Ná ɔsomafo Paulo nim sɛ Satan nnaadaa yɛ hu paa, nanso na ɛnyɛ ne mfɛfo Kristofo nyinaa na wɔn ani da hɔ saa. Yɛhwɛ Korinto sei a, ɛbɛyɛ sɛ na anuanom no bi gye wɔn ho di dodo. Ná ɛyɛ wɔn sɛ wɔn ase atim wɔ nokware no mu araa ma wontumi nhwe ase da. (1 Kor. 10:12) Wei nti na Paulo bɔɔ wɔn kɔkɔ sɛ: “Misuro sɛ ɔkwan bi so no sɛnea ɔwɔ no de n’anitew daadaa Hawa no, saa ara na mo nso wɔbɛsɛe mo adwene afi nokwaredi ne kronnyɛ a ɛsɛ Kristo no ho.”​—2 Kor. 11:3.

Paulo asɛm yi ma yehu sɛ ɛnsɛ sɛ yegye yɛn ho di dodo. Sɛ wubetumi adi Satan nnaadaa so nkonim a, ɛsɛ sɛ wuhu sɛ ne nnaadaa no yɛ hu na wobɔ wo ho ban.

Dɛn ne nnaadaa? Sɛ yɛka nnaadaa wɔ ha a, ɛkyerɛ asɛm bi a ɛnyɛ nokware a obi ka de dan nkurɔfo adwene anaa ɛma wɔyɛ nea ɔpɛ. Nkurɔfo ka sɛ nnaadaa yɛ “atosɛm, nkontomposɛm, adɛfɛdɛfɛsɛm, [ne] obi adwene a wokyinkyim.” Wɔka sɛ nnaadaa “yɛ subammɔne, epira nnipa, na ɛyɛ nyansakwan a wɔde obi fa so.”​—Propaganda and Persuasion.

Asiane bɛn na ɛwɔ nnaadaa mu? Ɛyɛ hu paa. Ɛte sɛ mframa bɔne bi a yɛmfa yɛn ani nhu. Enni pampan, nanso etumi di awu. Nnaadaa betumi awurawura yɛn adwenem nkakrankakra a yenhu mpo. Vance Packard asua nnipa nneyɛe ho ade. Ɔkae sɛ nnaadaa “tumi dan yɛn mu pii adwene a yenhu mpo.” Nea enti a ɛte saa ne sɛ ebia yɛrenhu sɛ asiane wɔ mu. Nhomanimfo bi nso kae sɛ, nnaadaa nti mmea ne mmarima “ayɛ nneɛma a ani yɛ nyan.” Ebi ne sɛ ‘wɔatɔre  mmusua ase, wɔde wɔn ho ahyɛ akodi mu, wɔatan ɔman foforo anaa ɔsom foforo mu nnipa, na wɔada suban ahorow pii a ɛmfa kwan mu adi.’​—Easily Led—A History of Propaganda.

Enti sɛ nnipa mpo tumi daadaa yɛn sɛe yɛn adwene a, wohwɛ a Satan rentumi nyɛ nea ɛkyɛn saa? Efi bere a wɔbɔɔ nnipa no, Satan de n’ani ato fam ahwɛ ahu sɛnea yɛte. Seesei, “wiase nyinaa” da ne tumi mu. Enti biribiara a ɛwɔ wiase mu no, obetumi afa so atrɛw n’atosɛm mu. (1 Yoh. 5:19; Yoh. 8:44) Satan atumi ‘afura nnipa adwene ani’ araa ma seesei deɛ “ɔredaadaa asase sofo nyinaa.” (2 Kor. 4:4; Adi. 12:9) Wobɛyɛ dɛn ako atia ne nnaadaa no?

Yesu kyerɛɛ yɛn biribi a ebetumi ama yɛako atia nnaadaa. Ɔkae sɛ: ‘Hu nokware no, na nokware no bɛma woade wo ho.’ (Yoh. 8:31, 32) Sɛ ɔko si a, ade a edi kan a asraafo taa yɛ ne sɛ wɔbɛdaadaa wɔn atamfo. Enti ɛsɛ sɛ ɔsraani hwɛ baabi a obenya nokwasɛm afi na n’atamfo ankyinkyim n’adwene annaadaa no. Wo nso saa ara na ɛsɛ sɛ woyɛ. Yehowa ama wo baabi a wubenya nokwasɛm afi. Wohwɛ Bible mu a, wubenya biribiara a wuhia de ako atia Satan nnaadaa.​—2 Tim. 3:16, 17.

Nokwasɛm ne sɛ, Satan, ɔdaadaafo kɛse no nim wei. Enti ɔma wiase nneɛma twetwe yɛn sɛnea ɛbɛyɛ a yɛrenkenkan na yɛrensua Bible no. Mma ne nnɛɛdɛe no nnya wo! (Efe. 6:11) Ehia sɛ ‘wutumi hu’ nokware no mu ‘yiye.’ (Efe. 3:18) Wei hwehwɛ sɛ woyere wo ho paa. Nanso kae nokwasɛm bi a nhomakyerɛwfo Noam Chomsky kyerɛwee yi: “Obi rentumi mpae wo tirim mfa nokware no nhyɛ mu. Wo ara na ɛsɛ sɛ wohwehwɛ na wuhu.” Enti fa nsi ‘hwehwɛ Kyerɛwnsɛm no mu yiye da biara,’ na ama ‘woahu’ nokware no.​—Aso. 17:11.

Ma ɛntena w’adwene mu sɛ Satan mpɛ sɛ wususuw nneɛma ho anaa wudwen ho yiye. Adɛn ntia? Nhoma bi ka sɛ, “sɛ nkurɔfo . . . antumi ansusuw nneɛma ho yiye a, ɛnna nnaadaa tumi nya wɔn paa.” (Media and Society in the Twentieth Century) Enti ɛnyɛ sɛ wotee medaase aberaw ara na woama wo koraa so. (Mmeb. 14:15) Onyankopɔn ama  wo adwene, enti fa yɛ adwuma na woatumi aso nokware no mu yiye.​—Mmeb. 2:10-15; Rom. 12:1, 2.

Asraafo betumi adaadaa wɔn atamfo ama ehu aka wɔn sɛnea ɛbɛyɛ a wɔrentumi nko. Wobetumi adaadaa wɔn ma wɔako atia wɔn ho mpo, anaa wɔama wɔn mu bi atew wɔn ho afi asraafodɔm no ho. Wɔkyerɛ sɛ Germany sahene bi kae sɛ, ade baako a ɛma wodii nkogu wɔ Wiase Ko I mu ne sɛ, “sɛnea ɔwɔ tumi daadaa adanko na ɔkyere no no, saa ara na wɔn atamfo daadaa wɔn.” Satan nso fa saa kwan no ara so bɔ mmɔden sɛ ɔde mpaapaemu bɛba Kristofo mu na wadi yɛn so. Ɔkwan baako a ɔfa so ne sɛ, otumi ma akasakasa ba anuanom ntam. Otumi nso ma ebinom nya adwene sɛ Yehowa ahyehyɛde no ne wɔn anni no yiye anaa ayɛ biribi atia wɔn, enti wɔbɛtew wɔn ho afi asafo no ho.

Hwɛ na wannaadaa wo! Ma Onyankopɔn Asɛm no nkyerɛ wo kwan. Sɛ nhwɛso no, Bible hyɛ yɛn nkuran sɛ yɛnkɔ so mfa ‘mfirifiri yɛn ho korakora’ na yensiesie yɛn ntam akasakasa ntɛm na ama baakoyɛ atena yɛne yɛn nuanom ntam. (Kol. 3:13, 14; Mat. 5:23, 24) Bible bɔ yɛn kɔkɔ denneennen sɛ mma yɛntew yɛn ho mfi asafo no ho. (Mmeb. 18:1) Ɛwom ara a, ɛsɛ sɛ wohwɛ sɛ w’akode ano yɛ nnam a wubetumi de ako atia Satan nnaadaa anaa. Bisa wo ho sɛ: ‘Bere a etwa to a me nua fom me no, dɛn na meyɛe? Wiase honhom na ɛkyerɛɛ me kwan anaa Onyankopɔn honhom?’​—Gal. 5:16-26; Efe. 2:2, 3.

Sɛ ɔsraani anni ne panyin nokware a, ɔrentumi nko yiye. Enti atamfo bɔ mmɔden sɛ wɔbɛdaadaa ɔsraani no na ahotoso a ɔwɔ wɔ ne panyin mu no, wɔasɛe no. Nea wobetumi aka de adaadaa no no bi ni: “Munnnye mo mpanyimfo no nni!” “Monhwɛ na wɔamfa mo ankɔto asɛm mu!” Sɛ ɛba no sɛ asraafo mpanyimfo no adi mfomso bi mpo de a, ɛnde na asɛm no asɛe koraa. Wɔbɛfa nyansakwan so de ɛno adaadaa asraafo no. Saa na Satan yɛ. Mpanyimfo a Yehowa apaw wɔn sɛ wonni yɛn anim no, ɔyɛ nea obetumi  biara sɛ ɔbɛsɛe ahotoso a yɛwɔ wɔ wɔn mu no.

Wobɛyɛ dɛn ako atia nnaadaa a ɛte saa? Ɛwom sɛ wɔn a wodi yɛn anim no tɔ sin, nanso si wo bo sɛ wobɛbata Yehowa ahyehyɛde no ho, na di nokware ma mmarima a wodi yɛn anim no. (1 Tes. 5:12, 13) Sɛ awaefo anaa nnaadaafo bi keka nsɛm de sɛe asafo no din na ɛte sɛ nea ɛyɛ nokware mpo a, mma no ‘nnsɛe w’adwene ntɛm.’ (2 Tes. 2:2; Tito 1:10) Fa afotu a Paulo de maa aberante Timoteo no yɛ adwuma. Bata nokware a wusuae no ho, na kae baabi a wusua fii. (2 Tim. 3:14, 15) Anokwa, ahyehyɛde a Yehowa de ayɛ adwuma bɛyɛ mfe ɔha ni de akyerɛ yɛn nokware kwan no, yɛwɔ adanse pii a ɛkyerɛ sɛ wubetumi de wo ho ato so.​—Mat. 24:45-47; Heb. 13:7, 17.

Kae sɛ, ɛnyɛ da biara na Satan bɛfa nyansakwan so adaadaa wo. Ɛtɔ da bi a, ɔde ahunahuna yɛ adwuma. Ahunahuna yɛ “ɔkwan baako a akyɛ paa a wɔfa so daadaa nnipa.” (Easily Led—A History of Propaganda) Ɔbenfo Philip M. Taylor a ofi Britain kaa Asiriafo ho asɛm sɛ, wɔde “ahunahuna ne nnɛɛdɛe nyinaa yɛɛ adwuma” sɛnea ɛbɛyɛ a wobedi wɔn atamfo so nkonim. Satan betumi de nneɛma pii ahunahuna wo ma w’abam abu sɛnea ɛbɛyɛ a wubegyae Yehowa som. Ebi ne nnipa ho suro, ɔtaa, ne owu.​—Yes. 8:12; Yer. 42:11; Heb. 2:15.

Ɛnsɛ sɛ woma Satan kwan ma ɔde ehu bu w’abam anaa ɔma wugyae wo mũdi mu. Yesu kae sɛ: “Munnsuro wɔn a wokum nipadua na ɛno akyi no wontumi nyɛ hwee bio no.” (Luka 12:4) Yehowa aka sɛ ɔbɛhwɛ wo so, ɔbɛma wo “tumi a ɛboro onipa de so,” na waboa wo ma woagyina ahunahuna biara a ebebu w’abam no ano. Nya ahotoso koraa sɛ obedi ne bɔhyɛ yi so.​—2 Kor. 4:7-9; 1 Pet. 3:14.

Wubetumi ahyia nneɛma a ebetumi abɔ wo hu na abu w’abam. Nanso ma nsɛm a Yehowa ka kyerɛɛ Yosua yi ntena w’adwenem: ‘Ma wo bo nyɛ duru na wo ho nyɛ den. Nsuro na mmɔ hu, efisɛ baabi a wobɛkɔ biara no, Yehowa wo Nyankopɔn ka wo ho.’ (Yos. 1:9) Sɛ wokɔ ahohia mu a, bɔ Yehowa mpae ntɛm na ka wo haw nyinaa kyerɛ no. Wubetumi anya awerɛhyem sɛ ‘Onyankopɔn asomdwoe bɛbɔ wo koma ne w’adwene nsusuwii ho ban’ na woanya ahoɔden de ako atia Satan nnaadaa nyinaa.​—Filip. 4:6, 7, 13.

Bere a Asiria hene somaa Rabsake no sɛ ɔnkɔkasa ntia Onyankopɔn nkurɔfo no, wokae nsɛm a ɔkae de daadaa wɔn no? Nea na ɔrepɛ akyerɛ ne sɛ: ‘Biribiara rentumi nnye mo mfi Asiriafo nsam. Mo Nyankopɔn Yehowa no mpo rentumi nyɛ hwee mma mo.’ Afei ɔde ne nsa sii ne bo kae sɛ: ‘Yehowa na ɔka kyerɛɛ yɛn sɛ yɛmmɛsɛe asase yi.’ Dɛn na Yehowa kae wɔ asɛm yi ho? Ɔkae sɛ: “Mma nsɛm a Asiria hene nkoa aka atia me a wotee no mmmɔ wo hu.” (2 Ahe. 18:22-25; 19:6) Ɛno akyi no, Yehowa somaa ɔbɔfo ma okokunkum Asiriafo asraafo 185,000 anadwo baako pɛ!​—2 Ahe. 19:35.

Woahwɛ sini bi ahu sɛ wɔredaadaa obi rekyinkyim n’adwene pɛn? Ebia na woreka wɔ wo tirim sɛ: ‘Nnye nea wɔreka no nni! Wɔboa, wɔredaadaa wo!’ Afei fa no sɛ, saa ara na abɔfo no nso reka akyerɛ wo sɛ: “Mma Satan mfa n’atosɛm no nnaadaa wo!”

Ɛnde, sisiw w’aso na woantie Satan nnaadaasɛm. (Mmeb. 26:24, 25) Tie Yehowa na fa wo ho to ne so wɔ biribiara mu. (Mmeb. 3:5-7) Yehowa dɔ wo, enti tie n’adesrɛ yi: “Me ba, yɛ onyansafo, na ma me koma ntɔ me yam.” (Mmeb. 27:11) Woyɛ saa a, wubetumi adi Satan nnaadaa so nkonim!