•   Sɛ wote sɛ nkurɔfo reka kasafĩ a, ɛyɛ a wote nka sɛn?

  •  Ɛyɛ a minhu mpo—memfa no sɛ ɛyɛ asɛm biara.

  •  Ɛyɛ a ɛhaw me kakra—nanso mefa no saa ara.

  •  Ɛyɛ a ɛhaw me—mintumi mmu m’ani ngu so.

•   Mpɛn ahe na woka kasafĩ?

  •  Menkaa bi da

  •  Ɛwom araa

  •  Meka daa

•   Wohwɛ a, kasafĩ yɛ biribi a ɛsɛ sɛ yɛhwɛ ka ho asɛm anaa?

  •  Ɛnyɛ asɛm biara

  •  Ɛyɛ biribi a ɛhaw adwene

 Wohwɛ a kasafĩ yɛ biribi a ɛhaw adwene? Ebia wobɛka sɛ: ‘Ɛnhyɛ da nhaw adwene.’ Efisɛ ɔhaw akɛse wɔ wiase a ɛsɛ sɛ yedwen ho. Afei nso, obiara ka kasafĩ!’ Enti ɛyɛ ampa?

 Nanso wubegye adi sɛ, nnipa pii wɔ hɔ a wɔn de, wɔnka kasafĩ. Nea enti a wɔnka kasafĩ no, nnipa bebree nnim. Ebi ni:

•  Kasafĩ nyɛ asɛm a wokae ara na mframa de kɔ. Wo kasa ma nkurɔfo hu nea ɛwɔ wo komam. Enti woka kasafĩ a, ebetumi ama nkurɔfo ahu sɛ wunnwen afoforo ho. Saa na wote ankasa?

   Bible ka sɛ: “Nea efi onipa anom ba no fi koma no mu.”—Mateo 15:18.

•  Woka kasafĩ a, ebetumi ama nkurɔfo anya wo ho adwemmɔne. Nhoma bi ka sɛ: “Sɛnea yɛkasa no na ɛbɛkyerɛ nnamfo kõ a yebenya, obu a yebenya afi yɛn abusuafo ne nkurɔfo a yɛne wɔn yɛ adwuma hɔ, ne sɛnea yɛne afoforo abusuabɔ bɛkɔ. Ɛno ara nso na ɛbɛkyerɛ sɛnea afoforo bɛhwɛ yɛn asua yɛn, sɛ ebia wɔbɛfa yɛn wɔ adwuma bi mu anaa wɔbɛbɔ yɛn aba so, ne sɛnea nnipa a yenhyiaa wɔn da bɛyɛ wɔn ade wɔ yɛn ho.” Nhoma no san ka sɛ: “Bisa wo ho sɛ, sɛ wonka kasafĩ a, anka ɛbɛma wo ne afoforo abusuabɔ ayɛ papa asen sɛnea ɛte seesei no anaa?”—Cuss Control.

   Bible ka sɛ: ‘Munyi abususɛm mfi mo mu.’—Efesofo 4:31.

•  Ebia sɛnea w’adwene yɛ wo no, ɛnyɛ nokware sɛ woka kasafĩ a ɛma nkurɔfo ani gye wo ho. Ɔbenfo Alex Packer kyerɛw nhoma bi a ɔtoo din How Rude! Ɔkaa wom sɛ: “Nkurɔfo a wɔka kasafĩ bere nyinaa nkɔmmɔ nyɛ dɛ.” Ɔka kaa ho sɛ, sɛ obi ka kasafĩ a, “ɛma wunya adwene sɛ onsusuw nneɛma ho nkɔ akyiri, n’adwenem mmuei, onnim nyansa, anaa onnwen afoforo ho. Sɛ wo kasa mu nna hɔ, ntease nnim, na ɛda adi sɛ wunnwen a, ɛremma wuntumi nsusuw nneɛma ho yiye.”

   Bible ka sɛ: “Mommma asɛm a aporɔw mmpue mmfi mo anom.”—Efesofo 4:29.

•  Fa botae bi si w’anim. Adɛn nti na womma wo ho bosome baako anaa nea ennu saa sɛ wode begyae kasafĩ ka? Sɛnea worenya nkɔso no, wubetumi akyerɛw ato kalenda so anaa woakyerɛw ato baabi. Nanso nea ɛbɛyɛ na woatumi adu nea wode asi w’anim no ho no, ebia ɛho behia sɛ wutu anammɔn foforo. Ebi ne sɛ:

•  Ɛnsɛ sɛ wode nneɛma bi a ɛma ɛyɛ mmerɛw sɛ wobɛka kasafĩ gyigye w’ani. Bible ka sɛ: “Fekubɔne sɛe ɔbra pa.” (1 Korintofo 15:33) Ɛnyɛ nnipa nko ara na yɛne wɔn bɔ “fekuw,” na mmom yɛnam anigyede so nso tumi yɛ saa. Wubetumi afa sini a wohwɛ, video game a wobɔ ne nnwom a wutie so abɔ fekuw. Kenneth adi mfe 17. Ɔka sɛ: “Sɛ yɛrebɔ nnwom bi na sɛ w’ani gye ho na biiti no yɛ wo dɛ a, wobɛhwɛ na woreto bi. Wo werɛ betumi afi koraa sɛ kasafĩ wom.”

•  Kyerɛ sɛ woanyin. Ebinom adwene yɛ wɔn sɛ, sɛ wɔka kasafi a, ɛkyerɛ sɛ wɔanyin. Nanso ɛnte saa koraa. Bible ka sɛ, wɔn a wɔanyin no, “wɔde wɔn adwene yɛ adwuma ma enti wɔatete no ama etumi hu papa ne bɔne mu nsonsonoe.” (Hebrifo 5:14) Wonnyaagyaa wɔn ho sɛnea ɛbɛyɛ a wɔbɛsɔ afoforo ani.

 Nokwasɛm ne sɛ, kasafĩ tumi ma nkurɔfo nya adwene a ɛmfata; ɛsɛe adwene (ne mframa). Kasafĩ abu so wɔ wiase paa! Cuss Control nhoma no ka sɛ, “Mfa bi nka ho. Bɔ mmɔden sɛ wobɛma ɛso atew. W’ankasa ani begye, na afoforo nso ani begye wo ho.”