ASƐMMISA 7
Obi Pɛ Sɛ Me ne No Da a Mɛyɛ Dɛn?
NEA ENTI A EHIA
Nea wobɛyɛ wɔ ɔbea ne ɔbarima nna ho biara, kae sɛ ɛda hɔ retwɛn wo.
ƐDƐN NA WOBƐYƐ?
Wo deɛ hwɛ asɛm yi: Heather huu Mike bosome mmienu pɛ ni, nanso ɛte sɛ nea ɔne no abɔ akyɛ. Daa wɔde text message manemane wɔn ho. Wosom sɛ wɔrekasa wɔ tɛlɛfon so a, nnɔnhwerew deɛ ɛwɔ hɔ na wogu so. Wɔrekasa a obiara nim nea baako ano besi. Nanso nkɔmmɔ nko ara mmee Mike; ɔpɛ biribi aka ho.
Bosome mmienu a wohyiae yi, nea wɔyɛ ara ne sɛ wɔsosɔ wɔn nsa, na ɛtɔ da nso a wɔfe wɔn ano kakra. Heather pɛ sɛ ɔde so hɔ ara; ɔmpɛ sɛ ɔyɛ biribiara ka ho. Nanso asɛm no ne sɛ ɔmpɛ sɛ Mike fi ne nsa. Obiara nni hɔ a ɔkorɔkorɔ no gyigye ne so te sɛ Mike. Ne komam paa deɛ, onim sɛ ɔne Mike dɔ wɔn ho.
Sɛ woanyin sɛ wo ne obi bɛnantew, ɛnna Heather asɛm yi bi too wo a, anka wobɛyɛ dɛn?
SUSUW HO HWƐ!
Ɔbea ne ɔbarima nna yɛ akyɛde a Onyankopɔn de ama awarefo nkutoo. Sɛ obi foforo biara de ne ho hyem a, na wasɛe akyɛde no. Ɛte sɛ obi ama wo atade fɛfɛ bi na woadan no ntamagow
Sɛ wugyina soro baabi na wuhuruw na ɛyɛ wo sɛ worenhwe fam a, na woredaadaa wo ho. Saa ara na wubu w’ani gu Bible afotu so a woremfa wo ho nni. Afotu no bi ne sɛ ‘yɛntwe yɛn ho mfi aguamammɔ ho.’
Wubu w’ani gu afotu yi so a, dɛn na ɛbɛto wo? Bible se: “Nea ɔde ne ho hyɛ aguamammɔ mu no yɛ n’ankasa nipadua bɔne.” (1 Korintofo 6:18) Dɛn na ɛkyerɛ sɛ asɛm yi yɛ nokware?
Nhomanimfo bi ayɛ nhwehwɛmu ahu sɛ mmabun a wɔde wɔn ho hyɛ nna mu ansa na wɔaware no twa ɛso aba bɔne. Aba no bi na edidi so yi.
-
AHOYERAW. Mmabun a wɔde wɔn ho ahyɛ nna mu no ka sɛ wowiei no na atete wɔn ani so, na wodii ho yaw paa.
-
OBIARA NNYE NE YƆNKO NNI BIO. Wɔda wie a, obiara bisa ne ho sɛ, ‘Hena bio na ɔne no ada?’
-
ABASAMTU. Nokwasɛm a ɛwom paa ne sɛ mmaayewa pii pɛ nnipa a wɔbɛbɔ wɔn ho ban na ɛnyɛ wɔn a wɔbɛdaadaa wɔn ne wɔn ada. Woyɛ abaayewa na wogyaagyaa wo ho ma mmarimaa a, wɔn ani nnye wo ho bio.
-
Nea yɛreka akosi ara ni: Wugyaa wo ho ma obi ne wo da ansa na woaware a, na wabrɛ wo ase ama woahwere ade kɛse paa. (Romafo 1:24) Kae sɛ wo nipadua som bo, enti ɛnsɛ sɛ wugyaagyae wo ho ma obi sɛe wo!
Kyerɛ sɛ wusi pi na wowɔ ahoɔden a wode ‘bɛtwe wo ho afi aguamammɔ ho.’ (1 Tesalonikafo 4:3) Daakye woware a, wubenya kwan ne wo hokafo ada. Ɛno deɛ w’ani begye, efisɛ ‘woankowia’ na akɔfa dadwen, abasamtu, ne ahoyeraw aba.
WUSUSUW HO SƐN?
-
Sɛ obi dɔ wo paa a, wugye di sɛ ɔbɛma woayɛ biribi a ebepira wo na agya wo adwennwen?
-
Sɛ obi dwen wo ho paa a, wususuw sɛ ɔbɛdaadaa wo ma woayɛ biribi a ɛbɛsɛe wo ne Onyankopɔn ntam?
—Hebrifo 13:4.
Ebia W'Ani Begye Wei Nso Ho
MMABUN BISA SƐ
Masõ Sɛ Me Ne Ɔbea Anaa Barima Bɛnantew?
Nneɛma nnum yi betumi aboa wo ama woahu sɛ woaso aware anaa woaso sɛ wo ne ɔbea anaa barima nantew a.
MMABUN BISA SƐ
Sɛ Me Ne Obi Renantew, Dɛn Na Ɛsɛ Mehwɛ Kwan?
Sɛ wo ne obi nantew na edu baabi a, nneɛma mmiɛnsa bi wɔ hɔ a ɛsɛ sɛ mudwen ho. Ɛyɛ nneɛma bɛn?
