Bible mmere mu no, sɛ obi de adwempa yɛ akɔnkyen a na Onyankopɔn gye tom. Nanso sɛ wamfa adwempa anyɛ a na Onyankopɔn ani nnye ho. Ɛnnɛ, Bible nhyɛ obi sɛ ɔnyɛ akɔnkyen. Sɛ obi pɛ sɛ ɔyɛ nso a, ɛnkasa ntia.

•   Bere a obi rehwehwɛ Onyankopɔn mmoa ne n’akwankyerɛ. Nnipa a na wɔretu kwan akɔ Yerusalem no yɛɛ akɔnkyen de kyerɛe sɛ wofi wɔn koma nyinaa mu rehwehwɛ Onyankopɔn mmoa. (Esra 8:21-23) Paulo ne Barnaba nso, ɛtɔ da na wɔrepaw asafo mu mpanyimfo a na wɔyɛ akɔnkyen.​—Asomafo Nnwuma 14:23.

•   Bere a obi de asi n’ani so sɛ ɔpɛ sɛ ɔyɛ nea Onyankopɔn pɛ. Yesu bɔɔ asu wiei no, ɔde nnafua 40 yɛɛ akɔnkyen. Ɔyɛɛ saa de siesiee ne ho maa Onyankopɔn apɛde a na ɔbɛyɛ wɔ ne som adwuma mu no.​—Luka 4:1, 2.

•   Bere a obi rekyerɛ sɛ wanu ne ho wɔ bɔne a wayɛ atwam ho. Onyankopɔn nam odiyifo Yoel so ka kyerɛɛ Israelfo a wɔanni nokware no sɛ: “Mumfi mo koma nyinaa mu mfa mmuadadi ne osũ ne agyaadwotwa nsan mmra me nkyɛn.”​—Yoel 2:12-15.

•   Sɛ edu Mpata Da a. Mmara a Onyankopɔn de maa Israelfo no mu no, ɔkaa sɛ edu mpata da a wɔnyɛ akɔnkyen. a (Leviticus 16:29-​31) Ná ehia sɛ Israelfo no yɛ akɔnkyen saa da no, efisɛ na ɛbɛkae wɔn sɛ wɔyɛ abɔnefo, na wohia Onyankopɔn hɔ bɔne fafiri.

•   Ebinom yɛ akɔnkyen sɛnea ɛbɛyɛ a wɔbɛsɔ nnipa ani. Yesu kyerɛkyerɛe sɛ, sɛ obi bɛyɛ akɔnkyen a, ɛyɛ ɔne Onyankopɔn ntam asɛm na ɛnsɛ sɛ obiara de ne ho gyigye mu.​—Mateo 6:16-18.

•   Ebinom yɛ akɔnkyen de bu wɔn ho atreneefo. Ɛnyɛ akɔnkyen a obi bɛyɛ na ɛbɛma n’abrabɔ ayɛ papa anaa ɔne Onyankopɔn ntam ayɛ kama asen afoforo.​—Luka 18:​9-​14.

•   Ebinom boapa yɛ bɔne a wonnyae, na wɔyɛ akɔnkyen sɛnea ɛbɛyɛ a wɔde bɛkata so. (Yesaia 58:3, 4) Wɔn a wɔyɛɛ osetie na wofii wɔn komam sakra fii wɔn bɔne ho nko ara na wɔn akɔnkyen sɔɔ Onyankopɔn ani.

•   Ebinom yɛ akɔnkyen de di wɔn som mu mmara so. (Yesaia 58:​5-7) Sɛ wɔhyɛ abofra bi sɛ ɔnnɔ n’awofo a, esiane sɛ emfi ne komam nti, ɛyɛ a awofo no ani nnye ho. Saa ara nso na sɛ wɔhyɛ obi ma ɔyɛ akɔnkyen a emfi ne komam a, Onyankopɔn ani nnye ho.

 Dabi. Onyankopɔn hyɛɛ Israelfo no sɛ, sɛ edu Mpata Da no a wɔnyɛ akɔnkyen. Nanso efi bere a Yesu de ne nkwa bɔɔ afɔre pata maa nnipa abɔnefo a wɔanu wɔn ho no, saa ahyɛde no baa awiei. (Hebrifo 9:24-26; 1 Petro 3:18) Mose Mmara a na ɛhwehwɛ sɛ nkurɔfo yɛ akɔnkyen wɔ Mpata Da no, seesei Kristofo nhyɛ ase. (Romafo 10:4; Kolosefo 2:13, 14) Ne saa nti, Kristoni biara na obesi ne gyinae sɛ ɔbɛyɛ akɔnkyen anaa ɔrenyɛ.​— Romafo 14:​1-4.

 Kristofo nim sɛ akɔnkyen nyɛ wɔn som mu ade titiriw. Bible no nkaa no baabiara sɛ, sɛ obi yɛ akɔnkyen a na n’ani begye. Mmom no, nokware Kristosom de anigye na ɛba, na ɛda Yehowa a ɔyɛ “anigye Nyankopɔn” no su ahorow adi.​—1 Timoteo 1:11; Ɔsɛnkafo 3:12, 13; Galatifo 5:22.

 Atosɛm: Sɛ Kristofo rekae Yesu wu no a, ɛsɛ sɛ wɔyɛ akɔnkyen.

 Nokwasɛm: Yesu anhyɛ n’asuafo no sɛ wɔnyɛ akɔnkyen bere a wɔrekae ne wu no. (Luka 22:14-​18) Ɛwom sɛ Yesu kaa sɛ owu a n’asuafo no bɛyɛ akɔnkyen de, nanso na ɛnyɛ ahyɛde na ɔde rema wɔn. Mmom, na ɔreka nea na ebesi ho asɛm. (Mateo 9:15) Bible no hyɛɛ Kristofo a na wɔrebehyiam akae Yesu wu no sɛ, sɛ ɔkɔm de obi a, na ɛsɛ sɛ odidi wɔ fie ansa na waba.​—1 Korintofo 11:33, 34.