ADESUA 52
Nea Enti a Ɛsɛ Sɛ Yɛhwɛ Yɛn Ntaadehyɛ Ne Yɛn Ahosiesie Yiye
Ntaade a yɛhyɛ ne sɛnea yesiesie yɛn ho no ho hia paa. Ɛwom, obiara ne sɛnea ɔpɛ sɛ osiesie ne ho. Nanso yemmisa sɛ, yebetumi ahyɛ ntaade a yɛpɛ, na bere koro no ara yɛn ahosiesie asɔ Yehowa ani anaa? Yiw! Sɛ yɛde Bible afotusɛm yɛ adwuma a, ebetumi ayɛ yiye. Ma yɛnhwɛ afotusɛm yi bi.
1. Bible afotusɛm bɛn na ebetumi aboa yɛn ma yɛahu ntaade a ɛsɛ sɛ yɛhyɛ ne sɛnea ɛsɛ sɛ yesiesie yɛn ho?
Bible tu yɛn fo sɛ, ɛsɛ sɛ ‘yɛhyɛ ntaade a ɛfata, na yɛde ahobrɛase ne adwene a emu da hɔ siesie yɛn ho.’ Afei nso, ɛsɛ sɛ yedi yɛn ho ni sɛnea ɛbɛyɛ a afoforo behu sɛ ‘yɛsom Onyankopɔn.’ (1 Timoteo 2:9, 10) Yebetumi asua nneɛma nnan afi afotusɛm yi mu: (1) Ɛsɛ sɛ yɛhyɛ ntaade a “ɛfata.” Sɛ wokɔ asafo nhyiam a, wubehu sɛ ɛsono sɛnea obiara asiesie ne ho, nanso ntaade a yɛhyɛ ne sɛnea yesiesie yɛn ti ho no da adi sɛ, yebu Onyankopɔn a yɛsom no no. (2) Ɛsɛ sɛ ntaade a yɛhyɛ ne sɛnea yesiesie yɛn ho no ma nkurɔfo hu sɛ ‘yɛbrɛ yɛn ho ase.’ Wei kyerɛ sɛ, ɛnsɛ sɛ sɛnea yesiesie yɛn ho no kanyan nna ho akɔnnɔ wɔ nkurɔfo mu. Saa ara nso na ɛnsɛ sɛ ɛma nkurɔfo adwene ba yɛn so dodo. (3) Ɛsɛ sɛ yɛn ahosiesie kyerɛ sɛ ‘yɛn adwene mu da hɔ.’ Wei kyerɛ sɛ, ɛnyɛ ntaade anaa ahosiesie a ɛbɛba so biara na ɛsɛ sɛ yedi akyi. (4) Sɛnea yesiesie yɛn ho ne ntaade a yɛhyɛ no, ɛsɛ sɛ ɛma nkurɔfo hu sɛ yɛsom nokware Nyankopɔn no.—1 Korintofo 10:31.
2. Sɛ yɛresiesie yɛn ho a, adɛn nti na ɛsɛ sɛ yedwen yɛn nuanom Kristofo ho?
Ɛwom, yɛwɔ hokwan sɛ yɛhyɛ nea yɛpɛ. Nanso, ɛsɛ sɛ yebisa yɛn ho sɛ, ‘Ataade a merehyɛ yi, ebetumi ato obi hintidua anaa?’ Ɛsɛ sɛ yɛbɔ mmɔden sɛ yɛrenyɛ biribiara a ɛbɛhaw afoforo, mmom ɛsɛ sɛ yɛyɛ ‘nea yɛn yɔnko pɛ ne nea ɛbɛhyɛ no den.’—Kenkan Romafo 15:1, 2.
3. Sɛnea yesiesie yɛn ho no betumi ama nkurɔfo ani agye ho sɛ wobesua Yehowa ho ade. Ɔkwan bɛn so?
Ɛwom, baabiara a yɛbɛkɔ biara, yɛbɔ mmɔden sɛ yɛbɛhyɛ ntaade a ɛfata. Nanso, sɛ yɛrekɔ asafo nhyiam anaa yɛrekɔ asɛnka a, ɛsɛ sɛ yɛhwɛ yɛn ahosiesie yiye paa. Asɛm yi ho hia paa, efisɛ sɛ yɛn ahosiesie nyɛ papa a, ebeyi nkurɔfo adwene afi asɛmpa a yɛka no so. Nanso, sɛ yesiesie yɛn ho yiye a, ebetumi ama nkurɔfo ani agye ho sɛ wobesua Onyankopɔn ho ade, na ‘ɛbɛma yɛn Agyenkwa nkyerɛkyerɛ no ho aba nyam.’—Tito 2:10.
SUA PII KA HO
Ɔfã yi bɛboa wo ama woahu sɛnea ɛsɛ sɛ Kristofo siesie wɔn ho.
Sɛ yɛrekɔ obi a ɔwɔ tumi anim a, sɛnea yebesiesie yɛn ho no bɛkyerɛ sɛ yebu no anaa yemmu no. Ɛwom, Yehowa hwɛ komam, nanso ɛsɛ sɛ sɛnea yesiesie yɛn ho no kyerɛ sɛ yebu no
4. Sɛ yesiesie yɛn ho yiye a, ɛkyerɛ sɛ yebu Yehowa
Dɛn nti paa na ɛsɛ sɛ yesiesie yɛn ho yiye? Monkenkan Dwom 47:2. Muwie a munsusuw nsɛmmisa yi ho:
-
Yɛyɛ Yehowa asomfo. Enti wohwɛ a, sɛn na ɛsɛ sɛ yesiesie yɛn ho?
-
Sɛnea yesiesie yɛn ho kɔ asafo nhyiam anaa asɛnka no, wohwɛ a, ɛsɛ sɛ yɛma ɛho hia yɛn? Adɛn nti na woreka saa?
5. Nea ɛbɛboa yɛn ama yɛahu ntaade a ɛsɛ sɛ yɛhyɛ ne sɛnea ɛsɛ sɛ yesiesie yɛn ho
Ntaade a yɛhyɛ no, sɛ ne bo yɛ den oo, ne bo nyɛ den oo, ɛsɛ sɛ yɛhwɛ sɛ ani tew. Afei, ɛsɛ sɛ yɛhwɛ sɛ, baabi a yɛrekɔ no, ɛfata sɛ yɛhyɛ saa ataade no anaa. Monkenkan 1 Korintofo 10:24 ne 1 Timoteo 2:9, 10. Afei, munsusuw ho nhwɛ nea enti a ɛnsɛ sɛ yɛhyɛ ntaade a edidi so yi . . .
-
ntaade a ayɛ fĩ.
-
ntaade a ɛkyekyere yɛn papee, ɛma yɛn ho baabi gu hɔ, anaa ɛkanyan nna ho akɔnnɔ.
Ɛwom, Kristofo nhyɛ Mose Mmara no ase, nanso nneɛma pii wom a ebetumi aboa Kristofo ama wɔahu sɛnea Yehowa te nka wɔ nneɛma bi ho. Monkenkan Deuteronomium 22:5. Muwie a munsusuw asɛmmisa yi ho:
-
Ntaade ne ahosiesie bi wɔ hɔ a, etumi ma mmarima sɛ mmea, ebi nso wɔ hɔ a, etumi ma mmea sɛ mmarima. Adɛn nti na ɛnsɛ sɛ yesiesie yɛn ho saa?
Monkenkan 1 Korintofo 10:32, 33 ne 1 Yohane 2:15, 16. Muwie a munsusuw nsɛmmisa yi ho:
-
Sɛ yɛresiesie yɛn ho a, ɛsɛ sɛ yɛhwɛ sɛ ɛrento wɔn a wɔwɔ yɛn mpɔtam anaa anuanom a wɔwɔ asafo no mu hintidua. Adɛn ntia?
-
Wohwɛ baabi a wowɔ no a, sɛn na nkurɔfo siesie wɔn ho, na ntaade bɛn na wɔtaa hyɛ?
-
Ntaade a wɔhyɛ ne sɛnea wosiesie wɔn ho no, wohwɛ a, ne nyinaa na ɛfata Kristoni anaa? Adɛn nti na woreka saa?
Akwan pii wɔ hɔ a yebetumi afa so asiesie yɛn ho ama asɔ Yehowa ani
EBINOM KA SƐ: “Metumi ahyɛ nea mepɛ biara.”
-
Wɔn a wɔka saa no, wo ne wɔn yɛ adwene? Adɛn ntia?
NEA YƐASUA
Sɛ yesiesie yɛn ho yiye na yɛhyɛ ntaade a ɛfata a, ɛkyerɛ sɛ yebu Yehowa na yebu afoforo nso.
Ntimu
-
Adɛn nti na yɛn ntaadehyɛ ne yɛn ahosiesie ho hia Yehowa?
-
Afotusɛm a ɛwɔ Bible mu a ɛboa yɛn ma yehu sɛnea ɛsɛ sɛ yesiesie yɛn ho no, ebi ne dɛn?
-
Sɛnea yesiesie yɛn ho no betumi ama nkurɔfo ani agye ho sɛ wobesua Yehowa ho ade, anaa ebetumi ato wɔn hintidua. Ɔkwan bɛn so?
YƐ NHWEHWƐMU
Kenkan saa asɛm yi, na wubehu sɛ ntaade a wohyɛ no ka nsɛm pii fa wo ho.
Ansa na wobɛdrɔdrɔ nneɛma bi agu wo ho anaa wobɛyɛ tattoo no, ɛsɛ sɛ wudwen ho yiye paa. Adɛn ntia?
Hwɛ Bible afotusɛm ahorow a ebetumi aboa wo ama woahu sɛnea ɛsɛ sɛ wusiesie wo ho.
“W’ahosiesie Hyɛ Onyankopɔn Anuonyam?” (Ɔwɛn-Aban, September 2016)
Ɔsom a na maame bi wom nti, na n’adwene yɛ no sɛ ɔkwan pɔtee bi wɔ hɔ a ɛsɛ sɛ nkurɔfo fa so siesie wɔn ho, nanso akyiri yi, ɔsesaa n’adwene. Dɛn na ɛboaa no?
Ebia W'Ani Begye Wei Nso Ho
NSƐM A NKURƆFO TAA BISA
Sɛn Na Yehowa Adansefo Ne Nkurɔfo Sua Bible?
Yehowa Adansefo ne nkurɔfo bɔ Bible mu nkɔmmɔ a wonnye sika. Wubetumi de Bible biara a wopɛ asua ade no. Wopɛ a, wubetumi afrɛ w’abusuafo nyinaa ne wo nnamfo abesua bi.
