So Asesɛwfo Betumi Ayɛ Nneɛma Yiye?

ADWUMAYƐ mu dwowtwa, mmara a wɔhyɛ de sisi nnipa, asetra mu ntɛnkyea, aduyɛ a enni mũ, sukuu pa a wonnya nkɔ, nyamesom mu dwowtwa ne abɔde a adifudepɛ nti wɔsɛe no yɛ nsɛm a ɛma nnipa pii si apini sɛ wɔadi wɔn huammɔ. Nea ɛrekɔ so no ma yɛn mu pii ho dwiriw yɛn. Eyinom ne nsɛm a epiapia asesɛwfo ma wɔyɛ biribi de hwehwɛ nsakrae no.

Asesɛwfo wɔ ɔman anaa kuw biara mu, na wɔnam mmara kwan so hyɛ nsakrae ho nkuran. Wɔntaa nyɛ ɔman anidanfo, esiane sɛ wɔn mu pii nam mmara kwan so na ɛyɛ wɔn ade a wɔnyɛ basabasa. Asesɛwfo kakra bi a wɔyɛ nnipa atitiriw wɔ ɔman mu no na wɔhwɛ ma nsakrae ba. Afoforo nso de wɔn ho gye nsɛm mu na wɔhyɛ wɔn a wokura tumi no ma wɔyɛ nsakrae.

Asesɛwfo bɔ mmɔden sɛ wɔbɛma ɔmanfo asusuw ɔkwan foforo a wɔbɛfa so adi nneɛma ho dwuma ho. Wɔnkasa ntia nneɛma ara kɛkɛ na mmom wɔkyerɛ sɛnea wɔbɛtoto nneɛma yiye. Nea ɛbɛyɛ na asesɛwfo atwe ɔmanfo adwene asi wɔn ahiasɛm so no, wobetumi de adesrɛde ato ɔmanfo anim, ayɛ ɔsɔretia ho ɔyɛkyerɛ wɔ mmɔnten so, anaa wɔabɔ ho dawuru. Ade a ebetumi ahaw ɔsesɛwfo kɛse ne sɛ ɔmanfo rennye no ntom.

Tete ne Nnɛyi Asesɛwfo

Ɔsesɛw pii akɔ so wɔ abakɔsɛm mu. Bible kyerɛ yɛn sɛ bɛyɛ mfe 2,000 a atwam ni no, baguam ɔkasafo bi kaa nsɛm yi de hoahoaa Felike a na odi Roma mantam a ɛwɔ Yudea so no: ‘Amansesɛw nam wo nimdeɛ so aba ɔman yi mu.’ (Asomafo no Nnwuma 24:2) Bɛyɛ mfe 500 ansa na Felike reba no, Helani mmaranimfo Solon  yɛɛ nsakrae a ɛbɛma ahiafo kɔn mu adwo wɔn. The Encyclopædia Britannica kyerɛkyerɛ mu sɛ Solon “tuu ɔhaw ahorow a emu yɛ den a ohia de ba no ase” fii tete Atene.

Asesɛwfo pii asɔre wɔ nyamesom abakɔsɛm mu. Sɛ nhwɛso no, Martin Luther bɔɔ mmɔden sɛ ɔbɛyɛ nsakrae wɔ Roma Katolek Asɔre no mu, na nea ɔyɛe no boae ma wɔtee Protestant som.

Nea Ɔsesɛw Kodu

Ebia asesɛwfo bɛbɔ mmɔden sɛ wɔbɛsakra sɛnea nneɛma te nso. Asesɛwfo binom hyɛ asetra kwan foforo ho nkuran. Saa na na ɛte wɔ Lebensreform (asetra kwan mu nsakrae) dwumadi a ɛkɔɔ so wɔ Germany wɔ afeha 20 mfiase mu no. Bere a ɔman mu mfiridwuma nyaa nkɔso no, ɛmaa nnipa pii tee nka sɛ wonni anigye wɔ asetra mu, na na obi mfa obi ho bio. Asesɛwfo no kamfo kyerɛe sɛ wɔnsan nkɔ wɔn asetra dedaw no mu. Wɔkamfoo apɔwmuden a obi benya, agodi, abɔde te sɛ mframa, nsu ne owia a wɔde bɛsa yare, ne nnuan a nnam nka ho a wobedi, kyerɛe.

Asesɛwfo afoforo nso ma ɔmanfo hu nsisi a ɛrekɔ so no, na wɔhyɛ aban no ma ɔtoto nneɛma yiye. Efi afe 1970 reba no, fekuw ahorow a wɔn ano yɛ den a wɔpɛ sɛ wɔbɔ abɔde ho ban no akasa atia abɔde mu nneɛma a wɔmfa nni dwuma wɔ ɔkwan pa so a ɛma nneɛma kɔ so sɛe no. Efi saa bere no, fekuw yi mu bi atrɛw kɔ aman pii so. Anuɔdenfo yi nkasa ntia abɔde a yɛsɛe no ara kɛkɛ. Wɔde nyansahyɛ a ɛbɛma wɔatoto nneɛma yiye nso ma. Nea ɛka ho bi ne sɛ wɔaboa ma wɔasakra mmara a ɛfa nwura a awuduru wom a wɔtow gu po mu ne abonsu a wokunkum wɔn no mu.

Wɔ 1960 mfe no mu no, Vatican Bagua a Ɛto so Abien no yɛɛ nsakrae wɔ Roma Katolek Asɔre no mu. Wɔ 1990 mfe no mu nso, Katolek asɔremma no mu bi sɔree a na wɔkyerɛ sɛ wɔyɛ asesɛwfo. Sɛ nhwɛso no, wɔde nyansahyɛ mae sɛ wɔnsakra sigyadi ho mmara a wɔahyɛ ama asɔfo no. Asesɛwfo a wɔwɔ Anglikan Asɔre mu no hwɛ maa wɔyɛɛ nsakrae, na wɔmaa mmea a wɔhyɛ wɔn asɔfo ho kwan.

Ɛnyɛ Obiara na Ogye Wɔn Tom

Nneɛma pa afi nsakrae a wɔayɛ no bi mu aba. Sɛ nhwɛso no, yehu aman akannifo ne afoforo pii wɔ Bible mu a wɔhwɛ ma wɔyɛɛ nsakrae a ɛfata. Wɔn mmɔdemmɔ no ma wonyaa ɔsom mu nkɔso, ɔmanfo dii yiye na wonyaa Onyankopɔn anim dom. (2 Ahene 22:3-20; 2 Beresosɛm 33:14-17; Nehemia, ti 8 ne 9) Nnansa yi, nnipa dodow no ara si ahofadi a ɛsɛ sɛ obiara nya ne hokwan a nnipa wɔ so dua de bɔ nnipa kakraa bi a wonni boafo wɔ ɔman mu ne ankorankoro a wɔtan wɔn no ho ban.

Nanso sɛ wonya fi ɔsesɛw ase a, nneɛma a wɔnhwɛ kwan taa sisi. John W. Gardner, a na ɔyɛ aban soafo wɔ afeha a ɛto so 20 mu no kae sɛ: “Ade a ntease nnim biako wɔ abakɔsɛm mu ne sɛ mpɛn pii no amansesɛwfo nhu sɛnea wɔn nsakrae no bewie no mu yiye.” Susuw nhwɛso ahorow yi ho hwɛ.

Wɔ 1980 mfe no mfiase no, Europa Aman Nkabom Kuw fii ase yɛɛ nsakrae wɔ kuayɛ mu sɛ ɛbɛboa nnipa a wɔte sare so ne nsase a asɛe so no. Kuayɛ ho nhyehyɛe foforo a wɔyɛe yi ma wonyaa nsase a wodua so nnɔbae a ɛtrɛw bɛboro akwansin 1,000 de duaa sare wɔ Germany ne Italy. Ɛmfa ho adwempa a na wokura no, asiane bi wɔ hɔ a na wonhui. Amanaman Nkabom Ahyehyɛde a Ɛhwɛ Abɔde So no ka sɛ: “Bere a mfiase no wogye toom sɛ mmeae a ɛte saa no bɛma mmoa anya baabi atra no, na ‘mmeae a wɔnnɔw’ yi betumi de ɔhaw nso aba—ɛbɛma ɔmanfo agyae sɛnea wɔyɛ kuadwuma no akɔfa ɔkwan foforo a ɛmfata so adua nnua.”

Ɛdefa mmɔden a wɔrebɔ de aboa ahiafo fam no, Amanaman Ntam Foto ma Kuadwuma Nkɔso no ka sɛ: “Nsakrae ho nhyehyɛe a wɔyɛ sɛ wɔde bɛboa ahiafo no nyinaa ntumi nyɛ yiye. Sɛ wɔtew ahyehyɛde bi a, nnipa a wokura  tumi no na wonya so mfaso. . . . ‘Nnipa a wɔwɔ tumi’ wɔ ahyehyɛde no mu no yɛ nea wɔn ankasa pɛ.”

Nhwɛso foforo ne mmea fekuw a wɔhyehyɛe ma ɛsakraa mmea a wɔwɔ Atɔe fam aman mu asetra no. Eyi ma wonyaa hokwan a wɔde bɛtow aba, asua ade akɔ akyiri na wɔapaw adwuma a wɔpɛ no. Nanso ebinom a wɔtaa mmea ahofadi nhyehyɛe yi akyi no mpo gye tom sɛ fekuw a ɛte saa no abɛyɛ ɔdomfo-kumfo. Susan Van Scoyoc a ɔyɛ nhoma kyerɛwfo no bisae sɛ: “So yɛama mmea asetra atu mpɔn ankasa, anaa bere a yɛrehwɛ kwan sɛ mmea ne mmarima bɛyɛ adwuma pɛ nanso wɔn kununom nyɛ biribi mmoa wɔn wɔ ofie adeyɛ mu no, na yennyaw mmea sɛ wonhu amane?”

“Nsakrae a Enkosi Hwee”

Wɔabɔ asesɛwfo binom sobo sɛ nsakrae hunu ara na wɔhwehwɛ. Bere a Frederick Hess a wasua nsakrae a wɔyɛ wɔ sukuu adesua mu ho ade rekyerɛkyerɛ nea ɔfrɛ no nsakrae a enkosi hwee mu no, ɔkae sɛ: “Nea ɛmma nsakrae kɛse a wɔyɛ nsɔ ani no fi ɔkwan a wɔfa so yɛ nsakrae no ankasa. Sɛ́ anka nsakrae ho mmɔden a wɔrebɔ no beyi ɔhaw ahorow afi hɔ no, ɛbɛyɛ nnaadaa kwan bi a wɔnam so twetwe nkurɔfo adwene, na ɛma ɔhaw no yɛ kɛse” mmom sen sɛ ebefi hɔ. Ɔtoa so sɛ: “Esiane sɛ nniso biara a ɛbɛba no de nsakrae foforo ba nti, ɛnkyɛ na wɔasan ahyɛ nneɛma nyinaa ase foforo.”

Ɔsesɛw betumi ama wɔahyɛ biribi foforo koraa a ɛtɔ mmere bi a ɛde ɔhaw ba nso ho nkuran. Lebensreform fekuw a ɛwɔ Germany no boae ma wosuaa ɔkwan a ɛbɛma adesamma abusua no atu pɔn denam paw a wɔbɛpaw awofo a wobetumi awo mmofra a wɔn ho yɛ den no so. Nanso nnipa a wɔyɛ ade tra so no de nimdeɛ yi dii dwuma wɔ ɔkwammɔne so de boaa Nasifo mmɔden a wɔbɔe sɛ wɔbɛhyehyɛ mmusua bi a wɔkyɛn afoforo nyinaa no.

Ɛtɔ mmere bi a, wonnya nea wɔhwehwɛ denneennen no mfi nsakrae mu. UN Kyerɛwfo Panyin Kofi Annan de awerɛhow kae sɛ: “Nea ɛyɛ abasamtu kɛse ne sɛ yɛn nyinaa nim adebɔne no ne nea ɛsɛ sɛ yɛyɛ, nanso mpɛn pii no yentumi nyɛ nea ɛsɛ. Ɛtɔ mmere bi a, wɔma adwumayɛbea a ɔkyerɛwfo panyin no da wɔn ano no tumi sɛ wɔnyɛ tebea no ho biribi, nanso ɛyɛ a na wonni sika a ɛsɛ a ɛbɛma wɔadi nneɛma ho dwuma. Sɛ ɛba sɛ nsɛm a ɛyɛ hu resisi na yɛpɛ sɛ yɛma wiase no hu nea ɛrekɔ so a, obiara mpɛ sɛ ɔbɛyɛ ho biribi esiane nea enye a ɔmanfo ahu wɔ bere a atwam no nti.”

Ɛyɛ den sɛ wobegye amansesɛwfo atom, esiane sɛ bere a wɔretwe adwene asi nneɛma  a wɔbɛyɛ so no, wɔma afoforo bi nso ho kyere wɔn. Jürgen Reulecke, nnɛyi abakɔsɛm ho ɔbenfo ne mansesɛw ho nimdefo kae wɔ Die Zeit atesɛm krataa mu sɛ: “Ɔmansesɛwfo yɛ honam mu nsɔe bere nyinaa.” Bio nso, ɛmfa ho sɛ amansesɛwfo pii di mmara so na wɔnyɛ basabasa no, wɔn mu binom nnya abotare bere a nkɔso mma ntɛmntɛm no. Wɔ tebea a ɛte saa mu no, saafo no betumi abɛyɛ basabasayɛfo a wonni mmara so.

So nsakrae pii a wɔayɛ nnansa yi ama nnipa dodow no ara anya abotɔyam wɔ asetra mu? Ɛte sɛ nea nneɛma nte saa. Wɔ  Germany sɛ nhwɛso no, nhwehwɛmu a wɔyɛe de huu nkurɔfo adwene wɔ nneɛma bi ho no kyerɛe sɛ, bɛyɛ mfe 35 a atwam ni no, ɛte sɛ nea nsakrae biara mmae wɔ asetra mu. Na nyamesom nso ɛ? So nyamesom mu nsakrae a wɔayɛ no ama nnipa pii abɛyɛ nyamesomfo? So nyamesomfo ani gye wɔn som ho nnɛ? Dabi. Adanse kyerɛ sɛ, nnipa a wɔwɔ Atɔe Fam aman mu ani nnye nyamesom ho, ma enti wɔmpɛ sɛ wɔde wɔn ho bɛbɔ wɔn som ahorow ho bio.

Na Yesu Kristo Yɛ Ɔmansesɛwfo?

Ebia ebinom bɛka sɛ na Yesu Kristo yɛ ɔmansesɛwfo. So ɛyɛ nokware? Saa asɛmmisa yi ho hia ma obiara a ɔpɛ sɛ ɔsom Onyankopɔn nokware mu no, efisɛ ɛhwehwɛ sɛ odi Kristo anammɔn akyi pɛɛ.—1 Petro 2:21.

Akyinnye biara nni ho sɛ na Yesu betumi de nsakrae aba. Sɛ́ onipa a ɔyɛ pɛ no, na obetumi ahwɛ ama nsakrae kɛse aba. Nanso, Kristo anni ɔsatu biara anim a na ɛbɛma watu aman mpanyimfo a na dwowtwa ahyɛ wɔn ma ne aguadifo atorofo ase. Ɛwom sɛ n’ankasa huu amane wɔ ntɛnkyea a na ɛrekɔ so no mu de, nanso wanni ɔsɔretia ho ɔyɛkyerɛ biara anim ankasa antia atɛnkyea. Ɛtɔ mmere bi a, na Yesu “nni nea ɔde ne ti to.” Nanso, wanhyehyɛ kuw bi a ɛbɛtwe aban no adwene asi nneɛma a nnipa a wonni baabi te hia no so. Bere a na ebinom renwiinwii wɔ sika ho no, ɔkyerɛkyerɛɛ mu sɛ: “Ahiafo wɔ mo nkyɛn daa.” Yesu amfa ne ho annye basabasayɛ a na ɛrekɔ so wɔ wiase no mu mu.—Mateo 8:20; 20:28; 26:11; Luka 12:13, 14; Yohane 6:14, 15; 18:36.

Nokwarem no, ɔhaw ahorow bi te sɛ ohia, amumɔyɛ ne ntɛnkyea kaa Kristo yiye. Bible kyerɛ sɛ, amanehunu kɛse a adesamma wom no haw no kɛse. (Marko 1:40, 41; 6:33, 34; 8:1, 2; Luka 7:13) Nanso ɔde ɔhaw ahorow no ho aduru koro pɛ mae. Ná ɛnyɛ nsakrae ara kɛkɛ na ɛwɔ Kristo adwenem, na mmom na ɔbɛsakra ɔkwan a adesamma fa so di nneɛma ho dwuma no koraa. Ɔsoro Ahenni a adesamma Bɔfo, Yehowa Nyankopɔn de bɛba, a ne ba Yesu Kristo ne so Hene no de nsakrae yi bɛba. Yebesusuw eyi ho wɔ asɛm a edi hɔ no mu.

[Asɛm a wɔafa aka wɔ kratafa 6]

“Ade a ntease nnim biako wɔ abakɔsɛm mu ne sɛ mpɛn pii no amansesɛwfo nhu nea ebefi wɔn nsakrae no mu aba no mu yiye.”—John W. Gardner

[Asɛm a wɔafa aka wɔ kratafa 7]

“Nea ɛyɛ abasamtu kɛse ne sɛ yɛn nyinaa nim adebɔne ne nea ɛsɛ sɛ yɛyɛ, nanso mpɛn pii no yentumi nyɛ nea ɛsɛ.”—UN Kyerɛwfo Panyin Kofi Annan

[Adaka/Mfonini wɔ kratafa 8, 9]

“Mede Me Nkwa Too Asiane mu De Bɔɔ Abɔde Ho Ban”

Wɔ mfe 48 a Hans de yɛɛ po so adwuma mu no, ɔde emu bɛboro 35 yɛɛ adwuma sɛ po so hyɛn mu panyin. Bere a ɔde n’adwuma rekɔ awiei no, ahyehyɛde bi a ɛbɔ abɔde ho ban de no yɛɛ wɔn hyɛn no mu panyin. Ɔkyerɛ mu sɛ:

“Na migye di bere nyinaa sɛ ɛsɛ sɛ adesamma hwɛ abɔde so yiye na wɔde di dwuma wɔ ɔkwan pa so. Enti bere a wɔde hokwan maa me sɛ memmɛyɛ hyɛn no mu panyin no, mampopo me ti koraa. Na yɛn adwuma ne sɛ yɛbɛma ɔmanfo ahu asiane a ɛba abɔde so no. Bere biara a yɛbɛyɛ po so ɔsatu ho nhyehyɛe no, yenya nsɛm ho amanneɛbɔfo ma wɔtwe ɔmanfo adwene ba so. Yɛhyɛɛ ase kɔɔ po so, yɛɛ biribi de siw nwura a awuduru wom ne nneɛma afoforo a edi awu a wɔtow gu po mu no ano. Yɛbɔɔ mmɔden yɛɛ ɔsatu foforo de siw sukraman ne wɔn mma a wokunkum wɔn no ano.

“Ná ɛyɛ adwuma a egye akokoduru. Mede me nkwa too asiane mu de bɔɔ abɔde ho ban. Wɔ ɔsatu biako mu no, mekyekyeree me ho fam ɛhyɛn sɛkyɛ ho ma ɛtwee me kɔɔ po ase. Bere foforo nso, metraa hyɛmma bi a wɔde rɔba ayɛ a etu mmirika ntɛmtɛm mu de dii hyɛn kɛse bi nkyɛnmu tuu kwan. Obi too ankora bi a emu yɛ duru too yɛn ahyɛmma no mu ma ebu faa so. Mipiraa kɛse.”

Nanso awiei koraa no Hans hui sɛ, ɛwom sɛ nneɛma a ahyehyɛde no pɛ sɛ wɔyɛ no ye de, nanso na ɔde ne nkwa reto asiane mu ayɛ biribi a entumi mmoa abɔde ahe biara. (Ɔsɛnkafo 1:9) Bere a ofii ahyehyɛde a ɛbɔ abɔde ho ban mu no, ankyɛ koraa na ɔne Yehowa Adansefo suaa Bible no, na ɔbɛyɛɛ Ɔdansefo a wabɔ asu. Ɛnnɛ, ɔyɛ bere nyinaa somfo. “Bible boaa me ma mihui sɛ Onyankopɔn Mesia Ahenni no ne anidaso koro pɛ a ebetumi ahwɛ abɔde so yiye.”

[Adaka/Mfonini wɔ kratafa 9]

Ɔpere Hwehwɛɛ Nsakrae

Wɔwoo Sara (ɛnyɛ ne din ankasa) wɔ Asia wɔ 1960 mfe no mu hɔ. Na onnii mfe aduonu na wotuu ne man mu aban gui maa aban foforo bae. Aban foforo yi hyɛɛ bɔ sɛ wɔde nsakrae bɛba amammui ne asetra mu. Mfiase no, ɔmanfo ani gyee nsakrae no ho, nanso afe pɛpɛɛpɛ na aban foforo yi fii ase tuu n’ani sii wɔn a na wonni n’afa no so sɛnea na aban dedaw no yɛ no. Nnipa pii tee nka sɛ wɔadi wɔn huammɔ, ma enti Sara kɔdɔm kuw bi a ɛsɔre tia aban foforo no.

“Na yɛn kuw no mufo yɛ nhyiam ma yɛyɛ ɔsɔretia ho ɔyɛkyerɛ wɔ baguam. Bere bi a mewɔ ahenkurow no abɔnten so de dawurubɔ nkratasin refomfam adan ho na merekyekyɛ nsaano krataa ama afoforo no, asraafo aboafo bi kyeree me. Awiei koraa no, wogyae me. Nanso yɛn kuw no mufo bi ti anyɛ yiye. Wɔkyeree me nnamfo mmabaa baanu kum wɔn. Na me nkwa da asiane mu ma enti m’agya hyɛɛ me sɛ mimfi ɔman no mu.”

Bere a Sara duu Europa no, osuaa Bible, na ɔbɔɔ asu sɛ Yehowa Dansefo. Ɛnnɛ, ɔyɛ bere nyinaa somfo. Sara bu kɔmpɔ a, ɔka sɛ:

“Nea na merehwehwɛ ara ne atɛntrenee ne yɛn asetra mu haw ano aduru. Mihui sɛ mfiase no na aban foforo no kura botae koro yi ara, nanso wɔyɛɛ ade traa so maa wɔn werɛ fii wɔn botae no, na wofii ase teetee ɔmanfo. Mihui nso sɛ na kuw a mewɔ mu a ɛsɔre tia aban no nni nsɛnnennen a yɛn man no hyia no ano aduru. (Dwom 146:3, 4) Seesei mahu sɛ Onyankopɔn Mesia Ahenni no ne adesamma haw nyinaa ano aduru.”

[Mfonini wɔ kratafa 7]

Berlin Fasu no dwiriw gui wɔ 1989 mu

[Mfonini wɔ kratafa 8]

So nsakrae a wɔayɛ wɔ nyamesom mu nnansa yi no ama wɔanya nyamesomfo pii?

[Mfonini Fibea wɔ kratafa 5]

Atifi fam nifa so: U.S. Information Agency photo

[Mfonini Ahorow Fibea wɔ kratafa 7]

Kofi Annan: UN/DPI photo by Evan Schneider (Feb97); akyi mfonini: WHO/OXFAM