•  Mpɛn ahe na wo bo fuw?

  •  menkae ɛda a me bo fuwii

  •  ɛwom ara

  •  da biara da

•  W’abufuw te sɛn?

  •  ɛyɛ nyaa

  •  ano yɛ hyew

  •  ehuru kutukutu

•  Hena na ɛnkyɛ koraa na wo bo afuw no?

  •  wo papa anaa wo maame

  •  wo nua

  •  w’adamfo

 Sɛ wuhu sɛ ehia sɛ wohyɛ wo ho so wɔ w’abufuw ho a, asɛm a yɛresusuw ho yi betumi aboa wo! Nea edi kan, ma yɛnhwɛ nneɛma bi a enti ɛsɛ sɛ wohyɛ wo ho so bere a obi ahyɛ wo abufuw.

 W’apɔwmuden. Mmebusɛm 14:30 ka sɛ: “Koma a edwo ma nipadua nya nkwa.” Nanso, “abufuw” de, nhoma bi ka sɛ, “etumi ma onipa nya komayare.”—Journal of Medicine and Life.

 Wo nnamfo. Bible ka sɛ: “Wo ne onipa a ne bo fuw ntɛmntɛm mmfa yɔnko, na wo ne onipa a ne koko haw no mmmɔ.” (Mmebusɛm 22:24) Enti sɛ woyɛ obi a wo bo taa haw wo a, sɛ nkurɔfo mpɛ sɛ wɔne wo bɛbɔ a, mma ɛnyɛ wo nwanwa. Awuraa bi a yɛfrɛ no Jasmine ka sɛ: “Sɛ woansua sɛ wobɛhyɛ wo ho so wɔ w’abufuw ho a, worennya nnamfo a wo ne wɔn bɛbɔ ama w’ani agye.”

 Sɛnea nkurɔfo behu wo. Ethan yɛ aberante a wadi mfe 17. Ɔka sɛ: “Sɛ wo bo fuw a, nkurɔfo behu, na ɛbɛma wɔanya wo ho adwene bi.” Enti bisa wo ho sɛ: ‘Adwene bɛn na mepɛ sɛ nkurɔfo nya wɔ me ho? Wopɛ sɛ nkurɔfo hu sɛ woyɛ obi a ɔpɛ asomdwoe na odwo te sɛ nsuonwini? Anaa wopɛ sɛ nkurɔfo hu wo sɛ obi a ɛreyɛ ara ni na ne koko apae, anaa na ne bo afuw?’ Bible ka sɛ: “Nea ne bo mfuw ntɛm no, ɔwɔ nhumu pii, na nea ɔpere ne ho de, ɔma obiara hu ne nkwaseasɛm.”—Mmebusɛm 14:29.

 Hwɛ kyerɛwnsɛm a edidi so yi ne nsɛm a ebinom aka. Wuwie a, nsɛmmisa a ɛka ho no, fa bisa wo ho.

•   Mmebusɛm 29:22: “Onipa a ne bo fuw ntɛm no ma ntɔkwaw ba; obiara a ne koko haw no no, ne mmarato dɔɔso.”

   “Bere a meyɛ abaayewa no, sɛ me bo fuw a, na mintumi nhyɛ me ho so koraa. Saa ara na me papa abusuafo te. Yɛtaa ka sɛ, abufuw wɔ me papa abusuafo mogya mu. Ɛyɛ den ma yɛn sɛ yɛbɛhyɛ yɛn ho so bere a yɛn bo afuw!”—Kerri.

   Bisa wo ho sɛ: Ɛnkyɛ na me bo afuw anaa? Sɛ nkurɔfo kamfo me wɔ me suban pa ho na sɛ ɛyɛ me dɛ a, ntease wom sɛ mɛka sɛ me bo a efuw ntɛmntɛm no de, ɛwɔ me mogya mu, enti merentumi nyɛ ho hwee anaa?

•   Mmebusɛm 15:1: “Mmuae bɔkɔɔ ma abufuw twa, na asɛm a ɛyɛ yaw de, ɛhyɛ abufuw.”

   “Nea ɛbɛboa wo paa ne sɛ wubesua sɛ wobɛhyɛ wo ho so. Sɛ wusua sɛ wobɛyɛ obi a odwo, na wunya adwempa a, ɛbɛyɛ den paa sɛ wo bo befuw.”—Daryl.

   Bisa wo ho sɛ: Sɛ nkurɔfo hyɛ me abufuw a, adɛn nti na ade a edi kan a mɛyɛ no, ɛho hia paa?

•   Mmebusɛm 26:26: “Sɛ anyina nni hɔ a, ogya dum.”

   “Sɛ obi bo fuw me, na me ne no kasa brɛoo a, mpɛn pii no, ɛma onipa no bo dwo, na yɛn mmienu nyinaa tumi bɔ nkɔmmɔ bere a obiara bo remfuw kɛse.”—Jasmine.

   Bisa wo ho sɛ: Mɛyɛ dɛn na me kasa anaa me nneyɛe ansoso gya angu asɛm no mu?

•   Mmebusɛm 22:3: “Onyansafo hu asiane, na ɔde ne ho sie, na ogyimifo de, ɛno ara ne sɛ ɔrekɔ, na otwa so aba.”

   “Sɛ biribi si na mehwɛ na me bo betumi afuw a, ɛtɔ da a, mifi hɔ kɔpɛ baabi tena. Midwinnwen nea esii no ho, na sɛ akyiri yi me bo dwo a, na mahu nea mɛyɛ.”—Gary.

   Bisa wo ho sɛ: Sɛ obi yɛ biribi, na me bo reyɛ afuw a, nea ɛbɛyɛ na ɛrenkɔyɛ sɛ matwiw afa onipa no so no, bere bɛn paa na eye sɛ mefi hɔ?

•   Yakobo 3:2: “Yɛn nyinaa di mfomso mpɛn pii.”

   “Sɛ yedi mfomso a, ɛsɛ sɛ yenu yɛn ho, nanso ɛnsɛ sɛ yɛde so hɔ ara; ɛsɛ sɛ yesua biribi fi mu nso. Ɛnsɛ sɛ yɛde ahweaseɛ yɛ nna. Mmom, ɛsɛ sɛ yɛsɔre, na yɛpem kɔ yɛn anim, na afei yesi yɛn bo sɛ yɛrensan nyɛ mfomso koro no ara bio.”—Kerri.

 Nyansahyɛ: Fa botae bi si w’ani so. Si wo bo sɛ wode bere bi besi hɔ a woremma wo bo mfuw, ebia bosome baako. Yɛ kyerɛwtohɔ, na hwɛ sɛ worenya nkɔso anaa.