1. Fa mfatoho kyerɛ nea enti a yehia Yehowa akwankyerɛ.

 FA NO sɛ woayera wɔ kwae bi mu. Ɛhɔ yɛ hu efisɛ nkekaboa, mmoawammoawa a wɔbetumi ama woayare, nsasono ne ohwirom, ne abotan tintim hɔ. Sɛ wunya obi a onim kwae no mu ma ɔkyerɛ wo kwan na woankɔtɔ asiane mu a, anka ɛrenyɛ wo dɛ? Wiase yi te sɛ kwae a yɛreka ho asɛm no. Emu yɛ hu paa, na nneɛma a ɛwom no betumi asɛe yɛne Yehowa ntam. Nanso yɛwɔ ɔkwankyerɛfo a obetumi akyerɛ yɛn kwan yiye; ɔno ne Yehowa. Ɔkyerɛ yɛn kwan na yɛantɔ asiane mu sɛnea ɛbɛyɛ a yɛbɛkɔ akodu wiase foforo no mu dwoodwoo.

2. Sɛn na Yehowa kyerɛ yɛn kwan?

² Sɛn na Yehowa kyerɛ yɛn kwan? Bible no ne ɔkwan titiriw a ɔfa so yɛ saa. Nanso ɔde nnipa nso di dwuma. Yɛbɛyɛ nhwɛso a, ɔnam “akoa nokwafo ne ɔbadwemma” no so ma yɛn honhom fam aduan. Wei boa yɛn ma yesisi gyinae pa. (Mat. 24:45) Yehowa san de mmarima afoforo a wɔfata di dwuma ma wɔkyerɛ yɛn kwan. Yɛbɛyɛ nhwɛso a, amansin so ahwɛfo ne asafo mu mpanyimfo hyɛ yɛn nkuran. Afei nso, wɔma yɛn akwankyerɛ a ɛboa yɛn ma yetumi gyina ɔhaw a emu yɛ den ano. Yɛda Yehowa ase paa sɛ ɔma yɛn akwankyerɛ pa wɔ mmere a emu yɛ den yi mu! Wei boa yɛn ma yɛne ne ntam kɔ so yɛ kama, na ɛma yɛkɔ so nantew nkwa kwan no so.

3. Dɛn na yebesusuw ho wɔ adesua yi mu?

³ Wei nyinaa akyi no, ɛtɔ mmere bi a, ebetumi ayɛ den ama yɛn sɛ yebetie Yehowa akwankyerɛ, ɛnkanka sɛ nnipa a sintɔ wɔ wɔn ho na ɛde rema yɛn a. Adɛn ntia? Efisɛ afotu a wɔde bɛma yɛn no, ebia ɛnyɛ ɛno na yɛrepɛ atie. Anaa ebia ɛbɛyɛ yɛn sɛ akwankyerɛ a wɔde rema yɛn no, ntease nnim, enti ɛnyɛ ade a ebetumi afi Yehowa hɔ. Mmere a ɛtete saa mu paa na ɛsɛ sɛ yenya awerɛhyem sɛ Yehowa na  ɔrekyerɛ ne nkurɔfo kwan, na sɛ yedi n’akwankyerɛ so a obehyira yɛn. Nea ɛbɛboa yɛn ma yɛanya ne mu ahotoso kɛse no, yebesusuw nsɛm a edidi so yi ho: (1) Sɛnea Yehowa kyerɛɛ ne nkurɔfo a wɔn ho asɛm wɔ Bible mu no kwan, (2) sɛnea ɔrekyerɛ yɛn kwan nnɛ, ne (3) mfaso a yenya bere a yɛkɔ so di n’akwankyerɛ so no.

SƐNEA YEHOWA KYERƐƐ ISRAEL MAN NO KWAN

4-5. Sɛn na Yehowa ma ɛdaa adi sɛ ɔnam Mose so rekyerɛ Israel man no kwan? (Hwɛ mfoni a ɛwɔ Ɔwɛn-Aban yi anim no.)

⁴ Yehowa paw Mose sɛ onkogye Israelfo no mfi Egypt. Ɔmaa Israelfo no huu adanse a ɛkyerɛ sɛ ɔnam Mose so rekyerɛ wɔn kwan. Ɔnam omununkum dum so kyerɛɛ wɔn kwan awia, na ɔnam ogya dum so maa wɔn hann anadwo. (Ex. 13:21) Mose dii adum no akyi, na ɛde wɔn kopuee Ɛpo Kɔkɔɔ no ho. Bere a ɛyɛɛ Israelfo no sɛ wɔaka Ɛpo Kɔkɔɔ no ne Egypt asraafo a na wɔtaa wɔn no ntam no, ehu kaa wɔn. Wɔkaa sɛ Mose adi mfomso sɛ ɔde wɔn baa Ɛpo Kɔkɔɔ no ho. Nanso na ɛnyɛ mfomso. Yehowa hyɛɛ da na ɔmaa Mose de Israelfo no kɔɔ hɔ. (Ex. 14:2) Afei Onyankopɔn gyee wɔn anwonwakwan so maa wɔn ho dwiriw wɔn.—Ex. 14:​26-28.

⁵ Mfe 40 a edi hɔ no, Mose kɔɔ so dii omununkum dum no akyi de kyerɛɛ Onyankopɔn nkurɔfo kwan wɔ sare no so. a Yehowa maa omununkum dum no kosii Mose ntamadan no atifi kosii bere bi, baabi a na Israelfo no nyinaa betumi ahu. (Ex. 33:​7, 9, 10) Sɛ Yehowa ne Mose kasa wɔ omununkum dum no mu a, na ɔno nso akɔka akyerɛ Israelfo no. (Dw. 99:7) Israelfo no tumi hui pefee sɛ na Yehowa nam Mose so rekyerɛ wɔn kwan.

6. Sɛn na Israelfo no yɛɛ wɔn ade wɔ Yehowa akwankyerɛ ho? (Numeri 14:​2, 10, 11)

⁶ Awerɛhosɛm ne sɛ, adanse a ɛkyerɛ pefee sɛ na Yehowa nam Mose so rekyerɛ Israelfo no kwan no, wɔn mu dodow no ara poe. (Kenkan Numeri 14:​2, 10, 11.) Mpɛn pii no, na wɔnnye ntom sɛ Yehowa nam Mose so rekyerɛ wɔn kwan. Ɛno nti, Yehowa amma saa Israelfo no ankɔ Bɔhyɛ Asaase no so.—Num. 14:30.

7. Wɔn a edii Yehowa akwankyerɛ so no, wɔn mu bi ne henanom? (Numeri 14:24) (Hwɛ mfoni no nso.)

⁷ Nanso Israelfo no bi dii Yehowa akwankyerɛ so. Yɛbɛyɛ nhwɛso a, Yehowa kaa sɛ: ‘Kaleb akɔ so de ne koma nyinaa adi m’akyi.’ (Kenkan Numeri 14:24.) Onyankopɔn bɔɔ n’aba so, na ɔmaa ɔno ankasa kyerɛɛ baabi a ɔpɛ sɛ ɔtena wɔ Bɔhyɛ Asaase no so. (Yos. 14:​12-14) Israelfo a wɔkɔɔ Bɔhyɛ Asaase no so no, wɔn nso yɛɛ nhwɛso pa, kyerɛ sɛ, wɔtiee Yehowa akwankyerɛ. Bere a Yosua besii Mose ananmu dii Israelfo no anim no, “wobuu no paa ne nkwa nna nyinaa.” (Yos. 4:14) Wei nti Yehowa hyiraa wɔn, na ɔde wɔn kɔɔ asaase a ɔde hyɛɛ wɔn bɔ no so.—Yos. 21:​43, 44.

8. Sɛnea Yehowa kyerɛɛ ne nkurɔfo kwan wɔ ahemfo no bere so no, kyerɛkyerɛ mu. (Hwɛ mfoni no nso.)

⁸ Mfe bi akyi no, Yehowa paw atemmufo ma wɔkyerɛɛ ne nkurɔfo kwan. Ɛno akyi wɔ ahemfo no bere so no, Yehowa paw adiyifo ma wɔkyerɛɛ ne nkurɔfo kwan. Ahemfo a na wɔdi nokware no tiee adiyifo no afotu. Yɛbɛyɛ nhwɛso a, nteɛso a odiyifo Natan de maa Ɔhene Dawid  no, ɔbrɛɛ ne ho ase gye toom. (2 Sam. 12:​7, 13; 1 Be. 17:​3, 4) Ɔhene Yehosafat tiee akwankyerɛ a Yahasiel de maa no no, na ɔhyɛɛ Yudafo no nkuran sɛ ‘wonnya Onyankopɔn adiyifo mu gyidi.’ (2 Be. 20:​14, 15, 20) Ɔhene Hesekia kɔɔ ahohia mu no, okogyee akwankyerɛ fii odiyifo Yesaia hɔ. (Yes. 37:​1-6) Bere biara a ahemfo no betie Yehowa akwankyerɛ no, na ohyira wɔn, na na ɔbɔ ɔman no ho ban. (2 Be. 20:​29, 30; 32:22) Ná anka ɛsɛ sɛ obiara hu sɛ Yehowa nam n’adiyifo no so rekyerɛ ne nkurɔfo kwan. Nanso, ahemfo dodow no ara ne ɔmanfo no antie Yehowa adiyifo no.—Yer. 35:​12-15.

SƐNEA YEHOWA KYERƐƐ TETE KRISTOFO NO KWAN

9. Henanom na Yehowa nam wɔn so kyerɛɛ tete Kristofo no kwan? (Hwɛ mfoni no nso.)

⁹ Yesu wusɔre akyi no, Yehowa hyehyɛɛ Kristofo asafo no. Sɛn na ɔkyerɛɛ Kristofo a na ɛwɔ hɔ saa bere no kwan? Ɔpaw Yesu sɛ asafo no ti. (Efe. 5:23) Nanso, Yesu amfa akwankyerɛ amma osuani biara tee. Ɔnam asomafo ne mpanyimfo a na ɛwɔ Yerusalem no so na ɛkyerɛɛ asafo no kwan. (Aso. 15:​1, 2) Afei nso, asafo biara mu no, wɔpaw mpanyimfo a na wɔde akwankyerɛ bɛma.—1 Tes. 5:12; Tito 1:5.

10. (a) Akwankyerɛ a wɔde maa tete Kristofo no, sɛn na wɔn mu dodow no ara yɛɛ wɔn ade wɔ ho? (Aso. 15:​30, 31) (b) Wɔn a Yehowa faa wɔn so kyerɛɛ ne nkurɔfo kwan tete no, adɛn nti na ebinom antie wɔn? (Hwɛ adaka a yɛato din, “ Adanse a Ɛda Adi Pefee No, Adɛn Nti Na Ebinom Apo?” no.)

¹⁰ Sɛn na tete Kristofo no yɛɛ wɔn ade? Wɔn mu dodow no ara de anigye tiee akwankyerɛ a wɔde maa wɔn no. Nokwasɛm ne sɛ, bere a ‘wɔhyɛɛ wɔn nkuran no, wodii ahurusi.’ (Kenkan Asomafo Nnwuma 15:​30, 31.) Yɛn bere yi so nso ɛ, sɛn na Yehowa rekyerɛ ne nkurɔfo kwan?

SƐNEA YEHOWA KYERƐ YƐN KWAN NNƐ

11. Wɔn a wɔdi Yehowa nkurɔfo anim wɔ yɛn bere yi so no, ma nhwɛso fa kyerɛ sɛnea Yehowa akyerɛ wɔn kwan.

¹¹ Yehowa kɔ so ara kyerɛ ne nkurɔfo kwan nnɛ. Ɔnam n’Asɛm ne ne Ba a ɔyɛ asafo no ti no so na ɛyɛ saa. Afei nso, adanse a ɛkyerɛ sɛ Onyankopɔn da so  ara fa nnipa so kyerɛ ne nkurɔfo kwan no, yehu anaa? Yiw. Momma yɛnhwɛ nea ɛkɔɔ so afe 1870 akyi. Charles Taze Russell ne wɔn a ɛka ne ho hwehwɛɛ Bible mu hui sɛ afe 1914 no, Onyankopɔn Ahenni no befi ase adi tumi. (Dan. 4:​25, 26) Bible nkɔmhyɛ na ɛboaa wɔn ma wɔtumi hui. Bible mu nhwehwɛmu a wɔyɛe no, Yehowa na ɔkyerɛɛ wɔn kwan anaa? Biribiara kyerɛ sɛ na Yehowa rekyerɛ wɔn kwan. Nsɛm a esisii afe 1914 no ma yehu ampa ara sɛ na Onyankopɔn Ahenni no afi ase redi tumi. Saa bere no na Wiase Ko a Edi Kan no fii ase; nsanyare a edi awu, asaasewosow, ne ɔkɔm nso bae. (Luka 21:​10, 11) Ɛda adi pefee sɛ na Yehowa nam Kristofo mmarima anokwafo yi so reboa ne nkurɔfo.

12-13. Wiase Ko a Ɛtɔ So Mmienu no mu no, nhyehyɛe bɛn na anuanom a edi nneɛma anim no yɛe a ɛma wɔtumi yɛɛ asɛnka adwuma no pii?

¹² Wiase Ko a Ɛtɔ So Mmienu no mu nso, momma yɛnhwɛ nea esii. Anuanom a na edi nneɛma anim wɔ wiase nyinaa adwumayɛbea ti no, bere a wɔtweetwee Adiyisɛm 17:8 mu no, wɔhui sɛ ɛnyɛ saa ɔko no na ɛde Armagedon bɛba. Mmom, ɔko no ba awiei a, na asomdwoe kakra bɛba na ama wɔanya hokwan de ayɛ asɛnka adwuma no kɛse. Enti Yehowa ahyehyɛde no tew Ɔwɛn Aban Gilead Bible Sukuu no sɛ wɔde bɛtete asɛmpatrɛwfo ma wɔakɔka asɛmpa no wɔ wiase baabiara. Saa bere no, wohwɛ a na asɛ ntease nnim sɛ wɔbɛyɛ saa. Bere a ɔko no gyina mu mpo, wɔde asɛmpatrɛwfo kɔɔ aman foforo so. Afei nso, akoa nokwafo no yɛɛ nhyehyɛe bi wɔ nsafo no nyinaa mu. Wɔtoo din Ntetee wɔ Teokrase Ɔsom Adwuma mu. b Ná ɛbɛboa adawurubɔfo ma wɔatumi aka asɛmpa no na wɔakyerɛkyerɛ yiye. Wɔnam saa akwan yi so maa Onyankopɔn nkurɔfo yɛɛ ahoboa maa adwuma a na ɛda wɔn anim no.

¹³ Yebu kɔmpɔ hwɛ yɛn akyi a, yetumi hu pefee sɛ Yehowa kyerɛɛ ne nkurɔfo kwan wɔ saa mmere bɔne no mu. Efi Wiase Ko a Ɛtɔ So Mmienu no so reba no, Yehowa asomfo a wɔwɔ aman pii so tumi ka asɛmpa no a obiara nhyɛ da nsɔre ntia  wɔn. Nokwasɛm ne sɛ, adwuma no anya nkɔso.

14. Akwankyerɛ a Yehowa ahyehyɛde no ne asafo mu mpanyimfo de ma yɛn no, adɛn nti na yebetumi de yɛn ho ato so? (Adiyisɛm 2:1) (Hwɛ mfoni no nso.)

¹⁴ Ɛnnɛ, Akwankyerɛ Kuw no kɔ so hwehwɛ akwankyerɛ fi Kristo hɔ. Wɔpɛ sɛ akwankyerɛ a wɔde ma anuanom no, ɛne Yehowa ne Kristo adwene hyia. Wɔnam amansin so ahwɛfo ne asafo mu mpanyimfo so de akwankyerɛ ma asafo no. c Asafo mu mpanyimfo a wɔasra wɔn no wɔ Kristo nsa “nifa mu,” nanso yɛbɛka a, asafo mu mpanyimfo nyinaa ka ho. (Kenkan Adiyisɛm 2:1.) Ɛwom, saa mpanyimfo yi nyinaa tɔ sin, na wɔdi mfomso. Ɛtɔ da a na Mose ne Yosua di mfomso; asomafo no nso saa ara. (Num. 20:12; Yos. 9:​14, 15; Rom. 3:23) Nanso, Kristo da so ara kyerɛ akoa nokwafo no ne asafo mu mpanyimfo kwan, na ɔbɛkɔ so ayɛ saa “nna nyinaa kosi wiase yi awiei bere.” (Mat. 28:20) Wei nti, wɔn a wapaw wɔn sɛ wɔnni nneɛma anim no, yebetumi de yɛn ho ato akwankyerɛ a wɔde ma yɛn no so.

YEDI YEHOWA AKWANKYERƐ SO A, ƐBOA YƐN

15-16. Wɔn a etie Yehowa akwankyerɛ no, dɛn na wusua fi wɔn hɔ?

¹⁵ Sɛ yɛkɔ so tie Yehowa akwankyerɛ a, ɛnnɛ mpo ohyira yɛn. Yɛbɛyɛ nhwɛso a, akoa nokwafo no afotu a ɛne sɛ yɛnyɛ yɛn ho awiɛmfoɔ no, Andy ne Robyn tiei. (Mat. 6:22) Wɔyɛɛ saa no, wɔtumi tuu wɔn ho mae kosisii asafo adan. Robyn kaa sɛ: “Adan a yɛtena mu no, ɛyɛ a emu sua, enti mpɛn pii no, yennya baabi a yɛbɛnoa aduan mpo. Ná m’ani gye mfonitwa ho paa, nanso na ɛsɛ sɛ metontɔn me kamera nyinaa. Meretɔn nyinaa na meresu. Nanso sɛnea Abraham yere Sara yɛe no, na masi me bo sɛ m’anim ara na mɛhwɛ, merenhwɛ m’akyi.” (Heb. 11:15) Gyinae a awarefo no sii no, mfaso bɛn na wɔnyae? Robyn kaa sɛ: “Yɛn ani gye paa efisɛ yenim sɛ yɛde nea yɛwɔ nyinaa ama Yehowa. Sɛ yɛresisi asafo adan a, ɛma yehu sɛnea wiase foforo no mu asetena bɛyɛ.” Andy ne ne yere yɛ adwene. Ɔkaa sɛ: “Yɛwɔ koma mu anigye, efisɛ  yenim sɛ yɛde yɛn bere ne yɛn ahoɔden nyinaa reyɛ Yehowa adwuma.”

¹⁶ Sɛ yɛde Yehowa akwankyerɛ yɛ adwuma a, nhyira foforo bɛn na yenya? Bere a Marcia wiee ntoaso sukuu no, afotu a wɔde maa no sɛ ɔnyɛ akwampae adwuma no bi no, otiei. (Mat. 6:33; Rom. 12:11) Ɔka sɛ: “Minyaa skɔlahyip a na anka ɛbɛma matumi de mfe nnan akosua ade wɔ suapɔn mu. Nanso na mepɛ sɛ meyɛ pii wɔ Yehowa som mu. Enti mekɔɔ sukuu bi a wɔkyerɛ nsaanodwuma kosuaa adwuma a ɛbɛboa me ma mayɛ akwampae adwuma no. Gyinae pa a masisi wɔ m’asetena mu no, wei ka ho. Seesei m’ani gye wɔ akwampae adwuma no mu. Esiane sɛ adwuma nkyekyere me nti, mitumi kɔboa wɔ Betel. Wei abue hokwan afoforo nso ama me.”

17. Sɛ yetie Yehowa akwankyerɛ a, nhyira foforo bɛn bio na yenya? (Yesaia 48:​17, 18)

¹⁷ Ɛtɔ mmere bi a, Yehowa ahyehyɛde no ma yɛn afotu a ɛbɔ yɛn ho ban. Ebi ne sɛ yɛbɛhwɛ yɛn ho yiye wɔ ahonyade ho. Ebi nso ne sɛnea yɛbɛhwɛ na yɛanyɛ nneɛma bi a ɛbɛma yɛabu Onyankopɔn mmara so. Wei mu nso, sɛ yetie Yehowa akwankyerɛ a, obehyira yɛn. Yɛn ahonim renhaw yɛn, na yɛrenkɔfa dadwen a ɛho nhia mmɛto yɛn so. (1 Tim. 6:​9, 10) Ɛba saa a, yebetumi afi yɛn koma nyinaa mu asom Yehowa; ɛno nso na ɛma yenya komam anigye, asomdwoe ne abotɔyam.—Kenkan Yesaia 48:​17, 18.

18. Adɛn nti na woasi wo bo sɛ wobɛkɔ so atie Yehowa akwankyerɛ?

¹⁸ Nokwasɛm ne sɛ Yehowa bɛkɔ so afa nnipa so de akwankyerɛ ama n’asomfo wɔ ahohiahia kɛse no mu; Mfirihyia Apem Nniso no mu mpo, ɔbɛkɔ so ayɛ saa. (Dw. 45:16) Akwankyerɛ a wɔde bɛma yɛn no, sɛ ɛnyɛ ɛno na yɛpɛ mpo a, yebetie anaa? Ɛnnɛ, sɛnea yɛyɛ yɛn ade wɔ akwankyerɛ a Yehowa de ma yɛn no ho no, ɛno na ɛbɛkyerɛ. Ɛno nti, momma yentie Yehowa akwankyerɛ bere nyinaa; mmarima a wɔapaw wɔn sɛ wɔnhwɛ yɛn so no nso, momma yentie wɔn. (Yes. 32:​1, 2; Heb. 13:17) Yɛyɛ saa a, yebetumi de yɛn ho ato yɛn Kwankyerɛfo Yehowa so, efisɛ ɔno na ɔredi yɛn anim abɔ yɛn ho ban akɔ wiase foforo no mu.