Mmeresanten Hene No
Ti 2
Mmeresanten Hene No
1. Dɛn nti na ɛsɛ sɛ yenya ahotoso wɔ Onyankopɔn mu sɛ Agya bi a ɔwɔ hɔ ankasa?
YESU frɛɛ Onyankopɔn sɛ “yɛn Agya,” de fii “Awurade Mpaebɔ” no ase. Dabi, ɔnyɛ Yesu Kristo nkutoo Agya, na mmom awiei koraa no, ɔbɛyɛ adesamma a wɔde osetie som “mpaebɔ Tiefo” a ɔwɔ ɔdɔ yi nyinaa Agya. (Dwom 65:2) Sɛ́ “mmeresanten Hene” no, ɔda no adi sɛ daa odwen n’abɔde ho ankasa, sɛnea desani agya pa nso dwen ne mma ho no. (1 Timoteo 1:17) Ɛsɛ sɛ yenya “yɛn Agya” no mu ahotoso sɛ ɔyɛ Obi a ɔwɔ hɔ ankasa a odwen yɛn ho. Ɛmfa ho kasa a yɛka, yɛn honam ani hwɛbea, anaa asetram dibea a yekura no, ɛsɛ sɛ yetumi kɔ ne nkyɛn a yensuro, efisɛ “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.”—Asomafo no Nnwuma 10:34, 35.
2, 3. Ɔkwan bɛn so na yɛn Agya ada ne ho adi sɛ ɔyɛ Nkwa Mafo ne Ɔdemafo Kɛse nso? (Genesis 1:1, 2, 31)
2 ‘Yɛn Agya a ɔwɔ soro’ ne Ɔbɔadeɛ no, Nea ɔmaa adesamma nkwa no. (Mateo 6:9; Dwom 36:9) Nanso ɔnyɛ yɛn Nkwa Mafo kɛkɛ; ɔne yɛn Demafo Kɛse nso. Yɛbɛhwɛ kwan sɛ ɔdesani agya bi a ɔyɛ n’asɛde bɛma ne mma atrae ne aduan, sɛ ebegye no bere ne mmɔdenbɔ pii na ɔde ayɛ saa mpo a. Yɛn soro Agya nam adɔe a ɛkyɛn so so ayɛ eyi ne bebree aka ho.
3 Susuw sɛnea “mmeresanten Hene” yi fi ɔdɔ mu siesiee asase yi sɛ ɛnyɛ yɛn fie no ho hwɛ. Ɔde sii ɔsoro ntrɛwmu no mu baabi a ɛfata pɛpɛɛpɛ, na ɔnam ne tumi a ɛsen biara no so de biribiara a ehia na ama nnipa a wɔbɛtra asase so no anya anigye baa so. Afei ɔbɔɔ ɔbarima ne ɔbea, na ɔde wɔn traa ofie fɛfɛ yi mu—ná ɔde akyɛde kɛse “ama nnipa mma” ampa!—Dwom 115:16; 19:1, 2.
4. (a) Yɛn Agya fi ayamye mu hwɛɛ ade kɔɔ akyiri dɛn wɔ yɛn fie no siesie ho? (b) Dɛn na ɛma yɛn awerɛhyem sɛ ɔpɛ sɛ yɛn ani gye?
4 Hwɛ ofie fɛfɛɛfɛ a yɛn soro Agya no de maa ne mma wɔ asase so ha! Ɔyɛɛ nhyehyɛe na anadwo a emu yɛ nwini na ɔhome wom atumi adi adekyee hann a dwumadi wom no akyi aba. Ɔhyehyɛɛ wim nsakrae a ɛtoatoa so ba na ɛde mfaso ne anigye abrɛ yɛn. (Genesis 8:22) Ɔde ade a ɛho hia kɛse, a ɛne nsu, bebree mae na ɔkyekyɛɛ mu guu asase so nyinaa sɛnea ɛbɛyɛ a yebetumi de adi dwuma wɔ baabiara a ehia. Wama sare mono fɛfɛɛfɛ afifi—akɔ akyiri akwansin ɔpepepem pii—wɔ asase so fie yi so baabiara. Ɔde nhwiren a ne kɔla yɛ fɛ asiesie so fɛfɛɛfɛ. Ɔde kwae a ɛyɛ fɛ, atare ne mmepɔw, asiesie so kama. Ɔde gyabiriw, ngo ne nneɛma foforo a wobetumi anya ahoɔden afi mu bebree asie asase “adekorabea” no mu. Ɔkɔ so de aburow, nnuaba, atosode ne nnuan afoforo a ɛyɛ dɛ bɛhyɛ nea wodi no ananmu wɔ asase “adekoradan” no mu ma ebu so. Ɔdemafo nyansafo a odwen yɛn ho bɛn ara na yɛn soro Agya no yɛ sɛɛ yi! Bible frɛ no ‘anigye Nyankopɔn.’ Ɛda adi pefee sɛ ɔpɛ sɛ yɛn nso yenya anigye.—1 Timoteo 1:11; Yesaia 25:6-8.
YƐN AGYA NO “DIN”
5. Dɛn na ɛsɛ sɛ ɛyɛ nea yɛn koma pɛ bere a yɛde nsɛm a edi kan wɔ Yesu mpaebɔ nhwɛso no mu rebɔ mpae no?
5 Yɛn soro Agya a ɔwɔ ɔdɔ no wɔ “din pa,” wagye din pa sɛ Ɔdemafo Kɛse. N’ankasa wɔ din nso, te sɛ ɔdesani agya biara. Sɛ yɛwɔ honam fam agya pa a, yɛrempɛ sɛ wɔsɛe ne din na wɔbɔ no ahohora. Yɛbɛpɛ sɛ yehu sɛ wɔde obu ma ne din. Nea ɛkyɛn saa koraa no, ɛsɛ sɛ yenya ɔpɛ sɛ yebehu sɛ wɔde nidi ma yɛn soro Agya no din. Enti, ɛsɛ sɛ yetumi fi yɛn koma nyinaa mu de nsɛm a Yesu de dii kan wɔ Mpaebɔ Nhwɛso no mu no bɔ mpae sɛ: “Yɛn Agya a wowɔ soro, wo din ho ntew.”—Mateo 6:9; Mmebusɛm 22:1.
6. Ɛdefa Onyankopɔn din ho no, dɛn na wobɛpɛ sɛ wuhu?
6 Nokwarem no, ɛsɛ sɛ bere nyinaa yefi komam bɔ mpae sɛ wɔmma ɔsoro ne asase Bɔfo kɛse no din so ma ɛnkorɔn nsen edin afoforo nyinaa, na wɔnna no adi sɛ ɛno ne din a ɛsom bo, ɛho hia, na ɛho wɔ dɔ sen biara wɔ amansan no nyinaa mu. Onyankopɔn din a ɛho bɛtew yi ho hia koraa sen yɛn ankasa nkwagye. Ɛsɛ sɛ wɔtew ne din ho—wɔsan ho fi ahohora a abɔde a wɔagye dimmɔne de aba so no nyinaa ho.
7. Dɛn na Bible kyerɛ sɛ ɛne Onyankopɔn din ankasa?
7 Dɛn ne yɛn soro Agya no din ankasa? Wɔda no adi wɔ nsɛm a ɛkyerɛ sɛ Onii a okura saa din kɛse no wɔ atamfo mu. Ɛreka eyinom ho asɛm no, Dwom 83, nkyekyem 17 ne 18 kenkan wɔ King James Version Bible no mu sɛ: “Ma wɔnyɛ basaa na wɔn ho nyeraw wɔn daa; yiw, ma wɔn anim ngu ase, na wonwu: Na nnipa ahu sɛ wo, a wo din nkutoo ne YEHOWA no, wo ne ɔsorosoroni wɔ asase nyinaa so.”—Hwɛ Dwom 100:3 nso.
8. Dɛn na Onyankopɔn atamfo abɔ mmɔden sɛ wɔbɛyɛ wɔ ne din ho, na dɛn na afi mu aba?
8 Enti, Onyankopɔn din de YEHOWA. Nanso nnipa pii a wose wɔsom Onyankopɔn nkyerɛɛ obu mmaa saa din no koraa. Ebinom ayi ne din afi wɔn Bible nkyerɛase ahorow mu mpo, na wɔde abodin “AWURADE” ne “ONYANKOPƆN” a wɔde nkyerɛwde akɛse akyerɛw no asi ananmu. Onyankopɔn din pa a adeyɛ yi kata so akyi no, ɛmma wonhu nsonsonoe a ɛda Awurade Yehowa ne Awurade Yesu Kristo ne “awurade” ne “anyame” afoforo a wɔka wɔn ho asɛm wɔ Bible mu no ntam nso. (Dwom 110:1; Deuteronomium 10:17; Romafo 1:4; 1 Korintofo 8:5, 6) Ɛbɛyɛ dɛn na nnipa atumi afi nokwaredi mu abɔ mpae sɛ Agya no din ho ntew, anaa ɛho nsan, bere a wɔbɔ mmɔden kata saa din no so no?
9. (a) Wɔkyerɛw Onyankopɔn din dɛn wɔ Hebri mu, na kasa afoforo mu nso ɛ? (b) Bible no kyerɛ sɛ Onyankopɔn yɛ nnipa baahe?
9 Wɔde nkyerɛwde יהוה a ebinom bɔ din sɛ Yahʹweh no na egyina hɔ ma Onyankopɔn din a ɛso nni no wɔ Hebri a ɛno ne kasa a edi kan a wɔde kyerɛw Bible no mu. Sɛnea nnipa dodow no ara gye edin no tom wɔ Twi kasa mu ne “Yehowa,” na sɛnea wɔkyerɛw din no wɔ kasa afoforo mu no sɛ eyi. Sɛ yɛde edin “Yehowa” no di dwuma a, ɛma yetumi da nea yɛreka ne ho asɛm no adi yiye. Ɔyɛ ‘Yehowa koro.’ Ɔnyɛ Yesu Kristo, efisɛ Yesu yɛ Onyankopɔn Ba nokwafo, “Onyankopɔn a wonhu no no suban ne abɔde nyinaa abakan.”—Kolosefo 1:15; Marko 12:29; Deuteronomium 6:4.
10. Dɛn na Onyankopɔn din kyerɛ, na ɔkwan bɛn so na wada eyi adi?
10 Edin “Yehowa” no wɔ asekyerɛ a tumi wom. Nea ɛkyerɛ ne sɛ: “Ɔma Ɛyɛ (anaasɛ Ɔyɛ).” Eyi fa N’ankasa ho, ɛmfa nneɛma a Ɔbɔ ho. Ne saa nti, ɔkae sɛ ‘Yehowa’ ne n’ankasa din a wɔmfa “nkae” no, bere a ɔrebɛyɛ ne man Israel anwonwa kwan so Ogyefo wɔ Misraim Farao nsam no. (Exodus 3:13-15) Akyiri yi, bere a odiyifo Yeremia gye toom sɛ Amansan Hene Yehowa ne ɔsoro ne asase Yɛfo ‘denam ne tumi kɛse ne ne basa a ateɛ so’ ne sɛ ‘ɔsõ agyinatu mu na n’adeyɛ dɔɔso’ no, Yehowa maa ne diyifo no awerɛhyem sɛ, N’ankasa ne bere a ɛsɛ mu no, Ɔbɛyɛ ade a ɛte sɛ nea entumi nyɛ yiye denam Ne nkurɔfo no a ɔbɛsan agye wɔn afi Babilon Ahemman no nkoasom mu aba no so. Na ɔyɛɛ saa nso!—Yeremia 32:17-19, 27, 44; 2 Beresosɛm 36:15-23.
11. Ɔkwan bɛn so na wobetumi de Onyankopɔn din abata n’Ahenni ho nnɛ?
11 Ɛnnɛ nso, Yehowa ne Onyankopɔn kɛse a “ɔma ɛyɛ” no. N’ankasa tumi yɛ nea ɛho hia biara de di asɛyɛde biara a ɛho hia ho dwuma, sɛnea ɛbɛyɛ a ɔnam n’Ahenni no so bɛyɛ anwonwade de atew ne din no ho na ayɛ mfaso ama ne nkurɔfo. Biribiara a ɔbɛbɔ ne tirim sɛ ɔbɛyɛ no, ɔyɛ, na esi yiye.—Yesaia 48:17; 55:11.
ONYANKOPƆN DIN HO ATEW ANAA?
12. Adesamma abu Onyankopɔn dɛn?
12 So adesamma akyerɛ anisɔ, obu ne ɔdɔ ama Onyankopɔn a ɔwɔ din pa yi a ɔteɛ na ɔde nneɛma bebree ama n’abɔde a wɔwɔ asase so sɛɛ yi? Hwɛ nea ɛrekɔ so wɔ asase yi so, na wubehu mmuae no. Hwɛ sɛnea aman a wɔfrɛ no Kristofo aman no mu som ahorow no asɛe Onyankopɔn din ma ɛyɛ awerɛhow! Aman yi mu pii abu no sɛ ɔyɛ Onyankopɔn a ogyina ɔfã bi akyi, na wɔabɔ no mpae sɛ ɔmmoa wɔn ma wɔnko ntia wɔn mfɛfo nnipa. Ebinom nso abu no sɛ Onyankopɔn a ne tirim yɛ den, a ɔde “akra a wɔafi ha kɔ” kogu daa ahoyeraw gyaframa mu. Afoforo nso abu no animtiaa de no atoto nnua ne abo ahoni a nkwa nnim ho. Nnipa bebree ahyɛ da abu ne trenee mmara ahorow so, na wose Onyankopɔn nhu wɔn anaasɛ wɔn asɛm mfa ne ho bio.—Hwɛ sɛnea ɛne Asomafo no Nnwuma 10:34, 35; Yeremia 7:31; Yesaia 42:8 ne 1 Petro 5:7 bɔ abira.
13. Sɛ wogyae nnipa a wɔafom kwan ma wɔfa wɔn akwan a ɛnkyerɛ ɔdɔ no so a, anka awiei koraa dɛn na ɛbɛba?
13 Nanso sɛ nnipa a wɔafom kwan nnɔ Onyankopɔn na wɔntew ne din ho a, ɛbɛyɛ dɛn na wɔbɛdɔ wɔn yɔnko nnipa? (1 Yohane 4:20, 21; 5:3) Na sɛ wɔansan amfa ɔdɔ amma adesamma abusua no mu a, awiei koraa no wiase bɛyɛ baabi a mpaapaemu, anuɔdensɛm ne basabasayɛ abu so. Wɔ mmeae bi no, ɛte saa dedaw. Esiane sɛ nuklea akode atrɛw wɔ amanaman no mu nti, da koro pɛ, nnipa bi a atuo to yɛ wɔn dɛ betumi atɔre adesamma abusua mũ no nyinaa ase. Nanso yɛn Agya a ɔdɔ yɛn no remma biribi a ɛte saa ho kwan da!—Dwom 104:5; 119:90; Yesaia 45:18.
SƐNEA ONYANKOPƆN TEW NE DIN HO
14, 15. Hena na odi kan wɔ Onyankopɔn din ho tew mu, na ɔkwan bɛn so na ɔyɛ saa?
14 Hena na odi kan wɔ Onyankopɔn din ho tew mu? Ɛnyɛ obiara sɛ Yehowa ankasa! Ɔnam ne trenee gyinapɛn ahorow a ɔsan ho so na ɔyɛ eyi. Ɔde atemmu bɛba wɔn a wɔtew n’apɛde a ɛho tew ho atua no nyinaa so, a wɔn a wɔhyɛ wɔn mfɛfo nnipa so ne wɔn a wɔkyerɛkyerɛ Onyankopɔn ho nkontomposɛm nso ka ho. (Dwom 140:12, 13; Yeremia 25:29-31) Yehowa ntumi mpa ne ho akyi. Ɔne nokware Nyankopɔn a ɔfata sɛ n’abɔde nyinaa som ɔno nkutoo. Ɔne Amansan Hene a ɛsɛ sɛ abɔde nyinaa tie no.—Romafo 3:4; Exodus 34:14; Dwom 86:9.
15 Amansan Hene Yehowa bɛpopa nnipa adesɛefo a wɔnyɛ n’apɛde nyinaa afi asase yi so de atew ne din ho. Nea enti a ɔbɛyɛ saa ne sɛ ɔtan amumɔyɛ na ɔdɔ trenee. (Dwom 11:5-7) Sɛnea n’ankasa ka no: “Mɛyɛ me ho kɛse na mayɛ me ho kronkron, na mama wɔahu me, amanaman bebree anim, na wɔahu sɛ mene [Yehowa].” (Hesekiel 38:23) Enti ɛda adi pefee sɛ, sɛ yɛpɛ sɛ yenya Yehowa anim dom a, ɛsɛ sɛ yɛn nso yɛtew ne din ho, yebu no sɛ ɛyɛ kronkron na ɛfata obu korakora, na yɛyɛ n’apɛde.
16. Ɔfã bɛn na yɛn abrabɔ nya wɔ Onyankopɔn din ho tew mu?
16 Wɔn a wɔsom Yehowa nyinaa abrabɔ hyɛ Onyankopɔn din anuonyam anaasɛ egu ho fĩ. Momma yɛn nyinaa mmu yɛn bra wɔ ɔkwan a ɛma afoforo bɔ Onyankopɔn kɛse a yɛsom no no din pa, na ɛma Yehowa ankasa koma ani gye so. (1 Petro 2:12; Mmebusɛm 27:11) Sɛ́ mma asoɔmmerɛfo no, ɛsɛ sɛ yenya ɔpɛ sɛ yɛbɛda yɛn Agya no ase wɔ n’akyɛde nyinaa ho, a yɛn fie fɛfɛ—asase—yi a ɔbɛma asan ayɛ fɛ asen sɛnea ɛte no mpo wɔ ne Ba no Ahenni ase no nso ka ho.—Yesaia 6:3; 29:22, 23.
17. Su bɛn na ɛsɛ sɛ yɛde bɛn “mmeresanten Hene” no wɔ mpaebɔ mu?
17 Hwɛ oye a eye sɛ yɛne “mmeresanten Hene” yi benya abusuabɔ pa! Nanso yentumi mfi yɛn ankasa tumi mu nyɛ eyi, efisɛ awofo a bɔne wɔ wɔn ho na wonyinsɛn yɛn nyinaa woo yɛn sintɔ mu. Nanso yebetumi abɔ Onyankopɔn mpae sɛnea Ɔhene Dawid yɛe yi: “Yi w’ani fi me bɔne ho hintaw, na popa m’amumɔyɛ nyinaa. Onyankopɔn, bɔ koma a emu tew ma me, na yɛ honhom foforo a ase tim wɔ me mu.” (Dwom 51:5-10) Bere a yehu nea ‘yɛn Agya a ɔwɔ soro’ no hwehwɛ fi yɛn hɔ no, yebetumi abɔ mpae na yɛanya daa nhyira a n’Ahenni no de bɛba no mu kyɛfa. Yiw, yebetumi de ahotoso abɔ mpae sɛ Onyankopɔn Ahenni mmra. Na saa Ahenni no bɛkyerɛ dɛn ama adesamma wɔ asase so ha? Momma yɛnhwɛ.
[Adesua no ho Nsɛmmisa]
