‘Ahenni no Abɛn’
Ti 8
‘Ahenni no Abɛn’
1. Ná dɛn nti na Yohane asɛm a ɛwɔ Mateo 3:1-10 yɛ nea ɛbae ne bere mu pɛpɛɛpɛ?
MA YƐNHWEHWƐ “Ɔbirɛmpɔn a Wɔasra no” no dwumadi mu yiye nkɔ akyiri nhwɛ bere a ɔbae nea edi kan no. Wɔtee amanneɛbɔ a ɛma onipa bɔ piriw no fii Osuboni Yohane anom nea edi kan sɛ: “Monsakra mo adwene na ɔsoro ahenni no abɛn.” (Mateo 3:2) Na nea ɔbɛyɛ Ɔhene daakye no reyɛ apue! Bere a ‘dapɛn a ɛto so aduɔson,’ “dapɛn” a ɔdom titiriw bi wom, no bɛnee no, na bere adu sɛ Yudafo no sakra wɔn adwene fi wɔn bɔne a wɔyɛ tiaa trenee mmara a wɔn Nyankopɔn Yehowa de maa wɔn no ho. Afei na Israel rebɛhyɛn atemmu da bi mu. Enti, Yohane kɔɔ so ka kyerɛɛ ɔman no anyamesom akannifo nyaatwomfo no sɛ: “Nhurutoa mma! Hena na ɔkyerɛɛ mo sɛ monguan mfi abufuw a ɛreba no ho? Ɛnde monsow aba a ɛfata adwensakra. Nanso wɔde abonnua no ato nnua no ntini ho dedaw; enti dua biara a ɛnsow aba pa no wobetwa ato gya mu.”—Mateo 3:7, 8, 10.
2. (a) Ɔkwan bɛn so na na ɛsono Yesu asubɔ no? (b) ‘Ofii n’adwuma ase’ no, dɛn na na ɛsɛ sɛ ogyina ano?
2 Saa bere no na Yesu fii Galilea baa Yordan ho na obebisaa Yohane sɛ ɔmmɔ no asu. Ná Yohane nim sɛ Yesu nni bɔne, na mfiase no wampene. Nanso, na Yesu asubɔ no bɛyɛ soronko. Ná ɛbɛyɛ ne ho a ɔde rema Yehowa ma wabɛyɛ adwuma pɔtee a na n’Agya wɔ ma no wɔ asase so no ho sɛnkyerɛnne. Ɛnde sɛnea ɛfata no wɔbɔɔ Yesu asu wɔ nsu mu.
“Na ɔrebɔ mpae no, ɔsoro buei, na honhom kronkron sianee ɔhonam tebea mu te sɛ aborɔnoma baa ne so, na nne bi fi soro kae sɛ; wo ne me dɔba, wo na wosɔ m’ani. Yesu fii n’adwuma ase no na wadi [bɛyɛ] mfirihyia aduasa.”
Ntɛm ara, sɛ́ Mesia ne Ɔhene a wɔapaw no no, ɔbɛyɛɛ obi a Ɔwɔ dedaw no, Ɔbonsam, ne saa Yudafo anyamesom akannifo a wofi nyaatwom mu kae sɛ wɔsom Onyankopɔn no, sɔre tiaa no.—Luka 3:21-23.
3. Nsonsonoe bɛn na ɛda ɔkwan a Yesu faa so dii sɔhwɛ ho dwuma ne ɔkwan a Adam ne Hawa faa so no mu?
3 “Na Yesu fii Yordan ho san bae a honhom kronkron ayɛ no ma, na honhom no de no kɔɔ sare so. Na ɔbonsam sɔɔ no hwɛe adaduanan.” (Luka 4:1, 2) Satan huu Yesu sɛ Onyankopɔn bɔhyɛ “Aseni” a bere a ɛsɛ mu no ɔbɛpɛtɛw Ɔbonsam ne ‘n’asefo’ bɔne no. So na Satan betumi ama Yehowa atirimpɔw ayɛ kwa denam yɛ a ɔbɛyɛ ma Yesu ayɛ N’asɛm ho asoɔden no so anaa? Ná Yesu adi mmuada adaduanan. Enti, Ɔbonsam too nsa frɛɛ Yesu a ɔkɔm de no no sɛ ɔmma saa sare paradadaa no so abo no bi nnan abodoo sebɔw ahorow. Saa bere yi na Yesu wɔ tumi a ɔde bɛyɛ anwonwade, nanso sɛnea ɛfata no, ɔfaa Yehowa trenee mmara no de kaa asɛm sɛ:
“Wɔakyerɛw sɛ: Ɛnyɛ abodoo nko so na onipa nam bɛtra se, na asɛm biara a efi Onyankopɔn [Yehowa] anom so.” (Mateo 4:1-4; Deuteronomium 8:3)
Ná ɔnte sɛ Hawa ne ne kunu Adam a wɔyɛɛ asoɔden kodii aduaba a wɔabara no bi ɛmfa ho sɛ na nnuan afoforo pii a wobetumi adi atra ase atwa wɔn ho ahyia no!
4. Dɛn na yebetumi asua afi ɔkwan a Yesu faa so hyiaa sɔhwɛ a ɛto so abien no mu?
4 Yesu ahobrɛase ne ne ho a ɔde to n’Agya so koraa no daa adi wɔ ɔkwan a ɔfaa so hyiaa sɔhwɛ a edi hɔ no mu. Satan bɔɔ mmɔden sɛ ɔbɛma Yesu asusuw sɛ ɔno, sɛ́ Onyankopɔn Ba no, yɛ obi a ne ho hia—okunini. Yiw, ma omfi asɔredan no atifi srɔnsrɔn hɔ ntow ne ho nkyene fam kwa, na sɛnea ɛte biara Onyankopɔn abɔfo bɛsɔw no sɛnea ɛbɛyɛ a ɔrempira. Nanso Yesu pow nkwasea nyansahyɛ a ɛte saa, na ɔfaa Yehowa mmara mu asɛm kae bio sɛ:
“Wɔakyerɛw bio sɛ nsɔ [Yehowa], wo Nyankopɔn nhwɛ!” (Mateo 4:5-7; Deuteronomium 6:16)
Asuade bi wɔ eyi mu ma wɔn a wɔkyerɛ sɛ wɔyɛ Onyankopɔn asomfo nyinaa de bedu nnɛ da yi: Mma obiara mfa gyinabea a ɔwɔ wɔ Yehowa anim no nni dwuma ɔkwammɔne so da. Hyira a Onyankopɔn behyira yɛn no nnyina yɛn som anaa dibea bi a abɛsen kɔ so, na mmom egyina kɔ a yɛbɛkɔ so atie no ahobrɛase nyinaa mu, na yɛakyerɛ obu a emu dɔ ama ne nhyehyɛe ne nneɛma a ɔhwehwɛ no so.—Filipifo 2:5-7.
5. (a) Ɔsɛmpɔw titiriw bɛn na sɔhwɛ a ɛto so abiɛsa no twee adwene sii so? (b) Ɔkwan bɛn so na Yesu de Onyankopɔn mmara buae bio? (d) Ɔkwan bɛn so na eyi yɛ nhwɛso fɛfɛ ma yɛn nnɛ?
5 Afei, yɛmmra da yi mu sɔhwɛ a edi akyiri ne nea wɔde wie no so! Oh, sɛ anka Satan betumi ayi Yesu ahwe fam wɔ ɔsɛmpɔw titiriw a ɛfa Ahenni no ho mu ɛ! Enti “Ɔbonsam faa no bio kɔɔ bepɔw tenten bi so, na ɔkyerɛɛ no wiase ahenni nyinaa ne emu anuonyam, na osee no sɛ: Sɛ wobɛkotow asɔre me a, anka mede eyinom nyinaa mɛma wo.” Nea Satan kae ne sɛ ɛdenam saa ade ketewaa yi a Yesu begyae mu asiesie so no, obetumi anya adesamma wiase mũ no nyinaa so tumi ɛhɔ ara a ɛho nhia a sɛ ɔtwɛn mfehaha pii kosi Yehowa bere a ɛsɛ mu ansa. Na bio Yesu kaa Yehowa mmara ho asɛm bere a obuae eyi no:
“Fi me so, Satan! Na wɔakyerɛw sɛ kotow sɔre [Yehowa], wo Nyankopɔn, na ɔno nko ara na som no!” (Mateo 4:8-10; Deuteronomium 6:13)
Eyi nso yɛ nhwɛso fɛfɛ ma wɔn a wɔsom Yehowa nnɛ! Ɛmfa ho sɛnea ɛbɛyɛ te sɛ nea ɔkwan no ware no, ɛnsɛ sɛ wɔn a wɔde ɔsom kronn ma Yehowa no gyae da biara da sɛ wɔde Onyankopɔn Ahenni bedi kan wɔ wɔn asetra mu. Ɛmmra sɛ wɔmman da, nkɔhyehyɛ wɔn ankasa “ahenni” nketenkete wɔ Satan wiase no mu honam fam ade dodowpɛ asetra no mu.
“WOMFI WIASE”
6. (a) Ɔkwan bɛn so na na Ahenni no abɛn afei? (b) Wɔ 1 Petro 2:21 ho dwumadi mu no, Yesu nhwɛso bɛn akyi na ɛsɛ sɛ Kristofo di?
6 Dɛn na edii Ɔbonsam sɔhwɛ ahorow a Yesu tutu gui no akyi bae? Bible kyerɛwtohɔ no ka kyerɛ yɛn sɛ:
“Yesu fii ase kaa asɛm sɛ: Monsakra mo adwene; na ɔsoro ahenni no abɛn.”
Ná ɔkwan bɛn so na Ahenni no abɛn? Ɛne sɛ na nea wɔasra no sɛ ɔbɛyɛ Ɔhene, Yesu Kristo, no ankasa wɔ hɔ afei, a ‘ɔrekyerɛkyerɛ na ɔreka Ahenni no ho asɛmpa no.’ Nkurɔfo akuwakuw pii dii n’akyi kɔɔ mmeaemmeae. (Mateo 4:17, 23-25) Yesu maa ɛdaa adi pefee sɛ na wɔn a wobegye ne nkyerɛkyerɛ no atom no ‘renyɛ wiase no fã sɛnea na ɔno nso nnyɛ wiase no fã no.’ Ɛsɛ sɛ wɔtew wɔn ho fi wiase ne n’anuɔden, ɔbrasɛe akwan no ho. Ɛsɛ sɛ wɔn a wɔpɛ sɛ wodi Yesu akyi nnɛ no nyinaa yɛ saa ara.—Yohane 17:14, 16; 1 Petro 2:21; hwɛ Mateo 5:27, 28; 26:52 nso.
7. Esiane Yesu nsɛm a ɛwɔ Yohane 8:44 no nti, dɛn nti na ɛho hia nnɛ sɛ yɛde Bible no hwehwɛ nyamesom akannifo nkyerɛkyerɛ no mu?
7 Ɛdefa atoro som ho no, Yesu ka kyerɛɛ ne bere so anyamesom akannifo no sɛ: “Mo de, mo agya a mufi no mu ne Ɔbonsam, na mo agya no akɔnnɔde na mopɛ sɛ moyɛ. Ɔno na ɔyɛ owudifo fi mfiase, na onnyina nokware so; efisɛ nokware nni ne mu. Sɛ ɔka atosɛm a, ofi n’ankasa mu na ɔka; efisɛ ɔyɛ ɔtorofo ne atoro agya.” (Yohane 8:44) Ná ehia yiye saa bere no sɛ mpapahwekwa no de wɔn ho fi atoro atetesɛm (a akyiri yi wɔde kɔhyɛɛ Talmud no mu) a na akɔ so wɔ Yudafo som mu no ho. Na nnɛ, ehia sɛ wɔn a, te sɛ Yudafo no, wɔatra wɔn agyanom som mu ara wɔn nkwa nna nyinaa no, hwehwɛ mu hwɛ sɛ wɔn nyamesom akannifo no ‘agyaw’ Onyankopɔn asɛm no sɛnea ɛbɛyɛ na wɔakyerɛkyerɛ nnipa atetesɛm ara kwa anaa.—Marko 7:9-13.
8, 9. (a) Dɛn nti na Yesu kae sɛ n’Ahenni “mfi wiase”? (b) Ɛnde, dɛn nti na nokware Kristofo hyia ɔtaa? (d) Dɛn nti na ɛsɛ sɛ wɔn bo tɔ wɔn yam?
8 Bere a wɔrebu Yesu atɛn akum no no, ɔka faa ne bere so amammui nniso horow no ho sɛ:
“M’ahenni mfi wi yi ase. Sɛ m’ahenni fi wi yi ase a, anka m’asomfo bɛkõ na wɔamfa me anhyɛ Yudafo no nsa; nanso m’ahenni mfi ha.”
Ná Yesu Ahenni no fi ɔsoro. Enyaa ne tumi fii Amansan Hene Pumpuni, Yehowa Nyankopɔn, nkyɛn na na emfi Satan nkyɛn. Ne saa nti, Satan de n’asase so “asefo” no dii dwuma de taa Yesu ne n’akyidifo.—Yohane 18:36.
9 Enti, Yesu ka kyerɛɛ ne nokware akyidifo sɛ: “Eyi na mehyɛ mo, sɛ monnodɔ mo ho. Sɛ wiase tan mo a, munhu sɛ watan me kan ansa na ɛretan mo. Sɛ mufi wiase a, anka wiase bɛdɔ n’ankasa ne de; na sɛ mumfi wiase na m’apaw mo afi wiase yi, eyi nti na wiase tan mo.” (Yohane 15:17-19) Yehowa asomfo hyia ɔtan ne ɔtaa a emu yɛ den de besi nnɛ efisɛ wɔtew wɔn ho fi amansɛm a aporɔw ne anuɔdensɛm a abu so pii nnɛ no ho. Nanso akatua pa wɔ hɔ retwɛn wɔn a awiei koraa no wobedi wiase no so nkonim no. Sɛnea Yesu maa n’asuafo awerɛhyem no: “Mo ho behia mo wi yi ase de, nanso momma mo bo ntɔ mo yam! Me na m’adi wiase so nkonim.”—Yohane 16:33.
ƆHENE AHWEHWƐDE AHOROW
10, 11. (a) Dɛn na ɛkyerɛ sɛ ɛnyɛ hokwan a efi soro so na wiase atumfo nam di tumi? (b) Nea ɛne ɛno bɔ abira no, ɔkwan bɛn so na Yesu daa ne ho adi sɛ ɔfata sɛ odi hene?
10 Su horow bɛn na wobɛpɛ sɛ wuhu wɔ wiase sodifo bi ho? Abakɔsɛm mu sodifo no dodow no ara yɛ “nnipa a wɔyɛ den,” ahantanfo ne wɔn a wɔhoman. Wɔtaa de wɔn ankasa nkɔso di ɔmanfo no ahiade anim. Ebinom ahoahoa wɔn ho sɛ wɔakyekye ahemman akɛse, nanso bere bi akyi no, wɔn ahemman akɛse akɛse no agu, a edi nokware a Ɔhene Salomo nsɛm no yɛ no ho adanse sɛ: “Sɛ [Yehowa] ansi dan no a, wɔn a wosi yɛ ho adwuma kwa.” (Dwom 127:1) Nokwarem no, saa “ahemfo” yi ada no adi sɛ womfi soro mmaa wɔn hokwan sɛ wonni tumi. Wɔn tumidi no amfi Yehowa Nyankopɔn hɔ.
11 Nanso wɔka Onyankopɔn Hene a wɔasra no, Yesu Kristo, ho asɛm wɔ nkɔmhyɛ mu sɛ wafi adi rekɔko atia n’atamfo “ma nokware trenee a wɔabrɛ no ase.” Wɔaka wɔ ne ho sɛ “wodɔ trenee, na wotan abɔnefosɛm, enti na Onyankopɔn, wo Nyankopɔn, de anigye ngo asra wo sen wo mfɛfo”—ahemfo a wofi Dawid mu a wodii n’anim no. (Dwom 45:4, 7) Esiane ɔtan a ɔsoro Hene no tan biribiara a egu Yehowa din kronkron no ho fĩ na ebu Onyankopɔn trenee nnyinasosɛm ahorow so nti, ɔbɛpopa nsɛmmɔnedi nyinaa afi asase yi so bere a ɛsɛ mu, na ɔde abɔ kwan ma wɔde trenee nniso aba. So Yesu ada ne ho adi sɛ ɔfata sɛ ɔyɛ sodifo a ɔte saa anaa? Ampa ara sɛ wayɛ saa!
12. Ɔsom kronn ho nhwɛso bɛn na Yesu yɛ maa yɛn?
12 Bere a Yesu yɛ onipa a ɔyɛ pɛ no, ɔyɛɛ nhwɛso wɔ ɔdɔ a woyi adi ma Onyankopɔn ne ne yɔnko no mu. Sɛ́ Onyankopɔn man Israel a wɔahyira so ama Yehowa no muni no, Yesu yɛɛ nhwɛso wɔ mmara nsɛm akɛse abien a ɛkyɛn so no sodi mu. Ɔkae sɛ: “Nea edi mmara nsɛm no nyinaa kan ne: Israel, tie, [Yehowa] yɛn Nyankopɔn yɛ [Yehowa] koro; na dɔ [Yehowa] wo Nyankopɔn fi wo koma nyinaa mu ne wo kra nyinaa mu ne w’adwene nyinaa mu ne w’ahoɔden nyinaa mu. Na nea ɛto so abien no ni: Dɔ wo yɔnko sɛ wo ho!” (Marko 12:29-31; Deuteronomium 6:4, 5) Yesu de ne ho mae koraa a wankyɛe ne ho so wɔ ne som a ɔde ma Yehowa ne ne mfɛfo Yudafo no a ɔkyerɛkyerɛɛ wɔn no mu. Bere a eyinom bɔɔ mmɔden sɛ wɔmma omfi wɔn nkyɛn nkɔ na ama wɔatumi atie pii bio no, ɔka kyerɛɛ wɔn sɛ:
“Ɛsɛ sɛ meka Onyankopɔn ahenni ho asɛmpa no mekyerɛ nkurow foforo nso; efisɛ eyi na wɔbɔɔ din somaa me.” (Luka 4:43)
Bere a Yesu de ɔsom kronn rema sɛ odwumayɛni no, ɔyɛɛ nhwɛso maa nokware Kristofo nyinaa sɛ wonni akyi.—Fa toto Yohane 5:17 ho.
13, 14. (a) Yesu buu nkurɔfo dɛn? (b) Dɛn nti na ofii adi kɔkaa asɛm, na dɛn nti na ɔsomaa afoforo? (d) Ɔhwɛ bɛn na adesamma betumi ahwɛ kwan wɔ Ahenni no ase?
13 Yesu daa ne ho adi sɛ ɔwɔ ɔdɔ ne ayamhyehye. Wɔ ne koma mu no, n’ani gyinae sɛ obehu sɛ wɔayi adesoa duruduru a ne nkurɔfo no nyamesom nhyɛsofo no de ato wɔn so no afi wɔn so. Enti ɔkaa Ahenni no ho asɛm kyerɛɛ wɔn, na ɔsomaa n’asuafo no sɛ:
“Na mokɔ a, monkɔka sɛ: Ɔsoro ahenni no abɛn.”—Mateo 9:35–10:7.
14 Ɔhene a wɔapaw no yi too nsa frɛɛ nkurɔfo no sɛ: “Mo a moayɛ adwuma abrɛ na wɔasoa mo nnosoa nyinaa, mommra me nkyɛn, na mɛma moahome. Momfa me kɔndua nto mo ho so, na munsua me, sɛ midwo na mebrɛ me ho ase koma mu; na mubenya ɔhome ama mo kra. Na me kɔndua yɛ mmerɛw, na m’adesoa yɛ hare.” (Mateo 11:28-30) Sɛ́ Onyankopɔn soro Hene wɔ adesamma nyinaa so no, Yesu beyi saa ayamhyehye koro no ara adi, na sɛnea ɔyɛe bere a na ɔwɔ asase so no, ɔbɛhwɛ sɛ n’Ahenni mu ahokafo ayɛ nhyehyɛe sɛ wɔde ahotɔ ne ɔhwɛ a efi ayamye mu a adesamma hia ankasa no bɛma. Wɔn a wɔbɛtra Yesu Ahenni nniso ase wɔ asase so no nyinaa benya ɔhome ama wɔn akra ampa.
MUDI MU KURA A ƐHO NNI ASƐM
15. Yesu buaa Satan mpoatwa no korakora dɛn?
15 Nea ɛsen ne nyinaa no, Ɔhene a obedi adesamma so daakye no kuraa ne mudi mu yɛɛ osetie maa ne soro Agya no a asɛm biara nni ho de koduu atirimɔden wu mu tɔnn wɔ asɛndua so. Bere a saa dɔnhwerew a wobekum Yesu no bɛnee no, ɔbɔɔ Yehowa mpae sɛ: “Agya, hyɛ wo din anuonyam!” Yehowa nne fi soro gyee so sɛ: “M’ahyɛ no anuonyam dedaw, na mɛhyɛ no bio!” Wɔ n’Agya din ho tew mu no, Yesu buaa Satan mpoatwa no wiei koraa. Ɔkyerɛe sɛ onipa a ɔyɛ pɛ betumi adi Onyankopɔn nokware wɔ sɔhwɛ biara a ɔtamfo de bɛba ne so no mu. Enti na Yesu betumi aka sɛ: “Afei ne wi yi ase atemmu; afei na wobeyi wi yi ase sodifo [Satan] no hɔ”—a wɔagu n’anim ase koraa, ada no adi sɛ ɔyɛ ɔtorofo. Ná Yudafo nyamesom akannifo, a wɔyɛ ‘ɔwɔ no asefo,’ bepira Onyankopɔn ahyehyɛde a ɛte sɛ ɔbea no, “aseni” no “nantin” yayaw, nanso na Onyankopɔn benyan ne Ba a ɔsom bo no aba nkwa mu sɛ honhom.—Genesis 3:15; Yohane 12:27-31.
16, 17. (a) Dɛn nti na yebetumi anya Ɔhene a obedi asase so daakye no mu ahotoso a emu yɛ den? (b) Ɔkwan bɛn so na Kyerɛwnsɛm no kyerɛ sɛ Paradise asase ho anidaso no yɛ paara? (d) So ɛsɛ sɛ wo kan asetra kwan a wofaa so no siw wo kwan wɔ pere a wobɛpere ahwehwɛ saa anidaso no ho anaa?
16 Trenee a Yesu dɔ, amumɔyɛ a ɔtan, n’ani a egye adesamma ho kɛse, ne, nea ɛsen biara no, osetie a edi mũ a ɔde yɛɛ n’Agya apɛde de hyɛɛ Yehowa din anuonyam—nneɛma yi nyinaa di Ɔba ɔnokwafo yi ho adanse sɛ ɔfata yiye koraa sɛ Ɔhene a obedi asase so daakye. So worempɛ sɛ wobɛkɔ daa nkwa mu sɛ́ ɔhene a ɔte saa no akoa a ɔwɔ anigye anaa?
17 Ɛmfa ho sɛ w’asetra ye anaasɛ enye dɛn ara de besi saa bere yi no, wubetumi anya daa nkwa wɔ asase a wɔama so ayɛ fɛ no mmamu ho anidaso. Hwɛ, wɔmaa owifo a ɔsakraa n’adwene a wokum no kaa Yesu ho no mpo owusɔre ho anidaso a ɛte saa! Na bere a ɔka kyerɛɛ Yesu sɛ, “sɛ woba w’ahenni mu a, kae me” no, Yesu buae sɛ: “Nokware mise wo nnɛ, wobɛka me ho wɔ Paradise.” (Luka 23:42, 43, NW) Ɛrenkyɛ, Paradise bɛba ampa ara. So wo nso wode mpaebɔ reyere wo ho ahwehwɛ Ahenni no ‘ba’ ne ne nhyira horow no?
[Adesua no ho Nsɛmmisa]
[Kratafa 77 mfonini]
ONIPA A ƆSEN BIARA A WATRA ASASE SO PƐN
Sɛ́ Ɔhene a wɔapaw no no, okuraa ne mudi mu de kɔɔ owu mu, na ɔnam ne mogya a ohwie gui no so gyee adesamma fii bɔne ne owu mu
