1. Adɛn nti na Yesu srɛɛ Yehowa sɛ ɔnhwɛ n’asuafo no so?

ADE rebɛkye ama Yesu awu no, na ɔredwen ɔhaw ahorow a n’asuafo no bɛfa mu no ho. Ɔdɔ a Yesu dɔ n’asuafo no nti, ɔsrɛɛ n’Agya sɛ ‘ɔnhwɛ wɔn so esiane ɔbɔnefo no nti.’ (Yoh. 17:14, 15) Ná Yesu nim sɛ, sɛ ɔkɔ soro a, Satan Ɔbonsam bɛkɔ so ara ako atia obiara a ɔpɛ sɛ ɔsom Yehowa. Ɛno ma yehu sɛ Yehowa asomfo behia ahobammɔ.

2. Dɛn na ɛma yenya awerɛhyem sɛ Yehowa betie yɛn mpaebɔ?

² Dɔ a Yehowa dɔ ne Ba Yesu nti otiee ne mpaebɔ no. Yɛn nso, sɛ yɛyɛ nea yebetumi biara tie Yehowa a, ɔbɛdɔ yɛn, na sɛ yɛbɔ mpae hwehwɛ mmoa ne ahobammɔ fi ne hɔ a, obetie. Yehowa yɛ Agya a odwen ne mma ho na ɔdɔ wɔn, enti ɔbɛkɔ so ahwɛ wɔn so. Sɛ wanyɛ saa a, ebegu ne din ho fĩ!

3. Adɛn nti na yehia Yehowa ahobammɔ nnɛ?

³ Ɛnnɛ paa na yehia Yehowa ahobammɔ. Wɔatow Satan afi soro, na “ne bo afuw denneennen.” (Adi. 12:12) Watumi ama nnipa binom anya adwene sɛ, sɛ wɔtan yɛn ani a, wɔyɛ ‘de som Onyankopɔn.’ (Yoh. 16:2) Wɔn a wɔtan yɛn ani no bi nso nnye Onyankopɔn nni, na nea enti a wɔtan yɛn ani ne sɛ yɛatwe yɛn ho afi wiase no ho. Nanso ɛmfa ho nea enti a nkurɔfo tan yɛn ani no, ɛnsɛ sɛ yesuro koraa. Adɛn ntia? Efisɛ Onyankopɔn Asɛm ka sɛ: “Awurade yɛ ɔnokwafo, na ɔbɛma moagyina pintinn, na wahwɛ mo so ɔbɔnefo no ho.” (2 Tes. 3:3) Dɛn na Yehowa de bɔ yɛn ho ban? Ma yɛnhwɛ nneɛma mmienu.

4. Wohwɛ asɛm a ɛwɔ Efesofo 6:13-17 no a, dɛn na Yehowa de ama yɛn sɛ ɛmmɔ yɛn ho ban?

⁴ Yehowa ama yɛn akode bi a ebetumi abɔ yɛn ho ban afi ɔsɔretia a Satan de ba yɛn so no ho. (Kenkan Efesofo 6:13-17.) Saa akode no yɛ nnam, na ɛbɔ adwuma paa! Nanso sɛ ebetumi abɔ yɛn ho ban a, gye sɛ yɛhyɛ ne nyinaa, na yɛhwɛ sɛ ɛhyɛ yɛn bere nyinaa. Saa akode no, ebiara gyina hɔ ma dɛn? Ma yɛntɔ yɛn bo ase nhwɛ.

5. Nokware abɔso anaa bɛlt no gyina hɔ ma dɛn, na adɛn nti na ɛsɛ sɛ yɛbɔ?

⁵ Nokware abɔso anaa bɛlt no gyina hɔ ma nokware a ɛwɔ Onyankopɔn Asɛm Bible mu no. Adɛn nti na ɛsɛ sɛ yɛbɔ saa bɛlt yi? Efisɛ Satan yɛ “atoro agya.” (Yoh. 8:44) Mfe mpempem pii ni a wadi atoro, na wadaadaa “asase sofo nyinaa.” (Adi. 12:9) Nanso nokware a ɛwɔ Bible mu no bɔ yɛn ho ban na Satan annaadaa yɛn. Saa bɛlt yi, yɛbɔ no sɛn? Ɛne sɛ yebesua Yehowa ho nokwasɛm, yɛbɛsom no “honhom ne nokware mu,” na yɛadi nokware wɔ biribiara mu.​—Yoh. 4:24; Efe. 4:25; Heb. 13:18.

6. Trenee nkatabo no gyina hɔ ma dɛn, na adɛn nti na ɛsɛ sɛ yɛhyɛ?

⁶ Trenee nkatabo no gyina hɔ ma Yehowa akwankyerɛ a ɛteɛ no. Adɛn nti na ɛsɛ sɛ yɛhyɛ trenee nkatabo no? Sɛ ɔsraani hyɛ ne nkatabo a, ɛbɔ ne ho ban na biribiara anwɔ ne koma. Saa ara nso na trenee nkatabo no bɔ yɛn ho ban na nneɛma bɔne a ɛwɔ Satan wiase yi mu no ansɛe yɛn koma anaa yɛn suban. (Mmeb. 4:23) Yehowa pɛ sɛ yɛde yɛn koma nyinaa dɔ no na yɛsom no. (Mat. 22:36, 37) Wei nti, Satan de asi n’ani so sɛ ɔbɛma yɛn koma mu akyɛ. Ɔyɛ no sɛn? Ɔyɛ nea obetumi biara sɛ ɔbɛma yɛn ani agye wiase yi mu nneɛma a Yehowa kyi no ho. (Yak. 4:4; 1 Yoh. 2:15, 16) Sɛ ɛno anyɛ yiye a, ɔde ɔsɔretia ba yɛn so na ama yɛayɛ biribi a Yehowa ani nnye ho.

7. Trenee nkatabo no, yɛhyɛ no sɛn?

⁷ Trenee nkatabo no, yɛhyɛ no sɛn? Ɛne sɛ, nneɛma a Yehowa ka sɛ ɛteɛ ne nea ɔka sɛ ɛnteɛ no, yebegye atom na yɛde abɔ yɛn bra. (Dw. 97:10) Ebia ebinom bɛte nka sɛ Yehowa akwankyerɛ ma yɛn ho kyere yɛn dodo. Nanso Bible mu nnyinasosɛm a yɛde bɔ yɛn bra no, sɛ yɛamfa ammɔ yɛn bra bio a, yɛbɛyɛ sɛ ɔsraani bi a ɔko gyina mu denneennen na wayi ne nkatabo ato hɔ. Adɛn a, ose emu yɛ duru dodo. Ɛbɛyɛ biribi a nyansa nnim koraa! Wɔn a wɔdɔ Yehowa no de, n’ahyɛde “nyɛ den” mma wɔn. Mmom wobu no sɛ egye wɔn nkwa.​—1 Yoh. 5:3.

8. Sɛ wɔka sɛ yɛmfa asomdwoe asɛmpa no nyɛ yɛn nan ase mpaboa a, ɛkyerɛ sɛn?

⁸ Paul tu yɛn fo nso sɛ yɛmfa asomdwoe asɛmpa no nyɛ yɛn nan ase mpaboa. Nea ɛno kyerɛ ne sɛ, daa nyinaa ɛsɛ sɛ yɛyɛ krado sɛ yɛbɛka Ahenni ho asɛmpa no. Sɛ yɛka Bible mu asɛm kyerɛ nkurɔfo a, ɛhyɛ yɛn ankasa gyidi den. Wokɔ wiase baabiara a, Yehowa nkurɔfo de hokwan biara a wobenya ka asɛmpa no. Wɔyɛ saa bere a wɔwɔ adwumam, sukuu mu, ne mmeae a nnwuma wowɔ, bere a wɔreyɛ afie afie asɛnka, wɔredi gua, wɔakɔsra wɔn abusuafo a wonni asafo no mu, wɔne wɔn amannifo rebɔ nkɔmmɔ, ne bere a biribi nti wɔaka dan mu mpo. Wei yɛ biribi a ɛhyɛ nkuran paa. Sɛ yɛma ehu kyekyere yɛn ma yegyae asɛmpa no ka a, yɛbɛyɛ sɛ ɔsraani a ɔko gyina mu na wayi ne mpaboa; ɛrenni gyina na wapira. Enti sɛ obi tow hyɛ no so a, ɛbɛyɛ den sɛ ɔbɛbɔ ne ho ban, na akwankyerɛ a ne panyin de bɛma no nso, ɔrentumi nni so.

9. Adɛn nti na ɛsɛ sɛ yɛde gyidi kyɛm kɛse no kura?

 ⁹ Gyidi kyɛm kɛse no gyina hɔ ma Yehowa mu gyidi a yɛwɔ. Yegye di sɛ obedi ne bɔhyɛ nyinaa so. Saa gyidi no boa ma ‘yedum ɔbɔnefo no mmɛmma a ɛredɛw no nyinaa.’ Adɛn nti na ehia sɛ yɛde gyidi kyɛm kɛse no kura? Efisɛ ɛbɔ yɛn ho ban na awaefo nkyerɛkyerɛ annaadaa yɛn, na sɛ nkurɔfo di yɛn gyidi ho fɛw nso a, ɛremma yɛn abam mmu. Sɛ nkurɔfo pɛ sɛ wɔdɛfɛdɛfɛ yɛn ma yebu Yehowa akwankyerɛ so na sɛ yenni gyidi a, yɛrennya ahoɔden mfa nnyina yɛn nan so. Nanso bere biara a yɛn gyidi nti yɛbɛtwe yɛn ho afi biribi a ɛmfata ho wɔ adwumam anaa sukuu mu no, ɛkyerɛ sɛ yekura yɛn kyɛm no. (1 Pet. 3:15) Sɛ obi ma yɛn adwuma a sika wom na yehu sɛ ebetwitware yɛn som mu na ɛno nti yɛanyɛ a, ɛno nso kyerɛ sɛ yekura yɛn kyɛm no. (Heb. 13:5, 6) Bere biara a yebehyia sɔhwɛ a yebedi Yehowa nokware no, ɛkyerɛ sɛ yɛn kyɛm no rebɔ yɛn ho ban.​—1 Tes. 2:2.

10. Dɛn ne nkwagye dade kyɛw no, na dɛn nti na ɛsɛ sɛ yɛhyɛ?

¹⁰ Nkwagye dade kyɛw no gyina hɔ ma anidaso a Yehowa de ama yɛn no. Saa anidaso  no ne sɛ obegye yɛn afi owu mu na wama wɔn a wɔyɛ n’apɛde nyinaa akatua. (1 Tes. 5:8; 1 Tim. 4:10; Tito 1:1, 2) Sɛnea dade kyɛw bɔ ɔsraani ti ho ban no, saa ara na nkwagye anidaso no bɔ yɛn nsusuwii anaa yɛn adwene ho ban. Ɛbɔ ho ban sɛn? Saa anidaso no ma yɛde yɛn adwene si Onyankopɔn bɔhyɛ ahorow so, na ɛmma ɔhaw a yehyia nso nhunahuna yɛn. Dade kyɛw no, yɛhyɛ no sɛn? Nea yɛyɛ a ɛkyerɛ sɛ yɛahyɛ dade kyɛw no ne sɛ yɛbɛhwɛ sɛ yɛn adwene ne Onyankopɔn adwene hyia. Ɛho nhwɛso ne sɛ, yɛde yɛn werɛ hyɛ Onyankopɔn mu; yɛmfa nhyɛ ahonyade a ɛntena hɔ nkyɛ mu.​—Dw. 26:2; 104:34; 1 Tim. 6:17.

11. Dɛn ne honhon no nkrante no, na adɛn nti na ɛsɛ sɛ yɛde yɛ adwuma?

¹¹ Honhom no nkrante no ne Onyankopɔn Asɛm Bible no. Saa nkrante no tumi twitwa atosɛm nyinaa gu, na ɛboa nkurɔfo na atoro nkyerɛkyerɛ ne subammɔne amfa wɔn anyɛ nkoa. (2 Kor. 10:4, 5; 2 Tim. 3:16, 17; Heb. 4:12) Nkrante no, kokoam adesua ne ntetee a yenya fi Onyankopɔn asafo no hɔ na ɛma yehu sɛnea yebeso mu yiye. (2 Tim. 2:15) Akode ahorow a Yehowa de ama yɛn no da nkyɛn a, wama yɛn ade kɛse bi nso a ɛbɔ yɛn ho ban. Ɛno ne dɛn?

12. Dɛn bio na yehia, na adɛn nti na yehia?

¹² Ɔsraani a ne ho akokwaw biara nim sɛ ɔno nkutoo ntumi nnyina asraafodɔm kɛse anim ne wɔn nko nni nkonim, gye sɛ ne mfɛfo asraafo ka ne ho. Yɛn nso, yɛn nko ara yentumi ne Satan ne ne dɔm nko nni nkonim, gye sɛ yɛn nuanom boa yɛn. Yehowa ama yɛn “anuanom” wɔ wiase nyinaa sɛ wɔmmoa yɛn.​—1 Pet. 2:17.

13. Sɛnea Hebrifo 10:24, 25 kyerɛ no, sɛ yɛkɔ Kristofo nhyiam a, ɛboa yɛn sɛn?

¹³ Ɔkwan baako a yɛfa so nya anuanom mmoa ne sɛ yɛbɛkɔ Kristofo nhyiam. (Kenkan Hebrifo 10:24, 25.) Yɛn nyinaa, ɛwom ara a, yɛn abam tumi bu, na sɛ ɛba saa a, asafo nhyiam tumi ma yenya ahoɔden foforo. Sɛ yɛn nuanom mmea ne mmarima fi wɔn komam ma mmuae a, ɛhyɛ yɛn nkuran. Sɛ wɔma Bible mu ɔkasa anaa wɔyɛ ɔyɛkyerɛ ahorow wɔ yɛn nhyiam ase a, ɛkanyan yɛn ma yɛkɔ so som Yehowa. Nkɔmmɔ a ɛhyɛ nkuran a yɛbɔ ansa na nhyiam no afi ase ne bere a yɛapɔn no nso hyɛ yɛn den paa. (1 Tes. 5:14) Afei nso yɛn nhyiam ahorow no ma yenya kwan boa yɛn nuanom, na woboa afoforo nso a, ɛma w’ani gye. (Aso. 20:35; Rom. 1:11, 12) Yɛn nhyiam ahorow no boa yɛn wɔ akwan foforo so. Ɛma yɛn ho kokwaw wɔ asɛnka mu, enti yɛbɛka a, ɛtete yɛn ma ɔko. Ɛboa yɛn ma yehu sɛnea yɛde Nnwinnade Titiriw a Yɛde Kyerɛkyerɛ no bɛyɛ adwuma yiye. Enti sɛ worekɔ asafo nhyiam a, di kan sua ade no yiye. Sɛ nhyiam no nso rekɔ so a, wɛn w’aso tie no yiye. Ntetee a wubenya wɔ nhyiam no ase no, wokɔ fie a, fa yɛ adwuma. Woyɛ saa a, wobɛyɛ “Kristo Yesu sraani pa.”​—2 Tim. 2:3.

14. Henanom nso na wɔtaa yɛn akyi?

¹⁴ Abɔfo ahoɔdenfo mpempem bebree nso taa yɛn akyi. Ɔbɔfo baako pɛ mpo, sɛ ɔkeka ne ho a, ɛnyɛ agorɔ! (Yes. 37:36) Enti sɛ abɔfodɔm kɛse ka wɔn ho bom a, dɛn na ebesi? Onipa anaa honhommɔne biara nni hɔ a obetumi Yehowa asraafodɔm a wɔn ho yɛ den no. Ebinom ka sɛ, Ɔdansefo nokwafo baako a Yehowa ka ne ho no, ɔkyɛn dɔm. (Atem. 6:16) Saa asɛm no yɛ nokware turodoo! Bere biara a obi a wo ne no wɔ adwumam anaa sukuu mu, anaa wo busuani  a ɔnyɛ gyidini bɛka asɛm bi anaasɛ ɔbɛyɛ biribi ama wo koma atu no, kae saa asɛm no. Mma wo werɛ mmfi sɛ wowɔ akyitaafo wɔ ɔko no mu. Yehowa na odi w’anim wɔ ɔko no mu, enti nea ɔbɛka na wutie.

15. Sɛnea Yesaia 54:15, 17 kyerɛ no, adɛn nti na obiara rentumi mma Onyankopɔn nkurɔfo nnyae asɛmpa no ka?

¹⁵ Nneɛma pii nti na wiase a Satan di so no tan yɛn. Ebi ne sɛ, yɛne amanyɔsɛm nni hwee yɛ, na yɛnkɔ ko. Yɛka Onyankopɔn din ho asɛm, yɛma nkurɔfo hu sɛ n’Ahenni no nko ara na ebetumi ama nnipa anya asomdwoe, na yedi n’akwankyerɛ so. Yɛma nkurɔfo hu sɛ nea odi wiase yi so no yɛ kontomponi dabrabani, na ɔyɛ owudifo nso. (Yoh. 8:44) Afei nso, yɛma nkurɔfo hu sɛ Satan wiase yi bɛsɛe nnansa yi ara. Ɛmfa ho sɛ Satan ne ne nkurɔfo tan yɛn no, biribiara nni hɔ a wobetumi ayɛ ama yɛagyae asɛmpa no ka. Mmom yɛbɛfa akwannuasa nyinaa so ayi Yehowa ayɛ! Ɛwom, Satan ho yɛ den, nanso mmɔden a ɔrebɔ sɛ ɔremma nkurɔfo nte Ahenni no ho asɛmpa wɔ wiase baabiara no, ayɛ kwa. Sɛ ɛnyɛ Yehowa na ɔtaa yɛn akyi a, anka ɛrentumi mma saa da.​—Kenkan Yesaia 54:15, 17.

16. Sɛ ahohiahia kɛse no ba a, dɛn na Yehowa begye ne nkurɔfo afi mu?

¹⁶ Dɛn na ebesi daakye? Ahohiahia kɛse no ba a, Yehowa bɛfa anwonwakwan so agye yɛn afi nneɛma mmienu bi mu. Nea edi kan, sɛ ɔma asaase so ahemfo sɛe Babilon Kɛse anaa atoro som ahemman no a, obegye n’asomfo anokwafo. (Adiyisɛm 17:16-18; 18:2, 4) Nea edi hɔ ne sɛ, sɛ Harmagedon du na sɛ ɔreyi Satan wiase no fã a aka no afi hɔ a, obegye ne nkurɔfo.​—Adi. 7:9, 10; 16:14, 16.

17. Sɛ yɛkɔ so bata Yehowa ho a, ɛbɛboa yɛn sɛn?

¹⁷ Sɛ yɛkɔ so bata Yehowa ho na sɛ Satan di yɛn ani sɛ dɛn mpo a, ɛrentena hɔ afebɔɔ. Ɔno mmom na wobeyi no afi hɔ afebɔɔ. (Rom. 16:20) Enti fa akode no nyinaa hyehyɛ wo ho; hwɛ sɛ ɛhyɛ wo bere nyinaa! Ɔko no nyɛ wo nko ara wo ko, enti ma afoforo mmoa wo. Boa wo nuanom, na nea Yehowa bɛka no, tie. Woyɛ saa a, wubetumi anya awerɛhyem sɛ w’Agya a ɔwɔ soro a ɔdɔ wo no bɛhyɛ wo den na wabɔ wo ho ban.​—Yes. 41:10.