Ɔwɛnfo No a Yɛne No Bɛsom
Ɔwɛnfo No a Yɛne No Bɛsom
“O [Yehowa, “NW”], migyina awɛnee ha ara adesae, na migyina m’ahwɛe ara anadwo nyinaa.”—YESAIA 21:8.
1. Bɔhyɛ akɛse bɛn na Yehowa ankasa yɛ ho dansefo?
YEHOWA yɛ Atirimpɔw Wura. Ɔbɔfo tuatewfo a ɔbɛyɛɛ Satan Bonsam no ntumi nyɛ biribiara mfa nsɛe N’atirimpɔw titiriw a ɛne sɛ ɔbɛtew N’ankasa din ho na wahyehyɛ Ahenni nniso a anuonyam wom ma adi asase so paradise so no. (Mateo 6:9, 10) Wɔ saa nniso no ase no, wobehyira adesamma ankasa. Onyankopɔn ‘bɛmene owu akosi daa, na Yehowa bɛpopa ani nyinaa so nusu, na wayi ne man ahohora afi asase nyinaa so akɔ.’ Adesamma a wɔayɛ biako a wɔwɔ anigye benya asomdwoe na wɔadi yiye daa. (Yesaia 25:8; 65:17-25) Yehowa ankasa na ɔyɛ saa bɔhyɛ akɛse yi ho dansefo!
2. Adansefo a wɔyɛ nnipa bɛn na Yehowa ama wɔasɔre?
2 Nanso, Ɔbɔadeɛ Kɛse no wɔ adansefo a wɔyɛ nnipa nso. Ansa na Kristofo mmere reba no, “adansefo mununkum,” fi Abel so, tuu boasetɔ ho mmirika, a mpɛn pii no na wɔyɛ saa wɔ amanehunu pii mu. Wɔn nhwɛso pa no hyɛ nokware Kristofo nkuran nnɛ. Kristo Yesu yɛ ɔdansefo kokodurufo ho nhwɛso a ɛkyɛn so. (Hebrifo 11:1–12:2) Sɛ nhwɛso no, susuw adanse a etwa to a odii wɔ Pontio Pilato anim no ho hwɛ. Yesu kae sɛ: “Eyi nti na wɔwoo me, na mebaa wi yi ase, sɛ merebedi nokware no ho adanse.” (Yohane 18:37) Efi afe 33 Y.B. besi afe 2000 Y.B. yi mu no, Kristofo a wɔyɛ nsi adi Yesu nhwɛso akyi, na wɔakɔ so adi adanse akokoduru so aka “Onyankopɔn ade kɛse” ho asɛm.—Asomafo no Nnwuma 2:11.
Babilonfo Mpaapaemu
3. Ɔkwan bɛn so na Satan asɔre atia Yehowa ne n’apɛde ho adanse a wɔadi no?
3 Mfe mpempem pii mu no, Ɔtamfo Kɛse, Satan Bonsam, afa akwammɔne so sɛ ɔbɛsɛe adanse a Onyankopɔn adansefo no di no. Sɛ́ “atoro agya” no, saa “ɔtweaseɛ kɛse . . . , ɔwɔ dedaw” yi ‘redaadaa asase sofo nyinaa.’ N’ani abere denneennen reko tia wɔn a “wodi Onyankopɔn ahyɛde so,” titiriw wɔ nna a edi akyiri yi mu.—Yohane 8:44; Adiyisɛm 12:9, 17.
4. Ɛyɛɛ dɛn na Babilon Kɛse no bae?
4 Bɛyɛ mfirihyia 4,000 a atwam ni, wɔ Noa Nsuyiri no akyi no, Satan maa Nimrod, “ɔbɔmmɔfo a ɔko tia Yehowa” sɔree. (Genesis 10:9, 10, NW) Nimrod kurow kɛse, Babilon (Babel), bɛyɛɛ adaemone som asoɛe. Bere a Yehowa yɛɛ Babel abantofo no kasa basabasa no, nkurɔfo no bɔ hwetee asase ani nyinaa, na wɔde wɔn atoro som no kɔe. Enti Babilon bɛyɛɛ beae a wiase nyinaa atoro som ahemman, a wɔfrɛ no Babilon Kɛse wɔ Adiyisɛm nhoma no mu no fi bae. Saa nhoma no hyɛ tete nyamesom ahyehyɛde yi sɛe ho nkɔm.—Adiyisɛm 17:5; 18:21.
Adansefo Man
5. Ɔman bɛn na Yehowa hyehyɛe ma wɔbɛyɛɛ n’adansefo, nanso dɛn nti na ɔmaa wɔkɔɔ nnommum mu?
5 Nimrod bere no akyi bɛyɛ mfirihyia 500 no, Yehowa hyehyɛɛ ɔnokwafo Abraham asefo yɛɛ wɔn ɔman Israel, ma wɔbɛyɛɛ N’adansefo wɔ asase so. (Yesaia 43:10, 12) Saa ɔman no mufo pii som Yehowa nokware mu. Nanso, bere a mfehaha pii twaam no, amanaman a na wɔatwa wɔn ho ahyia no sɛee Israel, na Yehowa nkurɔfo a ɔne wɔn yɛɛ apam no dan fii n’akyi kɔsom atoro anyame. Enti, wɔ afe 607 A.Y.B. mu no, Babilon asraafo, a Ɔhene Nebukadnesar di wɔn anim sɛee Yerusalem ne n’asɔrefie, na wɔfaa Yudafo dodow no ara nnommum kɔɔ Babilon.
6. Asɛmpa bɛn na Yehowa nkɔmhyɛ kwan so wɛnfo no de too gua, na bere bɛn na ɛbaa mu?
6 Nkonim bɛn ara na atoro som dii sɛɛ yi! Nanso, Babilon nniso no ankyɛ. Aka bɛyɛ mfirihyia 200 ma asɛm no asi no, Yehowa hyɛe sɛ: “Kɔ, fa ɔwɛnfo kogyina hɔ, nea obehu no, ɔnka.” Amanneɛbɔ bɛn na na saa wɛnfo yi de bɛto gua? “Ahwe ase oo! Babel ahwe ase! Na n’anyame ahoni nyinaa, wɔabubu agu fam.” (Yesaia 21:6, 9) Enti ɛbae sɛ, wɔ afe 539 A.Y.B. mu no, nkɔm a wɔhyɛe no baa mu. Babilon a ɛyɛ den no hwee ase, na ankyɛ na Onyankopɔn nkurɔfo a ɔne wɔn ayɛ apam no tumi baa wɔn asase so bio.
7. (a) Dɛn na Yudafo no sua fii Yehowa nteɛso mu? (b) Mfiri bɛn na Yudafo a wɔsan fii nnommum mu bae no tɔɔ mu, na dɛn na efii mu bae?
7 Ná Yudafo a wɔresan aba no ahu no yiye sɛ ɛsɛ sɛ wogyae abosonsom ne ahonhonsom. Nanso, mfe bi akyi no, wɔtɔɔ mfiri foforo mu. Helafo nyansapɛ yii ebinom. Afoforo sii nnipa atetesɛm so dua sen Onyankopɔn Asɛm. Ɔmampɛ nso daadaa afoforo. (Marko 7:13; Asomafo no Nnwuma 5:37) Eduu bere a wɔwoo Yesu no, na ɔman no asan adan afi nokware som ho. Bere a Yudafo bi tiee asɛmpa a Yesu kae no, ɔman mũ no nyinaa poo no, na Onyankopɔn nso poo wɔn. (Yohane 1:9-12; Asomafo no Nnwuma 2:36) Ná Israel nyɛ Onyankopɔn adansefo bio, na afe 70 Y.B. mu no, wɔsɛee Yerusalem ne n’asɔrefie bio, saa bere yi de, ɛdenam Roma asraafo so.—Mateo 21:43.
8. Hena na ɔbɛyɛɛ Yehowa dansefo, na dɛn nti na kɔkɔ a Paulo bɔɔ ɔdansefo yi yɛ nea ɛbaa ne bere mu?
8 Saa bere yi na wɔawo Kristofo “Nyankopɔn Israel” no, na na wɔsom sɛ Onyankopɔn dansefo ma amanaman no. (Galatifo 6:16) Ntɛm ara na Satan bɔɔ ne tirim sɛ ɔbɛsɛe honhom fam man foforo yi. Ebeduu afeha a edi kan no awiei no, na wotumi hu mpaapaemu wɔ asafo ahorow no mu. (Adiyisɛm 2:6, 14, 20) Paulo kɔkɔbɔ no baa ne bere mu: “Monhwɛ yiye na obi amfa nyansapɛ ne nnaadaa hunu a ɛnam nnipa atetesɛm ne wiase mfitiasesɛm so na ɛnnam Kristo so ammɛfa mo nnommum.”—Kolosefo 2:8.
9. Sɛnea na Paulo abɔ kɔkɔ no, dɛn na ɛde Kristoman bae?
9 Awiei koraa no, Helafo nyansapɛ, Babilonfo nyamesom mu adwene, ne akyiri yi nnipa “nyansa” te sɛ, adannandi nkyerɛkyerɛ ne ɔkasatia ho adwene a wɔde hwehwɛ Bible mu, sɛee nnipa pii a wɔkyerɛe sɛ wɔyɛ Kristofo no, som. Na ɛte sɛ nea Paulo aka asie no: “Minim sɛ mekɔ akyi no, mpataku bɔne bɛhyɛn mo mu a wɔrenkyɛe nguankuw no so. Nso mo ankasa mu nnipa bɛsɔre a wɔbɛka nkontomposɛm de atwe asuafo no adi wɔn akyi.” (Asomafo no Nnwuma 20:29, 30) Saa ɔwae yi so na Kristoman nam bae.
10. Tebea horow bɛn na ɛma ɛdaa di sɛ ɛnyɛ obiara na na ɔde ne ho ahyɛ Kristoman mu ɔsom porɔwee mu?
10 Ná ɛsɛ sɛ wɔn a wɔresom nokware som ankasa no “pere gyidi a wɔde ama ahotefo prɛko no ho.” (Yuda 3) So na nokware som ne Yehowa ho adanse a wodi no befi asase so koraa? Dabi. Bere a aka kakra ma wɔasɛe otuatewfo Satan ne ne nnwuma no, ɛbɛdaa adi sɛ ɛnyɛ obiara na ɔde ne ho ahyɛ awaefo som mu wɔ Kristoman mu. Wɔ afeha a ɛto so 19 no awiei, wɔ Pittsburgh, Pennsylvania, U.S.A. no, wɔhyehyɛɛ Bible asuafo anokwafo kuw bi, na ɛno na ɛbɛyɛɛ nnɛyi Nyankopɔn adansefo kuw no. Kristofo yi twee adwene sii Kyerɛwnsɛm mu adanse so sɛ, mprempren wiase nhyehyɛe no awiei abɛn. Sɛnea Bible nkɔmhyɛ daa no adi no, wiase yi “awiei” fii ase afe 1914 mu, na wiase nyinaa ko a edi kan a esii no na ɛhyɛɛ no agyirae. (Mateo 24:3, 7) Adanse a emu yɛ den wɔ hɔ a ɛkyerɛ sɛ efi saa afe no na wɔtoo Satan ne n’adaemone dɔm fii soro gui. Afeha a ɛto so 20 a ɔhaw ahyɛ no ma no ama yɛahu Satan nnwuma ne ɔsoro Ahenni tumi mu a Yesu di hene no ho adanse pefee.—Mateo, ti 24 ne 25; Marko, ti 13; Luka, ti 21; Adiyisɛm 12:10, 12.
11. Dɛn na Satan bɔɔ mmɔden sɛ ɔbɛyɛ, nanso ɛyɛɛ dɛn na ne mmɔdenbɔ no anyɛ yiye?
11 Wɔ June 1918 mu no, Satan yeree ne ho denneennen sɛ ɔbɛtɔre saa Bible asuafo a saa bere no na wɔreka asɛm wɔ aman pii mu no ase. Ɔpɛe nso sɛ ɔsɛe wɔn mmara kwan so ahyehyɛde, Watch Tower Bible and Tract Society, no. Wotwaa atoro too Asafo ti no mpanyimfo a na asɛyɛde hyehyɛ wɔn nsa no so sɛ wotutu ɔman ase, de wɔn koguu afiase, sɛnea na wɔayɛ Yesu wɔ afeha a edi kan mu pɛpɛɛpɛ no. (Luka 23:2) Nanso wɔ afe 1919 mu no, woyii saa mpanyimfo yi ma wotumi kɔtoaa wɔn som adwuma so. Akyiri yi wogyaee wɔn koraa.
“Ɔwɛnfo” a Ogyina Awɛnee
12. Henanom na wɔyɛ Yehowa awɛnfo kuw, anaa “ɔwɛnfo” no nnɛ, na su bɛn na wɔanya?
12 Enti bere a “awiei bere no” fii ase no, Yehowa san de ɔwɛnfo bi gyinaa hɔ ma ɔkaa N’atirimpɔw ahorow a ɛrenya mmamu no ho asɛm kyerɛɛ nkurɔfo. (Daniel 12:4; 2 Timoteo 3:1) Ɛde besi nnɛ no, ɔwɛnfo kuw no—Kristofo a wɔasra wɔn, Nyankopɔn Israel no—ayɛ ade ma ɛne nkɔmhyɛ kwan so ɔwɛnfo a Yesaia kaa ne ho asɛm no ahyia sɛ: “Ɔwɛn n’aso wɛn pa ara. Na ɔteɛɛm sɛ gyata sɛ: O [Yehowa, NW], migyina awɛnee ha ara adesae, na migyina m’ahwɛe ara anadwo nyinaa.” (Yesaia 21:7, 8) Oyi yɛ ɔwɛnfo a ɔyɛ n’adwuma anibere so!
13. (a) Asɛm bɛn na Yehowa wɛnfo no aka? (b) Ɔkwan bɛn so na yebetumi aka sɛ Babilon Kɛse no ahwe ase?
13 Dɛn na ɔwɛnfo yi hui? Yehowa wɛnfo, n’adansefo kuw no bɔ amanneɛ bio sɛ: “Ahwe ase oo! Babel ahwe ase! Na n’anyame ahoni nyinaa, wɔabubu agu fam.” (Yesaia 21:9) Saa bere yi, wɔ Wiase Ko I akyi no, ɛyɛ Babilon Kɛse, wiase nyinaa atoro som ahemman no na wotuu no fii ne tumidi so. (Yeremia 50:1-3; Adiyisɛm 14:8) Ɛnyɛ nwonwa! Ɔko Kɛse no, sɛnea na wɔfrɛ no saa bere no, fii ase wɔ Kristoman mu, baabi a asɔfo a na wɔwɔ afanu no nyinaa nam nsɛm a wɔkeka kyerɛɛ wɔn mmerante a wɔn ho yɛ den so ma wɔde wɔn ho hyɛɛ ɔko no mu, na ɛnam so maa emu yɛɛ den no. Animguasesɛm bɛn ara ni! Wɔ afe 1919 mu no, Babilon Kɛse no antumi ansiw Bible Asuafo, sɛnea na wɔfrɛ Yehowa Adansefo saa bere no, kwan wɔ fi a na wobefi tebea a na wɔwom a na wontumi nyɛ hwee no mu akɔyɛ wiase nyinaa adansedi adwuma a wogu so besi nnɛ no ho kwan. (Mateo 24:14) Ɛno yɛɛ Babilon Kɛse no asehwe ho sɛnkyerɛnne, sɛnea gyae a wogyaee Israel wɔ afeha a ɛto so asia A.Y.B. mu no yɛɛ tete Babilon asehwe ho sɛnkyerɛnne no.
14. Nsɛmma nhoma bɛn na Yehowa wɛnfo kuw no de adi dwuma titiriw, na ɔkwan bɛn so na Yehowa ahyira dwuma a wɔde adi no so?
14 Ɔwɛnfo kuw no de nsiyɛ ne ɔpɛ a wɔwɔ sɛ wɔbɛyɛ nea ɛteɛ no na ayɛ wɔn adwuma no bere nyinaa. Wɔ July 1879 mu no, Bible Asuafo no fii ase tintim nsɛmma nhoma yi a saa bere no na wɔfrɛ no Zion’s Watch Tower and Herald of Christ’s Presence no. Efi afe 1879 besi December 15, 1938 no, na asɛm “‘Ɔwɛnfo, Anadwo mu Dasu Bɛn Ni?’—Yesaia 21:11,” * wɔ nea ɛba biara anim. Ɔwɛn-Aban no akɔ so de nokwaredi abɔ wiase nsɛm a ɛresisi ne sɛnea ɛfa nkɔmhyɛ ho no ho dawuru mfirihyia 120 ni. (2 Timoteo 3:1-5, 13) Onyankopɔn wɛnfo kuw no ne wɔn ahokafo “nguan foforo” no, de nsɛmma nhoma yi adi dwuma denneennen de aka asɛm akyerɛ adesamma sɛ Kristo Ahenni a ɛbɛsan Yehowa tumidi ho no, abɛn. (Yohane 10:16) So Yehowa ahyira saa ɔdansefo yi? Wiɛ, efi nea edii kan bae a na ɛyɛ 6,000 wɔ afe 1879 mu so no, Ɔwɛn-Aban no anya nkɔanim abɛyɛ nea ebi kɔ wiase nyinaa a emu biara a ɛba boro 22,000,000 wɔ kasa horow 132 mu—na wotintim emu 121 wɔ bere koro mu. Hwɛ sɛnea ɛfata sɛ nyamesom nsɛmma nhoma a wɔkyekyɛ sen biara wɔ wiase no bɛyɛ nea ɛma nokware Nyankopɔn, Yehowa, din so!
Wɔtew Wɔn Ho Nkakrankakra
15. Ahotew a wɔyɛɛ no nkakrankakra bɛn na efii ase mpo ansa na afe 1914 reba?
15 Bɛyɛ mfirihyia 40 ansa na Kristo soro nniso no refi ase wɔ afe 1914 mu no, na Bible Asuafo no ade wɔn ho afi Kristoman nkyerɛkyerɛ a ennyina Bible so no pii te sɛ nkokoaa asubɔ, onipa kra a enwu da, ahodwiragya, hellgya mu ayayade, ne Baasakoro Nyame ho. Nanso egyee bere pii ansa na wɔretumi atwe wɔn ho afi adwene a ɛnteɛ nyinaa ho. Sɛ nhwɛso no, wɔ 1920 mfe mu no, na Bible Asuafo pii bɔ akoroteaa a ne ti yɛ mmeamudua ne ahemmotiri ahyɛnsode, na wodii Buronya ne abosonsomfo dapɔnna foforo. Nanso, sɛ ɔsom bi bɛyɛ nea ɛho tew a, ɛsɛ sɛ woyi abosonsom ho nneɛma nyinaa fi mu. Onyankopɔn Asɛm, Kyerɛw Kronkron Bible no, nkutoo so na ɛsɛ sɛ Kristoni de ne gyidi ne n’asetra gyina. (Yesaia 8:19, 20; Romafo 15:4) Ɛyɛ bɔne sɛ wɔde biribi bɛka Onyankopɔn Asɛm ho anaasɛ wobeyi biribi afi mu.—Deuteronomium 4:2; Adiyisɛm 22:18, 19.
16, 17. (a) Adwene a ɛnteɛ bɛn na ɔwɛnfo kuw no kuraa mu mfe pii? (b) Dɛn ne “afɔremuka” ne “ɔbodum” a ɛwɔ “Misraim” no ho nkyerɛkyerɛmu a ɛfata?
16 Nhwɛso biako bɛkyerɛ sɛnea na saa nnyinasosɛm yi ho hia. Wɔ 1886 mu bere a C. T. Russell tintim nhoma a wɔbɛfrɛɛ no The Divine Plan of the Ages no, na nsɛm bi a wɔahyehyɛ wɔ saa nhoma yi mu no de adesamma mfirihyia nna bata Misrifo Ɔbodan Kɛse no ho. Na wosusuw sɛ Farao Khufu nkaedum yi yɛ ɔbodum a wɔaka ho asɛm wɔ Yesaia 19:19, 20 no: “Ɛda no na wɔde afɔremuka besi Misraim asase mfinimfini ama [Yehowa, NW], na ɔbodum besi ne hye ho ama [Yehowa, NW], na ayɛ sɛnkyerɛnne ne adanse ama asafo [Yehowa, NW], Misraim asase so.” Abusuabɔ bɛn na ɔbodan no betumi ne Bible anya? Wiɛ, sɛ nhwɛso no, sɛnea na wɔte ase saa bere no, na wosusuw sɛ Ɔbodan Kɛse no afã bi tenten kyerɛ bere a “ahohiahia kɛse” a wɔaka ho asɛm wɔ Mateo 24:21 no befi ase. Ebegyee Bible Asuafo bi adwene araa ma wosusuw ɔbodan no afã bi de hwɛɛ nneɛma bi te sɛ bere a na wɔde bɛkɔ soro!
17 Wɔkyerɛɛ obu kɛse maa nea wɔfrɛɛ no Bible Ɔbodan yi mfe pii, kosii sɛ November 15 ne December 1, 1928, Ɔwɛn-Aban no bɛmaa emu daa hɔ sɛ Yehowa nhia ɔbo nkaedum bi a Faraonom a wɔyɛ abosonsomfo sii a nsoromma mu hwɛ nsɛnkyerɛnne a ɛyɛ adaemonesɛm wom, na ɔde asi adanse a wɔde ama wɔ Bible mu so dua. Mmom no, wohui sɛ Yesaia nkɔmhyɛ no mmamu bɛyɛ honhom fam de. Sɛnea ɛte wɔ Adiyisɛm 11:8 no, “Misraim” yɛ Satan wiase no ho sɛnkyerɛnne. ‘Afɔremuka ma Yehowa’ no kae yɛn afɔrebɔ a ɛsɔ ani a Kristofo a wɔasra wɔn no bɔ bere a wɔwɔ wɔn ahɔhobea wɔ wiase yi mu no. (Romafo 12:1; Hebrifo 13:15, 16) Ɔbodum a ‘esi Misraim hye so’ no twe adwene si Kristofo a wɔasra wɔn no asafo a egyina hɔ sɛ adanse wɔ “Misraim,” wiase a wɔrebefi mu no mu no so.—1 Timoteo 3:15.
18. (a) Ɔkwan bɛn so na Yehowa akɔ so ama nneɛma mu ada hɔ ama Bible asuafo anokwafo? (b) Sɛ ɛyɛ den ma Kristoni bi sɛ ɔbɛte Kyerɛwnsɛm mu nkyerɛkyerɛmu bi ase a, su a nyansa wom bɛn na ɛsɛ sɛ onya?
18 Bere nyinaa Yehowa kɔ so ma yɛn nokware no ho nkyerɛkyerɛmu foforo, a ne nkɔmhyɛ asɛm no ho ntease a emu da hɔ ka ho. (Mmebusɛm 4:18) Mfe kakra a abɛsen no, wɔahyɛ yɛn nkuran sɛ yɛmfa ntease a emu dɔ nsusuw—nneɛma bi te sɛ awo ntoatoaso a ɛrentwam ansa na awiei no aba, nguanten ne mpapo ho bɛ, akyide no ne bere a ɛbɛsɔre agyina kronkronbea hɔ, apam foforo, ahosakra no, ne Hesekiel nhoma no mu anisoadehu no—ho bio. Ɛtɔ mmere bi a ebetumi ayɛ den sɛ yɛbɛte nkyerɛkyerɛmu foforo a ɛtete saa no ase, nanso ntease a ɛwom no mu bɛda hɔ wɔ bere a ɛsɛ mu. Sɛ Kristoni bi nte kyerɛwsɛm bi ho nkyerɛkyerɛmu foforo a wɔde ma ase a, ɛyɛ papa sɛ obefi ahobrɛase mu aka odiyifo Mika nsɛm yi bi: “Mɛtwɛn me nkwagye Nyankopɔn no.”—Mika 7:7.
19. Ɔkwan bɛn so na nkaefo a wɔasra wɔn no ne wɔn ahokafo a wɔyɛ nguan foforo no ada akokoduru a ɛte sɛ gyata de adi wɔ nna a edi akyiri yi mu?
19 Kae sɛ ɔwɛnfo no ‘teɛɛm te sɛ gyata sɛ: O Yehowa, migyina awɛnee ha ara adesae, na migyina m’ahwɛe ara anadwo nyinaa.’ (Yesaia 21:8) Nkaefo a wɔasra wɔn no ada akokoduru te sɛ gyata de adi apa atoro som ho ntama akyerɛ nkurɔfo kwan kɔ ahofadi mu. (Adiyisɛm 18:2-5) Sɛ́ “akoa nokwafo ne ɔbadwemma” no, wɔayɛ Bible nsɛmma nhoma, ne nhoma foforo kɔ kasa pii mu—‘aduan a wɔde ma wɔ bere a ɛsɛ mu.’ (Mateo 24:45) Wɔadi anim aboaboa ‘nnipakuw kɛse a wofi aman ne mmusuakuw ne nkurɔfo ne ɔkasa nyinaa mu’ no ano. Wɔde Yesu agyede mogya no atew eyinom nso ho, na wɔda wɔn ho adi sɛ wɔwɔ gyata koma wɔ ‘ɔsom kronn’ a wɔde ma Onyankopɔn “awia ne anadwo” no mu. (Adiyisɛm 7:9, 14, 15) Aba bɛn na Yehowa Adansefo a wɔasra wɔn no kuw ketewaa a aka no ne wɔn ahokafo, nnipakuw kɛse no sow afe a etwaam no? Asɛm a edi hɔ no bɛkyerɛ.
[Ase hɔ asɛm]
^ nky. 14 Efi January 1, 1939 no, wɔsesaa eyi yɛɛ no ‘Wobehu sɛ mene Yehowa—Hesekiel 35:15.’
So Wokae?
• Adansefo bɛn na Yehowa ama wɔasɔre wɔ mfe a abɛsen no nyinaa mu?
• Dɛn na ɛde Babilon Kɛse bae?
• Dɛn nti na Yehowa maa kwan ma wɔsɛee Yerusalem, n’adansefo man no ahenkurow no wɔ afe 607 A.Y.B. ne afe 70 Y.B. mu?
• Su bɛn na Yehowa wɛnfo kuw no ne wɔn ahokafo no ada no adi?
[Adesua no ho Nsɛmmisa]
[Mfonini wɔ kratafa 7]
‘O Yehowa, migyina awɛnee ha daa nyinaa’
[Mfonini ahorow wɔ kratafa 10]
Yehowa wɛnfo kuw no ntoto wɔn adwuma ase