Di Bere So!

ATESƐM krataa, USA Today, bɔ amanneɛ sɛ: “Akyirika abɛyɛ adwumam mpanyimfo su a wɔyɛ ho hwee a ɛnyɛ yiye.” Bere a atesɛm krataa no reka adwumam mpanyimfo 2,700 ho nhwehwemu a wɔyɛe ho asɛm no, ɛde kaa ho sɛ: “Adwumam nhyiam 10 biara a wɔbɛkɔ no, wɔka akyi wɔ emu asia mu.”

Wommu akyi a obi taa ka wɔ adwumam no sɛ subammɔne kɛkɛ na mmom ɛyɛ aniberesɛm. Nhwehwɛmu bi a wɔyɛe wɔ adwumayɛfo 81,000 mu no kyerɛe sɛ: “Nnɔnhwerew dodow a akyirika ma wɔsɛe, ne adwuma mu a wɔtoto bere a wɔnsrɛ kwan ne ade titiriw a ɛma wɔbɔ ka wɔ nnwuma mu.” Ɛwom, ɛnyɛ nnwuma mu nko na akyirika ma nsɛnnennen sɔre. Nhwehwɛmu bi a wɔyɛe wɔ ntoaso sukuu so ahwɛfo mu no daa no adi sɛ “akyi a adesuafo no taa ka no ne ɔhaw a wɔtaa hyia wɔ sukuu mu.”

Yɛn Bɔfo no ammɔ yɛn sɛ yemmu yɛn ani ngu bere so. Ɔyɛɛ ‘akanea akɛse abien’—owia ne ɔsram—sɛ ɛmmoa yɛn mma yemmu bere. (Genesis 1:14-16) Nnansa yi, wɔayeyɛ mfiri horow a ɛboa yɛn ma yetumi bu yɛn bere wɔ simma ne anibu mu. Nanso, ɛmfa ho nyansahu mu nimdeɛ yi no, ɛyɛ den ma yɛn mu pii sɛ yɛbɛkɔ adwuma, sukuu, anaa baabi foforo biara a ehia sɛ yɛkɔ ntɛm.

So ɔhaw no gyina bere a yenni so? Ɛwom, adwuma a yɛyɛ ne yɛn abusua betumi agye yɛn bere pii. Nanso, ɛna bi a wɔfrɛ no Wanda Rosseland a ɔyɛ adwuma ka sɛ: “Bere a mibehui sɛ yɛn nyinaa wɔ nnɔnhwerew 24 da biara no, migyaee anwiinwii wɔ mmere pii a na minnya no ho. Masusuw ho ahu sɛ wɔ yɛn wiase yi mu nnɛ no, ɛnyɛ sɛ bere no sua ma yɛn, na mmom yɛma nneɛma pii twitware yɛn akwan mu sɛe yɛn bere.”

Susuw Renee, * ɛna bi a ɔwɔ mma baanum a ɔyɛ Yehowa Dansefo no nso ho hwɛ. Ɔka n’asɛm sɛ: “Bere a na me mma no susua no, na wɔn ho a mesiesie ama wɔakɔ sukuu ne Kristofo nhyiam ahorow no yɛ asɛnnennen ma me. Ne nyinaa akyi no, na mitumi di me bere so. Nanso mprempren a wɔanyinyin no, m’abenya subammɔne a ɛne akyirika.” So wo nso wowɔ subammɔne yi bi? Sɛ saa a, wubetumi asesa! Nneɛma bi a wubetumi ayɛ ni.

● SUSUW NEA EBEFI MU BA NO HO. Akyi a wotaa ka betumi ayɛ sɛ ade ketewaa bi. Nanso susuw Bible asɛm yi ho hwɛ: “Nwansena funu  ma odufrafo aduru bɔn na ɛporɔw, na nkwaseasɛm kakra yɛ duru sen nyansa ne anuonyam.” (Ɔsɛnkafo 10:1) Yiw, “nkwaseasɛm kakra” a wubedi denam afoforo ho a wunsusuw so no betumi asɛe din pa a wowɔ wɔ ɔkyerɛkyerɛfo—anaa adwumawura bi anim no.

Bere a ɔbea bi a wɔfrɛ no Marie resua ade wɔ kɔlege bi a ɛwɔ baabi a ɔte no, ohui sɛ ne mfɛfo sukuufo no bi “mfa bere nni dwuma,” ma enti na wɔntaa mma sukuu ntɛm. Ɔka sɛ: “Nanso ankyɛ na wogyaee akyirika. Na akyerɛkyerɛfo baanu bi yɛ katee wɔ bere sodi ho. Enti sɛ sukuufo no bi ka akyi simma kakraa bi a, na wɔakyerɛw ahyɛ wɔn din ho sɛ wɔamma. Enti akyirika pii no amma wɔammɔ mmɔden wɔ sɔhwɛ mu.”

Sɛ wotaa ka akyi a, ɛbɛma wo nnamfonom ne wo mfɛfo abɔ wo dimmɔne. Joseph, ɔbarima bi a n’ani afi kaa ne yɔnko Kristoni bi a na onim no mfe dudu bi a abɛsen kɔ ho asɛm sɛ, ɛwom sɛ na wobu barima yi sɛ obi a ne ho akokwaw wɔ adekyerɛ mu de, nanso na ɔwɔ sintɔ bi a enye koraa. Joseph ka sɛ: “Daa na ɔka akyi. Mekyerɛ sɛ, ɔka akyi wɔ biribiara mu! Nanso ɛte sɛ nea na ɛmfa ne ho koraa. Nkurɔfo dii akyiri a ɔka no ho fɛw.” So nkurɔfo afi ase reka sɛ wotaa ka akyi? Sɛ saa a, ɛnde na ɛrenyɛ den sɛ wobebu wɔn ani agu su pa a wowɔ no so.

● SUSUW AFOFORO HO. Akyirika yɛ subammɔne a ɛhaw afoforo. Na ebetumi ama afoforo asusuw sɛ woyɛ ahomaso. Adwumawura bi rekyerɛkyerɛ nea enti a adwumam mpanyimfo pii taa ka akyi wɔ adwumam nhyiam ase mu no, ɔkae sɛ: “Yɛn mu pii yɛ ahantan.” Nea ɛne eyi bɔ abira no, Kristofo bu wɔn yɔnkonom kyɛn wɔn ankasa ho. (Filipifo 2:3) Wɔsan de Mmara Pa no di dwuma bu afoforo sɛnea wɔpɛ sɛ wobu wɔn no. (Mateo 7:12) Sɛ woretwɛn obi a waka akyi a, so ɛnhyɛ wo abufuw? Ɛnde, mma afoforo ntra hɔ ntwɛn wo.

● SUA NYANSAHYƐ AHOROW A WƆDE DI BERE SO. So wotaa tu bere a wode bɛyɛ biribi no hyɛ da, na awiei koraa no wode ahopere ayɛ? So wokeka nneɛma bobɔ wo ho so, na woabɔ mmɔden sɛ wode bere ketewaa bi bɛyɛ ne nyinaa? Nnyinasosɛm a ɛwɔ Ɔsɛnkafo 3:1 no betumi aboa wo: “Ade biara wɔ ne bere a wɔahyɛ.” ‘Bere a wobɛhyɛ’ ama nneɛma ahorow no betumi ama woayɛ ne nyinaa wɔanowɔano.

Nea edi kan no, kyerɛw nneɛma a wopɛ sɛ woyɛ no nyinaa to hɔ. Afei, fa nnyinasosɛm a ɛwɔ Filipifo 1:10 no di dwuma: ‘Monsɔ nneɛma a eye koraa no nhwɛ.’ Yiw, yɛ nneɛma a ehia paa no. Dɛn na ehia paa sɛ woyɛ? Nneɛma bɛn na wubetumi ayɛ no akyiri yi a ɛrenhaw adwene? Awiei koraa no, hwɛ bere dodow a wubehia de ayɛ nneɛma no ne bere a wubetumi de awie. Nya adwene a ɛfata, na kwati sɛ wode bere ketewaa bi bɛyɛ nneɛma pii.

 Ɔbea bi a wɔfrɛ no Dorothy kamfoo n’awofo wɔ kyerɛ a wɔkyerɛɛ no sɛnea ɛsɛ sɛ odi ne bere so no ho. Ɔka sɛ: “Sɛ yɛbɛkɔ Kristofo nhyiam anwummere 7:30 a, me maame bɛma yɛasiesie yɛn ho awie bere a aka dɔnhwerew biako ne simma 45 ma bere aso no. Na yenya bere ma aduan a yebedi anwummere, bere a yɛde bɛhohoro nneɛma a yedidii mu mu, bere a yɛde besiesie yɛn ho, ne bere a yɛde bɛtra kaa mu akɔ nhyiambea hɔ. Bere sodi bɛyɛɛ yɛn su.” Ɛtɔ mmere bi a, ɛma yetumi di biribi a esi mpofirim ho dwuma nanso yɛnka akyi. Dorothy ka sɛ: “Nnansa yi ara, na ɛsɛ sɛ mekɔfa nnipa kakraa bi kɔ nhyiam bi ase. Bere a menam kwan so rekɔ no, kar no kɔba dwoe. Mitumi tuu kɔba no de foforo hyɛɛ ananmu san kɔfaa wɔn a manka akyi. Asɛm no ne sɛ, metaa gyaw bere ma ɔhaw a ebia kar no behyia anaa kar nkyereso a ebia mehyia wɔ kwan so.”

● BISA AFOFORO HƆ NYANSAHYƐ. Bible no ka wɔ Mmebusɛm 27:17 sɛ: “Dade sew dade ano, na onipa sew ne yɔnko anim.” Nea ɛne saa nnyinasosɛm no hyia no, ka w’asɛm kyerɛ wɔn a wɔn tebea te sɛ wo de nanso wotumi di wɔn bere so no. Saafo no taa wɔ nyansahyɛ pii a mfaso wɔ so.

Renee, a yɛfaa n’asɛm kae mfiase no asi ne bo sɛ ɔbɛsesa akyi a ɔtaa ka no. Ɔka sɛ: “Masi gyinae sɛ mɛbɔ me ho mmɔden nnansa yi. Ɛwom sɛ ɛnyɛ mmerɛw de, nanso merenya nkɔso.” Wo nso, wubetumi ayɛ saa. Sɛ woyɛ w’adwene yiye na woyere wo ho a, wubetumi asua sɛ wubedi bere so!

[Ase hɔ asɛm]

[Mfonini ahorow wɔ kratafa 16]

Akyirika a wobɛma ayɛ wo su no remma adwumawuranom nnya wo ho adwempa na ɛkyerɛ sɛ wunsusuw afoforo ho

[Mfonini wɔ kratafa 17]

Nhyehyɛe pa a wobɛyɛ no betumi aboa wo ma woagyae bere sɛe