Ahenni No—Dɛn Nti na Akyɛ ‘Ba’ Saa?
Ti 5
Ahenni No—Dɛn Nti na Akyɛ ‘Ba’ Saa?
1. Esiane nea ɛwɔ Romafo 8:22 no nti, nsemmisa bɛn na ɛsɔre?
ƆSOMAFO Paulo kyerɛw sɛ: “Yenim sɛ abɔde nyinaa penepene na ɛko awo.” (Romafo 8:22) Dɛn nti na ɛte saa? Dɛn nti na Onyankopɔn ama kwan ma ɔko, nsɛmmɔnedi, ɔyare ne amanehunu akɔ so wɔ abakɔsɛm a wɔakyerɛw ato hɔ no mu mfe 6,000 a atwam no? Dɛn na ankɔ yiye ma enti adesamma a wɔbɔɔ wɔn sɛ wɔntra ase sɛnea ɔsoro mmara te no, afei de ɛsɛ sɛ amumɔyɛ haw wɔn? Dɛn nti na yɛn soro Agya no nsiesiee tebea yi? Sɛ Ahenni no ne ano aduru a, dɛn nti na akyɛ ‘ba’ saa? So yebetumi anya anidaso ampa sɛ Onyankopɔn bɛsakra tebea horow a ɛyɛ hu yi ma ayɛ yiye anaa?
2. Wɔ Onyankopɔn tumidi ase no, anka ɛsɛ sɛ asase yɛ dɛn?
2 Wɔ “Mmeresanten Hene” no nniso anaa tumidi kɛse ase no, na anka ɛsɛ sɛ tebea horow a eye koraa tra asase so fi bere a wɔbɔɔ ade wɔ Eden no. Bere a ɔbarima ne ɔbea a wodi kan no woo mma, na adesamma abusua no dɔe ma wɔbɛyɛɛ mmusua akuw akuw ɔpehaha pii no, na anka ɛsɛ sɛ asase mũ no nyinaa bɛyɛ paradise fɛfɛ a anigye serew ne yɔnko dɔ a ɛwɔ adesamma mmusua a wɔwɔ asomdwoe ntam ayɛ so ma.—Fa toto Ɔsɛnkafo 2:24 ho.
3. (a) Hena suban so na wɔbɔɔ onipa? (b) Adwuma bɛn na wɔde hyɛɛ nnipa baanu a wodi kan no nsa sɛ wɔnyɛ? (d) Asɛm bɛn na afei ɛsɛ sɛ yebisa?
3 Ná ɛno ne Ɔbɔadeɛ a ɔwɔ ɔdɔ no atirimpɔw ma asase yi bere a ɔbɔɔ onipa wɔ n’ankasa suban so na ofi onipa no mu yɛɛ ɔbea no. Efisɛ Bible adebɔ ho asɛm no ka kyerɛ yɛn sɛ:
“Ɔbarima ne ɔbea na ɔbɔɔ wɔn. Na Onyankopɔn hyiraa wɔn na Onyankopɔn ka kyerɛɛ wɔn sɛ: Monwo, na monnɔ, na monyɛ asase so ma, na monhyɛ so, na munni ɛpo mu mpataa ne wim nnomaa ne mmoa a wɔkeka wɔn ho wɔ asase so nyinaa so. . . . Na Onyankopɔn huu nea ɔyɛe nyinaa na hwɛ, eye papa.” (Genesis 1:26-31)
Ɛnde dɛn nti na Onyankopɔn abɔde a wɔwɔ asase so no nsɛ nea “eye papa” nnɛ?
WOTWA ONYANKOPƆN TUMIDI MPOA
4. (a) Onyankopɔn mmara bɛn na ɛkyɛn so, na dɛn ntia? (b) Hena na ɔpɛe sɛ ɔyɛ mmara foforo, na ɔkwan bɛn so na ɔfa yɛɛ eyi?
4 Ná Onyankopɔn mmara horow na ɛyɛ adebɔ nnyinaso. Na eyinom mu titiriw ne ɔdɔ mmara no. Onyankopɔn ankasa “ne dɔ.” (1 Yohane 4:8) Nanso afei obi bae a ɔpɛe sɛ ɔyɛ mmara ahorow a ɛyɛ soronko ma adesamma. Ná ‘onii’ no yɛ ‘Onyankopɔn ba’ a ɔyɛ ɔbɔfo a aniwa nhu no, na akyinnye biara nni ho sɛ na ɔyɛ wɔn a bere a Yehowa bɔɔ asase ne biribiara a ɛwɔ so no ‘wɔbɔɔ ose’ no mu biako. (Hiob 38:7) Ɔbɔfo yi dan ne ho bɛyɛɛ satan, Onyankopɔn tamfo. Ɔpɛe sɛ ɔde ne ho, hwehwɛe sɛ wɔsɔre no, na ɔde atuatew honhom bae. (Efesofo 2:1, 2; fa toto Luka 4:5-7 ho.) Ɔbɔɔ pɔw bɔne sɛ ɔde yɛn awofo a wodi kan no bedi dwuma de anya n’ankasa pɛsɛmenkominya akɔnnɔde. Ɔkwan bɛn so na ɔfa yɛɛ eyi?
5, 6. (a) Ahyɛde a ɛnyɛ den bɛn na Onyankopɔn de maa Adam? (b) Dɛn na Satan yɛe, na dɛn nti na wɔfrɛ no “Ɔbonsam” ma ɛfata?
5 Wɔ Eden paradise no mu no, Adam ne Hawa na wonyaa Yehowa nniso a adɔe wom no. Onyankopɔn de biribiara a ehia ma wɔde ahwɛ wɔn ho honhom fam ne honam fam nyinaa mae. Sɛnea ɛbɛyɛ na wɔn ankasa yiyedi akɔ so no, ɔhwehwɛe nso sɛ wotie no sɛ wɔn Amansan Hene. Sɛnea ɛbɛyɛ na wɔayɛ eyi no, na ɔde ahyɛde bi a ɛnyɛ den ama Adam sɛ, ɛnsɛ sɛ odi “papa ne bɔne hu dua” no bi. Ná eyi fa Hawa nso ho bere a akyiri yi wɔbɔɔ no no. Ɛnyɛ sɛ na Onyankopɔn de biribi rekame wɔn, efisɛ na nnua afoforo wɔ turo no mu no a ɛmaa wɔn nnuaba ahorow ahorow a ɛyɛ dɛ na ɛmee. Nanso, sɛ wɔyɛ Onyankopɔn asɛm ho asoɔden di saa aduaba yi a, ‘owu na wobewu.’ Ɛdenam ɔwɔ bi so no, otuatewfo Satan nam anifere kwan so dii kan kɔɔ Hawa nkyɛn na ɔkae sɛ: “Ɛnyɛ owu na mubewu: Na Onyankopɔn nim sɛ da a mubedi bi no, mo ani bebue, na moayɛ sɛ Onyankopɔn ahu papa ne bɔne.”—Genesis 2:17; 3:1-5.
6 Ɛno ma ɛbɛyɛɛ te sɛ nea Onyankopɔn yɛ ɔtorofo. Nanso Satan mmom na na ɔyɛ ɔtorofo. Wɔbɛfrɛɛ saa “atoro agya” no ma ɛfatae sɛ Ɔbonsam, a ase ne “Ɔnototofo.” (Yohane 8:44) Ná eyi yɛ Yehowa tumidi, ne Hene a odi wɔ n’abɔde so no mpoatwa tee. Ɛkyerɛe sɛ na Onyankopɔn de nimdeɛ a wɔwɔ ho kwan sɛ wonya rekame wɔn, wontumi mfa wɔn ho nto Onyankopɔn nniso so, na sɛ wɔde wɔn ho na wɔfa wɔn ankasa kwan so de wɔn ankasa gyinapɛn ahorow a ɛfa “papa ne bɔne” ho sisi hɔ a ebesi wɔn yiye.
7. Akwan bɛn so na nnipa baanu no dii nkogu wɔ sɔhwɛ mu?
7 Dɛn na ɔbea no yɛe wɔ anototo asɛm yi ho? Wantumi anhwɛ ne koma so yiye na ɔmaa kwan maa akɔnnɔ bɔne gyee ntini wɔ hɔ. Afei akɔnnɔ yi nyinsɛnee ma enti wɔdaadaa no ma ofi ne pɛ mu yɛɛ bɔne denam Onyankopɔn asɛm ho asoɔden a ɔyɛe no so. Eyi mu no, ɔtew ne kunu a anka ɛsɛ sɛ ɔne no susuw asɛm no ho no tiyɛ no nso ho atua. Na dɛn na ɔbarima no yɛe wɔ ho? “Ɛnyɛ Adam na wɔdaadaa no,” nanso ɔpawee sɛ ɔne Hawa bɛkɔ, fii ne pɛ mu de ne ho bɔɔ ɔbea no ho wɔ n’atuatew kwan a ɔfaa so no mu. Na awerɛhow da bɛn ara na ɛno yɛ maa yɛn awofo a wodi kan, ne adesamma abusua mũ no nyinaa sɛɛ yi!—Genesis 3:6, 7; 1 Timoteo 2:14; Fa toto Yakobo 1:14, 15 ho.
8. (a) Atemmu a ɛfata bɛn na Onyankopɔn de baa Adam ne Hawa so? (b) So na wɔwɔ akra a ɛbɛkɔ soro anaa hell ahoyeraw bi mu wɔ owu akyi? (d) Ɔhene bɛn na obedii yɛn so, na dɛn ntia?
8 Ná Adam ne Hawa abu Onyankopɔn tumidi abomfiaa koraa. Enti afei, sɛnea ɛne ne mmara hyia no, Onyankopɔn buu wɔn kumfɔ na ɔka kyerɛɛ Adam sɛ:
“Woyɛ dɔte, na dɔte mu na wobɛsan akɔ.” (Genesis 3:19)
Ná Onyankopɔn nkyerɛ wɔ ha sɛ Adam nipadua nko na ebewu bere a biribi a ɛhyɛ ne mu, “ɔkra” anaa “honhom” bi, guan fi ne nipadua no mu kɔ so tra ase wɔ ɔsoro anaa hell bi. Dabi, efisɛ na Adam ankasa yɛ “ɔkra.” Sɛnea adebɔ ho asɛm no ka wɔ Genesis 2:7 no: ‘Yehowa Nyankopɔn de fam dɔte nwenee onipa, na ohuu nkwa home guu ne hwene mu, na onipa bɛyɛɛ ɔkra teasefo.’ Bere bi akyi no, Adam ne Hawa nyinaa wuwui—sɛ akra. Na esiane sɛ na adesamma abusua no nyinaa yɛ Adam a bɔne agu ne ho fĩ no asefo nti, yɛn nyinaa nyaa bɔne ne owu fii awo mu. “Ɔkra a ɔyɛ bɔne no, ɔno ara na obewu.” (Hesekiel 18:4, 20) Yiw, sɛ́ adesamma a yɛyɛ akra no, yɛn nyinaa wuwu. Owu abedi yɛn so sɛ ɔhene.—Romafo 5:12, 14; 6:12; Ɔsɛnkafo 3:19, 20; 9:5, 10; Dwom 6:5; 115:17.
ONIPA MUDI MU KURA HO ƆSƐMPƆW NO
9. Ɔsɛmpɔw foforo bɛn na ɛsɔree wɔ Eden?
9 Nanso ɛnyɛ Onyankopɔn tumidi nkutoo na Eden atuatew no maa ɛho baa asɛm. Ɛde ɔsɛmpɔw foforo nso bae. Esiane sɛ na adesamma a wodi kan a Onyankopɔn de wɔn traa asase so no abɛyɛ wɔn a wɔanni nokware wɔ sɔhwɛ mu nti, na biribi tɔ sin wɔ Onyankopɔn adebɔ ho anaa? Ná wobetumi aka sɛ ne nnwuma nyinaa yɛ “pɛ” anaa?
10. (a) Ná mfomso wɔ Onyankopɔn abɔde ho anaa, na dɛn nti na wubua saa? (b) Ɔkwan bɛn so na adesamma bɛfa de akyerɛ sɛ wɔyɛ ‘Onyankopɔn sɛso’?
10 Ná anka Onyankopɔn betumi asɛe Adam ne Hawa nyinaa prɛko na wabɔ nnipa afoforo baanu. Nanso, so na ɛno rennyɛ gye a wagye atom sɛ na mfomso bi wɔ n’abɔde a wodi kan no ho anaa? Ná mfomso bi nni ho. Nea na ɛte ara ne sɛ na yɛn awofo a wodi kan no apaw sɛ wobedi tumi a wɔwɔ sɛ wɔpaw nea wɔbɛyɛ no ho dwuma ɔkwammɔne so. Sɛ na anka wɔyɛ mfiri a ɛsɛ sɛ wɔyɛ nea ɛteɛ wɔ tebea nyinaa mu a, ɛnde na anka aka wɔn biribi wɔ abrabɔ fam. Ná anka wɔnyɛ ‘Onyankopɔn sɛso.’ Yehowa yɛ nneɛma pɛpɛɛpɛ bere nyinaa, wɔ ɔkwan pa so, efisɛ ɔyɛ ɔdɔ. Ɔpɛ sɛ ɔdɔ kanyan n’abɔde a wonim nyansa no nso wɔ nea ɛteɛ a wɔbɛyɛ no mu.—Genesis 1:26, 27; 1 Yohane 5:3.
11. Ntease bɛn na Deuteronomium 32:4, 5 ma yenya wɔ tebea a na ɛwɔ hɔ saa bere no mu?
11 Wɔakyerɛw wɔ Yehowa ho sɛ: “Ɔbotan no n’adeyɛ yɛ pɛ, na n’akwan nyinaa yɛ trenee; ɔyɛ nokware Nyankopɔn na nkontompo nni no mu; ɔtreneeni ne teefo ne no.” N’abɔde a wɔyɛ adesamma nso betumi ayɛ anokwafo, atreneefo ne teefo. Enti ɔmaa Adam ne Hawa kwan sɛ wɔnwo mma. Ɛwom sɛ eyinom nyaa bɔne su fii wɔn awofo hɔ de, nanso na ebinom bɛwɔ wɔn mu a wɔbɛda wɔn dɔ a enhinhim a wɔwɔ ma wɔn Bɔfo no adi na wɔakura wɔn mudi mu ama no, wɔ wɔn honam a ɛnyɛ pɛ ne sɔhwɛ ne ɔtaa ahorow a emu yɛ den a ɛbɛto wɔn mpo mu. Nanso na adesamma afoforo ‘bedi nsɛmmɔne’ na wɔada wɔn ho adi sɛ wɔnnyɛ Onyankopɔn mma. Ná ɛno bɛyɛ nea wɔn ankasa apaw, na nkekae no ho asɛm bɛda wɔn so na ɛnyɛ Onyankopɔn so.—Deuteronomium 32:4, 5.
12, 13. (a) Ɔkwan bɛn so na Satan bɔɔ Onyankopɔn ahohora wɔ Hiob ho? (b) Mmuae bɛn na Hiob de mae, na dɛn na efii mu baa ne so?
12 Onipa mudi mu kura ho ɔsɛmpɔw yi a Satan Ɔbonsam de kɔtoaa Onyankopɔn no yɛ nea wɔada no adi wɔ Bible nhoma a ɛne Hiob no mu. Ná ɔbarima Hiob a ɔtraa ase bɛyɛ mfe 2,500 wɔ Adam atuatew no akyi no ‘di mu na ɔteɛ, osuro Onyankopɔn, na oyi ne ho fi bɔne ho.’ Satan bɔɔ Onyankopɔn ahohora sɛ na Hiob teeyɛ no nyɛ papa, na na ɔsom Onyankopɔn esiane nea na obetumi anya afi mu nkutoo nti. Enti Onyankopɔn maa Satan kwan sɛ ɔnsɔ Hiob nhwɛ. Hiob ahode nyinaa fii ne nsa; asiane bi kunkum ne mma 10; akyiri yi ɔyare bɔne bi bɔɔ n’ankasa, na awiei koraa no, n’ankasa ne yere dii ne ho fɛw sɛ: “Woda so kura wo mudi yi mu ara? Dome Onyankopɔn na wu!” Ɛno akyi no, na ɛsɛ sɛ Hiob gyina nkɔmmɔdomfo baasa ahohorabɔ a fɛwdi wom no ano.—Hiob 1:6–2:13.
13 Wɔ sɔhwɛ yi nyinaa mu no, Hiob kuraa ne gyinaesi no mu denneennen:
“Meremma wonyi me mudi mfi me ho de bɛkɔ akosi sɛ megyaa mu.”
Odii Onyankopɔn nokware, na ɔnam saayɛ so de anoyi a emu yɛ den maa Satan anototo no. Enti, Yehowa de nea na Hiob wɔ kan no nyinaa mmɔho maa no sɛ akatua. Ohyiraa no bio ma ɔsan woo mmabarima baason ne mmabea baasa—na na ne mmabea no ho yɛ fɛ sen asase no sofo nyinaa.—Hiob 27:5; 42:10-15.
14. Ɔkwan bɛn so na afoforo nso abua nea Satan kae no, na eyi ho nhwɛso a eye sen biara ne nea ɛwɔ he?
14 Nanso Hiob yɛ Onyankopɔn asomfo anokwafo ɔpehaha pii a wɔama Ne koma ani agye denam bua a wɔabua Satan nkontompo a ɛne sɛ pɛsɛmenkominya adwene nkutoo nti na wɔn a wɔdɔ Yehowa no tie no na wɔsom no no mu biako pɛ. Eyi ho nhwɛso a eye sen biara ne Onyankopɔn Ba Yesu a bere a na ɔwɔ asase so no, “ɔtɔɔ ne bo ase huu asennua ho amanne, na wammu aniwu,” a ne nyinaa fi anigye a na ɔwɔ sɛ obefi ne koma nyinaa mu akɔ so ayɛ ɔsom adwuma a Onyankopɔn de maa no no.—Hebrifo 12:2.
WƆABUA ƆHOHORAFO NO MPOATWA NO
15. Dɛn nti na wobetumi aka sɛ wɔabua Yehowa afã a ɛwɔ mpoatwa no mu no?
15 Afei, bere a wɔahyɛ ato hɔ no aka kakraa bi. Bɛyɛ mfe 6,000 yi mu no, Yehowa akɔ so adi ne fam de no ho adanse de abua mpoatwa no. Wakyerɛ sɛ obetumi anya, na ɔwɔ mmarima ne mmea wɔ asase so a wokura wɔn mudi mu, ɛmfa ho ɔtaa anaasɛ sɔhwɛ a ɛyɛ hu bɛn ara a Satan de ba wɔn so no. Ɔbonsam de nneyɛe bɔne biara a obetumi asusuw ho adi dwuma atia wɔn, nanso ayɛ ɔkwa. Onyankopɔn asomfo anokwafo ama wɔn Agya koma ani agye, na wɔama wanya mmuae a ɔde bɛma nea ‘ɔbɔ Onyankopɔn ahohora,’ a ɔne Satan, ɔtamfo kɛse no.—Mmebusɛm 27:11.
16. (a) Nkonimdi bɛn mu kyɛfa na Onyankopɔn nkurɔfo anokwafo no bi anya dedaw? (b) Dɛn nti na Ahenni no nkoa betumi anya wɔn sodifo no mu ahotoso?
16 Bere koro no ara, Yehowa nam ɔkwan a ɔfa so yɛ ade a ɛmma ɔnsɛe bere ne ahoɔden pii no so akɔ so apaw nnipa a wɔne Kristo bedi tumi wɔ ɔsoro Ahenni no mu no afi saa anokwafo yi mu. Ɛwom sɛ Satan atoto wɔn ano “yɛn Nyankopɔn anim awia ne anadwo” de, nanso wɔadi ne so nkonim “wɔn adanse asɛm no” nti, “na wɔannɔ wɔn kra de akosi owu mu.” Te sɛ wɔn Nhwɛsofo Yesu Kristo no, wɔpɛ sɛ wɔkyerɛ wɔn dɔ a ɛkyɛn so no ma Onyankopɔn ne wɔn yɔnko denam wɔn nkwa mpo a wɔde bɛma no so. Ahotoso bɛn ara na adesamma betumi anya wɔ ɔsoro Ahenni a wɔn a wɔwɔ mu ne Kristo ne ne yɔnkodifo 144,000 no—a wɔn nyinaa yɛ mudi mu kurafo a wɔasɔ wɔn ahwɛ na wɔadi wɔn ho adanse—no mu sɛɛ yi!—Adiyisɛm 12:10, 11; 14:1-5; 20:4; Yohane 15:13.
17. Henanom na wonya Ahenni no ahemman a ɛwɔ asase so no di?
17 Wɔama afoforo, te sɛ Hiob a wodii nokware maa Onyankopɔn kosii owu mu ansa na Kristosom refi ase no, awerɛhyem sɛ wobenya “owusɔre a eye kyɛn so” akɔ “asase foforo” bi so. (Hebrifo 11:35; 2 Petro 3:13) Wɔbɛyɛ “oguanhwɛfo pa” Yesu Kristo “nguan foforo” no mufo a wɔwɔ daa nkwa wɔ paradise asase so no ho anidaso. Afei nso, wɔto nsa frɛ wɔn a wɔte sɛ nguan na woyi ayamye adi kyerɛ Kristo “nuanom” a wɔasra wɔn wɔ “nneɛma nhyehyɛe no awiei” bere no mu no sɛ wɔmmɛfa Ahenni no ahemman a ɛwɔ asase so no nni. (Yohane 10:11, 16; Mateo 24:3; 25:31-46) Wogye wɔn nkwa bere a ɔsoro abɔfo no gyae “ahohiahia kɛse” no mframa no mu gu yɛn asase yi so no. Wopɛ sɛ woyɛ saa “nnipakuw kɛse” a sɛ Onyankopɔn Ahenni ‘ba’ bɛsɛe amumɔyɛfo aman no a, wobenya wɔn ti adidi mu no biako anaa? Wubetumi ayɛ saa! Na sɛ́ mudi mu kurafo no, wo nso wubetumi akyerɛ sɛ Onyankopɔn kwan nkutoo na etumi de obi kɔ daa nkwa mu.—Adiyisɛm 7:1-3, 9, 13, 14.
18. (a) Dɛn nti na ɛrenhia bio da sɛ wɔsan Yehowa tumidi ho? (b) Henanom na wɔwɔ anidaso bi a ɛyɛ anigye seesei? (Dwom 37:11, 29)
18 Sɛ Onyankopɔn Ahenni nya sɛe Satan ne ne nneɛma nhyehyɛe a aporɔw no a, ɛrenhia bio da sɛ wɔbɛsan Onyankopɔn tumidi ho. Saa bere no na wɔabua ɔsɛmpɔw a otuatewfo Satan de bae no prɛko pɛ. (Nahum 1:9) Wɔ asase yi so ha ara no, wɔbɛda fata a tumidi a egyina Onyankopɔn dɔ mmara so no fata, teɛ a ɛteɛ, ne kyɛn a ɛkyɛn so no adi, na Ahenni no ‘bɛba’ abɛtew Amansan Hene Awurade Yehowa din kɛse no ho. Wɔ ‘abɔde a wɔpenepene’ no mufo a mprempren wɔsom Onyankopɔn wɔ nokwaredi mu no fam no, anidaso a ɛyɛ anigye bɛn ara na Onyankopɔn Ahenni wɔ ma wɔn sɛɛ yi! So worebɔ mpae denneennen ama ‘aba’?—Romafo 8:22-25.
[Adesua no ho Nsɛmmisa]
[Kratafa 44 adaka]
DƐN NTI NA ONYANKOPƆN AMA BƆNE HOKWAN BERE TENTEN SAA?
● Sɛnea ɛbɛyɛ a fata a Yehowa amansan tumidi fata, teɛ a ɛteɛ, sɛnea ɛkyɛn so na ɛtra hɔ daa no bɛda adi
● Sɛnea ɛbɛyɛ a ɔde bɛkyerɛ prɛko pɛ sɛ nnipa nniso biara a atew ne ho afi Onyankopɔn ho no de nnipa kɔ awerɛhow ne amanehunu nkutoo mu
● Sɛnea ɛbɛyɛ a ɔde bɛma Onyankopɔn Ahenni bɔhyɛ ahorow ne Ahenni no adedifo paw ne wɔn sɔhwɛ akɔ so
● Sɛnea ɛbɛyɛ a ɛbɛma wɔanya bere de akyerɛ, te sɛ nea wɔyɛ wɔ asennibea, sɛ Onyankopɔn asomfo betumi akura wɔn mudi mu a sɔhwɛ a efi Satan hɔ biara mfa ho
● Sɛnea ɛbɛyɛ a ɔde bɛkyerɛ sɛ osetie a egyina Onyankopɔn dɔ mmara so no nkutoo ne ɔkwan a ɛde kɔ daa nkwa mu
● Sɛnea ɛbɛyɛ a ɔde bebua Satan mpoatwa no korakora na ɔde mmara mu asɛnnahɔ a emu da hɔ pefee bi asi hɔ a ɛho renhia bio da sɛ wɔsan Yehowa din ne ne tumidi ho
