Yosua 14:1-15
14 Eyi na Israelfo nyae sɛ wɔn agyapade wɔ Kanaan asase so.+ Asase yi na ɔsɔfo Eleasar ne Nun ba Yosua ne Israel agyanom mmusua mu atitiriw kyɛ maa wɔn.+
2 Wɔbɔɔ ntonto de kyɛɛ asase no+ maa mmusua akron ne fã no, sɛnea na Yehowa nam Mose so aka no.+
3 Saa bere no na Mose de mmusua abien ne fã no agyapade ama wɔn dedaw wɔ Yordan agya+ nohoa. Lewifo de, wamma wɔn agyapade no bi wɔ wɔn mu.+
4 Nanso na Yosef mma Manase+ ne Efraim+ abɛyɛ mmusua abien;+ na wɔantwa asase no bi amma Lewifo no, gye nkurow+ a wɔbɛtena mu ne mfikyisase a wɔn mmoa bedidi so na wɔakora agyapade ahorow wɔ so.+
5 Nea Yehowa ka kyerɛɛ Mose no, saa ara na Israelfo no yɛe, na wɔkyekyɛɛ asase no mu.
6 Afei Yuda asefo baa Yosua nkyɛn wɔ Gilgal,+ na Kenisini+ Yefune ba Kaleb+ ka kyerɛɛ no sɛ: “Wo ara wunim nea Yehowa ka kyerɛɛ+ nokware Nyankopɔn nipa Mose+ wɔ Kades-Barnea+ faa me ne wo ho.
7 Bere a Yehowa akoa Mose somaa me fi Kades-Barnea sɛ menkɔhwɛ asase no,+ na madi mfe aduanan, na mesan bae de asɛm a ɛwom biara bɛtoo n’anim, nea ɛwɔ me komam biara.+
8 Me nuanom a me ne wɔn kɔe no maa nnipa no koma tui;+ nanso me de, mede me koma nyinaa dii Yehowa me Nyankopɔn akyi.+
9 Enti saa da no, Mose kaa ntam sɛ: ‘Asase a wode wo nan sii so no+ bɛyɛ wo ne wo mma agyapade daa, efisɛ wode wo koma nyinaa adi Yehowa me Nyankopɔn akyi.’+
10 Yehowa adaworoma meda so te ase+ sɛnea Yehowa hyɛɛ Mose bɔ+ mfe aduanan anum ni, bere a Israelfo nam sare so no,+ na ɛnnɛ, madi mfe aduɔwɔtwe anum.
11 Nanso ɛnnɛ mpo me ho yɛ den te sɛ da a Mose somaa me no.+ Ahoɔden a na mewɔ saa bere no, ebi na mewɔ nnɛ a metumi akɔ akono asan aba.+
12 Enti mesrɛ wo, fa asase a ɛwɔ bepɔw so a Yehowa hyɛɛ ho bɔ saa da no ma me,+ efisɛ da no wotee sɛ Anakimfo+ wɔ hɔ na wɔabɔ wɔn nkurow ho ban.+ Minim sɛ Yehowa bɛka me ho,+ na mɛpam asase no sofo sɛnea Yehowa aka no.”+
13 Afei Yosua hyiraa Yefune ba Kaleb, na ɔde Hebron maa no sɛ n’agyapade.+
14 Ɛno nti na ɛde besi nnɛ, Hebron yɛ Kenisini Yefune ba Kaleb agyapade no, efisɛ ɔde ne koma nyinaa dii Israel Nyankopɔn Yehowa akyi.+
15 Kan no na Hebron de Kiriat-Arba+ (efisɛ na Arba+ yɛ Anakimfo mu ɔkatakyi). Efi saa bere no, ɔko anhaw asase no bio.+
