Cyril Lucaris—Ɔbarima a na Ɔwɔ Obu Ma Bible No

Na ɛyɛ afe 1638 ahohuru bere mu. Apofofo a na wɔwɔ Marmara Po a ɛbɛn Constantinople (nnɛyi Istanbul), Ottoman ahemman no ahenkurow so no bɔɔ birim bere a wohui sɛ efunu bi tɛn nsu no ani no. Bere a wɔbɛn ho kɔhwɛe no, wɔn ho dwiriw wɔn sɛ onipa a na wɔatim ne mene akum no no yɛ Constantinople asɔre nkabom no agya, Ortodɔks Asɔre no panyin. Eyi ne Cyril Lucaris, afeha a ɛto so 17 no mu asɔre panyin a wagye din no awiei a na ɛyɛ awerɛhow.

LUCARIS antra ase ankyɛ anhu ne botae no—Kristofo Hela Kyerɛwnsɛm no nkyerɛase a ɛwɔ Hela kasa a wɔka a wobeyi no adi no—mmamu. Lucaris annu botae foforo bi nso a ɔde sii n’anim ho—sɛ́ ɔbɛma Ortodɔks Asɔre no asan de “nsɛm a asete nyɛ den aka asɛmpa no.” Na hena ne saa barima yi? Akwanside ahorow bɛn na ohyiae wɔ saa mmɔden a ɔbɔe yi mu?

Nhoma a Wonnim Ma Ne Ho Dwiriw No

Wɔwoo Cyril Lucaris wɔ afe 1572 mu, wɔ Candia, faako a na Venicefo abɛtra hɔ (mprempren Iráklion), Crete. Esiane sɛ na ɔwɔ ɔdom akyɛde ahorow nti osuaa nhoma wɔ Venice ne Padua a ɛwɔ Italy no, na afei otutuu akwan kɔɔ ɔman no afã pii ne aman foforo so. Ntawntawdi a na ɛrekɔ so wɔ asɔre no mu akuw horow ntam no maa odii yaw, na ɔsesɛw akuw a na wɔatetew wɔ Europa no nso twetwee n’adwene, na ebetumi aba sɛ ɔkɔɔ Geneva a saa bere no na ɛwɔ Calvinsom nkɛntɛnso ase no.

Bere a Lucaris kɔɔ Poland nsrahwɛ no, ohui sɛ Ortodɔks a ɛwɔ hɔ no asɔfo ne asɔremma no nyinaa wɔ honhom fam tebea a ɛyɛ awerɛhow mu esiane nhoma a na wonnim nti. Bere a ɔsan kɔɔ Alexandria ne Constantinople no, ɛyɛɛ no nwonwa sɛ ohui sɛ wɔatutu asɛnka agua—baabi a na wogyina kenkan Kyerɛwnsɛm no—afi asɔredan ahorow bi mu!

Wɔ afe 1602 mu no, Lucaris kɔɔ Alexandria, baabi a okodii ne busuani bi, Agyapanyin Meletios, ade sɛ sɔfopanyin. Afei ofii ase ne Europa nyamekyerɛfo a wɔpɛ nsakrae no dii nkrataa-kyerɛw. Wɔ saa nkrataa no biako mu no, ɔkae sɛ Ortodɔks Asɔre no akora nneyɛe a ɛnteɛ pii so. Wɔ nkrataa foforo mu no, osii hia a ehia sɛ asɔre no de “nsɛm a asete nyɛ den a wɔde ka asɛmpa no”  besi gyidihunu ananmu, na wɔde Kyerɛwnsɛm no nkutoo adi dwuma no so dua.

Ɛyɛɛ Lucaris nwonwa nso sɛ na wobu Asɔre Agyanom honhom fam mmara sɛ ɛne Yesu ne asomafo no nsɛm yɛ pɛpɛɛpɛ. Ɔkyerɛwee sɛ: “Mintumi ntra hɔ nhwɛ mma nnipa nka sɛ nnipa atetesɛm ne Kyerɛwnsɛm no mu nsɛm yɛ pɛ.” (Mateo 15:6) Ɔde kaa ho sɛ, sɛnea n’adwene kyerɛ no no, ahonisom yɛ ade bɔne. Ɔkae sɛ, “ahotefo” a wɔbɔ wɔn mpae no yɛ animtiaa a wobu Ntamgyinafo Yesu.—1 Timoteo 2:5.

Wɔtɔn Asɔre Agyanom Agua No

Saa nsusuwii no, ne Lucaris ho a ɔtwe fii Roma Katolek Asɔre no ho no maa Jesuitfo ne Otordɔks Asɔre no mufo a na wɔn ani gye ho sɛ wɔne Katolekfo bɛka abom no de ɔtan ne ɔtaa baa no so. Saa ɔsɔretia no nyinaa akyi no, wɔ afe 1620 mu no, wɔpaw Lucaris sɛ Constantinople agyapanyin. Saa bere no na Ortodɔks Asɔre no mpanyinni ho nsɛm hyɛ Ottoman Ahemman no tumidi ase. Na Ottoman nniso no ntwentwɛn wɔn nan ase koraa sɛ wobegye sika atu asɔre agya bi afi agua so de foforo asi so.

Lucaris atamfo, Jesuitfo no ne Congregatio de Propaganda Fide (Asɔre no Gyidi Ho Dawurubɔ) titiriw, na wɔkɔɔ so dii ne ho nseku bɔɔ ne ho pɔw bɔne. Kyrillos Loukaris nhoma no ka sɛ: “Wɔ eyi yɛ mu no, Jesuitfo no faa akwan horow so—nnaadaa, anototo, adɛfɛdɛfɛ ne nea ɛsen ne nyinaa no, adanmude, a ɛno ne akode a ɛyɛ den a wɔde nya [Ottoman] mpanyimfo no anim dom.” Ne saa nti, wɔ afe 1622 mu no, wotwaa Lucaris asu kɔɔ supɔw Rhodes so, na Gregory a ofi Amasya tɔɔ agua no dwetɛbona 20,000. Nanso, Gregory antumi antua sika a ɔhyɛɛ ho bɔ no, enti Anthimus a ofi Adrianople tɔɔ agua no, nanso ɔsɔre fii so akyiri yi. Anwonwasɛm ne sɛ, wɔsan de Lucaris sii asɔre agyanom agua no so.

Lucaris sii ne bo sɛ ɔde hokwan foforo yi betintim Bible ne nyamesɛm nkratawa de akyerɛ Ortodɔks asɔfo ne asɔremma no ade. Nea ɛbɛyɛ na watumi ayɛ eyi no, ɔyɛɛ nhyehyɛe sɛ Engiresi aban nanmusifo nhwɛ mma wɔmfa nhoma tintim afiri mmra Constantinople. Nanso, bere a afiri no bedui wɔ June 1627 mu no, Lucaris atamfo kae sɛ ɔde rebedi amammuisɛm ho dwuma, na awiei koraa no, wotumi ma wɔsɛee no. Afei na ɛsɛ sɛ Lucaris de nhoma tintim mfiri a ɛwɔ Geneva na edi dwuma.

Kristofo Kyerɛwnsɛm no Nkyerɛase Bi

Obu kɛse a na Lucaris wɔ ma Bible ne sɛnea etumi tete nkurɔfo no ma onyaa ɔpɛ a emu yɛ den sɛ ɔbɛma mpapahwekwa ahu mu nsɛm no. Ohui sɛ ɛnyɛ nnipa nyinaa na wɔte kasa a na wɔde di dwuma wɔ mfitiase Hela Bible nkyerɛwee mu no ase. Enti nhoma a edi kan a Lucaris ma wɔyɛɛ ho adwuma ne Kristofo Hela Kyerɛwnsɛm no a wɔkyerɛɛ ase kɔɔ ne bere so Hela kasa mu no. Maximus Callipolites, ɔkokorani nhomanimfo bi, fii ase yɛɛ ho adwuma wɔ March 1629 mu. Kyerɛwnsɛm no nkyerɛase no hyɛɛ Ortodɔksfo pii abufuw, ɛmfa ho sɛ sɛ wɔankyerɛ ase a anka akenkanfo ntumi nkan nte ase no. Nea ɛbɛyɛ na Lucaris adwudwo wɔn bo no, ɔmaa wɔkyerɛw mfitiase nkyerɛwee no ne nkyerɛase foforo no wɔ fã ne fã, na wɔde nsɛm kakra kaa ho de kyerɛkyerɛɛ mu. Esiane sɛ Callipolites wiee nsaano nkyerɛwee no ankyɛ na owui nti, Lucaris ankasa na ɔhwɛɛ mu. Wotintim saa nkyerɛase no wɔ Lucaris wu akyi bere tiaa bi wɔ afe 1638 mu.

Ahwɛyiye a Lucaris yɛe nyinaa akyi no, asɔfo mpanyin pii ani annye saa nkyerɛase no ho. Sɛnea na Lucaris ani gye Onyankopɔn Asɛm ho no daa adi kɛse wɔ saa Bible nkyerɛase no nnianim asɛm no mu. Ɔkyerɛwee sɛ, Kyerɛwnsɛm no a wɔakyerɛ ase kɔ kasa a nkurɔfo ka mu no yɛ “nsɛmɔdɛ a wofi soro de ama yɛn.” Otuu nkurɔfo fo sɛ “wonhu [Bible] mu nsɛm yiye,” na ɔkae sɛ, ɔkwan foforo biara nni hɔ a wɔbɛfa so asua ‘nneɛma a ɛfa gyidi ho yiye, gye sɛ wɔnam Onyankopɔn ne Asɛmpa kronkron no so.’—Filipifo 1:9, 10.

Lucaris kasa tiaa wɔn a wɔbaraa Bible sua ne wɔn a wɔpoo mfitiase nkyerɛwee no a wɔkyerɛɛ ase no denneennen sɛ: “Sɛ yɛka anaa yɛkenkan biribi a yɛnte ase a, ɛte sɛ nea yɛreka nsɛm gu mframa mu.” (Fa toto 1 Korintofo 14:7-9 ho.) Bere a ɔde nnianim asɛm no reba awiei no, ɔkyerɛwee sɛ: “Bere a mo nyinaa rekenkan  Onyankopɔn Asɛmpa kronkron yi wɔ mo ankasa mo kasa mu no, munnya mfaso a ɛfata wɔ n’akenkan mu, . . . na Onyankopɔn mma mo kwan mu nyɛ hann mma ensi mo yiye.”—Mmebusɛm 4:18.

Cofession of Faith Bi

Bere a Lucaris ma wofii Bible nkyerɛase no ase no, ofi akokoduru mu yɛɛ biribi foforo. Wɔ afe 1629 mu no, otintim Confession of Faith no wɔ Geneva. Na ɛyɛ n’ankasa gyidi ahorow a na ɔhwɛ kwan sɛ Ortodɔks Asɔre no begye atom. Sɛnea The Orthodox Church nhoma no kyerɛ no, saa Confession no “ma Ortodɔks nkyerɛkyerɛ a ɛfa asɔfodi ne ahyɛde kronkron ho nyinaa yɛ nea ntease nnim, na etia nidi a wɔde ma ahoni ne ahotefo a wɔbɔ wɔn mpae no nyinaa sɛ ɛyɛ abosonsom.”

Nsɛmpɔw 18 na ɛwɔ Confession no mu. Asɛm a ɛto so abien wɔ mu no ka sɛ Kyerɛw no fi Onyankopɔn home mu na ɛwɔ tumi sen nea asɔre no ka. Ɛka sɛ: “Yegye di sɛ Onyankopɔn na ɔde Kyerɛw Kronkron no maa yɛn . . . Yegye di sɛ Kyerɛw Kronkron no wɔ tumi sen nea Asɔre no ka. Honhom Kronkron no nkyerɛkyerɛ ye sen onipa nkyerɛkyerɛ koraa.”—2 Timoteo 3:16.

Nsɛmpɔw a ɛto so awotwe ne edu no kyerɛ sɛ Yesu Kristo nkutoo ne Ntamgyinafo, Sɔfopanyin, ne asafo no Ti. Lucaris kyerɛwee sɛ: “Yegye di sɛ yɛn Awurade Yesu Kristo te N’agya nsa nifa, na ɛhɔ na Ofi di ma yɛn, ɔno nkutoo na ɔyɛ mmara kwan so sɔfopanyin nokwafo ne ntamgyinafo a ɔfata.”—Mateo 23:10.

Ɔka wɔ ɔsɛmpɔw a ɛto so 12 no mu sɛ, asɔre no betumi afom, afa atosɛm sɛ nokwasɛm, nanso honhom kronkron no betumi afa asomfo anokwafo dwumadi so agye no. Wɔ ɔsɛmpɔw a ɛto so 18 mu no, Lucaris kyerɛ sɛ ahodwiragya yɛ nsusuwii hunu ara kwa: “Ɛda adi sɛ ɛnsɛ sɛ yegye ayɛsɛm a ɛne Ahodwiragya no tom.”

 Nsɛmmisa ne mmuae pii wɔ Confession no nkekaho mu. Ɛhɔ no, Lucaris si so dua sɛ ɛsɛ sɛ gyidini biara kenkan Kyerɛwnsɛm no, na sɛ Kristoni bi ankenkan Onyankopɔn Asɛm no a opira ne ho. Afei ɔde ka ho sɛ ɛsɛ sɛ wɔkwati Apokrifa nhoma ahorow no.—Adiyisɛm 22:18, 19.

Asɛm a ɛto so abiɛsa no bisa sɛ: “Ɔkwan bɛn so na ɛsɛ sɛ yesusuw ahoni ho?” Lucaris bua sɛ: “Onyankopɔn ne Kyerɛw Kronkron no ka kyerɛ yɛn pefee sɛ, ‘Nyɛ ohoni bi anaa ade a ɛwɔ wim wɔ ɔsoro anaa nea ɛwɔ asase so wɔ fam anaa nea ɛwɔ nsu mu wɔ asase ase nsɛso biara mfa; nkotow wɔn, na nsom wɔn; [Exodus 20:4, 5],’ na esiane sɛ ɛnsɛ sɛ yɛsom abɔde, na mmom Ɔbɔadeɛ no a ɔyɛ ɔsoro ne asase Yɛfo no nkutoo nti, Ɔno nkutoo na ɛsɛ sɛ yedi no ni. . . . Esiane sɛ wɔabara [ahonisom] . . . wɔ Kyerɛw Kronkron no mu nti, yɛpo, na yɛn werɛ mfi sɛ, sɛ́ anka yɛbɛsom Ɔbɔadeɛ ne Ɔyɛfo no, yɛkɔsom kɔla, ne mfonini, ne abɔde ahorow.”—Asomafo no Nnwuma 17:29.

Ɛwom sɛ Lucaris antumi anhu mfomso ahorow a na ɛwɔ hɔ saa honhom fam sum mmere a na ɔte mu no nyinaa de, * nanso ɔbɔɔ mmɔden yiye sɛ ɔbɛma asɔre no nkyerɛkyerɛ agyina Bible so, na wɔde mu nsɛm akyerɛkyerɛ nkurɔfo no.

Bere a woyii saa Confession yi adi pɛ na Lucaris ɔsɔretia foforo fii ase. Wɔ afe 1633 mu no, Cyril Contari a ofi kuropɔn Beroea (mprempren Aleppo) mu, a na ɔyɛ Lucaris tamfo a na Jesuitfo taa n’akyi no bɔɔ mmɔden sɛ ɔne Ottomanfo no bedi asɔre agyanom agua no ano, atɔ. Nanso, atirisopam no dii huammɔ bere a Contari antumi antua sika no. Lucaris kɔɔ so di n’ade. Afe a edi hɔ no, Athanasius a ofi Tesalonika tuaa dwetɛbona 60,000 tɔɔ agua no. Wotuu Lucaris bio. Nanso, ɔsram biako akyi no, wɔsan frɛɛ no de no sii agua so. Saa bere no na Cyril Contari nsa aka ne dwetɛbona 50,000 no. Saa bere yi de, wotwaa Lucaris asu kɔɔ Rhodes. Asram asia akyi no, ne nnamfo tumi kɔfaa no bae.

Nanso, wɔ afe 1638 mu no, Jesuitfo ne wɔn Ortodɔksfo a wɔne wɔn ayɛ biako no bɔɔ Lucaris sobo sɛ otutu Ottoman Ahemman no ase. Saa bere yi de, ɔhene no kae sɛ wonkum no. Wɔkyeree Lucaris, na July 27, 1638 no, wɔde no traa ahyɛmma ketewa bi mu te sɛ nea wɔrekotwa no asu no. Bere a ahyɛmma no duu po no so pɛ na wotim ne mene kum no. Wosiee no beae bi a ɛbɛn mpoano, na akyiri yi wokotuu ne funu tow kyenee ɛpo mu. Apofofo bi kohuu no, na akyiri yi ne nnamfo siee no.

Asuade Ma Yɛn

Nhomanimfo bi ka sɛ: “Ɛnsɛ sɛ yɛn werɛ fi sɛ na [Lucaris] botae atitiriw no biako ne sɛ ɔbɛma n’asɔfo ne ne nguankuw no anya nimdeɛ pii, ade a na akɔ fam koraa wɔ afeha a ɛto so dunsia ne dunson no mfiase no.” Akwanside pii amma Lucaris annu ne botae ho. Wotuu no fii asɔre agyanom agua no so mpɛn anum. Ne wu akyi mfirihyia aduasa anan no, asɔre bagua a ɛwɔ Yerusalem no kae sɛ ne gyidi ahorow no yɛ atuatew. Wɔkae sɛ Kyerɛwnsɛm no, “ɛnyɛ obiara na ɛsɛ sɛ ɔkenkan, na mmom wɔn a wɔhwehwɛ honhom fam nneɛma a emu dɔ na wɔayɛ nhwehwɛmu a ɛfata no”—kyerɛ sɛ, gye asɔfo a wonim nhoma no nkutoo.

Asɔre mpanyimfo no kaa mmɔden a wɔbɔe sɛ wɔbɛma wɔn nguankuw no nsa aka Onyankopɔn Asɛm no hyɛe bio. Wɔbɔɔ obiara a ɔdaa mfomso a ɛwɔ wɔn gyidi ahorow a ennyina Bible so adi no ano atirimɔden so. Wɔdaa wɔn ho adi sɛ wɔka nyamesom mu ahofadi ne nokware ho atamfo a wonye koraa no ho. Awerɛhosɛm ne sɛ, eyi yɛ su a ɛnam akwan horow so atra hɔ abedu yɛn bere yi so. Ɛkae yɛn aniberesɛm a ɛyɛ bere a asɔfo di anim sɔre tia adwene ne kasa mu ahofadi denneennen no.

[Ase hɔ asɛm]

[Nsɛm a wɔafa aka wɔ kratafa 29]

Lucaris bɔɔ mmɔden yiye sɛ ɔbɛma asɔre no nkyerɛkyerɛ agyina Bible no so na wɔde mu nsɛm akyerɛkyerɛ nkurɔfo no

[Adaka/Mfonini wɔ kratafa 28]

Lucaris ne Alexandrinus Nsaano Nkyerɛwee No

Nneɛma a ɛsom bo kɛse wɔ Britain Nhomakorabea no mu biako ne Alexandrinus Nsaano Nkyerɛwee no, a ɛyɛ afeha a ɛto so anum Y.B. Bible nsaano nkyerɛwee. Wɔakora ne mfitiase nkratafa a na ɛbɛyɛ 820 no mu 773 so.

Bere a na Lucaris yɛ asɔre agya wɔ Alexandria, Egypt no, ɔboaboaa nhoma pii ano. Bere a ɔbɛyɛɛ asɔre agya wɔ Constantinople no, ɔde Alexandrinus Nsaano Nkyerɛwee no kɔe. Ɔde maa Britain aban nanmusifo a na ɔwɔ Turkey no sɛ akyɛde ma Engiresini Ɔhene James I wɔ 1624. Wɔde maa nea obedii n’ade, Charles I, mfirihyia abiɛsa akyi.

Wɔ afe 1757 mu no, wɔde Ɔhene no Adehye Nhomakorabea no maa Britain man no, na mprempren wɔde saa nsaano nkyerɛwee a emu yɛ anigye yi rekyerɛ wɔ John Ritblat Abrannaa so wɔ Britain Nhomakorabea.

[Nsɛm Fibea]

Gewerbehalle, Vol. 10

From The Codex Alexandrinus in Reduced Photographic Facsimile, 1909

[Mfonini Fibea wɔ kratafa 26]

Bib. Publ. Univ. de Genève