Ɔhene no Di Tumi!
Ti 14
Ɔhene no Di Tumi!
1, 2. (a) Dɛn na na ɛda nsow titiriw wɔ 1914 ho? (b) Ɔkwan bɛn so na Watch Tower nsɛmma nhoma no dii kan sii 1914 so dua mfe pii?
AKYINNYE biara nni ho sɛ 1914 na ɛhyɛ amanaman ne adesamma nsɛm mu nsakrae kɛse agyirae. Nanso na ɛkyerɛ biribi a ɛkɔ akyiri koraa sen sɛnea abakɔsɛm akyerɛwfo mu dodow no ara nim. Ɛyɛ bere a nsɛm a ɛyɛ anigye a ɛfa Onyankopɔn Ahenni no ‘ba’ ho sisii. Mfe pii ansa na ɛno reba no, na Bible asuafo a wɔhwɛ ade yiye de anidahɔ rehwɛ saa afe no kwan. Egyina dɛn so?
2 Mfe aduasa anan ansa na 1914 reba no, nsɛmma nhoma a wɔfrɛ no Zion’s Watch Tower and Herald of Christ’s Presence a ɛbae wɔ December 1879 ne March 1880 mu no twee adwene sii 1914 so sɛ ɛyɛ bere a wɔahyɛ no agyirae wɔ Bible nkɔmhyɛ mu. Asɛm bi a wɔkyerɛwee wɔ June 1880 de no mu no danee adwene kɔɔ “amanaman no mmere (Luka xxi. 24)” a ɛreba awiei no so. Ɛwom sɛ na ɔkyerɛwfo no nte nsɛm a na ɛrebesisi no nyinaa ase nwie saa bere no de, nanso ofi Bible akontaabu mu kyerɛe sɛ na “mmere nson,” anaasɛ mfe 2,520, a amanaman a wonnim Onyankopɔn nniso bedi akoten, a efii ase fi bere a wɔyɛɛ tete Yerusalem amamfõ no rebɛba awiei wɔ “1914 Y.B. mu.” Ɔkae sɛ: “Dan. iv de Nebukadnesar ne ne suahu a ɛyɛ yaw a onyaa no mmoa mu ‘mmere nson’ no yɛɛ bere tenten a ɛyɛ mfe 2,520 no ne . . . [Onyankopɔn nkurɔfo] suahu a ɛyɛ yaw a wonyae wɔ mmoa no (adesamma nniso horow, Dan. vii.) tumidi ase no ho mfonini pefee.” Ɛnde, na dɛn ne “mmere nson” no?
ƆDAE BI ASEKYERƐ
3. Nokwasɛm titiriw bɛn na wɔaka wɔ Daniel 4:25?
3 Bible mu nhoma a ɛne Daniel ti 4 ka nkɔmhyɛ kwan so dae bi a ɛyɛ nwonwa ho asɛm. Ɛkyerɛ sɛ “Ɔsorosoroni no di nnipa ahenni so tumi, na ɔde ma obiara a ɔpɛ.” (Daniel 4:25) Babilon hene Nebukadnesar na ɔsoo dae no na ɔka kyerɛɛ odiyifo Daniel ma ɔkyerɛɛ ase.
4-6. (a) Dae bɛn na Nebukadnesar soe? (b) Daniel kyerɛɛ ase dɛn? (d) Ɛbaa mu dɛn? (e) Wɔsan de Nebukadnesar sii ne sibea no, dɛn na ogye toom?
4 Nebukadnesar huu dua kɛse bi a wohu no asase so mmaa nyinaa wɔ anisoadehu mu. Ɛmaa nnipa nyinaa aduan, ne trabea. Nanso “kronkronni” bi a ofi soro hyɛe sɛ wɔntow dua no nto fam na wonnyaw ne sin dade ne kɔbere mpokyerɛ mu, nnade abien a na ɛyɛ den sen biara saa bere no. Ná “mmere nson” betwam bere a dua no ntumi mfefɛw.
5 Daniel rekyerɛ saa nkɔmhyɛ kwan so anisoadehu yi ase no, ɔkyerɛkyerɛɛ mu sɛ na dua a ɛwɔ n’anuonyam mu no yɛ Nebukadnesar ho mfonini. Ná ‘wɔbɛtow no ato fam’ anaasɛ wɔbɛbrɛ no ase. Ná “mmere nson” betwam bere a Nebukadnesar bɛyɛ ade te sɛ wuram aboa no. Nanso sɛnea wɔansɛe “dua” no pasaa no, saa ara nso na “mmere nson” akyi no, na wɔbɛsan de ɔhene no abesi ne sibea.—Daniel 4:19-27.
6 Eyi ara na ɛbaa Nebukadnesar so. Wɔbrɛɛ no ase, na ɔbɛyɛɛ te sɛ aboa a wɔayi no afi adesamma trabea, na ɔwee nwura. Ɛda adi pefee sɛ na saa “mmere nson” no yɛ mfe ason, a emu na Nebukadnesar nyaa ‘ne suahu a ɛyɛ yaw no wɔ mmoa mu.’ Ne ho nhwi fuwii kusuu, te sɛ akɔre ntakra, na n’awerɛw fuwii te sɛ nnomaa de. Nanso awiei koraa no, n’ani so tetee no ma n’adwene san baa ne ho so, na wɔsan de no sii n’ahenni no so bio. Bere a ɛno sii no, oyii “ɔsoro Hene” no ayɛ kamfoo no sɛ Nea odi tumi na “n’ahenni wɔ awo ntoatoaso nyinaa so.”—Daniel 4:28-37.
7-9. (a) Nkɔmhyɛ bɛn mu na Yesu kaa Amanaman Mmere no awiei ho asɛm? (b) Enti nsemmisa bɛn na ɛsɛ sɛ ɛho hia yɛn yiye?
7 Nanso, eyi nyinaa fa Yɛn Bere so 1914 ho dɛn?
“AMANAMAN NO MMERE A WƆAHYƐ ATO HƆ”
8 Ɛyɛ bere a Yesu Kristo reka ‘nneɛma nhyehyɛe no awiei ho sɛnkyerɛnne’ ho asɛm no na ɔkae sɛ:
“Amanaman betiatia Yerusalem so, de akosi sɛ amanaman no mmere a wɔahyɛ ato hɔ no bewie du.” (Luka 21:24, “NW”)
Ná “amanaman” a Yesu kaa wɔn ho asɛm no yɛ amanaman a wɔnyɛ Yudafo, anaasɛ “Amanaman mufo.” King James Version Bible nkyerɛase a wonim no yiye no de ɔkasa “Amanaman no mmere” na edi dwuma wɔ ha. Ne saa nti, nnipa pii abisa sɛ, ‘Dɛn ne Amanaman no mmere no? Ná bere bɛn na ɛwɔ Yesu adwene mu? Bere bɛn na efii ase, na bere bɛn na ɛbɛba awiei?’
9 Yɛahu dedaw sɛ Yesu nkɔmhyɛ kɛse a ɛfa “sɛnkyerɛnne” ho no wɔ ntease bi a ehia yiye ma yɛn nnɛ. Enti ehia sɛ yehu nsemmisa ahorow yi ho mmuae nso.
“YERUSALEM” KYERƐ DƐN?
10-12. (a) Sɛnea nhomanimfo bi kyerɛ no, na nsɛm a esisii afe 29-70 Y.B. mu no yɛ dɛn ho nhwɛso? (b) Nanso ntease a ɛkɔ akyiri bɛn na “Yerusalem” betumi anya wɔ Luka 21:24? (d) Ɔkwan bɛn so na cyclopedia bi a wonim no yiye boa yɛn saa ntease yi mu? (e) Ne saa nti, na “Yerusalem” gyina hɔ ma dɛn?
10 Ɔbenfo A. T. Robertson * reka Yesu nkɔmhyɛ no ho asɛm no, ɔkyerɛ sɛ Yesu de “asɔredan no ne Yerusalem sɛe a ɛbae wɔ saa awo ntoatoaso no mu wɔ afe 70 Y.B. mu no yɛɛ ne ba a ɛto so abien ne wiase anaa bere no awiei nso ho sɛnkyerɛnne.” Enti, yebetumi abisa sɛ: Nea ɛbaa Yerusalem so 70 Y.B. mu no akyi no, ntease a ɛkyɛn so anaasɛ nea ɛbɛba akyiri yi koraa bɛn na ebetumi aba sɛ na Yesu de rebata “Yerusalem” ho wɔ Luka 21:24 ho no?
11 Yesu buu Yerusalem sɛ Israel kuropɔn, baabi a ahemfo a Yehowa sraa wɔn wɔ Dawid abusua mu no traa “Yehowa agua” so dii tumi sɛ ahene maa Yehowa Nyankopɔn. Afei nso, na n’asɔredan no ne nokware som fibea wɔ asase nyinaa so. (1 Beresosɛm 28:5; 29:23; 2 Beresosɛm 9:8) Cyclopaedia a M’Clintock ne Strong yɛe no ka sɛ: “Ná wɔde Yerusalem ayɛ Israel nyinaa so hene no ahemfie; na Asɔrefi a wɔtaa frɛ no ‘Yehowa fi,’ no yɛɛ ahene mu Hene, teokrase man no ti pumpuni, no ahemfie bere koro no ara, . . . ampa, na Yerusalem nyɛ amammui kwan so kurow titiriw: na ɛnyɛ ahemman bi a ne ho yɛ den a edi aman afoforo so kuropɔn, na mmom na egyina hɔ sɛ kurow a wɔhwɛ kwan sɛ ebenya anuonyam sɛnea Dawid kaa ho asɛm siei bere a na ɔreka gyidi a ɔwɔ wɔ Mesia no ba mu ho asɛm no [Dwom 2:6; 110:2].”—Po IV, kratafa 838.
12 Nokwasɛm a ɛyɛ sɛ ahene a wofi Dawid ase no traa ‘Yehowa ahenni agua so’ no sii nokwasɛm a ɛne sɛ na Ahenni no yɛ Onyankopɔn dea ampa no so dua. Ná Israel ahenni sɛnea na ɛwɔ Yerusalem no yɛ Onyankopɔn Ahenni ho sɛnkyerɛnne. Ne saa nti “Yerusalem” gyinaa hɔ maa Onyankopɔn Ahenni.
13, 14. Bere bɛn, na ɔkwan bɛn so na ‘ntiatiaso’ a ɛwɔ Luka 21:24 no fii ase?
13 Afei, kae Yesu nsɛm no: “Amanaman betiatia Yerusalem so, de akosi sɛ amanaman no mmere a wɔahyɛ ato hɔ no bewie du.” (Luka 21:24, NW) Na bere bɛn na ‘ntiatiaso’ yi fii ase? Ɛda adi pefee sɛ efii ase dedaadaw ansa na wɔrewo Yesu wɔ Betlehem, efisɛ na nnipa ahemfo a wofi Dawid mu no agyae tumidi wɔ Yerusalem dedaadaw. Dawid asefo mu ahenni no baa awiei bere a Babilonfo a wɔwɔ Nebukadnesar ase no tuu Ɔhene Sedekia ade so no.
14 Bible abakɔsɛm a ɛyɛ nokware no ka nea ɛbae esiane ɔmanfo no ne Ɔhene Sedekia nnebɔne nti. Ɛka sɛ: “[Yehowa] abufuhyew no sɔre hyɛɛ ne man no a wɔannya ano aduru bio. Na oyii Kaldeafo [Babilonfo] hene no baa wɔn so, na ɔde nkrante bekunkum wɔn mmerante . . . [Onyankopɔn] de wɔn nyinaa hyɛɛ [Nebukadnesar] nsa. Na Onyankopɔn fi nneɛma no nyinaa, akɛse ne nketewa ne [Yehowa] fi akorade ne ɔhene no ne mmapɔmma akorade, ɔde ne nyinaa kɔɔ Babel. Na ɔhyew Onyankopɔn fi no, na oburuw Yerusalem fasu no.” (2 Beresosɛm 36:11, 12, 16-20) Ɛhɔ na ‘ntiatiaso’ no fii ase.
‘WOTIATIA SO’ BERE TENTEN BƐN?
15-17. (a) Hena na ɔhweree “mmara mu hokwan” a na ɔwɔ sɛ Dawid ahenni no mu ɔdedifo, na ɔkwan bɛn so? (b) Hena na ɔbɛsan anya saa hokwan no, na bere tenten bɛn? (d) Enti, ɛho asemmisa bɛn na ɛsɔre? (e) Dɛn nti na ɛbɛfata sɛ Daniel bua asɛm yi?
15 Odiyifo Hesekiel hyɛɛ Dawid asefo mu ahemfo a wodii tumi fii asase so Yerusalem no mu nea otwa to a ɔne Sedekia a wobetu no ade so no ho nkɔm sɛ:
“Eyi ne nea Amansan Hene Awurade Yehowa aka, ‘Wonyi abotiten no, na wɔmpɔn ahemmotiri no. Eyi renyɛ saa ara bio. . . . Ɔsɛe, ɔsɛe na mɛsɛe no. Eyi nso, ampa ara sɛ ɛremmɛyɛ obi de kosi sɛ nea mmara mu hokwan wɔ no no bɛba, na mede bɛma no.’”—Hesekiel 21:26, 27, “NW.”
16 Ɛwom sɛ saa bere no “mmara mu hokwan” a Ɔhene Sedekia wɔ wɔ Dawid ahenni no mu fii ne nsa de, nanso Mesia a wɔhyɛɛ ne ho bɔ no nsa bɛsan aka saa “hokwan” no na wadi tumi Onyankopɔn Ahenni mu “daa apem.” (Luka 1:32, 33) Nanso bere ahe na ebedi ansa na Mesia Ahenni—a na wɔde Israel asase so ahenni ne n’ahenkurow a na ɛwɔ Yerusalem ayɛ ho mfonini no—befi ase adi tumi?
17 Ná Yehowa Nyankopɔn nim, na na obetumi akyerɛ bere no wɔ n’Asɛm mu, sɛnea wahyɛ nsɛm a ebesisi daakye ho nkɔm pii no. Wɔ Yesu asɛm a ɔka faa “nneɛma nhyehyɛe no awiei” ho no mu no, ɔkaa Daniel nkɔmhyɛ a emu na Onyankopɔn aka nneɛma pii a ɛbɛba ɔsoro ne asase so ho nsɛm pɛpɛɛpɛ asie no ho asɛm mpɛn pii. (Fa Mateo 24:3, 15, 21, 30 toto Daniel 9:27; 11:31; 12:1; 7:13 ho.) Afei nso, so na “adapɛn aduɔson” a ɛwɔ Daniel 9:24-27 nkɔmhyɛ mu no mfaa Mesia no ba a edi kan no ho bere nhyehyɛe a ɛyɛ pɛpɛɛpɛ mmae anaa? So ɛremfata sɛ odiyifo koro no ara de Mesia no ba a ɛto so abien no ho bere nhyehyɛe bɛma anaa? Ɛyɛ Daniel ti a ɛto so anan no mu na yehu saa nkɔmhyɛ asɛm yi a ɛfa yɛn ho tee no.
NE MMAMU KƐSE
18. (a) Ɛbɛyɛ sɛ dɛn nti na wiase abakɔsɛm ahorow nka Nebukadnesar adammɔ ho asɛm? (b) Dɛn nti na ɛsɛ sɛ yetie nea Onyankopɔn Asɛm ka wɔ ha no?
18 Yɛahwehwɛ Daniel nkɔmhyɛ a ɛfa “mmere nson” no mfiase, mfonini kwan so de ho no mu dedaw na yɛahu sɛ na ɛfa Nebukadnesar mfe ason adammɔ ankasa ho. Ɛnsɛ sɛ ɛyɛ yɛn nwonwa sɛ wiase abakɔsɛm mfa mfe ason a na Nebukadnesar nte ahengua so no ho nsɛm fefeefe bi mma. Wonim Misraim, Asiria ne Babilon tete kyerɛwtohɔ ho asɛm yiye sɛ ɛnka biribiara a ebegu sodifo no anim ase, a ɛno yɛ ade biako nti a wontumi mfa ho nto so te sɛ Onyankopɔn Asɛm a efi honhom mu no. Onyankopɔn Asɛm na ɛma yɛn awerɛhyem sɛ anisoadehu a wonyae wɔ dae mu no baam. Sɛnea wɔhyɛɛ nkɔm no nso kyerɛ sɛ ne mmamu a ɛkɔ akyiri koraa nso bɛwɔ hɔ, na ɛno nso abam saa ara. Ɔkwan bɛn so?
19. Nea ntease wom no, dɛn nti na anisoadehu yi bɛboa yɛn ma yɛahu Amanaman Mmere no tenten?
19 Ɛsɛ sɛ yɛhyɛ no nsow sɛ nea wɔmaa ɔsoo dae no ne Babilon hene a ɔno ara ne wiase sodifo a wɔde no dii dwuma de tutuu Onyankopɔn Ahenni ho nhwɛsode a na ɛwɔ asase so gui na wɔnam saayɛ so de amanaman tumi a wɔde di wiase so no sii hɔ no. Afei nso ɛda adi sɛ ɛnyɛ nsakrae kɛse yi akyi mfe pii na wɔde anisoadehu no mae—bere a na ahenni nhwɛsode bi a Yehowa nam so dii tumi to atwa no. Afei nso Daniel ti 4 sii asɛmti ‘Ɔsorosoroni no ne Tumidifo adesamma ahenni mu na ɔde ma nea ɔpɛ’ no so dua mpɛn pii. (Daniel 4:17, 26, 34, 35) Ne saa nti yɛwɔ ntease pa a enti yɛbɛhwɛ anisoadehu yi kwan ma akyerɛ bere tenten a wiase Amanaman bedi asase so akodu.
20. Asɛm bɛn na yebisa, na ɛhe na yebetumi anya ɛho mmuae?
20 Sɛ yɛkan fi bere a wotutuu Onyankopɔn Ahenni ho nhwɛsode, a na Dawid asefo di so hene no gui a, bere tenten bɛn na ebedi ansa na Onyankopɔn asan ada ne tumidi adi denam Dawid adehye abusua ahenni no a Mesia di so hene no so? Daniel ti 4 de nea yebegyina so ahu wiase Amanaman Mmere anaa “Amanaman no mmere a wɔahyɛ ato hɔ,” no tenten ma, bere a emu na saa amanaman no betiatia “Yerusalem,” anaasɛ Onyankopɔn Ahenni, so no.—Luka 21:24.
21. Dɛn na Daniel 4:15-17 ne Hiob 14:7 kyerɛ wɔ tebea a ɛbae bere a wotuu Sedekia fii ade so no ho?
21 Saa ntiatiaso yi fii ase afe a Nebukadnesar tuu Ɔhene Sedekia fii ahengua a ɛwɔ Yerusalem so no. Efi saa bere no de rekɔ no, ‘wɔtoo’ Yehowa tumidi sɛnea wɔdaa no adi wɔ Yuda ahene a wodidi so no mu no too fam. Ná wɔaka ahyɛ, te sɛ Nebukadnesar ɔdae no mu dunsin a wɔakyekyere no. Amanaman Mufo atumfoɔ a wɔte sɛ mmoa no dii tumi asase no nyinaa so. Nanso na anidaso bi wɔ hɔ ma “dua” no sɛ “ɛbɛfefɛw bio.” Ɛno na afei ateasefo behu sɛ “Nea ɔwɔ ɔsorosoro na odi nnipa ahenni so tumi.”—Daniel 4:15-17; Hiob 14:7; fa toto Yesaia 11:1, 2; 53:2 ho.
22. Bere bɛn, na ɔkwan bɛn so na Ahenni “dua” no fefɛw bio?
22 Ahenni a wɔasan de asi hɔ yi mu no, Ɔsorosoroni no nam ne Mesia no so na edi tumi. Dabi, ɛnyɛ bere a saa Onii no puei nea edi kan sɛ onipa a ɔyɛ pɛ wɔ asase so, bere a Yudafo no buu no animtiaa na wɔannye no antom sɛ ɔhene no. Nanso wɔsansan ahama a wɔde kyekyeree dunsin no, na Ahenni “dua” no fii ase fefɛwee bio, bere a “nipa mu ɔhobrɛasefo” yi ba wɔ n’anuonyam mu sɛ nnipa a wɔwɔ amanaman mu nyinaa so ɔsoro Hene. Afei bere a Amanaman Mmere no wie du no, wiase ahenni no bɛyɛ “yɛn Awurade ne ne Kristo no ahenni.”—Adiyisɛm 11:15, NW; Daniel 4:17, 25.
“MMERE NSON” NO—NE TENTEN YƐ AHE?
23. Dɛn nti na ɛsɛ sɛ Amanaman Mmere no ba bedu yɛn bere so?
23 Ɛnde, ɛda adi pefee sɛ, “mmere nson” sɛnea ɛfa wiase Amanaman Mmere ho no bɛyɛ nea ɛware koraa sen mfirihyia ason ankasa. Kae sɛ, Yesu de saa wiase Amanaman Mmere no ‘a ebewie du’ anaa ɛbɛkɔ awiei no kaa “nneɛma nhyehyɛe no awiei” ho asɛm. (Luka 21:7, 24; Mateo 24:3) Enti ɛsɛ sɛ ebedu yɛn bere so pɛɛ. Ná ebedi bere tenten bɛn ankasa?
24. Yɛbɛkyerɛkyerɛ “mmere nson” no mu dɛn?
24 Sɛ yɛdan kɔ Adiyisɛm ti 12 a, yehu sɛ nkyekyem 6 ne 14 kyerɛ bere bi a ɛyɛ nnafua 1,260 sɛ ɛyɛ “bere ne mmere ne bere fã,” anaasɛ 1 + 2 + 1/2, a ne nyinaa dodow yɛ mmere 31/2. Enti, “bere” bɛyɛ nnafua 360, anaasɛ asram 12 a ɔsram biara yɛ nnafua 30. “Mmere nson” bɛyɛ nnafua 2,520; na Bible nkɔmhyɛ akontaabu a ɛne sɛ “dakoro dakoro nyɛ afe afe” no kyerɛ sɛ eyinom bɛyɛ mfe 2,520 ankasa. (Numeri 14:34; Hesekiel 4:6) Enti, “mmere nson”—Amanaman Mmere—no tenten ni.
25. Ɔkwan bɛn so na “mfirihyia aduɔson” a wɔka ho asɛm wɔ Yeremia 25:11 no boa ma yehu bere a Amanaman Mmere no fii ase?
25 Sɛ yɛhwɛ Onyankopɔn Asɛm mu a, ɛboa yɛn ma yehu bere a Amanaman Mmere no fii ase. Sɛnea yɛahu dedaw no, Yehowa maa Babilonfo kwan ma wodii ne nkurɔfo so nkonim, sɛee Yerusalem ne n’asɔrefi, tuu Sedekia fii ‘Yehowa ahenni agua so’ na wɔfaa Yudafo no kɔɔ Babilon nkoasom mu. (1 Beresosɛm 28:5) Nsɛm a edii akyi bae “ɔsram a ɛto so ason no mu” no maa Yudafo kakraa a na wɔaka wɔ asase no so no guan kɔɔ Misraim, ma afei Yuda bɛyɛɛ amamfõ koraa. (2 Ahene 25:1-26; Yeremia 39:1-10; 41:1–43:7) Ná Yehowa diyifo Yeremia aka asie sɛ amamfõyɛ no bedi mfe 70. (Yeremia 25:8-11) Ɛno na afei Yehowa ‘bɛkae Babilon hene amumɔyɛ’ na ‘wasan de Ne nkurɔfo aba wɔn asase so bio.’—Yeremia 25:12; 29:10.
26. (a) Dɛn na Daniel de n’aniwa hui, na dɛn ho ntease na onyae? (b) Yɛbɛyɛ dɛn ahu ɔsram ne afe ko a Daniel nkɔmhyɛ a ɛfa san a wɔbɛsan de wɔn aba ho no baa mu? (d) Ɛyɛ afe bɛn pɔtee?
26 Daniel ankasa traa Babilon nkoasom mu mfe pii. Anadwo a Babilon hwee ase Medo-Persiafo nsam no, ohuu n’ankasa ne nkɔmhyɛ ne nkɔmhyɛ afoforo a etia saa kurow no mmamu. (Daniel 5:17, 25-30; Yesaia 45:1, 2) Abakɔsɛm akyerɛwfo bu akontaa sɛ Babilon hwee ase afe 539 A.Y.B. October mfiase. Ɛno akyi pɛɛ no, Daniel fi Yeremia nkɔmhyɛ no mu hui sɛ na mfe 70 nnommumfa ne Yerusalem amamfoyɛ no reyɛ aba awiei. (Daniel 9:2) Ná n’asɛm no yɛ nokware! Persiani Kores afe a edi kan a abakɔsɛm akyerɛwfo pii kyerɛ sɛ efii ase fii afe 538 A.Y.B. fefɛw bere mu no, Kores de ahyɛde bi mae a ɛmaa Yudafo no kwan sɛ wɔnsan nkɔ wɔn asase so nkɔtra hɔ na wɔnsan nsi Yehowa asɔrefi wɔ hɔ. (2 Beresosɛm 36:20-23; Esra 1:1-5) Abakɔsɛm a efi honhom mu no kyerɛ yɛn sɛ Yudafo no gyee Kores ahyɛde no so ntɛm ara, ma enti “ɔsram a ɛto so ason dui [no], na Israelfo no tete nkurow no mu.” (Esra 3:1) Yɛn kalenda mu no, na ɛno bɛyɛ October, afe 537 A.Y.B., ma enti ɛkyerɛ bere a mfe 70 amamfoyɛ a wɔka siei no wie du.
27. (a) Enti bere bɛn na ɛbɛyɛ sɛ mfe 70 no fii ase, na asɛm bɛn na esii? (b) “Mmere nson” no tenten yɛ ahe, enti bere bɛn na ɛsɛ sɛ ɛba awiei? (d) Nkɔmhyɛ kɛse foforo bɛn na efii ase baam saa bere no pɛpɛɛpɛ? (e) Na asɛm bɛn ho adanse na Ɔwɛn-Aban no akɔ so adi bɛboro mfe 100 ni?
27 Saa abakɔsɛm mu nsɛm no ho hia yɛn ma yɛde ahu “amanaman no mmere a wɔahyɛ ato hɔ no” mfiase. Esiane sɛ Yuda ne Yerusalem amamfoyɛ mfe 70 no baa awiei 537 A.Y.B. mu nti, efii ase 607 A.Y.B. Na ɛno bɛyɛ afe a Sedekia gyae ‘Yehowa ahenni agua so’ tra wɔ Yerusalem no. Enti, ɛkyerɛ Amanaman no Mmere no mfiase nso. Sɛ yɛkan fi October 607 A.Y.B. mu a, “mmere nson” a ɛyɛ mfe 2,520 no de yɛn bedu October mfiase wɔ 1914 Y.B. mu, bere a sɛnea yɛahu dedaw no, Yesu nkɔmhyɛ kɛse a ɛfa “nneɛma nhyehyɛe no awiei” ho no fii ase baam no. Nsɛm a wotumi de ho to so a ɛwɔ Onyankopɔn Asɛm mu, a Ɔwɛn-Aban nsɛmma nhoma no akɔ so adi ho adanse nea ɛboro mfe 100 ni no so na yegyina ka eyi.
28, 29. (a) Dɛn na ɛwɔ wiase kyerɛwtohɔ ahorow ho a enti ɛsɛ sɛ yɛde aseda ma sɛ wɔakora nsɛm so ama yɛn wɔ Onyankopɔn Asɛm no mu? (b) Dɛn nti na ntease pa a emu yɛ den bi wɔ hɔ a enti yebetumi agye October 1914 mmom atom, sen bere foforo biara, sɛ Amanaman Mmere no awiei no?
28 Ampa ara sɛ yebetumi ada Yehowa ase sɛ wakora nsɛm a ehia a ɛfa Yudafo, Babilonfo ne Medo-Persiafo ho wɔ afeha a ɛto so asia A.Y.B. mu ho no so pɛpɛɛpɛ wɔ n’Asɛm a efi honhom mu no mu. Anyɛ saa a, anka ɛbɛyɛ den yiye sɛ yebehu bere pɔtee a nsɛm sisii saa bere no, efisɛ wiase kyerɛwtohɔ ahorow a ɛfa saa bere no ho no nni mũ.
29 Nanso sɛ yɛde gyina wiase kyerɛwtohɔ ahorow a ɛtete saa no so titiriw a, ebinom bu akontaa sɛ wɔsɛee Yerusalem 587/6 A.Y.B., ne sɛ Yudafo no baa Babilonfo tumidi ase Nebukadnesar ahenni afe a edi kan no mu a wobu sɛ ɛyɛ afe 605 A.Y.B. no. * Wɔnam saayɛ so kyerɛ sɛ afe 605 A.Y.B. ne bere a Yeremia 25:11 fii ase baa mu: “Asase no nyinaa bɛyɛ amamfõ; na wɔbɛsom Amanaman Mufo mfirihyia aduɔson.” (Greek Septuagint a Bagster kyerɛwee) Sɛ saa na ɛte ma wɔkan Amanaman Mmere no fii saa bere no a, na ɛde nkɔmhyɛ “mmere nson” no awiei bɛba Wiase Ko no afe 1916 mu. Nanso, sɛnea yɛaka no, yegye di sɛ ntease pa a emu yɛ den wɔ hɔ a enti ɛsɛ sɛ yegye Onyankopɔn Asɛm a efi honhom mu a ɛkyerɛ sɛ Amanaman Mmere no mfiase yɛ October 607 A.Y.B. mu na ɛkowiee October 1914 Y.B. no tom.
30. Nsɛm a aka abom bɛn na ɛkyerɛ sɛ efi 1914 mu na “nna a edi akyiri” no fii ase?
30 Yɛn ani betumi agye sɛ efi tete na Onyankopɔn ma wɔkyerɛw nkɔmhyɛ a ɛkyerɛ bere a Yesu ba sɛ Mesia wɔ afe 29 Y.B. mu, ne ne “ba a waba” sɛ ɔsoro Hene onuonyamfo fi 1914 Y.B. mu no pefee too hɔ wɔ n’Asɛm mu. Bere a “nneɛma nhyehyɛe no awiei” rebɛn no, yehu sɛ tebea horow a Yesu ka kyerɛɛ yɛn sɛ yɛmma yɛn ani nna yɛn ho so wɔ ho no atwa yɛn ho ahyia na kɔ ara na emu kɔ so yɛ den. Wiase nyinaa akodi, ɔkɔm, ɔyaredɔm, asasewosow, basabasayɛ, ɔdɔ a wonni, tan a wɔtan wɔn a wogyina hɔ ma Bible nnyinasosɛm ahorow na wɔtaa wɔn—eyinom nyinaa aka abom aboa yɛn ma yɛahu “nna a edi akyiri” no.—2 Timoteo 3:1; Mateo 24:3-12; Marko 13:7-13.
MFIRIHYIA APEM NO—BERE BƐN?
31. (a) Afotu bɛn na Yesu de ma wɔ yɛn da yi ho, na dɛn ntia? (b) Asɛm bɛn na ebia yebebisa, na mmuae bɛn na Yehowa de ma?
31 Tebea a ɛyɛ hu yi bɛkɔ so akodu bere tenten bɛn? Afei a wɔde Kristo Yesu asi ahengua so sɛ Ɔhene-Kofoni no, ntease pa bi wɔ hɔ a enti yebegye adi sɛ ɛrenkyɛ na wadi atemmu ho dwuma Onyankopɔn atamfo so. “Na da no ne dɔn no de, obi nnim,” ma enti ɛso remma yɛn mfaso sɛ yɛbɛbɔ yɛn tirim aka biribi. Nanso, ɛsɛ sɛ yetie Yesu afotu a ese: “Enti monwɛn” no. (Marko 13:32; Mateo 24:42) Bere a yehu sɛ tebea horow kɔ so sɛe wɔ asase so na yehu sɛnea nnipa pii ntie Ahenni ho asɛmpa no, ebia yebebisa te sɛ nea Onyankopɔn diyifo no yɛe no wɔ yɛn asɛnka no ho sɛ: “O [Yehowa], enkosi da bɛn?” Yehowa bua wɔ eyi ho sɛ:
“Enkosi sɛ nkurow bɛdan akurofõ a obi nte mu, na afi ada ntuw a onipa nni mu, na asase no asɛe ayɛ afõ koraa.” (Yesaia 6:10-12)
Wɔ Yehowa bere a wahyɛ mu no, ɔde saa atemmu yi bɛba Kristoman so kan, na afei ɔde aba Satan wiase no afã a aka nyinaa so. Kristo mfirihyia 1000 nniso no bɛba wɔ ɛno akyi pɛɛ.—Adiyisɛm 20:1-3, 6.
“AWO NTOATOASO YI”—NEA ƐWƆ HE?
32. Mateo 24:34 ma asemmisa bɛn na ɛsɔre?
32 Wɔ Yesu nkɔmhyɛ kɛse a ɛfa “sɛnkyerɛnne” no ho mu no, ɔma yɛn awerɛhyem sɛ: “Nokware mise mo sɛ, awo ntoatoaso yi rentwam, gye sɛ eyinom nyinaa abam ansa.” (Mateo 24:34) Esiane sɛ ɔnkyerɛ bere tenten pɔtee bi a awo ntoatoaso di nti, yɛbɛte “awo ntoatoaso yi” no ase dɛn?
33. (a) Ná “awo ntoatoaso” a ɛwɔ Yesu bere so no ne nea ɛwɔ he? (b) Nea ɛne no hyia no, dɛn na wobetumi aka afa 1914-1918 “awo ntoatoaso” no ho?
33 Yesu bere so no, n’asuafo a wɔtee ne nsɛm no, ne ne bere sofo afoforo nso, traa ase faa awiei “ahohiahia” a ɛbaa Yudafo nneɛma nhyehyɛe no so no mu. Ná wɔn ne Yesu bere so “awo ntoatoaso” no. Bere a yɛrekyerɛw asɛm yi no, wɔ United States nkutoo no, nnipa bɛboro 10,000,000 na na wɔda so ara te ase a wɔanyinyin yiye a wohuu “awoko yaw mfiase” no wɔ 1914-1918 mu. Eyinom mu binom betumi akɔ so atra ase mfe kakraa bi bio. Nanso Yesu ma yɛn awerɛhyem sɛ ɔbɛba sɛ “onipa Ba” abedi atemmu ho dwuma wɔ Satan nneɛma nhyehyɛe no so ansa na “awo ntoatoaso yi” atwam. (Mateo 24:8, 21, 37-39) Ɛsɛ sɛ yɛma yɛn ani da hɔ, na yɛhwɛ saa ‘ahenni no ba’ kwan.—Luka 21:31-36.
[Ase hɔ nsɛm]
^ nky. 10 Word Pictures in the New Testament, Po I, kr. 188.
^ nky. 29 Hwɛ Nkekaho a ɛwɔ kratafa 186 no.
[Adesua no ho Nsɛmmisa]
[Kratafa 135 adaka]
“MMERE NSON” NO BU
“Mmere” 7 = 7 × 360 = mfe 2,520
(Bible mu “bere” anaa afe yɛ ɔsram afe a ɛwɔ nnafua 354 ne owia afe a ɛwɔ nnafua 3651/4 a wɔaka abom na wɔakyem pɛpɛɛpɛ)
Afe 607 A.Y.B. besi 1 A.Y.B. = mfe 606
Afe 1 A.Y.B. besi 1 Y.B. = afe 1
Afe 1 Y.B. besi 1914 Y.B. = mfe1,913
Afe 607 A.Y.B. besi 1914 Y.B. = mfe2,520
[Kratafa 140 adaka]
“1914 AWO NTOATOASO NO”
Nhoma a ekura asɛmti a ɛwɔ atifi hɔ no mu no, Robert Wohl “hyɛ nyansa sɛ wɔmmfa akontaahyɛde nnkyerɛ awo ntoatoaso bi tenten wɔ mfe dodow mu, na mmom ɛfa abakɔsɛm mu nsɛntitiriw bi ho, a wiase ko a edi kan no yɛ ho nhwɛsode kɛse.”—“The Economist,” March 15, 1980
