ƐNNƐ, nnipa pii te nka sɛ, ɛsɛ sɛ afoforo de obu soronko bi ma wɔn, anaa ɛsɛ sɛ wɔnya hokwan soronko bi. Sɛ wɔnya nea wɔrehwehwɛ no mpo a, ɛnsɔ wɔn ani; wɔte nka sɛ ɛsɛ sɛ wɔnya bi ka ho. Nnipa a wɔwɔ adwene a ɛte saa no yɛ pɛsɛmenkominya ne bonniayɛ. Bible ka too hɔ sɛ, awiei mmere yi mu no, nnipa bɛda suban a ɛte saa adi.—2 Tim. 3:2.

Nokwasɛm ne sɛ, pɛsɛmenkominya fii ase nyɛ nnɛ. Yɛbɛyɛ nhwɛso a, Adam ne Hawa fa too wɔn ho so sii papa ne bɔne ho gyinae, na akɔfa ɔhaw ne amane abɛsoɛ nnipa nyinaa so. Nhwɛso foforo nso ne Yuda hene Usia. Onyaa adwene sɛ ɔwɔ hokwan sɛ ɔkɔhyew aduhuam wɔ asɔrefi hɔ, nanso na onni hokwan a ɛte saa koraa. (2 Be. 26:​18, 19) Farisifo ne Sadukifo no nso, na wɔgye di sɛ esiane sɛ wɔyɛ Abraham asefo nti, na ɛsɛ sɛ wɔnya hokwan soronko bi.—Mat. 3:9.

Ɛnnɛ, pɛsɛmenkominyafo ne ahantanfo atwa yɛn ho ahyia. Sɛ yɛanhwɛ yiye a, yebetumi asuasua wɔn suban no bi. (Gal. 5:26) Yebetumi anya adwene sɛ yɛn na yɛfata sɛ wɔde obu anaa hokwan soronko bi ma yɛn. Yɛbɛyɛ dɛn akwati adwene a ɛte saa? Ɛne sɛ yebenya Yehowa adwene. Bible nnyinasosɛm mmienu bi betumi aboa yɛn.

Yehowa na ɔkyerɛ hokwan a ɛsɛ sɛ yenya. Ɛho nhwɛso na edidi so yi.

• Abusua no mu no, ɛsɛ sɛ okunu te nka sɛ ne yere bu no, na ɛsɛ sɛ ɔyere nso te nka sɛ ne kunu dɔ no. (Efe. 5:33) Yehowa ka sɛ, sɛ obi  aware a, ne hokafo nko ara na ɔwɔ hokwan sɛ ɔne no nya nna mu nkitahodi. (1 Kor. 7:3) Afei nso, ɛsɛ sɛ mmofra yɛ osetie ma wɔn awofo, na awofo nso dɔ wɔn mma na wɔhwɛ wɔn.—2 Kor. 12:14; Efe. 6:2.

• Asafo no mu nso, ɛsɛ sɛ yɛde obu ma asafo mu mpanyimfo a wɔyɛ adwumaden no. (1 Tes. 5:12) Nanso, mpanyimfo no nni hokwan sɛ wɔhyɛ anuanom so.—1 Pet. 5:​2, 3.

• Onyankopɔn ama aban ahorow kwan sɛ wɔbetumi agyigye tow. Afei nso, ɛsɛ sɛ ɔmanfo no de nidi a ɛfata ma aban ahorow no.—Rom. 13:​1, 6, 7.

Yehowa yi ne yam de nea ɛboro so koraa ma yɛn. Esiane sɛ yɛyɛ abɔnefo nti, owu paa na anka ɛfata yɛn. (Rom. 6:23) Nanso, Yehowa dɔ a enni huammɔ nti, wahwie nhyira pii agu yɛn so. (Dw. 103:​10, 11) Nhyira anaa hokwan biara a yebenya afi ne hɔ no, ɛyɛ n’adom ara kwa.—Rom. 12:​6-8; Efe. 2:8.

Hwɛ yiye na woannya wiase adwene no bi. Sɛ yɛanhwɛ yiye a, yebetumi anya adwene sɛ nea yɛwɔ no mfata yɛn anaa ehia sɛ yenya bi kyɛn afoforo. Bere bi, Yesu maa mfatoho bi a ɛma yehu sɛ ɛnyɛ den koraa sɛ yebenya adwene a ɛte saa. Ɔkaa sɛ, adwumawura bi bɔɔ adwumayɛfo bi paa sɛ wɔnkɔyɛ adwuma wɔ ne bobefuw mu. Adwumayɛfo no penee so sɛ, sɛ wɔyɛ adwuma da mu no nyinaa a, wɔbegye denare baako. Akyiri yi, adwumawura no kɔpɛɛ adwumayɛfo no bi bɛkaa wɔn ho. Eduu anwummere no, otuaa adwumayɛfo no nyinaa ka pɛ; wɔn a wɔyɛɛ adwuma dɔnhwerew baako pɛ no mpo, wantew wɔn akatua no so. Wei nti adwumayɛfo a wɔyɛɛ adwuma fii anɔpa kosii anwummere maa awia hyee wɔn no nyaa adwene sɛ, anka ɛsɛ sɛ wɔnya akatua kɛse sen wɔn a wɔbaa akyiri yi no. (Mat. 20:​1-16) Bere a Yesu rekyerɛkyerɛ saa mfatoho no mu no, ɔmaa n’akyidifo no hui sɛ, nea Onyankopɔn de bɛma wɔn biara, wɔmma wɔn ani nsɔ.

Nhyɛ afoforo sɛ wɔmma wo biribi anaa wɔnkyɛ wo ade, mmom kyerɛ nneɛma ho anisɔ. (1 Tes. 5:18) Suasua ɔsomafo Paul. Ɛwom sɛ na ɔwɔ hokwan sɛ ogye honam fam nneɛma fi anuanom a na ɛwɔ Korinto  no hɔ, nanso wanyɛ saa. (1 Kor. 9:​11-14) Yɛn nso, ɛnsɛ sɛ yɛhyɛ afoforo sɛ wɔmma yɛn biribi anaa wɔnkyɛ yɛn ade, mmom nhyira biara a yebenya no, ɛsɛ sɛ yɛkyerɛ ho anisɔ.

Brɛ wo ho ase. Sɛ obi bu ne ho tra so a, ɛma onya adwene sɛ nea ɔwɔ biara sua ma no. Sɛ yɛwɔ ahobrɛase a, ɛbɛboa yɛn ama yɛakwati saa adwene a ɛmfata no.

Ná odiyifo Daniel brɛ ne ho ase paa, na yebetumi asuasua ne nhwɛso no. Ná ofi adehye abusua mu, na ne ho yɛ fɛ, na onim ade na na otumi yɛ nneɛma afoforo pii nso. Na anka wei nyinaa betumi ama wate nka sɛ obu ne hokwan ahorow a onyae no fata no. (Dan. 1:​3, 4, 19, 20) Nanso, Daniel kɔɔ so brɛɛ ne ho ase. Wei nti, na ɔsom bo paa ma Yehowa.—Dan. 2:30; 10:​11, 12.

Pɛsɛmenkominya ne ahantan a abu so wɔ wiase nnɛ no, momma yɛntwe yɛn ho mfi ho. Nhyira biara Yehowa nam n’adom so de bɛma yɛn no, momma yɛnkɔ so nkyerɛ ho anisɔ.