SƐ BONSU nyin a, ɔyɛ kɛse na ne mu yɛ duru sen bɔs. Nanso aboa kɛse yi tumi ne ho, na otumi dannan ne ho wɔ nsu mu ma ɛyɛ nwonwa. Dɛn na ɛma bonsu kɛse yi tumi ne ho saa? Ne nsa ano apɔwapɔw no na ɛboa no.

Susuw ho hwɛ: Bonsu ne mpataa akɛse afoforo no mu dodow no ara wowɔ nsa a ano yɛ tromtrom. Nanso bonsu yi de yɛ soronko. Ne nsa no ano no yɛ apɔwapɔw akɛse (wɔfrɛ no tubercles wɔ borɔfo kasa mu). Sɛ bonsu no reguare wɔ nsu mu a, nsu no fa apɔwapɔw a ɛwɔ ne nsa ano no ntam ma nsu no twa kanko pii ma ɛyɛ dede. Eyi ma bonsu no tumi huruw kɔ soro, na ɔdannan ne ho kyeakyea ne nsa no kɔ soro paa a ɔnhome so. Sɛ ohuruw kɔ soro paa a, ne nsa ano apɔwapɔw no ma otumi ma ne mu so kɔ soro yiye—bonsu no nsa woware, na eyi boa no paa. Ne nsa no tenten bɛyɛ sɛ bonsu mũ no nyinaa nkyem abiɛsa.

Nhwehwɛmufo nam saa kwan yi so reyɛ ahyɛmma kudɔɔ, mfiri a ɛtwe anyinam ahoɔden wɔ nsu mu, nea ɛtwe ahoɔden fi mframa mu, ne helikopta abɔmframa a ɛyɛ adwuma yiye.

Wususuw ho dɛn? So bonsu nsa nam adannandi so na ɛbae? Anaa wɔbɔe?