Sakaria 9:1-17
9 Atemmusɛm:
“Eyi yɛ Yehowa asɛm a etia Hadrak asaase,Na Damasko paa na ɛkɔ ma no,*+Efisɛ Yehowa ani wɔ nnipa so,+Na n’ani wɔ Israel mmusuakuw nyinaa so.
2 Asɛm no tia Hamat+ a ɛne no* bɔ hye no nso,Na etia Tiro+ ne Sidon+ nso, efisɛ wonim nyansa paa.*+
3 Tiro sii akoban* fae.
Ɔboaboaa dwetɛ pii ano te sɛ mfuturu,Na ɔboaboaa sika kɔkɔɔ pii ano te sɛ abɔnten so atɛkyɛ.+
4 Hwɛ! Yehowa begye n’ahode afi ne nsam,Na obekunkum n’asraafo agu po mu;*+Na ogya bɛhyew no.+
5 Askelon behu, na obesuro;Gasa ho bɛyeraw no paa,Ekron nso ho bɛyeraw no paa, efisɛ nea ɔde ne werɛ ahyɛ ne mu no anim agu ase.
Ɔhene bɛyera afi Gasa,Na obiara rentena Askelon.+
6 Ɔhɔho na ɔbɛtena Asdod,Na nea Filistifo de hoahoa wɔn ho no, meyi afi hɔ.+
7 Meyi nneɛma a mogya akekã mu no afi n’anom,Na meyi nneɛma a ɛyɛ tan no afi ne se mu,Na wobegyaw no ama yɛn Nyankopɔn;Ɔbɛyɛ sɛ abusuapanyin wɔ Yuda,+Na Ekron ayɛ sɛ Yebusini.+
8 Mɛyɛ me ho ɔwɛmfo* na mabɔ me fi ho ban;+Obiara rentwam mfa hɔ, na obiara remfi hɔ mma.Na nhyɛsofo biara remfa hɔ bio,+Efisɛ seesei me ara mede m’ani ahu.*
9 O Sion babea, ma w’ani nnye paa.
O Yerusalem babea, teɛm bɔ ose.
Hwɛ! Wo hene reba wo nkyɛn.+
Ɔyɛ ɔtreneeni, na ɔde nkwagye reba,*Ɔbrɛ ne ho ase,+ na ɔte afurum so,Ɔte afurum ba* so, afurumbere ba.+
10 Meyi ɔko teaseɛnam afi Efraim,Na mayi ɔpɔnkɔ afi Yerusalem.
Wobeyi agyan a wɔde kɔ ɔko no afi hɔ.
Na ɔbɛka asomdwoesɛm akyerɛ aman;+Obedi hene afi po so akɔ po so,Na wadi ade afi Asubɔnten no* ano akosi asaase ano.+
11 Na wo, O ɔbea, w’apam mogya no nti,Meyi wo nneduafo afi amoa a nsu nnim mu.+
12 Mo, nneduafo a mowɔ anidaso, monsan mmra aban a ɛyɛ den no mu.+
Mereka akyerɛ wo nnɛ sɛ,‘O ɔbea, mɛma wo akatua mmɔho.+
13 Na mekuntun Yuda mu* te sɛ m’agyan.
Mede Efraim bɛhyɛ mu,*Na mɛkanyan wo mma mmarima, O Sion,Ama wɔaba wo mma mmarima so, O Greece,Na mede wo bɛyɛ sɛ ɔsabarima sekan.’
14 Yehowa bɛma ada adi sɛ ɔka wɔn ho,Na n’agyan bepue akɔ te sɛ anyinam.
Awurade Tumfo Yehowa bɛbɔ abɛn,+Na ɔbɛfa anaafo fam mframa a ano yɛ den mu akɔ.
15 Asafo Yehowa bɛko ama wɔn,Na wɔbɛmemene akorabo na wɔadi so nkonim.+
Wɔbɛnom na wɔayɛ hagyahagya te sɛ nea wɔanom nsã;Wɔbɛyɛ sɛ kuruwa a nsã ayɛ no ma,Na wɔayɛ sɛ mogya a wɔahwie agu afɔremuka ntwea so.+
16 Saa da no, Yehowa wɔn Nyankopɔn begye wɔnSɛ ne man nguan;+Efisɛ wɔbɛyɛ sɛ ahenkyɛw* mu aboɔden abo hyɛnhyɛn wɔ n’asaase so.+
17 Hwɛ sɛnea ne papayɛ dɔɔso fa!+Na hwɛ sɛnea ne ho yɛ fɛ fa!
Aduan bɛma mmerante ayɛ frɔmfrɔm,Na bobesa foforo ama mmaabun ho ayɛ fɛ.”+
Ase Hɔ Nsɛm
^ Nt., “ɛyɛ ne homebea.”
^ Ɛbɛyɛ sɛ ɛfa Hadrak asaase anaa Damasko ho.
^ Anaa “efisɛ ɛyɛ wɔn sɛ wonim nyansa paa.”
^ Esiw anaa ɔfasu a wogyina so ko anaa wɔde bɔ kurow ho ban.
^ Ebetumi nso akyerɛ, “wɔ po so.”
^ Ɛbɛyɛ sɛ ɛfa amanehunu a ne nkurɔfo refa mu ho.
^ Anaa “awɛmfo dɔm.”
^ Anaa “na wadi nkonim; na wagye nkwa.”
^ Anaa “afurumnini.”
^ Kyerɛ sɛ, Eufrate.
^ Nt., “metia Yuda so.”
^ Kyerɛ sɛ, te sɛ bɛmma.
^ Anaa “ahemmotiri.”
