tāua, kae ‵mao mai i a tatou, kaia fua la e fia saga mai ei a ia ki a au?’ E mata, konā loa lagonaga e manako te Atua ke maua ne tatou? Ikai. E manako a Ieova ke pili mai a ia ki a tatou. E fai mai te Tusi Tapu me i te Atua “e se ‵mao mai i a tatou taki tokotasi.” (Galuega 17:27) E manako te Atua ke fakapilipili atu koe ki a ia, kae e tauto mai a ia me “ka fakapilipili mai a ia ki a koutou.”—Iakopo 4:8.

19. (a) E mafai pefea o fai koe mo taugasoa o te Atua? (e) Ne a uiga o Ieova e fiafia malosi koe ki ei?

¹⁹ E mafai pefea o fai koe mo taugasoa o te Atua? Muna a Iesu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, e penā foki loa mo te tino telā ne uga mai ne koe, ko Iesu Keliso.” (Ioane 17:3) Tumau i te fai o sukesukega, kae ka iloa ne koe a Ieova mo Iesu. Tenā ko mafai ei o maua ne koe te ola se-gata-mai. E pelā me se fakaakoakoga, ko oti ne tauloto tatou me i “te Atua ko te alofa eiloa.” (1 Ioane 4:16) Kae e isi foki ne nisi uiga ‵gali o ia. E fai mai te Tusi Tapu me i a Ieova e “alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu.” (Esoto 34:6) A Ieova “e ‵lei kae e toka o fakamagalo.” (Salamo 86:5) A te Atua e kufaki kae fakamaoni. (2 Petelu 3:9; Fakaasiga 15:4) E uke ‵ki ana uiga ‵gali ka tauloto ne koe māfai e faitau koe e uiga ki a ia i te Tusi Tapu.

20-22. (a) E mafai pefea o fakapili‵pili atu tatou ki te Atua telā e se mafai o lavea ne tatou? (e) Ne a au mea e ‵tau o fai māfai e taumafai nisi tino o taofi aka tau sukesukega ki te Tusi Tapu?

²⁰ E mafai pefea o fakapilipili atu koe ki te Atua telā e se  mafai o lavea ne koe? (Ioane 1:18; 4:24; 1 Timoteo 1:17) Kafai e faitau koe e uiga ki a Ieova i te Tusi Tapu, ka iloa ei ne koe me i a ia se Tino tonu eiloa. (Salamo 27:4; Loma 1:20) Ko te uke o au mea e tauloto e uiga ki a Ieova, ko te gasolo aka foki o lasi tou alofa ki a ia kae ka fai ei ke pili atu koe ki a ia.

²¹ Ka malamalama koe me i a Ieova ko te ‵tou Tamana. (Mataio 6:9) Ne tuku mai ne ia te ola ki a tatou, kae manako foki a ia ke maua ne tatou te ‵toe olaga ‵lei. Tenā loa te mea e manako se tamana ke maua ne ana tama‵liki. (Salamo 36:9) Ao, e akoako mai te Tusi Tapu me e mafai koe o fai mo taugasoa o Ieova. (Iakopo 2:23) Ke fakaataata te mea tenā i tou mafaufau. E manako a Ieova, te Mafuaga o te iunivesi, ke fai koe mo fai tena taugasoa!

²² Kāti ka taumafai a nisi tino o taofi aka tau sukesukega ki te Tusi Tapu. Kāti e manava‵se latou i a koe ma ‵fuli tau lotu. Ke mo a loa ma talia ne koe se tino ke taofi aka ne ia koe mai te fai mo fai se taugasoa o Ieova. A ia ko te ‵toe Taugasoa ‵lei e mafai o maua ne koe.

23, 24. (a) Kaia e ‵tau ei o tumau koe i te faiga o fesili? (e) Ne a mea ka sau‵tala tatou ki ei i te suā mataupu?

²³ I te taimi e sukesuke ei koe ki te Tusi Tapu, e isi ne mea ka se malamalama koe i ei. Ke mo a loa koe e mā o fesili atu e uiga ki ei io me ‵sala ki se fesoasoani. Ne fai mai Iesu me e ‵tau mo tatou o loto mau‵lalo e pelā mō tama‵liki fo‵liki. (Mataio 18:2-4) Kae uke ‵ki a fesili e fai mai sāle ne tama‵liki. E manako te Atua ke maua ne koe a tali. Tela la, ke sukesuke faka‵lei ki te Tusi Tapu ke iloa ne koe me i au mea e tauloto ko te munatonu.—Faitau te Galuega 17:11.

²⁴ A te ‵toe auala ‵lei ke tauloto e uiga ki a Ieova ko te sukesuke ki te Tusi Tapu. I te suā mataupu, ka iloa ne tatou a pogai e ‵kese ei te Tusi Tapu mai nisi tusi aka.