Onyankopɔn hyɛɛ agya panyin Abraham bɔ sɛ ɔnam n’aseni bi so na obehyira “asase so aman nyinaa.” (Genesis 22:18) Hena na na ɔbɛyɛ saa aseni no?

Bɛyɛ mfe 2,000 ni, Onyankopɔn maa Yesu a ɔyɛ Abraham aseni tumi ma ɔde yɛɛ anwonwade pii. Anwonwade ahorow a Yesu yɛe no ma yehu sɛ ɔno ne Abraham aseni a Onyankopɔn hyɛɛ bɔ sɛ ɔbɛfa no so ahyira asase so aman nyinaa no.—Galatifo 3:14.

Anwonwade ahorow a Yesu yɛe no maa nkurɔfo hui sɛ ɔno na Onyankopɔn nam no so behyira nnipa. Anwonwade ahorow no nso ma yehu nneɛma a Onyankopɔn nam Yesu so bɛyɛ ama nnipa afebɔɔ. Sɛ yɛhwɛ anwonwade ahorow a Yesu yɛe no a, ɛma yehu ne suban ahorow a ɛka koma no bi.

Ayamhyehye—Yesu saa ayarefo yare.

Da bi, kwatani bi srɛɛ Yesu sɛ ɔnsa no yare. Yesu soo ne mu kaa sɛ: “Mepɛ.” Ɛhɔ ara kwata no tu ­yerae.—Marko 1:40-42.

Ayamye—Wɔn a ɔkɔm de wɔn no, Yesu maa wɔn aduan dii.

Ade baako a na Yesu mpɛ ne sɛ obehu sɛ ɔkɔm de nkurɔfo. Ɔyɛɛ anwonwade maa nnipa mpempem pii nyaa aduan dii. Ná paanoo ne nam kakraa bi na ɛwɔ hɔ, nanso ɔkyɛ ma ɛsoo wɔn nyinaa so. (Mateo 14:17-21; 15:32-38) Nnipakuw no didi mee ma bebree kae. Ɛnyɛ pɛnkoro pɛ na ɔyɛɛ saa.

Mmɔborɔhunu—Yesu nyan awufo.

Bere a Yesu hui sɛ ɔbea kunafo bi ba a odi no bakoro awu, na onni obiara a ɔbɛhwɛ no no, “ɔyɛɛ no mmɔbɔ” na onyan no.—Luka 7:12-15.