E ‵tau o taumafai malosi koe ke maua se taugasoa; kae e ‵tau o taumafai foki ke tumau te fealofani o taugasoa. E uke a fakamanuiaga ka maua ne koe māfai e taumafai koe ke fai mo fai se taugasoa o te Atua kae ke tumau koulua e pelā me ne taugasoa. Muna a Iesu ki a latou kolā ne tali‵tonu ki a ia: “Ko te munatonu foki ka fakasaoloto ne ia koutou.” (Ioane 8:32) Se a tena uiga?

E mafai o maua nei ne koe te saolotoga. E mafai o saoloto koe mai i akoakoga ‵se mo pati ‵loi kolā ne fakasalalau mai ne Satani. E mafai o saoloto koe mai te fanoanoa telā e lagona ne te fia miliona o tino i olotou olaga me e se iloa ne latou a Ieova. (Loma 8:22) E saoloto foki a taugasoa o te Atua mai i “te ma‵taku ki te mate.”—Epelu 2:14, 15.

Ka maua ne koe te saolotoga i te lalolagi fou a te Atua. Ka pefea te fakaofoofogia o te saolotoga telā e mafai o maua ne koe i aso mai mua nei! I te lalolagi Palataiso, ka se toe ai ne taua, ne masaki, io me ne amioga ma‵sei. Ka se toe ai se mativa io me se fiakai. Ka se toe ai se vāivāi ona ko te matua io me ko te mate. Ka se toe ai se mataku, ne amioga fakasauā, io me ne faifaiga sē tonu. E fai mai penei te Tusi Tapu e uiga ki te Atua: “E tuku ne koe ki ei a mea e lava mo latou, kae fakamalie ne koe olotou manako.”—Salamo 145:16.

 Ka ola ki te se-gata-mai a taugasoa o te Atua. A te ola se-gata-mai se meaalofa tāua ‵ki telā ka tuku atu ne te Atua ki tino katoa kolā e taumafai o fai mo fai ne ana taugasoa. (Loma 6:23) Ke mafaufau malie aka ki te uiga o te ola se-gata-mai ki a koe!

Ka maua ne koe a avanoaga ke fai a mea e uke. Kāti e fia fakamasani koe ki te faiga o pese. Io me e fia ‵lomi ne koe a ata io me e fai koe mo fai se kamuta. Kāti e fia iloa ne koe a nisi mea e uiga ki manu mo lakau. Io me kāti e fia faimalaga atu koe ke ‵mata i nisi fenua kese‵kese kae ke fetaui mo nisi tino. E mafai ne koe o fai a mea katoa konā māfai ko maua ne koe te ola se-gata-mai!

Ka lava a avanoaga e maua ei ne koe a nisi taugasoa e tokouke. Kafai e ola koe ki te se-gata-mai ka mafai ei ne koe o fakamasani atu ki nisi tino kolā ko oti ne fai mo fai ne taugasoa o te Atua. Ka masani koe i olotou ata‵mai mo olotou uiga ‵lei, kae ka fai foki latou mo fai ne ou taugasoa. Ka alofa koe ki a latou, kae ka a‵lofa mai foki latou ki a koe. (1 Kolinito 13:8) Kafai e seai se gataga ki tou olaga, ka lava loa te taimi ke fakamasani koe ki tino katoa i te lalolagi nei! Kae ko te ‵toe mea ‵lei, ka gasolo o malosi ‵ki te va fakataugasoa o koulua mo Ieova i te fia selau tausaga. Ke na fai koe mo fai se taugasoa o te Atua ke oko eiloa ki te se-gata-mai!