1. Mfe kakra a atwam ni, nsakrae bɛn na aba wɔ mmeae bi?

MFE mpempem a atwam no, na ɛte sɛ nea nnipa dodow no ara a wɔwɔ wiase wɔ ɔsom bi mu. Nanso mfe kakra a atwam no, nneɛma asesa koraa. Nnipa pii mmu wɔn ho sɛ wɔyɛ nyamesomfo. Aman bi mu de, nnipa dodow no ara ka sɛ wonni ɔsom biara mu. *—Mat. 24:12.

2. Ɛbɛyɛ sɛ, adɛn nti na nnipa pii ani nnye nyamesom ho?

² Adɛn nti na nkurɔfo a wɔka sɛ wonni ɔsom biara mu no redɔɔso saa? * Ebia ebinom de wɔn adwene asi anigyede anaa wɔn dadwen so. (Luka 8:14) Ebinom wɔ hɔ a bere bi na wɔwɔ ɔsom bi mu, nanso seesei wonnye nni sɛ Onyankopɔn wɔ hɔ. Afoforo de, wogye di sɛ Onyankopɔn wɔ hɔ, nanso wɔn adwene yɛ wɔn sɛ nyamesom bere atwam, ɛho nhia, ɛne nyansahu nhyia, na ntease nnim. Ebia wɔte sɛ wɔn nnamfo, wɔn akyerɛkyerɛfo, anaa nsɛm ho amanneɛbɔfo ka sɛ nkwa fi adannandi mu, nanso wɔntaa nte sɛ nkurɔfo reka nsɛm a ntease wom a ɛkyerɛ nea enti a wogye di sɛ Onyankopɔn wɔ hɔ. Afoforo nso de, nea ama wɔn ani nnye nyamesom ho ne asɔfo a wɔyɛ pɛsɛmenkominya a wɔn ani bere sika ne tumidi no. Mmeae bi wɔ hɔ a, aban de nsa ato ɔsom ahorow so.

3. Dɛn ne adesua yi atirimpɔw?

³ Yesu kaa sɛ ‘yɛnyɛ aman nyinaa n’asuafo.’ (Mat. 28:19) Yɛbɛyɛ dɛn atumi aboa nkurɔfo a wonni ɔsom biara mu ama wɔabɛdɔ  Onyankopɔn na wɔabɛyɛ Kristo asuafo? Ɛsɛ sɛ yehu sɛ baabi a wɔtetee obi na ebia ɛbɛkyerɛ sɛnea ɔbɛyɛ n’ade bere a yɛaka asɛmpa no akyerɛ no. Nhwɛso bi ni. Sɛ yɛka asɛmpa no kyerɛ nkurɔfo a wofi Europe a, ebia ɛsono sɛnea wɔbɛyɛ wɔn ade wɔ asɛmpa no ho, ɛnna ɛsono sɛnea nkurɔfo a wofi Asia nso bɛyɛ wɔn ade. Adɛn ntia? Wokɔ Europe a, nkurɔfo pii nim Bible mu kakra, na wɔate nso sɛ Onyankopɔn na ɔbɔɔ nneɛma nyinaa. Nanso wokɔ Asia a, nnipa dodow no ara nnim Bible mu ahe biara, anaa wonnim ho hwee, na ebia wonnye nni sɛ Ɔbɔadeɛ bi wɔ hɔ. Adesua yi atirimpɔw ne sɛ ɛbɛboa yɛn ama yɛaka asɛm no ama aka nkurɔfo a yehyia wɔn wɔ asɛnka mu no koma, ɛmfa ho baabi a wofi anaa nea wogye di.

4. Adɛn nti na yebetumi akɔ so anya adwempa?

⁴ Nya Adwempa. Afe biara, nkurɔfo a wonni ɔsom biara mu bɛyɛ Yehowa Adansefo. Wɔn mu pii wɔ hɔ a na wɔn abrabɔ yɛ papa dedaw, na nea na wokyi kɔkɔɔkɔ ne nyaatwom a ɛkɔ so wɔ ɔsom ahorow mu no. Afoforo nso de, na wɔn abrabɔ nye koraa, na na pii nso wɔ subammɔne a ɛsɛ sɛ wogyae. Yebetumi anya awerɛhyem sɛ Yehowa bɛboa yɛn ama yɛahu “wɔn a wɔpɛ daa nkwa” no.—Aso. 13:48; 1 Tim. 2:3, 4.

5. Dɛn na ɛma nkurɔfo taa tie asɛm a yɛka no?

⁵ Da Ayamye Adi Na Yɛ Anifere. Mpɛn pii no, ɛnyɛ nea yɛka na ɛma nkurɔfo tie yɛn, na mmom ɔkwan a yɛfa so ka yɛn asɛm no. Sɛ nkurɔfo hu sɛ yɛn yam ye, yɛyɛ anifere, na yedwen wɔn ho pa ara a, ɛma wɔn ani gye. Yɛnhyɛ wɔn sɛ wontie nea yɛka no. Mmom, adwene a wɔwɔ wɔ nyamesom ho no, yɛbɔ mmɔden sɛ yebehu nea enti a wokura saa adwene no. Nhwɛso bi ni. Ebinom mpɛ sɛ wɔne obi a wonnim no bɛbɔ nyamesom ho nkɔmmɔ. Afoforo nso adwene yɛ wɔn sɛ ɛnyɛ papa sɛ wubebisa wɔn nea wonim fa Onyankopɔn ho. Ebinom nso de, ɛyɛ wɔn aniwu sɛ nkurɔfo behu sɛ wɔrekenkan Bible, ɛnkanka sɛ wɔne Yehowa Adansefo na ɛreyɛ saa. Sɛnea ɛte biara no, yɛbɔ mmɔden sɛ yɛbɛte wɔn ase.—2 Tim. 2:24.

6. Dɛn na ɔsomafo Paulo yɛe a ɛkyerɛ sɛ na otumi sesa ɔkwan a ɔfa so ka asɛmpa no, na yɛbɛyɛ dɛn atumi asuasua no?

⁶ Sɛ yɛne obi rebɔ nkɔmmɔ na yehu sɛ nsɛmfua te sɛ “Bible,” “adebɔ,” “Onyankopɔn,” anaa “nyamesom” pue yɛn kasa mu na n’ani nnye ho a, dɛn na yebetumi ayɛ? Yebetumi asuasua ɔsomafo Paulo na yɛasesa ɔkwan a yɛfa so ka asɛmpa no kyerɛ nkurɔfo no. Sɛ Paulo ne Yudafo rekasa a, na ɔne wɔn susuw nsɛm a ɛwɔ Kyerɛwnsɛm no mu ho. Nanso, bere a ɔne Helafo nyansapɛfo a na wɔwɔ Areopago resusuw nsɛm ho no, wammɔ Bible din tẽẽ. (Aso. 17:2, 3, 22-31) Yɛbɛyɛ dɛn asuasua nea Paulo yɛe no? Sɛ wuhyia obi a onnye Bible nni na wo ne no rebɔ nkɔmmɔ a, ɛbɛyɛ papa sɛ worentwe adwene nsi Bible so tẽẽ. Sɛ wuhu sɛ onii no mpɛ sɛ afoforo behu sɛ ɔrekenkan Bible a, bɔ mmɔden bue kyerɛ no wɔ ɔkwan bi so a obiara renhu; wubetumi abue wɔ fon anaa tablɛt so akyerɛ no.

7. Sɛnea 1 Korintofo 9:20-23 kyerɛ no, sɛ yebetumi asuasua nea Paulo yɛe no a, dɛn na ɛsɛ sɛ yɛyɛ?

⁷ Te Afoforo Ase Na Tie Wɔn. Sɛnea nkurɔfo a yehyia wɔn susuw nneɛma ho no, ɛsɛ sɛ yɛbɔ mmɔden sɛ yebehu nea enti a wokura adwene a ɛte saa. (Mmeb. 20:5) Momma yɛnsan nhwɛ nea Paulo yɛe no bio. Wɔtetee no wɔ Yudafo mu. Enti, na ɛsɛ sɛ ɔsesa ɔkwan a ɔfa so ka asɛm no kyerɛ Amanaman mufo, efisɛ na wonnim Yehowa ne Kyerɛwnsɛm no yiye anaa na wonnim Yehowa ne Kyerɛwnsɛm no ho hwee. Ebia ɛho behia sɛ yɛyɛ nhwehwɛmu bi anaa yɛhwehwɛ mmoa fi asafo no mufo a wɔn ho akokwaw hɔ sɛnea ɛbɛyɛ a yebenya  ayamhyehye ama nkurɔfo a wɔwɔ yɛn asasesin mu na yɛate wɔn ase.—Kenkan 1 Korintofo 9:20-23.

8. Dɛn ne ɔkwan baako a yebetumi afa so ne obi afi ase abɔ Bible mu nkɔmmɔ?

⁸ Yɛn botae ne sɛ yebehu wɔn a ‘wɔfata.’ (Mat. 10:11) Sɛ yebehu wɔn a, ɛsɛ sɛ yɛma nkurɔfo kyerɛ wɔn adwene na afei yɛyɛ aso tie wɔn. Ɛyɛ a onua bi a ɔwɔ England ma nkurɔfo kyerɛ wɔn adwene wɔ nsɛm bi ho. Nsɛm bi te sɛ, nea ɛde anigye ba aware mu, sɛnea wɔtete mmofra, anaa nea ɛma yetumi gyina nhyɛso ano. Sɛ otie wɔn adwenkyerɛ wie a, ɔka sɛ, “Afotu a merebɛka ho asɛm yi, bɛyɛ mfe 2,000 ni na wɔkyerɛwee. Wudwen ho sɛn?” Ɛno akyi no, obue kyerɛwnsɛm a ɛfata wɔ ne fon so kyerɛ wɔn a ɔmmɔ “Bible” din.

9. Nkurɔfo a wɔmpɛ sɛ wɔne obi bɛbɔ Onyankopɔn ho nkɔmmɔ no, yɛbɛyɛ dɛn atumi aboa wɔn?

⁹ Nkurɔfo a wɔmpɛ sɛ wɔne obi bɛbɔ Onyankopɔn ho nkɔmmɔ no, sɛ yɛne wɔn susuw biribi a wɔn ani gye ho ho a, ebetumi aka wɔn koma. Nhwɛso bi ni. Sɛ nnipa pii hwɛ abɔde a, ɛma wɔn ho dwiriw wɔn. Enti, yebetumi aka sɛ: “Ebia wunim sɛ nneɛma pii a nyansahufo yɛ no, ɛyɛ a, wɔhwɛ nneɛma a Onyankopɔn abɔ so na wɔyɛ. Ebi ni. Nkurɔfo a wɔyɛ akasam no, wosuaa aso ho ade na wɔhwɛɛ so yɛe, na saa ara na wɔn a wɔyɛɛ afiri a yɛde twa mfoni nso suaa ani ho ade. Sɛ wohwɛ abɔde a, dɛn na ɛba w’adwene mu? Ɛyɛ wo sɛ ɛno ara na ɛbae, obi na ɔbɔe, anaa biribi foforo na ɛde bae?” Sɛ yɛyɛ aso tie nea wɔbɛka wie a, yebetumi de aka ho sɛ: “Sɛ mfiridwuma ho animdefo hwɛ aso ne ani sua biribi a, ɛnde wohwɛ a, ɛnyɛ nea ɔbɔɔ aso ne ani no na wɔresua biribi afi ne hɔ? M’ani gye asɛm bi a tete anwensɛm kyerɛwfo bi kyerɛwee ho. Ɔkaa sɛ: ‘Nea ɔyɛɛ aso no, ɔrente asɛm anaa? Na nea ɔyɛɛ aniwa no, ɔrenhu ade? . . . Ɔno a ɔkyerɛ nnipa nimdeɛ no?’ Nyansahufo binom gye saa asɛm yi tom.” (Dw. 94:9, 10) Ɛno akyi no, yebetumi ayi video bi a ɛwɔ jw.org^® akyerɛ wɔn. Yebetumi akɔ “Interviews and Experiences” wɔ nsɛm a ɛba toatoa so a wɔato din “Viewpoints on the Origin of Life.” (Hwɛ PUBLICATIONS > VIDEOS.) Anaa yebetumi de nhomawa Was Life Created? anaa The Origin of Life—Five Questions Worth Asking no ama wɔn.

10. Yɛbɛyɛ dɛn ne obi a ɔmpɛ sɛ ɔne obi bɛbɔ Onyankopɔn ho nkɔmmɔ afi nkɔmmɔbɔ ase?

¹⁰ Nnipa dodow no ara hwɛ kwan sɛ nneɛma bɛyɛ yiye daakye. Nanso, nkurɔfo pii suro sɛ asase bɛsɛe daakye anaa nnipa ntumi ntena so. Ɔhwɛfo kwantufo bi a ɔwɔ Norway ka sɛ,  nkurɔfo a wɔmpɛ sɛ wɔne obi bɛbɔ Onyankopɔn ho nkɔmmɔ no, mpɛn pii no, ɛyɛ a wɔn ani gye ho sɛ wɔbɛbɔ nea ɛrekɔ so wɔ wiase no ho nkɔmmɔ. Sɛ okyia obi wie a, ɛyɛ a obisa sɛ: “Wohwɛ a, nneɛma bɛyɛ yiye daakye? Ɛyɛ wo sɛ amanyɔfo, nyansahufo, anaa obi foforo na obetumi ama nneɛma ayɛ yiye?” Sɛ ɔyɛ aso tie onii no wie a, ɔkenkan kyerɛwsɛm bi a ɛkyerɛ sɛ nneɛma bɛyɛ yiye daakye, anaa ɔka mu asɛm kyerɛ no. Sɛ ebinom te sɛ Bible ahyɛ bɔ sɛ wɔrensɛe asase da na nnipa pa bɛtena so afebɔɔ a, ɛyɛ wɔn nwonwa.—Dw. 37:29; Ɔsɛnk. 1:4.

11. Adɛn nti na ɛsɛ sɛ yɛfa akwan ahorow so ne nkurɔfo fi ase bɔ nkɔmmɔ, na yɛbɛyɛ dɛn asuasua nea Paulo yɛe a ɛho asɛm wɔ Romafo 1:14-16 no?

¹¹ Ɛyɛ papa sɛ yɛfa akwan ahorow so ne wɔn a yehyia wɔn no fi ase bɔ nkɔmmɔ. Adɛn ntia? Efisɛ ɛsono onipa biara. Nea obi pɛ no, ɛnyɛ ɛno na ɔfoforo pɛ. Ebinom wɔ hɔ a, ɛnhaw wɔn sɛ wo ne wɔn bɛbɔ Onyankopɔn anaa Bible ho nkɔmmɔ; afoforo nso de, gye sɛ wudi kan ne wɔn bɔ biribi foforo ho nkɔmmɔ ansa. Emu biara no, ɛsɛ sɛ yɛne nnipa ahorow nyinaa kasa. (Kenkan Romafo 1:14-16.) Ɛsɛ sɛ yɛkae nso sɛ Yehowa na ɔma nokware no nyin wɔ wɔn a wɔpɛ adetrenee no koma mu.—1 Kor. 3:6, 7.

12. Nkurɔfo a wofi aman a ɛwɔ Asia a wonni adwene biara sɛ Ɔbɔadeɛ bi wɔ hɔ no, yɛbɛyɛ dɛn atumi aka asɛmpa no akyerɛ wɔn?

¹² Wiase nyinaa no, adawurubɔfo pii hyia nkurɔfo a wofi aman a ɛwɔ Asia. Aman a wɔn mu bi fi so no, ɛhɔ aban de nsa ato nyamesom so. Aman bi wɔ Asia a nkurɔfo pii a wɔwɔ hɔ nna nnwenee ho da sɛ Ɔbɔadeɛ bi wɔ hɔ. Ebinom repɛ biribi ahu na wɔma kwan ma wɔne wɔn sua Bible, nanso afoforo de, mfiase no, wɔtwentwɛn wɔn nan ase sɛ wobesua biribi foforo. Yɛbɛyɛ dɛn atumi aboa wɔn? Adawurubɔfo bi a wɔn ho akokwaw ahu sɛ, sɛ wɔne nkurɔfo bɔ biribi a wɔn ani gye ho ho nkɔmmɔ, na wɔma wohu sɛ wodwen wɔn ho a, ɛboa pa ara. Afei sɛ adawurubɔfo no hu sɛ ɛfata a, wɔka sɛnea wɔde Bible mu asɛm pɔtee bi abɔ wɔn bra ama nneɛma akɔ yiye ama wɔn ho asɛm kyerɛ wɔn.

13. Dɛn na ebetumi aboa nkurɔfo ama wɔn ani agye Bible ho? (Hwɛ mfoni a ɛwɔ Ɔwɛn-Aban yi anim no.)

¹³ Nnipa pii wɔ hɔ a, nea ɛma wɔn ani di kan gye Bible ho ne akwankyerɛ pa a ɛwom no. (Ɔsɛnk. 7:12) Onuawa bi a ɔka asɛmpa no kyerɛ nkurɔfo a wɔka Mandarin kasa wɔ New York no kaa sɛ: “Mebɔ mmɔden sɛ mɛma nkurɔfo ahu sɛ midwen wɔn ho, na afei meyɛ aso tie wɔn. Sɛ mihu sɛ wɔbaa ɔman no mu nkyɛe a, mitumi bisa wɔn sɛ: ‘Nneɛma rekɔ sɛn? Woanya adwuma? Mpɔtam hafo ne wo te yiye anaa?’” Ɛtɔ da a, wei ma onuawa no nya kwan ka Bible mu asɛm kyerɛ wɔn. Sɛ onuawa no hu sɛ ɛfata a, ɔde ka ho sɛ: “Wohwɛ a, dɛn pa ara na ɛma yetumi ne afoforo tena yiye? Mepɛ sɛ mede ɛbɛ bi a ɛwɔ Bible mu kyerɛ wo. Ɛka sɛ: ‘Ntɔkwaw mfiase te sɛ nsu a atue; enti ansa na ɔham mu bɛyɛ den no, twa so kɔ.’ Wohwɛ a, saa afotu yi betumi aboa yɛn ma yɛne afoforo atena yiye?” (Mmeb. 17:14) Yɛne nkurɔfo bɔ nkɔmmɔ saa a, ɛbɛboa yɛn ama yɛahu wɔn a wɔn ani begye ho sɛ yɛsan kɔ wɔn nkyɛn bio no.

14. Dɛn na onua bi a ɔwɔ Asia yɛ de boa nkurɔfo a wɔka sɛ wonnye Onyankopɔn nni no?

¹⁴ Wɔn a wɔka sɛ wonnye Onyankopɔn nni no nso ɛ? Onua bi a ne ho akokwaw pa ara a ɔka asɛmpa no kyerɛ nkurɔfo a wonni ɔsom biara mu wɔ Asia ka sɛ: “Mpɛn pii no, sɛ obi a ɔwɔ ɔman yi mu ka sɛ, ‘Minnye Onyankopɔn nni’ a, nea ɔrekyerɛ ara ne sɛ anyame a nkurɔfo a wɔwɔ hɔ som wɔn no na onnye wɔn nni. Enti ɛyɛ a metaa ne wɔn yɛ adwene, na  meka sɛ anyame a wɔwɔ hɔ no dodow no ara yɛ nnipa nsa ano adwuma, na wɔnyɛ anyame ankasa. Metaa kenkan Yeremia 16:20 kyerɛ wɔn. Ɛhɔ ka sɛ: ‘So ɔdesani bɛyɛ anyame afa, bere a wɔnyɛ anyame bi?’ Afei, mibisa wɔn sɛ: ‘Yɛbɛyɛ dɛn ahu nea ɔyɛ onyame ankasa ne onyame a ɔyɛ onipa nsa ano adwuma?’ Meyɛ aso tie wɔn, na ɛno akyi no, mekenkan Yesaia 41:23 kyerɛ wɔn sɛ: ‘Monka nea ɛbɛba akyiri yi na yenhu sɛ moyɛ anyame ampa.’ Miwie a, mekyerɛ wɔn nkɔm bi a Yehowa hyɛe a ɛbaa mu.”

15. Nea onua bi a ɔwɔ Asia yɛ no, dɛn na yebetumi asua afi mu?

¹⁵ Onua bi a ɔwɔ Asia reyɛ sankɔhwɛ a, nea ɔyɛ ni. Ɔka sɛ: “Mekyerɛ wɔn afotu pa a ɛwɔ Bible mu, Bible nkɔmhyɛ a anya mmamu, ne mmara a ɛma nsoromma, okyinnsoromma, ne nneɛma foforo a ɛwɔ wim yɛ adwuma pɛpɛɛpɛ. Afei, mema wohu sɛ wei nyinaa kyerɛ sɛ Ɔbɔadeɛ bi wɔ hɔ a ɔyɛ ɔteasefo, na ɔyɛ onyansafo. Sɛ obi gye tom sɛ ɛbɛyɛ ampa sɛ Onyankopɔn wɔ hɔ a, mifi ase kyerɛ no nea Bible ka fa Yehowa ho.”

16. Sɛnea Hebrifo 11:6 kyerɛ no, nkurɔfo a yɛne wɔn sua Bible no, adɛn nti na ehia sɛ wonya Onyankopɔn mu gyidi na wogye Bible tom, na yɛbɛyɛ dɛn aboa wɔn ama wɔayɛ saa?

¹⁶ Sɛ yɛne nkurɔfo a wonni ɔsom biara mu sua Bible a, ɛsɛ sɛ yɛkɔ so boa wɔn ma wɔhyɛ wɔn gyidi den sɛ Onyankopɔn wɔ hɔ. (Kenkan Hebrifo 11:6.) Afei nso, ɛsɛ sɛ yɛboa wɔn ma wogye Bible tom. Nkyerɛkyerɛ bi wɔ hɔ a, ebia ɛho behia sɛ yetĩ mu mpɛn pii. Bere biara a yɛne wɔn besua ade no, ebia ebehia sɛ yɛne wɔn susuw adanse a ɛkyerɛ sɛ Bible yɛ Onyankopɔn Asɛm ho. Ebia yebetumi de bere tiaa bi ne wɔn asusuw Bible nkɔmhyɛ a anya mmamu, sɛnea Bible mu nsɛm ne nyansahu ne abakɔsɛm hyia, ne sɛnea akwankyerɛ pa a ɛwɔ Bible mu boa yɛn ho.

17. Sɛ yɛda ɔdɔ adi kyerɛ afoforo a, ɛbɛboa wɔn sɛn?

¹⁷ Sɛ yɛda ɔdɔ adi kyerɛ afoforo ɛmfa ho sɛ wɔwɔ ɔsom bi mu anaa wonni ɔsom bi mu a, ɛbɛboa wɔn ama wɔabɛyɛ Kristo asuafo. (1 Kor. 13:1) Yɛrekyerɛkyerɛ wɔn a, yɛn botae ne sɛ yɛbɛma wɔahu sɛ Onyankopɔn dɔ yɛn nyinaa, na ɔpɛ sɛ yɛn nso yɛdɔ no bi. Afe biara, esiane sɛ nnipa mpempem nya Onyankopɔn ho dɔ nti, wɔbɔ asu. Saa nkurɔfo no, kan no, na wɔn ani nnye nyamesom ho papa, anaa na wɔn ani nnye ho koraa. Enti nya adwempa, na ma nnipa ahorow nyinaa nhu sɛ wodɔ wɔn na wudwen wɔn ho. Yɛ aso tie wɔn. Bɔ mmɔden te wɔn ase. Fa wo nhwɛso kyerɛkyerɛ wɔn ma wɔmmɛyɛ Kristo asuafo.