“Mo a moabrɛ na wɔde nnesoa asoa mo nyinaa, mommra me nkyɛn, na mɛma mo ho adwo mo. Momfa me kɔndua nto mo ho so na munsua me, efisɛ midwo, na mebrɛ me ho ase koma mu, na mubenya ɔhome. Efisɛ me kɔndua soa nyɛ den na m’adesoa yɛ hare.”—Mateo 11:28-30, Wiase Foforo Nkyerɛase.

 “Mo a moayɛ adwuma abrɛ na moasoa nnesoa nyinaa, mommra me nkyɛn, na mɛma mo ahome. Momfa me konnua nto mo ho so, na munsua me, efisɛ midwo na mebrɛ me ho ase koma mu, na mubenya ɔhome ama mo kra. Efisɛ me konnua yɛ mmerɛw, na mʼadesoa yɛ hare.”—Mateo 11:28-30, Akuapem Twi Nkwa Asɛm.

 Yesu de anigye ka kyerɛɛ n’atiefo sɛ, wɔmmra ne nkyɛn. Ɔmaa wɔn awerɛhyem sɛ, sɛ wosuasua no a, wɔn ho bedwo wɔn, na wɔn koma atɔ wɔn yam.

 “Mo a moabrɛ na wɔde nnesoa asoa mo nyinaa, mommra me nkyɛn.” Wɔn a Yesu kaa saa asɛmdɛ no kyerɛɛ wɔn no, na wɔn som mu mpanyimfo “asoa” mmara ne nnipa atetesɛm agu wɔn so. (Mateo 23:4; Marko 7:7) Afei nso, na ɛsɛ sɛ te-man-mufo no biri wɔn mogya ani yɛ adwumaden ansa na wɔn nsa akɔ wɔn ano. Enti na dadwen hyɛ wɔn so.

 “Mɛma mo ho adwo mo.” Yesu hyɛɛ bɔ sɛ, wɔn a wobegye ne frɛ no so no, ɔbɛma wɔn ho adwo wɔn, na ampa-ne-ampa ara, ɔyɛɛ saa. Ɔkyerɛɛ wɔn nea Onyankopɔn pɛ sɛ wɔyɛ ankasa, na ɔboaa wɔn ma wɔtee ase. (Mateo 7:24, 25) Saa nimdeɛ no boaa wɔn, na atoro nkyerɛkyerɛ ne nyamesom mu atetesɛm a na ɛde wɔn ayɛ nkoa no, ɛma wotumi dee wɔn ho fii ho. (Yohane 8:31, 32) Ɛwom, na ɛsɛ sɛ wɔyere wɔn ho ansa na wɔatumi de Yesu nkyerɛkyerɛ no abɔ wɔn bra, nanso bere a wɔyɛɛ saa no, ɛmaa wɔn ho dwoo wɔn.

 “Momfa me kɔndua nto mo ho so na munsua me.” Bible mu no, sɛ adwumayɛfo resoa nneɛma a emu yɛ duru a, na wɔtaa de dua bi to wɔn abati na wɔde asoa. Saa dua no, wɔfrɛ no kɔndua. Dwuma a na wɔde kɔndua di nti, eduu baabi no, sɛ nkurɔfo te asɛmfua “kɔndua” a, na wɔte ase sɛ obi bɛbrɛ ne ho ase ahyɛ obi foforo tumi ne n’akwankyerɛ ase. (Leviticus 26:13; Yesaia 14:25; Yeremia 28:4) Asɛm “munsua me” no, yebetumi nso akyerɛ ase “mommɛyɛ m’asuafo (anaa m’akyidifo).” Enti na Yesu rehyɛ n’atiefo no nkuran sɛ wonni n’akyi na wonsuasua ne nhwɛso. Sɛ wɔyɛ saa a, na ɛbɛma wɔabɛyɛ n’asuafo.—Yohane 13:13-15; 1 Petro 2:21.

 “Mubenya ɔhome.” Yesu anka sɛ n’atiefo haw nyinaa betu ayera prɛko pɛ. Mmom ɔboaa n’atiefo ma wonyaa awerɛkyekye ne anidaso. (Mateo 6:25-32; 10:29-31) Wɔn a wɔbɛyɛɛ n’asuafo na wogyee ne nkyerɛkyerɛ toom no hui sɛ, Onyankopɔn som nyɛ adesoa, mmom ɛma akomatɔyam ankasa.—1 Yohane 5:3.

 “Efisɛ me kɔndua soa nyɛ den na m’adesoa yɛ hare.” Ná Yesu nte sɛ nyamesom mpanyimfo a ɛwɔ ne bere so no. Ɔno de, na ɔbrɛ ne ho ase, na na odwo. (Yohane 7:47-49) Ná ne tirim nyɛ den, na wanhyɛ nkurɔfo so nso da. Mmom, na ne yam ye, na na obiara tumi bɛn no. Ná ɔnhwɛ kwan sɛ n’akyidifo bɛyɛ ade a ɛboro wɔn ahoɔden so. (Mateo 7:12; Marko 6:34; Luka 9:11) Afei nso, ɔkyerɛɛ wɔn nea wɔyɛ a ɛbɛma Onyankopɔn ahu wɔn mmɔbɔ, ne sɛnea wobenya ahonim pa na ama wɔn ho atɔ wɔn. (Mateo 5:23, 24; 6:14) Yesu suban pa no nti, na nkurɔfo tumi bɛn no. Bio nso, ɛmaa ebinom gyee ne kɔndua no toom, na wɔbɛyɛɛ n’asuafo.

 Yesu kaa asɛm a ɛwɔ Mateo 11:28-30 no afe 31 Y.B. Saa bere no, na ɔreka asɛmpa no wɔ Galilea. Wɔn a wɔkyerɛw Nsɛmpa nnan no, ɔsomafo Mateo nko ara na ɔkyerɛw saa nsɛm a Yesu kae no. Ná Mateo yɛ Yudani, na kan no, na ɔyɛ towgyeni. Enti na onim sɛ ɛtow a Romafo gyigye te-man-mufo no, ɛyɛ atwa-mene. Ná onim nso sɛ Yudasom aporɔw atetew, na wɔhyɛ ɔmanfo no so. Enti bere a ohui sɛ Yesu de tumi a n’agya Yehowa a de ama no no refrɛ ahobrɛasefo ne mmɔborɔwafo ba ne nkyɛn no, ɛbɛyɛ sɛ n’ani gyei paa.—Mateo 11:25-27.

 Suban pa a Yesu a ɔyɛ Mesia a wɔahyɛ ne ho bɔ ne Onyankopɔn Ahenni no so hene daa no adi no, Mateo Asɛmpa no twe adwene si so paa.—Mateo 1:20-23; Yesaia 11:1-5.

 Hwɛ video tiawa yi, na wubehu Mateo nhoma no ani so.