ADESUA 55
Yɛ Nea Wubetumi Biara Fa Boa Asafo a Wowom No
Wokɔ wiase baabiara a, nnipa ɔpepem pii de anigye resom Onyankopɔn wɔ Yehowa Adansefo asafo ahorow mu. Akwankyerɛ ne nkyerɛkyerɛ a wonya wɔ hɔ no, wɔn ani gye ho, na wɔyɛ nea wobetumi biara boa ma asafo no nya nkɔso. Wo nso, asafo a wowom no, wuhu no sɛn? Dɛn na wubetumi ayɛ de aboa ama anya nkɔso?
1. Akwan bɛn so na wubetumi de wo bere ne w’ahoɔden aboa asafo a wowom no?
Yɛn nyinaa betumi ayɛ biribi de aboa asafo a yɛwom no. Sɛ wohwɛ w’asafo mu a, ebinom wɔ hɔ a wɔn ani afi anaa wɔyare? Wɔn a wɔte saa no, wubetumi akɔfa wɔn aba asafo nhyiam. Sɛ wohia biribi a, wubetumi akɔtɔ abrɛ wɔn, anaa wubetumi ayɛ fie nnwuma bi de aboa wɔn. (Kenkan Yakobo 1:27.) Afei nso, sɛ mo asafo no resiesie Ahenni Asa so a, wubetumi atu wo ho ama akɔboa. Obiara nhyɛ yɛn sɛ yɛnyɛ nneɛma a yɛaka ho asɛm yi. Mmom, Onyankopɔn ne yɛn nuanom ho dɔ nti na ‘yetu yɛn ho ma koraa’ boa asafo a yɛwom no.—Dwom 110:3.
Wɔn a wɔabɔ asu abɛyɛ Yehowa Adansefo no, nneɛma afoforo wɔ hɔ a wobetumi ayɛ de aboa asafo a wɔwom no. Sɛ wɔyɛ mmarima a wɔbɔ wɔn bra yiye anaa wɔyɛ nhwɛso pa a, wobetumi abɛyɛ asafo mu asomfo, na akyiri yi wɔabɛyɛ mpanyimfo. Mmarima ne mmea a wɔabɔ asu betumi abɛyɛ akwampaefo na wɔde wɔn bere pii ayɛ asɛnka adwuma no. Ɛno da nkyɛn a, sɛ wɔresi adan a yehyiam som a, wobetumi atu wɔn ho ama akɔboa. Afei nso, sɛ asafo bi hia mmoa wɔ baabi a, wobetumi atu akɔ hɔ akɔboa.
2. Ɔkwan bɛn so na yebetumi de yɛn sika ne yɛn ahonyade aboa asafo no?
Yebetumi de yɛn ‘ahonyade ahyɛ Yehowa anuonyam.’ (Mmebusɛm 3:9) Yɛn ani gye ho paa sɛ yɛde yɛn sika ne yɛn ahonyade bɛboa asafo a yɛwom ne asɛnka adwuma a yɛyɛ wɔ wiase nyinaa no. (Kenkan 2 Korintofo 9:7.) Ntoboa ahorow a yeyi no, yɛde bi boa yɛn nuanom a atoyerɛnkyɛm ama wɔn ho aka no. Nea ɛyɛ a anuanom pii yɛ ne sɛ, ‘woyi sika kakra sie,’ sɛnea ɛbɛyɛ a wobetumi de ayi ntoboa. (Kenkan 1 Korintofo 16:2.) Sɛ yɛpɛ sɛ yeyi ntoboa a, yɛbɛyɛ no sɛn? Ntoboa nnaka a ɛyɛ a esisi mmeae a yehyiam som no, yebetumi de yɛn ntoboa no agu mu, anaa yebetumi afa intanɛt so ayi ntoboa. Yebetumi ayɛ saa wɔ donate.dan124.com. Hokwan baako a Yehowa de ama yɛn ne sɛ yɛde yɛn ahode ne yɛn sika bɛboa ne som. Sɛ yɛyɛ saa a, ɛma ohu sɛ yɛdɔ no.
SUA PII KA HO
Ɔfã yi bɛma woahu nneɛma bi a wubetumi ayɛ de aboa asafo a wowom no.
3. Yebetumi de yɛn sika ne yɛn ahode aboa
Wɔn a woyi wɔn yam kyɛ ade no, Yehowa ne Yesu dɔ wɔn paa. Bere bi, Yesu huu okunafo hiani bi a ɔde sika kakra a ɔwɔ no reyi ntoboa, na ɔkamfoo no paa. Monkenkan Luka 21:1-4. Muwie a munsusuw nsɛmmisa yi ho:
-
Ɛsɛ sɛ yeyi ntoboa kɛse ansa na asɔ Yehowa ani anaa?
-
Sɛ yefi yɛn komam yi ntoboa a, Yehowa ne Yesu te nka sɛn?
Ntoboa ahorow a yeyi no, sɛ wopɛ sɛ wuhu nea yɛde yɛ a, hwɛ VIDEO yi. Muwie a, munsusuw asɛmmisa yi ho:
-
Ntoboa ahorow a yeyi no, sɛn na asafo ahorow a ɛwɔ wiase nyinaa nya so mfaso?
4. Sɛ asafo no reyɛ adwuma bi a, yebetumi atu yɛn ho ama akɔboa
Tete Israelfo bere so no, Yehowa asomfo yɛɛ nea wobetumi biara sɛ wɔbɛhwɛ mmeae a wohyiam som no so yiye. Sɛ wobetumi ayɛ saa a, na ɛsɛ sɛ woyi ntoboa, nanso ɛnyɛ ɛno nko ara. Dɛn bio na na ɛsɛ sɛ wɔyɛ? Monkenkan 2 Beresosɛm 34:9-11. Muwie a munsusuw asɛmmisa yi ho:
-
Dɛn na Israelni biara yɛ de boa ma wosiesiee Yehowa fie no?
Sɛnea Israelfo no yɛe no, ɛnnɛ nso, Yehowa Adansefo yɛ adwumaden de siesie mmeae a wohyiam som no. Hwɛ VIDEO yi. Muwie a, munsusuw nsɛmmisa yi ho:
-
Adɛn nti na ehia sɛ yɛma yɛn Ahenni Asa so tew, na yɛhwɛ sɛ biribiara ntɔɔ kyima wɔ hɔ?
-
Nneɛma bɛn na wubetumi ayɛ de aboa ama yɛahwɛ Ahenni Asa no so yiye?
5. Mmarima a wɔwɔ asafo no mu betumi ayere wɔn ho na wɔde nnwuma pii ahyehyɛ wɔn nsa
Kyerɛwnsɛm no hyɛ mmarima a wɔwɔ asafo no mu nkuran sɛ, wɔnyere wɔn ho nyɛ nea wobetumi biara mmoa asafo no. Hwɛ VIDEO yi, na wubehu sɛnea aberante bi tumi yɛɛ saa. Muwie a, munsusuw asɛmmisa yi ho:
-
Dɛn na Ryan yɛe sɛnea ɛbɛyɛ a wobetumi de nnwuma pii ahyɛ ne nsa na waboa asafo no?
Bible no ma yehu nneɛma a wɔhwehwɛ fi obi a ɔpɛ sɛ ɔbɛyɛ asafo mu somfo anaa ɔpanyin hɔ. Monkenkan 1 Timoteo 3:1-13. Muwie a, munsusuw nsɛmmisa yi ho:
-
Sɛ ɔbarima bi pɛ sɛ ɔbɛyɛ asafo mu somfo anaa ɔpanyin a, dɛn na Bible no hwehwɛ fi ne hɔ?
-
Dɛn na wɔhwehwɛ fi n’abusua nso hɔ?—Hwɛ nkyekyɛm 4 ne 11.
-
Nea Bible no hwehwɛ fi Kristofo mmarima hɔ no, sɛ wɔyɛ nea wobetumi biara du ho a, sɛn na ɛbɛboa wɔn a wɔwɔ asafo no mu?
OBI BETUMI ABISA SƐ: “Adwuma a Yehowa Adansefo yɛ no, ɛhe na wonya ho sika?”
-
Sɛ obi bisa saa a, wubeyi ano sɛn?
NEA YƐASUA
Sɛ yɛde yɛn bere, yɛn ahoɔden, yɛn sika, ne yɛn ahode boa asafo no a, ɛma Yehowa ani gye, na n’ani sɔ.
Ntimu
-
Ɔkwan bɛn so na yebetumi de yɛn bere ne yɛn ahoɔden aboa asafo no?
-
Ɔkwan bɛn so na yebetumi de yɛn sika ne yɛn ahode aboa asafo no?
-
Nneɛma bɛn na wopɛ sɛ woyɛ de boa asafo a wowom no?
YƐ NHWEHWƐMU
Kenkan saa asɛm yi, na wubehu nea enti a Onyankopɔn nhwɛ kwan sɛ n’asomfo beyi ntotoso du du nnɛ.
Bible ma yehu sɛ dwumadi ahorow bi wɔ hɔ a, mmarima a wɔabɔ asu na ɛsɛ sɛ wɔyɛ. Na sɛ tebea bi nti ɛho hia sɛ ɔbea a wabɔ asu di saa dwuma no bi nso ɛ?
“Sɛnea Tiyɛ Nhyehyɛe No Yɛ Adwuma Wɔ Asafo No Mu” (Ɔwɛn-Aban, February 2021)
Hwɛ video yi, na wubehu Yehowa Adansefo bi a wɔde nneɛma bɔɔ afɔre sɛnea ɛbɛyɛ a wobetumi de nhoma akɔma wɔn nuanom afoforo.
Ɔkwan bɛn so na yenya sika de yɛ adwuma a yɛyɛ no, na sɛn na ɛyɛ soronko wɔ sɛnea nsɔrensɔre no nya wɔn sika ho? Kenkan saa asɛm yi, na wubenya ho mmuae.
“Adwuma a Yehowa Adansefo Yɛ Wɔ Wiase Nyinaa No, Wɔyɛ Dɛn Nya Ho Sika?” (Ɛwɔ jw.org)
Ebia W'Ani Begye Wei Nso Ho
NSƐM A NKURƆFO TAA BISA
Sɛn Na Yehowa Adansefo Ne Nkurɔfo Sua Bible?
Yehowa Adansefo ne nkurɔfo bɔ Bible mu nkɔmmɔ a wonnye sika. Wubetumi de Bible biara a wopɛ asua ade no. Wopɛ a, wubetumi afrɛ w’abusuafo nyinaa ne wo nnamfo abesua bi.
