Ɔman a Mary ne ne kunu John a te mu no, wɔtumi ka asɛmpa no kyerɛ nkurɔfo bebree a wɔfi Philippines a wɔatu aba hɔ rebɛyɛ adwuma. COVID-19 nsanyare bere no mu no, Mary tumi ne ebinom a wɔwɔ ne man mu fii ase suaa Bible. Afei nso ɔne nkurɔfo a wɔwɔ ɔman afoforo so nso fii ase suaa ade. Ɔyɛɛ no sɛn?

Ɛyɛ a na Mary bisa ne Bible asuafo no sɛ, “Wunim obi a ɔno nso ani begye ho sɛ obesua Bible anaa?” Sɛ wɔka sɛ wɔnim obi saa a, ɛyɛ a obisa wɔn sɛ, ‘Obetumi ahu wɔn anaa?’ Saa asɛm tiawa yi a obisa no tumi sow aba paa. Adɛn ntia? Efisɛ wɔn a wɔn ani gye Onyankopɔn Asɛm ho no, mpɛn pii no, ɛyɛ a wɔpɛ sɛ wɔka nea wɔresua no ho asɛm kyerɛ wɔn abusuafo ne wɔn nnamfo. Ɛnde, sɛ Mary bisa saa asɛm no a, dɛn na efi mu ba?

Mary Bible suani bi a ne din de Jasmin de Mary kyiaa ne nnamfo baanan bi a wɔn nso ani gye ho sɛ wɔbesua Bible. Wɔn mu baako a ne din de Kristine ani gyee nea na ɔresua no ho paa, enti ɔka kyerɛɛ Mary sɛ ɔne no nsua ade mprenu nnawɔtwe biara. Bere a Mary bisaa Kristine sɛ onim obi a ɔno nso ani gye ho sɛ obesua Bible no, ɔkaa sɛ, “Yiw, mede me nnamfo bi bekyia wo.” Nnawɔtwe kakraa bi ntam no, Kristine de ne nnamfo baanan bi a wɔpɛ sɛ wɔsua Bible kyiaa Mary. Akyiri yi, ɔma ohyiaa ne nnamfo afoforo nso, na ne nnamfo no mu bi nso maa Mary hyiaa wɔn nso nnamfo.

Ná Kristine pɛ sɛ n’abusuafo a wɔwɔ Philippines no nso sua Bible. Enti ɔne ne babea a ne din de Andrea kaa ho asɛm. Mfiase no, Andrea kaa sɛ, ‘Adansefo no yɛ kuw bi a wɔdi nnipa akyi; wɔnnye Yesu nni, na Apam Dedaw no nko ara na wɔde kyerɛkyerɛ.’ Nanso da a edi kan a wɔsuaa ade no, obehui sɛ nea watete afa Adansefo no ho nyinaa nyɛ nokware. Bere biara a obesua biribi foforo afi Bible mu no, ɔka sɛ, “Sɛ ɛwɔ Bible mu de a, ɛnde na ɛyɛ nokware!”

Akyiri yi, Andrea de ne nnamfo mmienu ne ne yɔnko dwumayɛni bi kyiaa Mary, na Mary ne wɔn nso fii ase suaa Bible. Afei nso, bere biara a Mary ne Andrea besua ade no, na Andrea sewaa bi a n’ani afura a ne din de Angela tie bi, nanso na Mary nnim. Da koro bi, Angela ka kyerɛɛ Andrea sɛ ɔmma ɔne Mary nkasa na ɔne ɔno nso mfi ase nsua Bible. Angela ani gyee nea na ɔresua no ho paa. Bosome baako ntam no, ɔkyeree kyerɛwnsɛm bebree guu ne tirim, na na ɔpɛ sɛ osua ade mpɛn nnan nnawɔtwe biara!  Andrea boaa Angela ma ofii ase baa adesua no bi daa wɔ videoconference so.

Bere a Mary behui sɛ, sɛ wɔresua ade a, ɛyɛ a na Kristine kunu Joshua hyɛ akyi hɔ retie bi no, obisaa no sɛ ɔno nso ani begye ho sɛ obesua bi anaa. Joshua kaa sɛ, “Wo de ma mintie bi kɛkɛ; mmisa me nsɛm no bi, anyɛ saa a megyaw mo hɔ akɔ.” Wɔfii adesua no ase no, simma nnum ntam no, Joshua bisaa nsɛm koraa sen Kristine, na na ɔno nso pɛ sɛ osua Bible.

Asɛmmisa tiawa a Mary bisae no kɔtwee Bible adesua bebree bae. Wɔn mu pii wɔ hɔ a, ɔyɛɛ nhyehyɛe maa anuanom afoforo ne wɔn suaa ade. Yɛka ne nyinaa bom a, Mary fii Bible adesua 28 ase wɔ aman nnan so.

Jasmin a Mary dii kan ne no suaa ade a yɛkaa ne ho asɛm no, ɔbɔɔ asu April afe 2021 mu. Kristine bɔɔ asu May afe 2022 na wakɔka n’abusua ho wɔ Philippines. Mmea mmienu a ɛnam Kristine so maa Mary ne wɔn suaa ade no, wɔn nso bɔɔ asu. Kristine asubɔ akyi abosome kakraa bi no, Angela nso bɔɔ asu, na seesei ɔyɛ daa kwampaefo. Kristine kunu Joshua ne wɔn babea Andrea ne asuafo afoforo nso renya nkɔso paa.

Asomafo no bere so no, na nkurɔfo taa ka asɛmpa no kyerɛ wɔn abusuafo ne wɔn nnamfonom. (Yoh. 1:​41, 42a; Aso. 10:​24, 27, 48; 16:​25-33) Wubetumi abisa wo Bible asuafo ne afoforo a wɔn ani gye Bible no ho sɛ, “Wunim obi a n’ani begye ho sɛ obesua Bible no?” Hena na onim, ebia saa asɛmmisa tiawa a obiara betumi abisa yi betumi akɔtwe Bible adesua pii aba.