Ɛwom, na wɔnhyɛɛ mmara sɛ, ɛnsɛ sɛ obi som bosom, nanso na Yakob nim sɛ, Yehowa mpɛ sɛ ɔne obiara bɛkyɛ ne som. (Ex 20:3-5) Ɛno nti, bere a Yehowa ka kyerɛɛ Yakob sɛ ɔnsan nkɔ Betel no, Yakob ka kyerɛɛ wɔn a wɔka ne ho no sɛ, wɔntow ananafo anyame a ɛwɔ wɔn nkyɛn no nyinaa ngu. Ahoni ne asomuade a ɛhyehyɛ wɔn a na ɛbɛyɛ sɛ wɔde ayɛ sɛbɛ no nyinaa, Yakob gye tow gui. (Ge 35:1-4) Akyinnye biara nni ho sɛ, Yehowa ani gyee nea Yakob yɛe no ho.

Ɛnnɛ nso, dɛn na yɛyɛ a, ɛkyerɛ sɛ Yehowa nko ara na yɛresom no? Ade baako a ehia paa ne sɛ, ɛsɛ sɛ yɛtwe yɛn ho fi biribiara a ahonhonsɛm wom ho. Enti sɛ yɛwɔ biribi, na ɛne asumansɛm wɔ biribi yɛ a, ɛsɛ sɛ yɛtow gu. Afei nso, ɛsɛ sɛ yɛhwɛ nneɛma a yɛde gyigye yɛn ani no mu yiye. Sɛ nhwɛso no, bisa wo ho sɛ: ‘Nhoma a mekenkan anaa video ahorow a mehwɛ de gyigye m’ani no, ɛyɛ a ɛfa abayifo a nkurɔfo kyerɛ sɛ wɔtwe afoforo mogya anaa wohunahuna afoforo ne sum mu atumfoɔ ho anaa? Nneɛma a mede gyigye m’ani no, ɛma ɛyɛ te sɛ nea mfomso biara nni nkonyaayi, aduto, anaa duabɔ ho anaa?’ Biribiara a Yehowa kyi no, ɛsɛ sɛ yɛtwe yɛn ho fi ho koraa.—Dw 97:10.

HWƐ VIDEO A YƐATO DIN “MUNSIW ƆBONSAM KWAN” NO. WUWIE A, BUA NSƐMMISA A EDIDI SO YI:

• Nsɛnnennen bɛn na Bible suani bi a ne din de Palesa hyiae?

• Sɛ wo anaa wo Bible suani bi hia mmoa na ama watumi atwe ne ho afi ahonhommɔne ho a, adɛn nti na ɛyɛ papa sɛ woka ho asɛm kyerɛ mpanyimfo no?

• Sɛ obi pɛ sɛ Yehowa bɔ ne ho ban a, nneɛma bɛn na ɛsɛ sɛ ɔtwe ne ho fi ho koraa?

• Dɛn na Palesa de ne nan sii fam yɛe?

• Nneɛma bɛn na wubetumi ayɛ de abɔ wo ho ban afi ahonhommɔne ho wɔ baabi a wote no?