Nea Enti A Onyamesom Pa A Wɔde Tra Ase De Anigye Ba
Ti 13
Nea Enti A Onyamesom Pa A Wɔde Tra Ase De Anigye Ba
1. Dɛn nti na yebetumi aka sɛ Yehowa kwan de anigye ba?
YEHOWA yɛ “anigye Nyankopɔn,” na ɔpɛ sɛ wunya asetra mu anigye. (1 Timoteo 1:11, NW) Sɛ wofa ne kwan so a, w’ankasa wubetumi anya so mfaso ne ahotɔ kɛse a ɛtra hɔ daa, te sɛ asubɔnten a ɛsen bere nyinaa. Onyankopɔn kwan a obi fa so nso ka no ma ɔkɔ so yɛ adetrenee, te “sɛ po asorɔkye.” Eyi de anigye ankasa ba.—Yesaia 48:17, 18.
2. Ɛwom sɛ ɛtɔ mmere bi a wɔyɛ Kristofo basabasa de, nanso dɛn nti na wobetumi anya anigye?
2 Ebia ebinom bɛka sɛ, ‘Ɛtɔ mmere bi a nea ɛteɛ a nkurɔfo yɛ ma wohu amane.’ Ɛyɛ ampa, na eyi ne nea ɛtoo Yesu asomafo no. Ɛwom sɛ wɔtaa wɔn de, nanso wɔn ani gyei na wɔtoaa so ‘kaa Kristo ho asɛmpa.’ (Asomafo no Nnwuma 5:40-42) Yebetumi anya asuade a ɛho hia afi eyi mu. Biako ne sɛ onyamesom pa a yɛde tra ase nkyerɛ sɛ wɔne yɛn bedi nsɛm yiye bere nyinaa. Ɔsomafo Paulo kyerɛwee sɛ: “Wɔn a wɔpɛ sɛ wɔde onyamesom pa tra ase Kristo Yesu mu nyinaa, wɔbɛtaa wɔn.” (2 Timoteo 3:12) Nea enti a eyi te saa ne sɛ Satan ne ne wiase no sɔre tia wɔn a wɔde onyamesom pa tra ase no. (Yohane 15:18, 19; 1 Petro 5:8) Nanso, anigye ankasa nnyina nneɛma a aniwa hu so. Mmom no, gyidi a yɛwɔ sɛ yɛreyɛ nea ɛteɛ ma enti yɛwɔ Onyankopɔn anim dom na ɛde ba.—Mateo 5:10-12; Yakobo 1:2, 3; 1 Petro 4:13, 14.
3. Ɛsɛ sɛ Yehowa som ka obi asetra dɛn?
3 Nnipa bi wɔ hɔ a wɔte nka sɛ wɔnam bere ne bere mu ɔsom mu nneyɛe bi so betumi anya Onyankopɔn anim dom, nanso wobetumi ama wɔn werɛ afi no wɔ mmere foforo mu. Yehowa Nyankopɔn nokware som nte saa. Ɛka obi nneyɛe bere nyinaa, da biara ne afe biara. Ɛno nti na wɔsan frɛ no “Ɔkwan No.” (Asomafo no Nnwuma 19:9; Yesaia 30:21) Ɛyɛ onyamesom pa a yɛde tra ase a ɛhwehwɛ sɛ yɛkasa na yɛyɛ ade ma ɛne Onyankopɔn Asɛm hyia.
4. Dɛn nti na mfaso wɔ so sɛ wobɛyɛ nsakrae na ama woatra ase sɛnea Onyankopɔn akwan te?
4 Sɛ Bible asuafo foforo hu sɛ ɛho hia sɛ wɔyɛ nsakrae bi na wɔasɔ Yehowa ani a, ebia wobebisa sɛ, ‘Onyamesom pa a wɔde tra ase so wɔ mfaso ankasa?’ Wubetumi anya awerɛhyem sɛ ɛte saa. Dɛn ntia? Efisɛ “Onyankopɔn ne dɔ,” ma enti yɛn mfaso nti na n’akwan wɔ hɔ. (1 Yohane 4:8) Onyankopɔn san yɛ onyansafo na onim nea eye sen biara ma yɛn. Esiane sɛ Yehowa Nyankopɔn ne ade nyinaa so tumfoɔ nti, otumi hyɛ yɛn den ma yedi ɔpɛ a yɛwɔ sɛ yɛbɛsɔ n’ani ho dwuma denam subammɔne bi a yebegyae no so. (Filipifo 4:13) Ma yensusuw onyamesom pa a wɔde tra ase mu nnyinasosɛm ahorow bi ho nhwɛ sɛnea dwuma a wɔde di no de anigye ba.
NOKWAREDI DE ANIGYE BA
5. Dɛn na Bible no ka wɔ atorodi ne korɔnbɔ ho?
5 Yehowa yɛ “nokware Nyankopɔn.” (Dwom 31:5) Akyinnye biara nni ho sɛ wopɛ sɛ wubedi ne nhwɛso no akyi na ama wɔafrɛ wo ɔnokwafo. Nokwaredi ma wunya obu ma wo ho na wote nka sɛ wudi yiye. Nanso, esiane sɛ atorodi abu so kɛse wɔ wiase bɔne yi mu nti, Kristofo hia nkaebɔ yi: “Obiara nni ne yɔnko nokware . . . Owifo nnwia ade bio, na mmom ɔmmɔ mmɔden mfa ne nsa nyɛ adwuma pa, na wanya biribi a ɔde bɛma nea odi hia.” (Efesofo 4:25, 28) Adwumayɛfo a wɔyɛ Kristofo yɛ da koro adwuma a ɛsɛ nkamfo. Sɛ wɔn adwumawura amma wɔn kwan a, wɔmfa ne nneɛma. Sɛ́ Yehowa somfo bi wɔ adwumam, sukuu mu, anaasɛ ɔwɔ fie no, ɛsɛ sɛ ‘odi ade nyinaa mu nokware.’ (Hebrifo 13:18) Obiara a ɔde atorodi anaa korɔnbɔ bɛyɛ ne suban no ntumi nnya Onyankopɔn anim dom.—Deuteronomium 5:19; Adiyisɛm 21:8.
6. Ɔkwan bɛn so na onipa a osuro Onyankopɔn nokwaredi betumi ahyɛ Yehowa anuonyam?
6 Nokwaredi ma obi nya nhyira pii. Selina yɛ Afrikani hiani bi a ɔdɔ Yehowa Nyankopɔn na n’ani gye ne trenee nnyinasosɛm ahorow ho. Da koro bi ohuu bag bi a sikakorabea nhoma ne sika pii hyem. Ɔhwehwɛɛ telefon nɔma nhoma mu na otumi huu ne wura—aguadidan wura bi a wɔawia ne nneɛma. Ɛyɛɛ ɔbarima no nwonwa bere a Selina, a na ɔyare no baa ne nkyɛn san de bag no mu nneɛma nyinaa brɛɛ no no. Ɔbarima no kae sɛ: “Nokwaredi a ɛte sɛɛ fata akatua,” na ɔmaa no sika. Nea ɛho hia kɛse no, ɔbarima yi kamfoo ɔsom a Selina wom no. Yiw, nokwaredi ma Bible nkyerɛkyerɛ yɛ dɛ, ɛhyɛ Yehowa Nyankopɔn anuonyam, na ɛde anigye brɛ n’asomfo anokwafo.—Tito 2:10; 1 Petro 2:12.
AYAMYE DE ANIGYE BA
7. Mfomso bɛn na ɛwɔ kyakyatow ho?
7 Ɔyamyefo a obi bɛyɛ no ma onya anigye, na adifudepɛfo “rennya Onyankopɔn ahenni.” (1 Korintofo 6:10) Adifudepɛde bi a abu so ne kyakyatow, a ɛyɛ mmɔden a obi bɔ sɛ ɔnam nea afoforo hwere so benya sika. Yehowa ani nsɔ “adifudepɛfo.” (1 Timoteo 3:8) Baabi a mmara ma kyakyatow kwan na obi tow de gyegye n’ani mpo no, ne tow betumi aka ne hɔ, na ɔbɛma adeyɛ bi a asɛe nnipa pii asetra anya nkɔso. Kyakya taa ma kyakyatowfo abusua, a sika kakraa bi pɛ na wonya de tɔ asetrade te sɛ aduan ne ntade, ho kyere wɔn.—1 Timoteo 6:10.
8. Ɔkwan bɛn so na Yesu yɛɛ ayamye ho nhwɛso pa, na ɔkwan bɛn so na yebetumi ayɛ ayamyefo?
8 Esiane sɛ Kristofo wɔ ayamye a efi ɔdɔ mu nti, wonya afoforo a wɔboa wɔn, titiriw wɔn mfɛfo gyidifo a ahia wɔn, no mu anigye. (Yakobo 2:15, 16) Ansa na Yesu reba asase so no, ohuu ayamye a Onyankopɔn yii adi kyerɛɛ adesamma no. (Asomafo no Nnwuma 14:16, 17) Yesu ankasa de ne bere, ne dom akyɛde ne ne nkwa mpo too hɔ maa adesamma. Enti, na ɔfata yiye sɛ ɔbɛka sɛ: “Ɔma mu wɔ [anigye] mmom sen ogye.” (Asomafo no Nnwuma 20:35) Yesu kaa okunafo hiani bi a oyii ne yam de ntaapo abien guu asɔrefi ntoboa adaka no mu ho asɛmpa, efisɛ ɔde “nea ɔwɔ nyinaa” mae. (Marko 12:41-44) Tete Israelfo ne afeha a edi kan no mu Kristofo de anigye mu a wofi yi ayamye adi ho nhwɛso mae denam honam fam nneɛma a wɔde boaa asafo no ne Ahenni adwuma no so. (1 Beresosɛm 29:9; 2 Korintofo 9:11-14) Wɔ honam fam nneɛma a nnɛyi Kristofo de ma ma wɔde di atirimpɔw ahorow yi ho dwuma akyi no, wɔde anigye kamfo Onyankopɔn, na wɔde wɔn nkwa yɛ n’adwuma. (Romafo 12:1; Hebrifo 13:15) Yehowa hyira wɔn wɔ wɔn bere, ahoɔden, ne nneɛma foforo a wɔn sika ka ho, a wɔde boa nokware som na wɔma wiase nyinaa Ahenni ho asɛmpaka adwuma no nya nkɔso no ho.—Mmebusɛm 3:9, 10.
NNEƐMA FOFORO A ƐDE ANIGYE BA
9. Mfomso bɛn na ɛwɔ mmosa a wɔnom ma ɛtra so no mu?
9 Sɛ Kristofo ani begye a, ɛsɛ sɛ ‘wɔhwɛ wɔn adwene tumi so.’ (Mmebusɛm 5:1, 2) Eyi hwehwɛ sɛ wɔkenkan Onyankopɔn Asɛm ne Bible ho nhoma a ɛyɛ papa na wodwennwen ho. Nanso nneɛma bi wɔ hɔ a ɛsɛ sɛ wɔkwati. Sɛ nhwɛso no, mmosa a obi nom ma ɛtra so ntumi mma onnwen nneɛma ho yiye. Wɔ tebea a ɛte saa mu no, nnipa pii de wɔn ho hyɛ ɔbrasɛe mu, wɔyɛ basabasa, na wɔma akwanhyia a etumi kunkum nnipa sisi. Ɛnyɛ nwonwa sɛ Bible ka sɛ asabofo rennya Onyankopɔn Ahenni! (1 Korintofo 6:10) Esiane sɛ nokware Kristofo asi wɔn bo sɛ ‘wɔbɛma wɔn adwenem atew’ nti, wɔkwati asabow, na eyi boa ma anigye tra wɔn ntam.—Tito 2:2-6.
10. (a) Dɛn nti na Kristofo mfa tawa nni dwuma? (b) Mfaso bɛn na efi nneyɛe a ɛka obi hɔ a ogyae no mu ba?
10 Nipadua a ɛho tew de anigye ba. Nanso, nnipa pii nom nnubɔne ma ne nom ka wɔn hɔ. Sɛ nhwɛso no, susuw tawa a wɔde di dwuma ho hwɛ. Wiase Nyinaa Akwahosan Ahyehyɛde no bɔ amanneɛ sɛ sigaretnom “kunkum nnipa ɔpepem abiɛsa afe biara.” Ɛyɛ den sɛ obi begyae dwuma a ɔde tawa di no, esiane sɛnea ne gyae ma ɔte nka no nti. Nea ɛne eyi bɔ abira no, nnipa pii a wɔagyae sigaretnom no hu sɛ wɔwɔ akwahosan pa ne sika pii a wɔde tɔ nea abusua no hia. Yiw, tawa anaa nnubɔne foforo a obi tumi gyae nom no ma ne nipadua ho tew, onya ahonim pa ne anigye ankasa.—2 Korintofo 7:1.
AWARE MU ANIGYE
11. Dɛn na ehia na obi anya mmara kwan so aware a ɛtra hɔ kyɛ na nidi wom?
11 Ɛsɛ sɛ wɔn a wɔte hɔ sɛ okunu ne ɔyere no hwɛ hu sɛ wɔde wɔn aware ahyɛ aban mmara ase yiye. (Marko 12:17) Ɛho hia nso sɛ wobu aware sɛ asɛyɛde a anibere wom. Nokwarem no, sɛ wɔhyɛ da pow sɛ wɔnhwɛ obi, wɔyɛ no ayayade ntraso, anaasɛ wosiw ne honhom mu nkɔso ano koraa a, ebia ntetewmu ho behia. (1 Timoteo 5:8; Galatifo 5:19-21) Nanso asɛm a ɔsomafo Paulo kae wɔ 1 Korintofo 7:10-17 hyɛ awarefo nkuran sɛ wɔnkɔ so ntra. Nokwarem no, sɛ wobenya anigye ankasa a, ɛnsɛ sɛ wɔn mu biako fi ne yɔnko akyi. Paulo kyerɛwee sɛ: “Wonni aware ni, ade nyinaa mu, na wonngu aware mpa ho fi; efisɛ nguaman ne awaresɛefo de, Onyankopɔn bebu wɔn atɛn.” (Hebrifo 13:4) Asɛm “aware mpa” no kyerɛ ɔbarima ne ɔbea a wɔaware mmara kwan so ntam nna. Wontumi nka nna foforo biara, te sɛ ɔyerenom dodow aware, ho asɛm sɛ ‘nidi wom ade nyinaa mu.’ Bio nso, Bible no kasa tia nna a edi aware anim ne wɔn a wokura bɔbeasu koro ntam nna.—Romafo 1:26, 27; 1 Korintofo 6:18.
12. Aba bɔne a aguamammɔ sow no bi ne dɛn?
12 Aguamammɔ betumi ama obi anya bere tiaa mu anigye bi de, nanso ɛmma onnya anigye ankasa. Ɛnsɔ Onyankopɔn ani na ebetumi akum obi ahonim. (1 Tesalonikafo 4:3-5) Awerɛhosɛm a aguamammɔ de ba betumi ayɛ AIDS ne nyarewa foforo a wonya fi nna mu. Aduruyɛ mu amanneɛbɔ bi ka sɛ: “Wɔabu akontaa sɛ afe biara babaso yɛ nnipa bɛboro ɔpepem 250 wɔ wiase nyinaa, na kekae yɛ nnipa bɛyɛ ɔpepem 50.” Ɔhaw a ɛne nyinsɛn a wɔmpɛ nso wɔ hɔ. Amanaman Ntam Awofoyɛ Ho Nhyehyɛe Kuw no bɔ amanneɛ sɛ wɔ wiase nyinaa no, mmeawa a wɔadi mfe 15 kosi 19 ɔpepem 15 nyinsɛn afe biara, na wɔn mu nkyem abiɛsa mu biako tu nyinsɛn gu. Nhwehwɛmu bi daa no adi sɛ wɔ Afrika man bi mu no, nyinsɛn a wotu mu ɔhaw ahorow na ekunkum mmeawa a wowuwu nyinaa mu ɔha biara mu 72. Ebia nguaman bi rennya nyarewa na wonnyinsɛn nso, nanso wobepira wɔ nkate fam. Ebinom mmu wɔn ho bio na wɔtan wɔn ho mpo.
13. Ɔhaw afoforo bɛn na awaresɛe de ba, na dɛn na ɛbɛba wɔn a wonnyae aguamammɔ ne awaresɛe no so?
13 Ɛwom sɛ ebia wɔde awaresɛe befiri obi de, nanso ɛno ne Kyerɛwnsɛm mu asɛm a ɛfata a ɔhokafo a ne ho nni asɛm no gyina so gyae aware. (Mateo 5:32; fa toto Hosea 3:1-5 ho.) Sɛ ɔbrasɛe a ɛte sɛɛ ma aware bi gu a, eyi betumi aka ɔhokafo a ne ho nni asɛm ne mma no ma wɔn werɛ remfi da. Adesamma abusua no yiyedi nti, Onyankopɔn Asɛm kyerɛ sɛ ɔde atemmu bɛba nguaman ne awaresɛefo a wonnu wɔn ho no so. Afei nso, ɛkyerɛ pefee sɛ wɔn a wɔde wɔn ho hyɛ nna mu ɔbrasɛe mu no “rennya Onyankopɔn ahenni.”—Galatifo 5:19, 21.
“WOMFI WIASE”
14. (a) Abosonsom bɛn na obi a osuro Onyankopɔn kwati? (b) Akwankyerɛ bɛn na wɔde ma wɔ Yohane 17:14 ne Yesaia 2:4?
14 Wɔn a wɔpɛ sɛ wɔsɔ Yehowa ani na wonya Ahenni nhyira horow kwati abosonsom biara. Bible no kyerɛ sɛ ɛyɛ mfomso sɛ yɛbɛyɛ ahoni asom wɔn, a Kristo anaa Yesu maame, Maria, de ka ho. (Exodus 20:4, 5; 1 Yohane 5:21) Enti, nokware Kristofo nsom nyamesom mfonini, mmeamudua ne ahoni. Wɔkwati anifere kwan so abosonsom biara, te sɛ frankaasom ne nnwom a ɛhyɛ aman anuonyam a wɔto. Sɛ wɔhyɛ wɔn sɛ wɔnyɛ saa nneɛma yi a, wɔkae nsɛm a Yesu ka kyerɛɛ Satan yi: “Kotow sɔre [Yehowa], wo Nyankopɔn, na ɔno nko ara na som no.” (Mateo 4:8-10) Yesu kae sɛ n’akyidifo “mfi wiase.” (Yohane 17:14) Eyi kyerɛ sɛ wɔmfa wɔn ho nhyehyɛ amammuisɛm mu, na wɔtra ase asomdwoe mu ma ɛne nea Yesaia 2:4 ka yi hyia: “Na [Yehowa Nyankopɔn bebu] amanaman no ntam atɛn, na ɔbɛka aman bebree anim, na wɔde wɔn nkrante abobɔ nsɔw, ne wɔn mpeaw ayeyɛ nnare; ɔman bi remma afoa so nhyɛ ɔman bi, na wɔrensua akodi bio.”
15. Dɛn ne Babilon Kɛse, na dɛn na Bible asuafo foforo pii yɛ de fi ne mu?
15 Sɛ obi ‘mfi wiase’ a, ɛkyerɛ nso sɛ ɔne “Babilon Kɛse,” wiase nyinaa atoro som ahemman no gyae fekubɔ biara. Ɔsom a ɛho ntew trɛw fii tete Babilon kosii sɛ edii nnipa awu wɔ honhom mu wɔ asase nyinaa so. Ɔsom biara a wɔn nkyerɛkyerɛ ne wɔn nneyɛe ne Onyankopɔn ho nimdeɛ nhyia no yɛ “Babilon Kɛse” no fã. (Adiyisɛm 17:1, 5, 15) Yehowa somfo nokwafo biara mfa ne ho nhyehyɛ gyidi afrafra mu denam ɔsom ahorow a ɔne wɔn bɛbom asom anaasɛ honhom fam ayɔnkofa a ɔne Babilon Kɛse no fã biara benya so. (Numeri 25:1-9; 2 Korintofo 6:14) Enti, Bible asuafo foforo pii de krataa a wɔde gyae wɔn asɔre kɔma ɔsom ahyehyɛde a wɔwom no. Eyi ama wɔabɛn nokware Nyankopɔn no, sɛnea wɔhyɛɛ bɔ no: “Mumfi wɔn mu, na montew mo ho, sɛnea [Yehowa] se ne no, na monnka nea ɛyɛ fi; na me nso magye mo.” (2 Korintofo 6:17; Adiyisɛm 18:4, 5) Ɛnyɛ nea wohwehwɛ paa ne sɛ yɛn soro Agya no begye wo atom saa?
AFAHYƐ AHOROW A WOBƐKARI AHWƐ
16. Dɛn nti na nokware Kristofo nni Buronya?
16 Onyamesom pa a yɛde tra ase mma yenni wiase nnapɔnna a ɛtaa yɛ ɔhaw no. Sɛ nhwɛso no, Bible no nkyerɛ da pɔtee a wɔwoo Yesu. Ebia ebinom bɛka sɛ: ‘Misusuw sɛ wɔwoo Yesu December 25!’ Entumi mma saa efisɛ owui wɔ 33 Y.B. fefɛw bere mu bere a na wadi mfe 33 1/2 no. Bio nso, bere a wɔwoo no no na nguanhwɛfo wɔ “wuram rewɛn wɔn nguankuw anadwo.” (Luka 2:8) Wɔ Israel asase so no, December awiei mu hɔ yɛ awɔw ne osutɔ bere a wɔde nguan gu adan mu anadwo na awɔw anne wɔn. Nokwarem no, Romafo na wɔpaw December 25 sɛ wɔn owia nyame awoda. Bere a Yesu baa asase so akyi mfehaha pii no, Kristofo awaefo paw da yi de dii Kristo awoda. Enti, nokware Kristofo nni Buronya anaa dapɔnna foforo biara a egyina atoro som gyidi horow so. Esiane sɛ wɔsom Yehowa nkutoo nti, wonni nnapɔnna a ɛhyɛ nnipa abɔnefo anaa aman anyame anuonyam.
17. Dɛn nti na nnipa a wosuro Onyankopɔn nni awoda, na dɛn nti na eyi nyinaa akyi no, Kristofo mmofra ani gye?
17 Bible ka awodadi abien pɛ ho asɛm, na mmarima a wɔnsom Onyankopɔn na wodii n’abien nyinaa. (Genesis 40:20-22; Mateo 14:6-11) Esiane sɛ Kyerɛwnsɛm no nkyerɛ da a wɔwoo ɔbarima a ɔyɛ pɛ, Yesu Kristo, nti, dɛn nti na ɛsɛ sɛ yɛtwe adwene si nnipa a wɔnyɛ pɛ awoda so wɔ ɔkwan soronko so? (Ɔsɛnkafo 7:1) Nokwarem no, awofo a wosuro Onyankopɔn ntwɛn nkosi da titiriw bi na wɔayi ɔdɔ adi akyerɛ wɔn mma. Abeawa Kristoni bi a wadi mfe 13 kae sɛ: “Me ne m’abusua gye yɛn ani mpɛn pii. . . Me ne m’awofo bɔ kɛse, na sɛ mmofra foforo bisa nea enti a minni nnapɔnna a, meka kyerɛ wɔn sɛ migye m’ani da biara.” Kristoni abofra bi a wadi mfe 17 kae sɛ: “Wɔ yɛn fie no, yɛkyɛ ade afe mũ no nyinaa.” Sɛ wofi komam de akyɛde ma a, ɛde anigye kɛse ba.
18. Afahyɛ biako bɛn na Yesu hyɛɛ n’akyidifo sɛ wonni, na dɛn na ɛkae yɛn?
18 Wɔ wɔn a wɔde onyamesom pa tra ase fam no, ɛda bi wɔ afe biara mu a ɛsɛ sɛ wɔhyɛ ho fã titiriw. Ɛne Awurade Anwummeduan, a wɔtaa frɛ no Kristo wu Nkaedi no. Yesu hyɛɛ n’akyidifo wɔ ho sɛ: “Monyɛ eyi mfa nyɛ me nkae.” (Luka 22:19, 20; 1 Korintofo 11:23-25) Bere a Yesu de adidi yi sii hɔ Nisan 14, 33 Y.B. anadwo no, ɔde abodoo a mmɔkaw nnim ne bobesa kɔkɔɔ a egyina hɔ ma ne nipadua a bɔne nni ho ne ne mogya a ɛyɛ pɛ na edii dwuma. (Mateo 26:26-29) Kristofo a wɔde Onyankopɔn honhom asra wɔn na wodi abodoo yi nom bobesa no bi. Wɔne wɔn ayɛ apam foforo ne Ahenni apam, na wɔwɔ ɔsoro anidaso. (Luka 12:32; 22:20, 28-30; Romafo 8:16, 17; Adiyisɛm 14:1-5) Nanso, wɔn a wɔwɔ ase saa anwummere a ɛne Nisan 14 hyia wɔ Yudafo kalenda so no nyinaa nya so mfaso horow. Ɛkae wɔn ɔdɔ a Yehowa Nyankopɔn ne Yesu Kristo ayi no adi denam ogye afɔrebɔ a ɛpata bɔne a etumi ma wɔn a wɔwɔ Onyankopɔn anim dom nya daa nkwa no so.—Mateo 20:28; Yohane 3:16.
ADWUMA NE ANIGYEDE
19. Ɔhaw bɛn na Kristofo hyia wɔ nea wobenya de ahwɛ wɔn ho no mu?
19 Ɛyɛ nokware Kristofo asɛyɛde sɛ wɔbɛyɛ adwumaden anya wɔn ahiade ahorow. Eyi a mmusua ti tumi yɛ ma wonya akomatɔyam. (1 Tesalonikafo 4:11, 12) Nokwarem no, sɛ Kristoni bi adwuma ne Bible no nhyia a, eyi bɛsɛe n’anigye. Nanso, ɛtɔ mmere bi a, ɛyɛ den ma Kristoni sɛ obenya adwuma a ɛne Bible gyinapɛn ahorow hyia. Sɛ nhwɛso no, wɔhwehwɛ sɛ adwumayɛfo bi sisi wɔn adetɔfo. Ɔkwan foforo so no, adwumawuranom pii bɛma nneɛma ho kwan na wɔn dwumayɛni nokwafo bi ahonim anhaw no, na odwumayɛni a wotumi de ho to no so no amfi wɔn nsa. Nanso, nea ebesi biara no, wubetumi anya awerɛhyem sɛ Onyankopɔn behyira mmɔden a wobɔ sɛ wubenya adwuma a ɛbɛma woanya ahonim pa no so.—2 Korintofo 4:2.
20. Dɛn nti na ɛsɛ sɛ yɛyɛ nyiyim wɔ anigyede a yɛpaw no mu?
20 Esiane sɛ Onyankopɔn pɛ sɛ n’asomfo ani gye nti, ɛho hia sɛ yɛma adwumaden ne ahomegye a ɛma yenya ahoɔden no kari pɛ. (Marko 6:31; Ɔsɛnkafo 3:12, 13) Satan wiase no hyɛ anigyede a ɛmfata ho nkuran. Nanso sɛ yɛbɛsɔ Onyankopɔn ani a, ɛsɛ sɛ yɛyɛ nyiyim wɔ nhoma a yɛkenkan, radio so dwumadi ne nnwom a yetie, ne kɔnsɛt, sini, agodie, television ne video so dwumadi ahorow a yɛhwɛ no mu. Sɛ anigyede a yɛpawee bere a atwam no ne kɔkɔbɔ a ɛwɔ kyerɛw nsɛm te sɛ Deuteronomium 18:10-12, Dwom 11:5, ne Efesofo 5:3-5 bɔ abira na yɛyɛ nsakrae a, yɛbɛsɔ Yehowa ani, na yebenya anigye kɛse.
OBU MA NKWA NE MOGYA
21. Ɛsɛ sɛ obu ma nkwa ka adwene a yekura wɔ nyinsɛn a wotu gu ne yɛn nneyɛe ne suban ho no dɛn?
21 Sɛ yebenya anigye ankasa a, ɛho hia sɛ yebu onipa nkwa sɛ ɛyɛ kronkron sɛnea Yehowa mpo yɛ no. N’asɛm bara yɛn sɛ yennni awu. (Mateo 19:16-18) Nokwarem no, Onyankopɔn Mmara a ɔde maa Israel no kyerɛ sɛ obu abofra a wɔyem no sɛ nkwa a ɛsom bo—ɛnyɛ biribi a ɛsɛ sɛ wɔsɛe no. (Exodus 21:22, 23) Ɛno nti, ɛnsɛ sɛ yebu nkwa adewa, denam tawa a yɛde bedi dwuma, nnubɔne anaa mmosa a yɛde begu yɛn nipadua ho fĩ anaasɛ yɛn nkwa a yɛde bɛto asiane mu wɔ ɔkwan a ɛho nhia so no so. Saa ara na ɛnsɛ sɛ yɛde yɛn ho hyehyɛ nneɛma biara a ɛde nkwa to asiane mu mu anaasɛ yebu yɛn ani gu nhyehyɛe a ɛbɔ yɛn ho ban so, ade a ebetumi ama yɛadi mogya ho fɔ nso.—Deuteronomium 22:8.
22. (a) Adwene bɛn na Onyankopɔn kura wɔ mogya ne ne dwumadi ho? (b) Hena mogya nkutoo na egye nkwa ankasa?
22 Yehowa ka kyerɛɛ Noa ne n’abusua sɛ mogya gyina hɔ ma ɔkra, anaa nkwa. Enti, Onyankopɔn baraa wɔn sɛ wonnni mogya biara. (Genesis 9:3, 4) Esiane sɛ yɛyɛ wɔn asefo nti, saa mmara no kyekyere yɛn nyinaa. Yehowa ka kyerɛɛ Israelfo no sɛ wonhwie mogya ngu fam, na onipa mmfa nnni n’ankasa atirimpɔw ho dwuma. (Deuteronomium 12:15, 16) Wɔsan tii Onyankopɔn mmara a ɛfa mogya ho no mu bere a wɔde ahyɛde yi maa afeha a edi kan no mu Kristofo no: ‘Munyi mo ho mfi mogya ho.’ (Asomafo no Nnwuma 15:28, 29) Esiane sɛ nnipa a wosuro Onyankopɔn bu nkwa sɛ ɛyɛ kronkron nti, wonnye mogya a wɔde ma, sɛ afoforo ka sɛ saa adeyɛ no begye wɔn nkwa mpo a. Ada adi sɛ nnuru pii a wɔde si mogya ananmu a Yehowa Adansefo gye tom no yɛ nnam yiye, na ɛmma obi nhyia mogya a wɔde ma mu asiane ahorow. Kristofo nim sɛ Yesu mogya a ohwie gui no nkutoo na egye nkwa ankasa. Emu gyidi ma wonya bɔne fafiri ne daa nkwa ho anidaso.—Efesofo 1:7.
23. Onyamesom pa a wɔde tra ase so akatua no bi ne dɛn?
23 Ɛda adi pefee sɛ onyamesom pa a wɔde tra ase gye mmɔdenbɔ. Ebetumi ama abusuafo anaa amannifo adi wo ho fɛw. (Mateo 10:32-39; 1 Petro 4:4) Nanso saa asetra no so mfaso horow sen sɔhwɛ biara. Ɛma wunya ahonim pa, na wo ne wo mfɛfo Yehowa asomfo nya fekubɔ pa. (Mateo 19:27, 29) Afei nso, susuw Onyankopɔn trenee wiase foforo a wobɛtra mu no ho. (Yesaia 65:17, 18) Na hwɛ anigye a ɛyɛ sɛ wubedi Bible afotu so, na wonam saayɛ so ama Yehowa koma ani agye! (Mmebusɛm 27:11) Ɛnyɛ nwonwa sɛ onyamesom pa a wɔde tra ase de anigye ba!—Dwom 128:1, 2.
SƆ WO NIMDEƐ HWƐ
Nneɛma a ɛma onyamesom pa a wɔde tra ase de anigye ba no bi ne dɛn?
Onyamesom pa a wɔde tra ase bɛhwehwɛ sɛ wɔyɛ nsakrae bɛn?
Dɛn nti na wopɛ sɛ wode onyamesom pa tra ase?
[Adesua no ho nsɛmmisa]
[Mfonini wɔ kratafa 124, 125]
Honhom fam dwumadi ahorow a wɔma ɛne ahomegye kari pɛ boa ma wɔn a wɔde onyamesom pa tra ase no nya anigye
