Ade rekye a ade resa no, brɛ ara na ɔdɔ a awarefo binom da no adi kyerɛ wɔn ho no ano kɔ so brɛ ase. Sɛ saa na ɛte wɔ w’aware mu a, ɛsɛ sɛ ɛhaw wo anaa?

•  Nea ɛsɛ sɛ wuhu

•  Nea wubetumi ayɛ

 Sɛ aware bɛsɔ a ɛho hia pa ara sɛ awarefo da ɔdɔ adi kyerɛ wɔn ho. Sɛnea nipadua hia nsu ne aduan daa na atumi anya ahoɔden no, saa ara na sɛ aware bɛsɔ a, ɛsɛ sɛ awarefo no kɔ so da ɔdɔ adi kyerɛ wɔn ho daa. Sɛ mo aware akyɛ sɛ dɛn mpo a, ɛsɛ sɛ okunu anaa ɔyere te nka bere nyinaa sɛ ne hokafo dɔ no na odwen ne ho.

 Obi a ɔda ɔdɔ kann adi no nyɛ pɛsɛmenkominya. Ɔbɔ mmɔden sɛ ɔbɛma ne hokafo ani agye. Enti sɛ obi dwen ne hokafo ho a, ɛnyɛ bere a ɔno te nka sɛ ɛsɛ sɛ ɔda ɔdɔ adi kyerɛ ne hokafo no nkutoo na ɔbɛyɛ saa. Mmom, ɔde n’ani bɛto fam ahu bere a ne hokafo ani begye ho sɛ ɔbɛda ɔdɔ adi akyerɛ no, na ɔbɛbɔ mmɔden ayɛ saa.

 Ɛsɛ sɛ ɔyerenom yɛ biribi de kyerɛ sɛ wɔdɔ wɔn kununom, nanso yɛbɛka pa ara a, ɔyerenom na ehia sɛ wɔn kununom yɛ biribi de kyerɛ sɛ wɔdɔ wɔn kɛse. Ebia na okunu bi dɔ ne yere pa ara. Nanso dɛn na ɛbɛma ɔyere no ahu pa ara sɛ ne kunu dwen ne ho? Ɛne sɛ, da mũ no nyinaa, ne kunu no bɛyɛ nneɛma ahorow bi de kyerɛ sɛ ɔdɔ no. Sɛ okunu no yɛ saa nneɛma yi anɔpa ne anwummere nkutoo, anaa bere a wɔrebenya nna mu kyɛfa nkutoo a, ɛremma ne yere no nhu sɛ ne kunu no dwen ne ho.

 Fa wo kasa kyerɛ sɛ wodɔ wo hokafo. Nsɛm ntiantiaa bi te sɛ “Medɔ wo” anaa “Wosom bo ma me pa ara” betumi ama wo hokafo no ate nka sɛ ne ho hia wo.

 Bible mu afotusɛm: “Nea ayɛ koma mã no na ano ka.”—Mateo 12:34.

 Nyansahyɛ: Wubetumi nso afa krataa tiawa a wobɛkyerɛw, e-mail anaa text message so ada ɔdɔ adi akyerɛ wo hokafo.

 Fa wo nneyɛe kyerɛ sɛ wodɔ wo hokafo. Sɛ woyɛ wo hokafo atuu, wofew n’ano, anaa mpo wuso ne nsa kɛkɛ a, ebetumi akyerɛ sɛ wodɔ no ampa. Afei nso sɛnea wode wo nsa bɛfa ne ho anaa wode w’ani bɛhwɛ no no mpo betumi ama wahu sɛ wodɔ no. Ɛwom ara a, wubetumi atɔ biribi akyɛ no de akyerɛ sɛ wudwen ne ho ampa. Wubetumi nso ayɛ nneɛma ahorow bi de aboa wo yere. Ebi ne sɛ wubetumi asoa ne nneɛma bi aboa no, abue pon ama no, ahohoro nkyɛnsee mu, ahoro nneɛma anaa woanoa aduan mpo. Ɔyerenom pii wɔ hɔ a, sɛ wɔn kununom yɛ saa nneɛma yi ma wɔn a, wohu no sɛ ɛnyɛ mmoa kɛkɛ na wɔn kununom reboa wɔn. Ɛma wohu sɛ wɔn kununom dɔ wɔn pa ara!

 Bible mu afotusɛm: ‘Mommma yɛmmfa ano anaa tɛkrɛma nkutoo nnnɔ, na mmom yɛnyɛ no nneyɛe mu.’—1 Yohane 3:18.

 Nyansahyɛ: Sɛnea na wugyigye wo yere so ansa na moreware no, gyigye ne so saa ara.

 Munnya bere mma mo ho. Sɛ mo mmienu nkutoo yɛ nneɛma ahorow bi bom a, ɛbɛhyɛ mo aware no mu den, na ɛbɛma wo hokafo no ahu sɛ, ɔwɔ wo nkyɛn a w’ani gye. Sɛ morehwɛ mmofra anaasɛ mowɔ nneɛma bi a ɛho hia sɛ da biara mudi ho dwuma a, ebetumi ayɛ den sɛ mubenya bere ama mo ho. Enti mubetumi ayɛ nhyehyɛe, na ɛyɛ a, mo mmienu nkutoo apue akɔnantenantew.

 Bible mu afotusɛm: ‘Mompɛɛpɛɛ mu nhu nneɛma a ehia koraa no.’—Filipifo 1:10.

 Nyansahyɛ: Nea awarefo binom a wonni bere yɛ ne sɛ, wɔtaa yi anadwo bi anaa dapɛn awiei bi si hɔ, na wɔn nkutoo de adwen wɔn ho.

 Hu wo hokafo yiye. Ɛsono awarefo no mu biara ne sɛnea ɔpɛ sɛ wɔda ɔdɔ adi kyerɛ no. Mommɔ ho nkɔmmɔ nhu nea mo mu biara pɛ na mummisa sɛ ebia ɛsɛ sɛ moyɛ pii ka ho anaa. Afei fi komam di wo hokafo no ahiade ho dwuma ma no. Kae sɛ ɔdɔ a wɔda no adi wɔ aware mu ho hia na ama aware asɔ.

 Bible mu afotusɛm: “Ɔdɔ nhwehwɛ nea n’ankasa hia.”—1 Korintofo 13:4, 5.

 Nyansahyɛ: Sɛ́ anka wobɛka akyerɛ wo hokafo sɛ ɔnna ɔdɔ adi nkyerɛ wo no, bisa wo ho sɛ, ‘Dɛn na metumi ayɛ na ayɛ mmerɛw sɛ me hokafo bɛda ɔdɔ adi akyerɛ me?’