“Ampa ara, Onyankopɔn deɛ, ɔnyɛ bɔne.”​—Hiob 34:12.

NEA NKURƆFOƆ KA

Ebinom ka sɛ nea ɛbɛsi biara fi Onyankopɔn. Enti wɔn adwene yɛ wɔn sɛ Onyankopɔn na ɔma yɛhu amane. Sɛ atoyerɛnkyɛm bi si a, ɛyɛ wɔn sɛ Onyankopɔn na ɔretwe abɔnefoɔ aso.

NEA BIBLE KA

Bible ka no pefee sɛ ɛnyɛ Onyankopɔn na ɔma yɛhu amane. Wo deɛ hwɛ nea Bible ka. Ɛse sɔhwɛ to obi a, ɛnsɛ sɛ ɔka sɛ: “Onyankopɔn na ɔresɔ me ahwɛ.” Adɛn ntia? Efisɛ obiara ntumi “mfa nnebɔne nsɔ Onyankopɔn nhwɛ, na ɔno nso nsɔ obiara nhwɛ.” (Yakobo 1:13) Nea Bible repɛ akyerɛ ara ne sɛ ɛnyɛ Onyankopɔn na ɔma yɛhu amane anaa ɔma yɛkɔ sɔhwɛ mu. Ɔrentumi nyɛ saa da! Onyankopɔn yɛ saa a, ɛnneɛ na ɔyɛ ɔtirimuɔdenfoɔ, nanso yɛnim sɛ “Onyankopɔn deɛ, ɔnyɛ bɔne.”​—Hiob 34:12.

Sɛ ɛnyɛ Onyankopɔn na ɔma yɛhu amane a, ɛnneɛ hwan na ɔma yɛhu amane anaa ɛdeɛn na ɛde amanehunu ba? Awerɛhosɛm ne sɛ mpɛn pii no, yɛn yɔnko nnipa ma yɛhu amane. (Ɔsɛnkafoɔ 8:9) Bio nso ‘asiane to yɛn nyinaa berɛ a yɛnhwɛ kwan.’ Asiane ho yɛ toro, enti ɛtɔ da a akwanhyia to yɛn berɛ a yɛn ani nna. (Ɔsɛnkafoɔ 9:11) Bible ma yɛhu nokwasɛm bi nso. Ɛka sɛ “wiase yi sodifoɔ” ne Satan Bonsam, na ɔno ne amanehunu bebrebe yi nyinaa farebae. Ɛnsɛ sɛ wei yɛ yɛn nwanwa, efisɛ “wiase nyinaa da ɔbɔnefoɔ no tumi mu.” (Yohane 12:31; 1 Yohane 5:19) Wei kyerɛ sɛ Satan Ɔbonsam na ɔma nkurɔfoɔ hu amane na ɛnyɛ Onyankopɔn.

“Berɛ a wɔn ho hiahiaa wɔn no, ne ho hiahiaa no.”​—Yesaia 63:9.

NEA NKURƆFOƆ KA

Ebinom susu sɛ sɔhwɛ a yɛrefa mu nyinaa, Onyankopɔn nim nanso wayi n’ani. Nhwɛsoɔ bi nie: Owura bi twerɛɛ sɛ, “Onyankopɔn nni ahummɔborɔ na yɛn amanehunu mfa ne ho.” Owura no toaa so sɛ, sɛ Onyankopɔn wɔ hɔ a, ɛnneɛ ɛbɛyɛ sɛ “tema paa deɛ, ɔnni bi.”

NEA BIBLE KA

Bible ma yɛhu sɛ Onyankopɔn wɔ ahummɔborɔ ankasa, na ɛrenkyɛ biara ɔbɛma amanehunu nyinaa to atwa. Wo deɛ ma yɛnhwɛ awerɛkyekyesɛm mmiɛnsa bi a ɛwɔ Bible mu.

Nea yɛrefa mu nyinaa Onyankopɔn nim. Ɛfi berɛ a adasamma amanehunu fii aseɛ bɛsi nnɛ, nnipa aniwam nisuo baako mpo ntɔɔ fam a Yehowa * nhu, efisɛ “n’ani tua biribiara.” (Dwom 11:4; 56:8) Yɛwɔ wei ho nhwɛsoɔ wɔ Bible mu. Berɛ a atamfoɔ hyɛɛ Onyankopɔn nkurɔfoɔ so wɔ Egypt no, ɔkaa sɛ: “Mahunu me nkurɔfoɔ a wɔwɔ Egypt no amanehunu.” Ɛnneɛ, n’ani ara kɛkɛ na ɔde huiɛ? Dabi, efisɛ ɔkaa sɛ: “Menim wɔn brɛ nyinaa.” (Exodus 3:7) Saa asɛm yi akyekye nnipa pii werɛ. Wɔabɛhu sɛ Onyankopɔn nim wɔn amanehunu nyinaa; nea wɔrefa mu a nkurɔfoɔ nhu mpo no, Onyankopɔn nim na ɔte aseɛ.​—Dwom 31:7; Mmebusɛm 14:10.

Sɛ yɛhu amane a, ɛka Onyankopɔn. Yehowa Nyankopɔn mfa n’ani nhu yɛn amanehunu kɛkɛ na mmom ɛka no paa. Berɛ a sɔhwɛ too Onyankopɔn asomfoɔ tete no, ɛyɛɛ no ya. Bible ka sɛ: “Berɛ a wɔn ho hiahiaa wɔn no, ne ho hiahiaa no.” (Yesaia 63:9) Ɛwom, Onyankopɔn sõ sen nnipa koraa, nanso yɛhu amane a, ɛka no; wobɛka sɛ ɔno mmom na ɔrehu amane! Anokwa, “Yehowa wɔ ayamhyehyeɛ ne mmɔborɔhunu.” (Yakobo 5:11) Afei nso Yehowa boa yɛn ma yɛtumi gyina yɛn amanehunu ano.​—Filipifoɔ 4:12, 13.

Onyankopɔn bɛma amanehunu nyinaa to atwa. Bible se Onyankopɔn bɛma obi biara amanehunu to atwa. Yehowa bɛma n’Ahennie a ɛwɔ soro no abɛsesa nneɛma wɔ asase so na adasamma asetena ayɛ kama. Bible ka sɛ Onyankopɔn bɛpepa nnipa “aniwam nisuo nyinaa, na owuo nni hɔ bio, na awerɛhoɔ ne esũ ne yea nso nni hɔ bio. Kane nneɛma no atwam.” (Adiyisɛm 21:4) Ɛnneɛ wɔn a wɔawuwu no nso ɛ? Onyankopɔn bɛnyane wɔn aba nkwa mu bio ma wɔabɛtena asase so, asase a amanehunu biara nni so. (Yohane 5:28, 29) Aninyanneɛ a yɛrefa mu no nso ɛ? Yɛbɛkae ma ahyɛ yɛn awerɛhoɔ anaa? Dabi, efisɛ Yehowa ahyɛ bɔ sɛ: “Wɔrenkae kane nneɛma no bio, na ɛremma akomam bio.”​—Yesaia 65:17. *