Wunim ɔbabun bi a yare a emu yɛ den bi reteetee no? Wowɔ yare anaa dɛmdi bi a ɛmma wuntumi mfa anigye nyɛ nneɛma a w’atipɛnfo yɛ no bi anaa?

 Sɛ saa a, ɛnyɛ nwonwa sɛ w’abam betumi abu. Nanso afotusɛm mmienu bi wɔ Bible mu a ebetumi akyekye wo werɛ pa ara.

•   Yehowa Nyankopɔn a ɔbɔɔ wo no nim nea worefa mu. Nea ɛsen saa no, ‘odwen wo ho.’​—1 Petro 5:7.

•   Yehowa Nyankopɔn abɔ ne tirim sɛ obeyi yare nyinaa afi hɔ! Wubetumi akenkan ɛho asɛm wɔ Bible mu. Ɛwɔ Yesaia 33:24 ne Adiyisɛm 21:1-4.

 Mmabun a yare reteetee wɔn no mu pii ahu sɛ, sɛ wonya Onyankopɔn ne ne bɔhyɛ ahorow mu gyidi a, ɛboa wɔn ma wotumi gyina wɔn yare no ano. Yɛnhwɛ wɔn mu nnan.

•  YEIMY

•  MATTEO

•  BRUNA

•  ANDRÉ

 Bere a midii mfe 11 no, sɛ mɛkɔ baabi a, na ɛsɛ sɛ metena mmubuafo akongua mu na obi pia me. Nneɛma nketenkete a obiara tumi yɛ mpo, mintumi nyɛ.

 Midii mfe nnum no, minyaa yare bi a wɔfrɛ no muscular dystrophy. Ɛyɛ yare bi a ɛkɔ so di me nya, na ɛmma mintumi nyɛ nneɛma pii. Ɛtɔ da a m’abam bu, efisɛ nneɛma a m’atipɛnfo tumi yɛ no, mintumi nyɛ bi. Nanso m’awofo ne m’asafo mufo hyɛ me den. Wɔboa me wɔ nneɛma a mintumi nyɛ mu, na wɔma m’ani gye nso. Wɔboa me ma mitumi som Onyankopɔn yiye. Seesei mede bere pii ka asɛmpa no, na me mfɛfo Kristofo taa boa me ma mitumi ne afoforo a wɔn ani gye Bible ho sua ade.

 Yesu kaa sɛ da biara ne emu dadwen. (Mateo 6:34) Wei nti, da biara mede m’adwene si nea metumi ayɛ so, memfa ɔkyena de nhaw me ho. Mebɔ mmɔden de botae ahorow a metumi adu ho sisi m’ani so. Merehwɛ Onyankopɔn wiase foforo no kwan; saa bere no menya “nkwa ankasa,” na yare a ɛreteetee me yi befi hɔ.​—1 Timoteo 6:19.

Biribi a ɛsɛ sɛ wususuw ho: Yeimy ahu sɛ “ɔde botae ahorow sisi n’ani so” a, ɛboa no pa ara. Wo nso, wobɛyɛ dɛn ayɛ saa?​—1 Korintofo 9:26.

 Midii mfe nsia no, m’akyi berɛmo fii ase yɛɛ me yaw. Efii ase no, adɔkotafo kaa sɛ nyin a merenyin ntia. Nanso afe akyi, wobehui sɛ sɛɛ na biribi ahono wɔ m’akyi dompe mu.

 Wɔyɛɛ me oprehyɛn, nanso adɔkotafo no antumi anyi ne nyinaa; ne kɛse no ara na ɛkaa hɔ. Ɛno nti, abosome mmienu pɛ na ɛsan hono yɛe sɛ kan no ara. Efi saa bere no, makɔyɛ me nipadua mu nhwehwɛmu mpɛn pii. Masɔ nnuru bebree ahwɛ, na emu pii wɔ hɔ a, ammoa me wɔ ɔkwan biara so.

 Ɛtɔ da a, mete yaw te sɛ nea wɔde sekan rewowɔ me, ɛnkanka m’akyi ne me bo. Nanso ne nyinaa akyi no, mebɔ mmɔden sɛ meremma yare no nhyɛ me so. Ɛyɛ a mekae me ho sɛ, ebinom nso afa yaw mu pa ara te sɛ me ara, nanso wɔabɔ mmɔden sɛ wɔremma yare no nhyɛ wɔn so. Ade a ɛboa me pa ara ma mitumi nya me yare no ho adwempa ne sɛ, mewɔ awerɛhyem sɛ da koro Yehowa Nyankopɔn beyi amanehunu nyinaa afi hɔ.​—Adiyisɛm 21:4.

Biribi a ɛsɛ sɛ wususuw ho: Onyankopɔn bɔhyɛ a ɛne sɛ obeyi amanehunu afi hɔ no, Matteo dwinnwen ho ma ɛboaa no. Wo nso woyɛ saa a, mfaso bɛn na wubenya?​—Yesaia 65:17.

 Wuhu me a, biribiara nkyerɛ sɛ meyare, enti anhwɛ a obi bɛte nka sɛ meyɛ ɔkwadwofo. Nanso nea ɛwom pa ara ne sɛ, mintumi nyɛ hwee. Ofie nnwuma nketenkete, adesua, anaa sɔre a mɛsɔre afi me kɛtɛ so mpo, ɛyɛ den ma me.

 Midii mfe 16 no, adɔkotafo kaa sɛ manya yare bi a wɔfrɛ no multiple sclerosis. Obi nya saa yare no a, ɛma ɔyɛ mmerɛw na nkakrankakra obubu. Enti mintumi nyɛ adwuma biara, na saa ara nso na mintumi nkɔ adesua ne asɛnka sɛnea mepɛ. Ɛyɛ a, metaa kenkan asɛm a ɛwɔ 1 Petro 5:7. Ɛhɔ ka sɛ: “Montow mo dadwen nyinaa ngu no so, efisɛ odwen mo ho.” Sɛnea Yehowa dwen yɛn mu biara ho no, sɛ midwinnwen ho a, ɛhyɛ me den. Ɛnnɛ nyinaa, ɛno ara na ekurakura me.

Biribi a ɛsɛ sɛ wususuw ho: Sɛ wokɔ so tow wo dadwen gu Yehowa so sɛnea Bruna yɛ no a, mfaso bɛn na wubenya?​—Dwom 55:22.

 Ebinom hu me a, wobu me sɛ abofra bi a wadi mfe 10. Nanso ɛnyɛ wɔn na wɔayɛ biribi, efisɛ mesɛ abofra.

 Midii mfe mmienu no, adɔkotafo hui sɛ manya kokoram soronko bi. Efii ase wɔ m’akyi berɛmo mu na nkakrankakra edidi kɔɔ m’adwenem. Adɔkotafo bɔɔ mmɔden sɛ wɔbɛsa yare no, nanso nnuru no maa me tɔɔ ape. Seesei, me tenten nyinaa yɛ mita 1.37 (anammɔn 4, nsateakwaa 6). Sɛ meka sɛ madi mfe 18 a, ɛyɛ a nnipa pii dwen sɛ meboa!

 Kristofo asafo no mu de, nkurɔfo di me ni. Wonni me ho fɛw te sɛ mmofra a na me ne wɔn kɔ sukuu no. Mebɔ mmɔden sɛ menya me yare no ho adwempa. Nokwasɛm ne sɛ, ade a ɛsom bo pa ara a obi betumi anya ne sɛ obehu Yehowa! Ɛno na me nsa aka yi. Biribiara a ɛsɛ sɛ migyina mu no, migye di sɛ Yehowa bɛboa me akwannuasa nyinaa mu. Nea Yehowa Nyankopɔn bɛyɛ wɔ wiase foforo a ɔde ahyɛ yɛn bɔ mu no, sɛ midwinnwen ho a, ɛboa ma minya me yare no ho adwempa.​—Yesaia 33:24.

Biribi a ɛsɛ sɛ wususuw ho: Adɛn nti na yebetumi aka sɛ Yehowa a obi behu no no yɛ “ade a ɛsom bo pa ara a obi betumi anya” sɛnea André kae no?​—Yohane 17:3.