NNIPA YƐ SORONKO WƆ AKWAN PII SO​—YƐKYERƐW, YƐDRƆ, YETUMI DE YƐN ADWENE YƐ BIRIBI, NA YESUSUW NSƐMMISA A ƐHO HIA PA ARA WƆ ASETENAM NO HO: Adɛn nti na wiase anaa amansan yi wɔ hɔ? Ɛyɛɛ dɛn na yɛbaa wiase? Dɛn ne asetena atirimpɔw? Dɛn na ebesi daakye?

Ebinom mpɛ sɛ wobebisa nsɛm a ɛtete saa, efisɛ wosusuw sɛ ɛyɛ den sɛ yebenya ho mmuae. Afoforo ka sɛ mfaso biara nni saa nsɛmmisa no so, efisɛ nkwa nam adannandi (evolution) a ntease biara nnim so na ɛbae. William Provine yɛ abakɔsɛm ne abɔde a nkwa wom ho ɔbenfo. Ɔkaa sɛ: “anyame biara nni hɔ, na yenni botae biara wɔ asetenam.” Ɔsan de kaa ho sɛ: “Obi titiriw biara nni hɔ a ɛsɛ sɛ ɔkyerɛ nea ɛyɛ papa ne bɔne, na yenni atirimpɔw titiriw biara wɔ asetenam.”

Nanso ebinom bu saa nsusuwii yi sɛ, ɛkyerɛ sɛ onipa ntumi nyɛ n’asetena ho hwee, enti wonnye ntom. Wohu sɛ nneɛma a ɛwɔ amansan yi mu no, wɔahyehyɛ no pɛpɛɛpɛ, na ɛde mmara pɔtee bi a nyansa wom na ɛyɛ adwuma. Sɛ wɔhwɛ sɛnea abɔde yɛ adwuma no a, ɛyɛ wɔn nwonwa, na ɛyɛ a nnipa hwɛ saa abɔde yi so yɛ nneɛma bi a ɛne no sɛ. Afei nea wohu wɔ wɔn asetenam da biara da no kyerɛ wɔn sɛ, ɛnyɛ tumi bi kɛkɛ na ɛkeka bɔɔ mu bɛyɛɛ nneɛma a ɛyɛ nwonwa na ɛyɛ adwuma saa no, na mmom Ɔbɔadeɛ bi a onim nyansa na ɔyɛe.

Saa nkyerɛkyerɛmu yi aka ebinom a wogye adannandi nkyerɛkyerɛ di no ma wɔasan asusuw nea wogye di no ho. Hwɛ nhwɛso mmienu a edidi so yi.

AMEMENE HO ƆBENFO ALEXEI MARNOV. Ɔkaa sɛ: “Sukuu ahorow a mekɔe no kyerɛkyerɛe sɛ Onyankopɔn biara nni hɔ, na nneɛma nam adannandi so na ɛbae. Obiara a na ogye di sɛ Onyankopɔn wɔ hɔ no, na wobu no sɛ onnim hwee.” Nanso wɔ afe 1990 no, saa adwene a na ɔwɔ no fii ase sesae.

Ɔkyerɛkyerɛɛ mu sɛ: “Efi teteete nyinaa, mebɔ mmɔden sɛ mɛfeefee nneɛma mu ahu nea enti a ɛyɛ adwuma wɔ ɔkwan bi so. Ebi ne nnipa amemene. Wɔka sɛ nneɛma a yɛahu wɔ amansan yi mu nyinaa no, saa akwaa a ɛyɛ nwonwa yi ne ade baako a ɛho nneɛma dɔɔso paa; ɛyɛ nokware nso. Nanso nea enti a wɔyɛɛ amemene no ara ne sɛ yɛmfa nsua ade na yennya nimdeɛ, na ewie a na awu anaa? Wei de antɔ m’asom, efisɛ na ntease biara nnim. Enti mifii ase dwinnwen ho sɛ: ‘Adɛn nti na yɛwɔ wiase? Dɛn ne asetena atirimpɔw?’ Bere a midwinnwen ho kɔɔ akyiri no, mekaa sɛ ɛbɛyɛ sɛ Ɔbɔadeɛ bi wɔ hɔ.”

Esiane sɛ na Alexei pɛ sɛ ohu asetena atirimpɔw nti, ɔhwehwɛɛ Bible no mu. Akyiri yi, ne yere nso suaa Bible no sɛnea ɛbɛyɛ a obetumi akyerɛ ne kunu sɛ wadi mfomso. Ná ɔbea no yɛ oduruyɛfo, na na ɔno nso nnye nni sɛ Onyankopɔn wɔ hɔ. Nanso seesei de, wɔn baanu nyinaa gye di sɛ Onyankopɔn wɔ hɔ, na sɛnea Kyerɛwnsɛm no akyerɛ nea enti a Onyankopɔn bɔɔ nnipa no, wɔte ase.

NYANSAHU MU ƆBENFO HUABI YIN. Ɔbea bi a yɛfrɛ no Huabi Yin suaa abɔde a aniwa hu ho ade, na ɔde mfe bebree yɛɛ owia a yɛn ani tua yi ho nhwehwɛmu.

Huabi ka sɛ: “Bere biara a yɛn a yɛyɛ nyansahufo besua biribi afa abɔde ho no, yehu sɛ abɔde no yɛ adwuma pɛpɛɛpɛ na nhyehyɛe da ho, efisɛ edi mmara pɔtee bi so. Midwinnwen ho sɛ, ‘Saa mmara no fi he? Ogya a yɛde noa aduan mpo, gye sɛ yɛhwɛ so yiye na ama yɛatumi de ayɛ ade. Ɛnde, owia ɛ? Hena na ɔhyehyɛɛ mmara maa no sɛnea ɛbɛyɛ a ebetumi ayɛ adwuma yiye?’ Bere bi akyi no, mibehui sɛ mmuae a ɛtɔ asom pa ara ne Bible mu asɛm a edi kan no: ‘Mfiase no Onyankopɔn bɔɔ ɔsoro ne asase.’”—Genesis 1:1.

Ɛyɛ nokware, sɛnea nneɛma bi yɛ adwuma no, sɛ yebisa ho asɛm a, nyansahufo tumi ma yɛn mmuae. Ebi ne: Sɛn na amemene no yɛ adwuma? Ɔkwan bɛn na owia no fa so ma ɔhyew ne hann? Nanso Alexei ne Huabi behui sɛ, Bible ma yenya nsɛmmisa a ɛho hia pa ara no ho mmuae. Ɛno yɛ nsɛmmisa a ɛma yehu nea enti a nneɛma bi wɔ hɔ. Ebi ne: Adɛn nti na amansan no wɔ hɔ? Adɛn nti na mmara bi kyerɛ no kwan? Adɛn nti na yɛwɔ wiase?

Bible ka asase no ho asɛm sɛ: ‘Onyankopɔn ammɔ no hunu na mmom ɔnwenee sɛ wɔntena so.’ (Yesaia 45:18) Anokwa, Onyankopɔn wɔ atirimpɔw bi ma asase no, na sɛnea yebehu wɔ asɛm a edi hɔ no, saa atirimpɔw no fa anidaso a yɛwɔ ma daakye no ho.