Awarefo bi wɔ hɔ a, nneɛma nkɔ yiye wɔ wɔn aware no mu a, nea wɔka ara ne sɛ, ‘yegyae aware a na ɛbɛboa mmofra no.’ Kyerɛ sɛ, eye sɛ obiara bɛfa ne kwan na ama mmofra no anya wɔn asomdwoe. Wohwɛ a, saa na ɛte?

•  Sɛ awaregyae ba a, ɔhaw bɛn na ɛde brɛ mmofra?

•  Sɛ migyae aware a, me ba no ani begye anaa?

•  Sɛ yegyae aware na obiara te ne baabi nanso yɛbom hwɛ mmofra no nso ɛ?

•  Biribi wɔ hɔ a eye sen awaregyae. Ɛyɛ dɛn?

 Nhwehwɛmu a nkurɔfo ayɛ kyerɛ sɛ, sɛ awarefo gyae aware a, ɔhaw a ɛkɔfa brɛ mmofra no nyɛ asɛm ketewa. Mmofra a wɔn awofo agyae aware no:

•   ɛnkyɛ na wɔn bo afuw, ɛyɛ a wɔn yam hyehye wɔn, na adwinnwen bɛtɔ wɔn so

•   wɔn suban yɛ basaa

•   wɔtaa we wɔ sukuu, anaa sukuu no mpo, wɔde kɔso kwan mu

•   ɛreyɛ ara ni, na wɔyare

 Ɛno da nkyɛn a, mmofra pii nya adwene sɛ wɔn nti na wɔn maame ne wɔn papa agyae aware. Wɔn adwene yɛ wɔn sɛ, wɔn na wɔkɔfaa awaregyae no bae, anaa anka wobetumi ayɛ biribi de asiw ano.

 Ɔhaw a awaregyae kɔfa ba mmofra so no, etumi pira wɔn ara kosi sɛ wobenyin. Bere a wɔanyin mpo no, wɔtaa nya adwene sɛ wɔn so nni mfaso, na wontumi nnye obiara nni. Sɛ wɔn ankasa nso ware na nneɛma nkɔ yiye a, ɛreyɛ ara ni, na wɔagyae aware apɛ wɔn baabi atena.

 Nea yɛreka akosi: Ɛwom sɛ ebinom ka sɛ wugyae aware a, ɛbɛboa wo mma, nanso nhwehwɛmu a nkurɔfo ayɛ kyerɛ sɛ ɛnyɛ nokware. Penelope Leach a ɔyɛ ɔbenfo wɔ mmofra ntetee mu no kyerɛwee sɛ, “Awaregyae ma mmofra yɛ mmɔbɔ paa.” a

 Bible mu afotusɛm: “Monnhwɛ nneɛma a ɛfa mo nko ara ho, na mmom monhwɛ nea ɛfa afoforo ho nso bi.”—Filipifo 2:4.

 Ebinom ka sɛ wɔn ba no ani begye. Nanso kae hu sɛ, ɛsono nea awofo hia, ɛnna ɛsono nea wɔn ba hia. Ɔwofo a ɔpɛ sɛ ogyae aware no, nea ɔrepɛ ne sɛ ne ho bɛtɔ no. Nanso nea abofra no pɛ ne sɛ ne maame ne ne papa bɛtena abom.

 Wɔn a wɔkyerɛw The Unexpected Legacy of Divorce nhoma no ne nkwadaa mpempem a wɔn awofo agyae aware twetwee nkɔmmɔ. Wɔkyerɛwee sɛ: “Ade baako a yehui ni: nkwadaa no anka sɛ wɔn ani gye. Mmom, wɔn mu biara kaa no pen sɛ, ‘Ɛda a me maame ne me papa gyaee aware no, saa da no ara na mebɛyɛɛ ɔpanyin amonoamono.’” Nhoma no ka kaa ho sɛ, saa mmofra no adwenem deɛ, “wiase yi mu yɛ hu paa, na wuntumi nnye obiara nni, efisɛ wɔn maame ne wɔn papa a wɔbɛn wɔn pɛɛ no mpo, wɔn ntam ayɛ basaa.”

 Nea yɛreka akosi: Sɛ awarefo gyae aware a, wɔn mma ani ntaa nnye.

 Bible mu afotusɛm: “Honhom a abotow ma nnompe mu yow.”—Mmebusɛm 17:22.

 Ebinom wɔ hɔ a wɔagyae aware, nanso wɔyɛ wɔn ho sɛ wɔda so yɛ awarefo. Enti wobɛhwɛ no, wei te ha, na wei nso te ha, ɛnna wɔpɛ sɛ wɔbom tete wɔn mma. Nanso ɛyɛ den sɛ awarefo a wɔagyae aware bɛbom atete wɔn mma. Nkurɔfo ayɛ nhwehwɛmu ahu sɛ awarefo a wɔagyae aware no:

•   wɔntaa nnya wɔn mma ho adagyew

•   ɛsono nea obiara de kyerɛkyerɛ nkwadaa no

•   ɛtɔ da a aniwu ne ɔbrɛ nti, wogyaa nkwadaa no ma wɔyɛ nea wɔpɛ biara

 Abofra a n’awofo agyae aware betumi abɛyɛ obi a ontie n’awofo asɛm. Adeɛ yi, ne maame ne ne papa koraa, ɛbɔ a wɔhyɛɛ wɔn ho sɛ wɔbɛtena abom no, wɔanni so. Enti akwadaa no betumi anya adwene sɛ, ‘Ɛnde, adɛn nti na ɛsɛ sɛ mitie wɔn?’

 Nea yɛreka akosi: Sɛ awarefo a wɔagyae aware bom tete wɔn mma a, ɛtaa yɛ den. Mmofra no mpo deɛ, ɛba saa a, wonhu so koraa.

 Bible mu afotusɛm: “Monnhyɛ mo mma abufuw na wɔn abam ammu.”—Kolosefo 3:21.

 Sɛ awarefo gyae aware a, wɔtaa brɛ ansa na wɔasi wɔn dedaw mu, na sɛ anka wɔde saa ahoɔden no siesiee aware no tenaa ho a, anka eye. Nhoma bi ka sɛ, “Sɛ aware bi nkɔ yiye a, ɛnkyerɛ sɛ wusiesie a ɛrenyɛ yiye. Awarefo a wɔn ani nnye wɔn aware mu koraa no, sɛ wɔannyae aware a, bere rekɔ so no, wonya mfaso pii, na wɔn ani gye paa.” (The Case for Marriage) Nea ɛwom ne sɛ, awarefo bom tena a, ɛma wɔn mma yɛ kama paa.

 Nea yɛreka yi nkyerɛ sɛ obi rentumi nnyae aware da. Bible ka sɛ, sɛ awarefo no baako bɔ aguaman a, sɛ ɔbaako no pɛ a, obetumi agyae aware no. (Mateo 19:9) Nanso Bible san ka sɛ, “onitefo hwɛ ne nantew mu yiye.” (Mmebusɛm 14:15) Ɔbea ne okunu a wɔpɛ sɛ wogyae aware no, ɛsɛ sɛ wodwen nea wɔpɛ sɛ wɔyɛ biara ho yiye. Nneɛma a ɛsɛ sɛ wodwen ho no, ebi ne sɛnea awaregyae no bɛka wɔn mma.

 Nea yɛreka yi nso nkyerɛ sɛ tena aware no ho kɛkɛ a wuntu ho anammɔn biara. Bible na ɛma afotu pa paa a ebetumi aboa okunu ne ɔyere ama wɔanya suban pa, na ama wɔn aware asɔ, na atim. Ɛnyɛ nwonwa sɛ Bible no ma afotu pa saa, efisɛ Yehowa a ɔma wɔkyerɛw Bible no, ɔno ara nso na ɔhyehyɛɛ aware.—Mateo 19:4-6.

 Bible mu afotusɛm: “Me Yehowa, mene wo Nyankopɔn, nea ɔkyerɛ wo ade a eye ma wo.”—Yesaia 48:17.