Ahenni Adedifo Kura Wɔn Mudi Mu
Ti 9
Ahenni Adedifo Kura Wɔn Mudi Mu
1. (a) Dɛn nti na Yesu nyaa din a eye kyɛn so? (b) Henanom na wobetumi anya ne nhwɛso no mu mfaso, na ɔkwan bɛn so?
BERE a Yesu dii nokware koduu owu mu no, onyaa din a ɛkorɔn sen abɔfo de. Wɔ Onyankopɔn abɔde a wonim nyansa nyinaa mu no, na ɔno ne Nea ɔbɛkyerɛ sɛ Onyankopɔn ba betumi akura mudi a ewie pɛyɛ mu ama Onyankopɔn, na ɔnam saayɛ so akyerɛ sɛ Satan yɛ ɔtorofo. Ne saa nti, ɔsomafo Paulo kyerɛw sɛ: “Ɔde n’ankasa ne ho dwiraa yɛn bɔne [denam agyede a ɔde mae no so] no, ɔkɔtraa anuonyam kɛse no nifa so ɔsorosoro.” Nhwɛso fɛfɛ bɛn ara na ɔyɛ maa wɔn a wɔtwɛn Ahenni no ‘ba’ nyinaa—wɔn a wɔyɛ “kuw ketewaa” a wobenya ɔsoro Ahenni no adi ne wɔn a wɔbɛyɛ saa Ahenni no nkoa wɔ asase so no sɛɛ yi! Sɛnea akyiri yi ɔsomafo koro yi ara ka no: “Yɛmfa boasetɔ ntu aperepere a ɛda yɛn anim no mu mmirika, nhwɛ gyidi mu dikanfo ne ne wiefo Yesu a ɔhwɛɛ anigye a ɛda n’anim no tɔɔ ne bo ase huu asɛndua ho amane, na wammu aniwu, na wakɔtra Onyankopɔn ahengua nifa.”—Hebrifo 1:3, 4; 12:1, 2.
2-4. (a) Ɔkwan bɛn so na Yesu kyerɛkyerɛɛ n’asuafo na ɔhyehyɛɛ wɔn maa asɛnka adwuma no nkakrankakra? (b) Yɛyɛ dɛn hu sɛ wɔde “asɛmpa” no kɔɔ nkurɔfo afie mu? (d) Nhwɛsode fɛfɛ bɛn na dwumadi yi de too hɔ maa Onyankopɔn asomfo nnɛ?
2 Ɛnyɛ nhwɛso fɛfɛ nko na Yesu yɛ maa n’akyidifo na mmom ɔkyerɛkyerɛɛ wɔn maa wɔn ntetee nso, sɛnea ɛbɛyɛ a wobetumi atoa Onyankopɔn adwuma so bere a wafi ha kɔ no.
“Ɔkɔfaa nkurow ne nkuraa nyinaa mu kaa Onyankopɔn ahenni ho asɛmpa kyerɛe, na dumien no ka ne ho.”—Luka 8:1.
3 Akyiri yi, Yesu somaa 12 no nkutoo “sɛ wɔnkɔka Onyankopɔn ahenni ho asɛm, na wɔnsa yare.” “Na wosiim hɔ faa nkuraa nyinaa ase mmiako mmiako kaa asɛmpa no, na wɔsaa yare baabiara.” (Luka 9:2, 6) Wɔ nkurow ne nkuraase no, na ɛsɛ sɛ wɔhwehwɛ wɔn a wɔfata wɔ hɔ, na wɔnam nkurɔfo no afie a wɔkɔe no so yɛɛ eyi. Na egye akokoduru a wɔde bekura wɔn mudi mu, sɛnea ɛte wɔ Yehowa Adansefo a wɔwɔ nsase pii so nnɛ fam no, esiane sɛ wɔsɔre tia asɛm no nti. Yesu kae sɛ: “Na sɛ ɛsɛ ofi no a, mo asomdwoe mmra so; na sɛ ɛnsɛ no a, mo asomdwoe nsan mmra mo nkyɛn. Na obiara a ɔrennye mo na ɔrentie mo asɛm no, mufi ofi anaa kurow no mu rekɔ a, momporoporow mo nan ase tutuw.”—Mateo 10:7, 11-14.
4 Akyiri yi, bere a Yesu paw asuafo afoforo 70 no, osee wɔn sɛ: “Hwɛ, mesoma mo sɛ nguanten akɔ mpataku mu.” Na ɛsɛ sɛ eyinom nso kɔ nkurɔfo no afie mu, efisɛ Yesu kɔɔ so kae sɛ: “Ofi biara a mobɛkɔ mu no, munse kan sɛ: Asomdwoe mmra ofie ha yi! Na sɛ asomdwoe ba wɔ hɔ a, mo asomdwoe bɛtra no so; na sɛ ɛnte saa a, ɛbɛsan aba mo so.” Sɛ nnipa no antie “asɛmpa” no mpo a, na ɛsɛ sɛ wɔbɔ wɔn kɔkɔ sɛ Onyankopɔn Ahenni no abɛn! (Luka 10:3-11) Eyi yɛ Yehowa Adansefo adwuma no ho nhwɛsode pa nnɛ, bere a eyinom de Onyankopɔn awerɛkyekye ne kɔkɔbɔ asɛm kɔ afie afie no.—Yesaia 61:1, 2.
ASƐM A WƆKA A ƆSƆRETIA MFA HO
5. Akwan bɛn so na Yesu a wɔanyan no no sii adwuma a na ɛda n’akyidifo anim no so dua?
5 Yesu wui no, saa asuafo no bɔ hwetee. Nanso bere a wonyanee no wɔ honhom mu akyi no, oyii ne ho adi kyerɛɛ wɔn mpɛn pii wɔ honam nipadua mu de maa wɔn awerɛhyem na ahyɛ wɔn den. (1 Korintofo 15:3-8) Wɔ mmere yi biako mu no, Yesu bisaa Petro mprɛnsa sɛ ɔdɔ no pɛ n’asɛm ampa anaa. Eyi yɛɛ Petro awerɛhow, nanso Yesu sii so dua mprɛnsa sɛ ɛsɛ sɛ Petro ma ne “nguan“ ne ne “nguammaa” aduan na ɔhwɛ wɔn de kyerɛ sɛ ɔdɔ no na ɔpɛ n’asɛm. (Yohane 21:15-17) Bere foforo a Yesu yii ne ho adi no, ɔka kyerɛɛ n’asuafo anokwafo 11 no sɛ:
“Wɔde ɔsoro ne asase so tumi nyinaa ama me. Enti monkɔ nkɔyɛ amanaman nyinaa m’asuafo. Mommɔ wɔn asu nhyɛ Agya ne Ɔba ne honhom kronkron din mu, na monkyerɛkyerɛ wɔn sɛ wonni nea mahyɛ mo nyinaa so. Na hwɛ, me ne mo wɔ hɔ nna nyinaa de bɛkɔ akosi wiase awiei.” (Mateo 28:18-20)
Ná adwuma pii da wɔn anim.
6. Dɛn nti na na Yesu asuafo no bɛyɛ ‘nnwuma a ɛkyɛn’ ne de no?
6 Ná Yesu aka akyerɛ n’asuafo no sɛ: “Nokware, nokware, mise mo sɛ: Nea ogye me di no, nnwuma a meyɛ no, ɔno nso bɛyɛ, na ɔbɛyɛ akɛse asen eyinom, efisɛ me de, merekɔ m’agya no nkyɛn.” (Yohane 14:12) Ná wɔbɛyɛ adwuma wɔ asasesin a ɛso sen nea ɔyɛɛ mu adwuma no, na wɔbɛkɔ so ayɛ Onyankopɔn Ahenni ho asɛnka adwuma no akyɛ asen no.
7. Ade a ɛyɛ nwonwa bɛn na ɛma wodii adanse fefeefe wɔ Pentekoste da no, na ade a ɛda nsow bɛn na efii mu bae?
7 Bere a Yesu koduu n’Agya nsa nifa wɔ soro no, ɔyɛɛ anwonwade bi. Wɔ Pentekoste da, afe 33 Y.B. no, ohwiee honhom kronkron guu n’asuafo a na wɔretwɛn no so de sraa wɔn na wɔabɛyɛ ne yɔnko adedifo wɔ Onyankopɔn soro Ahenni no mu. Awiei koraa no, na wɔbɛpaw nnipa 144,000 afi adesamma mu ma wɔne Kristo akɔyɛ ahene ne asɔfo wɔ soro. Esiane adanse fefeefe a wodii saa da biako pɛ no nti, Yudafo ne wɔn a wɔasakra abɛyɛ Yudafo 3,000 de anigye gyee asɛm no ma wɔbɔɔ wɔn asu.—Yohane 14:2, 3; Adiyisɛm 14:1-5; 20:4, 6; Asomafo no Nnwuma 2:1-4, 14, 40, 41.
8-11. (a) Ɔko bɛn na afei ɛkɔɔ so wɔ Yudafo akannifo ne asomafo no ntam? (b) Ɔkwan bɛn so na asomafo no daa wɔn ho adi sɛ wɔyɛ mudi mu kurafo? (d) Sɛnea Asomafo no Nnwuma 5:40-42 kyerɛ no, nhwɛso fɛfɛ bɛn na saa asomafo no de gyaw Onyankopɔn asomafo a wɔwɔ hɔ nnɛ?
8 “Asɛmpa” no ka trɛw faa Yerusalem asase no so te sɛ kwae mu gya. Na saa na Onyankopɔn Ahenni no ho ɔsɔretia nso yɛe. Ankyɛ na wɔtwee asomafo no kogyinaa Yudafo Sanhedrin asenni bagua no anim na wɔbaraa wɔn sɛ wɔnnkasa Yesu din mu bio. Ná wobekura wɔn mudi mu pintinn anaa? Petro ne Yohane buae sɛ: “Sɛ ɛteɛ Onyankopɔn anim sɛ yetie mo sen Nyankopɔn a, mummu ntɛn! Na yɛn de, yentumi, gye sɛ yɛka nea yɛahu na yɛate.” Saa bere no, wogyaa asomafo no, na ntɛm ara na wɔne wɔn ahokafo no de aseda maa Onyankopɔn, srɛɛ no sɛ: “Afei de, [Yehowa], . . . ma wo nkoa mfa nnam nyinaa nka w’asɛm.” Enti wɔkɔɔ so kaa asɛm no denam Yehowa honhom mmoa so.—Asomafo no Nnwuma 4:19, 20, 29, 31.
9 Nyamesom akannifo no kyeree asomafo no bio de wɔn koguu afiase. Nanso na ɛnyɛ Onyankopɔn pɛ sɛ wɔtra hɔ. Anadwo no, Yehowa bɔfo beyii wɔn ma enti ade kyee no, na wɔrekyerɛkyerɛ bio wɔ Yerusalem asɔrefi hɔ.—Asomafo no Nnwuma 5:17-21.
10 Ná dɛn na Sanhedrin no betumi ayɛ de asiw “asɛmpa” no trɛw ano? Wɔde asomafo no baa asennibea hɔ bio, na ɔsɔfo panyin no bɔɔ wɔn sobo sɛ: “Yɛammara mo ketee sɛ monnkyerɛkyerɛ [Yesu] din yi mu anaa? Na hwɛ, mode mo kyerɛ yi ahyɛ Yerusalem ma, na mopɛ sɛ mode onipa yi mogya ba yɛn so.” Yɛte mmuae a asomafo no de maa akokoduru so no ara wɔ mfeha 19 yi mu:
“Ɛsɛ sɛ yetie Onyankopɔn mmom sen nnipa”!
Dɛn na na Yudafo no betumi ayɛ saa mudi mu kurafo yi? Mmarakyerɛfo Gamaliel de afotu a nyansa wom mae sɛ: “Munyi mo ho mfi nnipa yi ho, na munnyaa wɔn! Na sɛ ebia agyina yi anaa adwuma yi fi nnipa a, ɛbɛsɛe. Na sɛ nso efi Onyankopɔn a, muntumi nsɛe wɔn, na moammɛyɛ sɛ mo ne Onyankopɔn po na ɛreko.”—Asomafo no Nnwuma 5:27-39.
11 Enti wɔhwee asomafo no hyɛɛ wɔn sɛ wonnyae asɛm no ka, na afei wogyaa wɔn. Dɛn na wɔyɛe? Wɔn ani gyei sɛ wɔabu wɔn sɛ wɔfata sɛ Yesu din nti wohu amane.
“Na wɔannyae Yesu Kristo ho asɛmpa no ka ne kyerɛkyerɛ asɔrefi ne afie mu da biara da.” (Asomafo no Nnwuma 5:40-42)
Ná Ahenni adedifo yi asi wɔn bo sɛ wobegyina biribiara a ehia ano na ama wɔatumi akɔ so ayɛ Onyankopɔn adwuma no. Wɔnam saayɛ so yɛɛ nhwɛso fɛfɛ maa nokware Nyankopɔn no adansefo nyinaa, a wɔakɔ so aka Ahenni no ho asɛm “gua so ne afi mu” de besi nnɛ.—Asomafo no Nnwuma 20:20, 21.
AHENNI HO “ASƐMPA” NO TRƐW
12. Sɛnea wɔakyerɛ wɔ Asomafo no Nnwuma 8:1-4 no, ɔkwan bɛn so na mpɛn pii no ɔtaa ma “asɛmpa” no trɛw kɛse bio?
12 Ɔtaa no mu yɛɛ den bio ma enti wɔn nyinaa hwete kɔɔ Yudea ne Samaria a ɛbemmɛn hɔ no ma ɛkaa asomafo no nkutoo. Nanso eyi maa adanse no trɛwee mmom, efisɛ “wɔn a wɔhwetee no kyinkyin kɔkaa asɛmpa no.” (Asomafo no Nnwuma 8:1-4) Nea ɛyɛ anika no, ade koro no ara na aba nnɛ. Bere a kannkabi nniso abɔ mmɔden sɛ wobesiw Yehowa Adansefo kwan denam hwete a wɔhwete wɔn kɔ mmeae a atew ne ho no, wɔakɔ so aka asɛm no wɔ hɔ ma “asɛmpa” no atrɛw.
13, 14. (a) Bere bɛn na dapɛn titiriw a Onyankopɔn de dom Yudafo no baa awiei, na henanom na saa bere no wogyee wɔn sɛ Ahenni adedifo? (b) Paulo nsɛm a ɛwɔ Asomafo no Nnwuma 13 ne Romafo 11 no di eyi ho adanse dɛn?
13 Nanso wɔ saa afeha a edi kan no mu no, Yudafo ne Samariafo a wɔbɛn wɔn no nkutoo na na wɔde Ahenni ho asɛm no bɛkɔ akɔma wɔn anaa? Wɔn nkutoo mu na na ɔsoro Ahenni no mufo nyinaa befi anaa? Wɔ adanse a ɛyɛ nwonwa a wodii mu mpo no, na ɛnyɛ saa na ɛbɛyɛ. Ɛda adi sɛ afe 36 Y.B., bere a “dapɛn” titiriw a Onyankopɔn de dom Yudafo no baa awiei no, Yehowa kyerɛɛ Petro kwan ma ɔkɔsraa Italiani sraani panyin Kornelio wɔ ne fie wɔ Kaesarea. Bere a na Petro reka asɛm no akyerɛ onipa a ɔnyɛ Yudani yi ne ne fifo no, honhom kronkron baa wɔn so, na ɛsraa wɔn ma wɔbɛyɛɛ Ahenni no adedifo. Wɔbɔɔ wɔn asu sɛ Amanaman mufo momonotofo a wodii kan sakra baa Kristosom mu.—Asomafo no Nnwuma 10:1-48.
14 Akyiri yi, bere a ɔsomafo Paulo ne n’ahokafo hyiaa ɔtaa a ano yɛ den wɔ Yudafo a na wɔwɔ Antiokia a ɛwɔ Pisidia no nsam no, Paulo ka kyerɛɛ saa Yudafo no sɛ: “Ehia sɛ anka wɔka Onyankopɔn asɛm no kyerɛ mo kan; na sɛ musum kyene na mubu mo ho sɛ monsɛ daa nkwa no yi, hwɛ, yɛdan akɔ amanaman no nkyɛn. Na saa ara na [Yehowa] ahyɛ yɛn sɛ: Mede wo masi hɔ sɛ amanaman kanea, na woayɛ nkwagye akodu asase ano.” (Asomafo no Nnwuma 13:46, 47) Sɛnea akyiri yi Paulo kae wɔ mfatoho bi mu no, na saa Yudafo a wonnye nni no te sɛ ngodua bi ho nnubaa ankasa a wotwa kyenee. Anka wobetumi anya Ahenni adedifo dodow no nyinaa afi Yudafo mu. Nanso, na wɔde “amanaman” mufo bɛhyɛ wɔn ananmu te sɛ ngodua pa a wɔde wuram de hyem, ma enti “[honhom mu] Israel nyinaa,” Ahenni no mufo nyinaa, “benya nkwa.”—Romafo 11:13-26; Galatifo 6:16.
MUDI MU KURA WƆ “AMANEHUNU” MU
15, 16. (a) Dɛn na Paulo yɛe na ɔka faa “amanehunu” ho, na nhwɛsode fɛfɛ bɛn na eyi de ma yɛn? (b) Dɛn na ɛsɛ sɛ yɛyɛ wɔ ɔtaa a efi nniso ahorow anaa abusuafo hɔ no ho, na wɔahyɛ yɛn bɔ sɛ ɛbɛkɔ akowie dɛn mu?
15 Wɔ ɔtaa afoforo a saa ɔhwɛfo kwantufo nokwafo, ɔsomafo Paulo, hyiae nyinaa akyi no, ɔsan kɔɔ Antiokia, sɛnea ɛbɛyɛ na wakɔhyɛ asuafo no den, ahyɛ wɔn nkuran na wasiesie nhyehyɛe ahorow a ɛwɔ wɔn asafo no mu. Saa bere no na Paulo kae sɛ:
“Etwa sɛ yɛnam amanehunu pii mu kɔ Onyankopɔn ahenni mu.”—Asomafo no Nnwuma 14:21-23.
16 Paulo kɔɔ so faa nsɛnnennen ne sɔhwɛ ahorow no mu bi. Nanso ɔyɛɛ nhwɛso pa wɔ ne mudi mu a okurae pintinn no mu. Ɔyɛɛ nhwɛsode fɛfɛ maa nnipa pii a wɔwɔ hɔ nnɛ a ɛsɛ sɛ wɔko ma gyidi no denneennen. Wɔahwe eyinom mu binom, de wɔn mu bi agu afiase na wɔn nkwa ankasa aba asiane mu. Wɔahyia ɔsɔretia afi kannkabi nniso ahorow anaa wɔn abusuafo a wɔdɔ wɔn yiye mpo hɔ. Abusuafo apow ebinom esiane “ahenni no ho asɛmpa yi” a wɔagye atom na wodi ho dwuma nti. (Mateo 24:14) Nanso, Yesu nsɛm yi akyekye saafo werɛ yiye: “Obi nni hɔ a wagyaw ofi, [anaa nuabarimanom,] anaa nuabeanom, anaa ɛna, anaa agya, anaa mma, anaa asase, me ne asɛmpa no nti, na ɔrennya afi ne nuabarimanom ne nuabeanom ne ɛnanom ne mma ne nsase mmɔho ɔha, a ɔtaa ka ho, seesei wɔ bere yi mu, ɛne daa nkwa wɔ wiase a ɛreba no mu.” (Marko 10:29, 30) Wonya “mmɔho ɔha” ampa fi wɔne Yehowa ne ne Ba no ntam abusuabɔ a emu yɛ den, ne wɔne Yehowa wiase nyinaa abusua no fekubɔ a ɛyɛ anigye no mu.
17. (a) Sɔhwɛ ahorow bɛn nso na tete Kristofo no hyiae? (b) Nhwɛso ne afotu a ɛso nni bɛn na Paulo de maa yɛn?
17 Ná ɛsɛ sɛ ɔsomafo Paulo ne n’ahokafo no ko tia wiase no ɔbrasɛe ne honam fam ade dodowpɛ ho sɔhwɛ ahorow nso. Ná wɔyɛ nnipa ara kwa, te sɛ yɛn. Sɛ yehyia nnɛɛdɛesɛm a ɛtete saa a, ɛsɛ sɛ yɛyɛ nea Paulo a ɔkaa sɛɛ no yɛe no: “Mehyɛ me nipadua ahometew, na midi no nya, na mereka asɛm makyerɛ ebinom yi, m’ankasa manyɛ nea ɔmfra.” Na te sɛ Paulo no, yɛn nso yebetumi anya ahobammɔ afi Onyankopɔn Ahenni ho asɛm a yɛbɛka akyerɛ yɛn mfɛfo no mu. Sɛnea Paulo ka faa ɔsom kronn a ɛte saa ho no: “Sɛ menka asɛmpa no a, anka minnue!”—1 Korintofo 9:16, 27.
“DI NKONIM BORO SO”
18. Nkuranhyɛ bɛn na Paulo de gyaw nokware Kristofo nyinaa, na dɛn na woyɛ wɔ ho?
18 Ɔsomafo Paulo ka kyerɛɛ ne mfɛfo Kristofo a wɔasra wɔn nso sɛ: “Na yɛyɛ [Onyankopɔn] mma a, yɛyɛ adedifo nso, Onyankopɔn adedifo ne Kristo yɔnkodifo, nanso gye sɛ yɛne no hu amane ansa na wɔahyɛ yɛn ne no anuonyam bi.” Nanso nea ɔkɔɔ so kae no fa “nguan foforo” “nnipa kuw kɛse” no nso ho saa ara, wɔn a nnɛ wɔrepere hwehwɛ daa nkwa akatua pa wɔ paradise asase so no. (Adiyisɛm 7:9; Yohane 10:16) Paulo hyɛ nokware Kristofo nyinaa nkuran sɛ:
“Hena na ɔbɛtetew yɛne Kristo dɔ mu? Ahohia anaa ahometew anaa ɔtaa anaa ɔkɔm anaa adagyaw anaa amanenya anaa nkrate? . . . Nanso eyinom nyinaa mu na yɛnam nea ɔdɔɔ yɛn no so di nkonim boro so. Na migye midi ampa sɛ owu anaa nkwa anaa abɔfo anaa atumfo anaa nneɛma a ɛwɔ hɔ anaa nneɛma a ɛrebɛba anaa ahoɔden anaa ɔsoro anaa ebun anaa abɔde foforo biara rentumi ntetew yɛne Nyankopɔn dɔ a ɛwɔ yɛn Awurade Kristo Yesu mu no mu.” (Romafo 8:17, 35-39; hwɛ 2 Korintofo 11:22-28 nso.)
Worenya ahotoso a ɛte saa wɔ Onyankopɔn dɔ ne Awurade Yesu Ahenni no ‘ba’ mu anaa? Ɛsɛ sɛ woyɛ saa!
19. Kɔkɔbɔ bɛn na Paulo de mae wɔ asiane foforo bi a ɛyɛ hu ho?
19 Asiane foforo nso a ehia sɛ wohyɛ wo ho den wɔ ho wɔ “nna a edi akyiri” yi mu ne atoro nkyerɛkyerɛ. Paulo de eyi nso ho kɔkɔbɔ mae. (Asomafo no Nnwuma 20:29, 30; 2 Timoteo 3:1, 13) Atoro akyerɛkyerɛfo fi he na ɛba, na ɔkwan bɛn na yebetumi afa so abɔ yɛn ho ban afi wɔn ho?
[Adesua no ho Nsɛmmisa]
