Tumi a Mpaebɔ Wɔ

Owia rekɔtɔ wɔ kuropɔn Nahor a ɛwɔ Mediterranea Supɔw so no. Siriani barima bi a ne din de Eliasar de yoma du abedu abura bi a ɛwɔ kuropɔn no kurotia ho. Ɛwom sɛ na wabrɛ na na sukɔm de no de, nanso nea na ehia Eliasar titiriw ne afoforo ahiade. Na ofi amannɔne asase so aba rebɛhwehwɛ ɔyere ama ne wura babarima. Afei nso na ɛsɛ sɛ onya saa ɔyere yi fi ne wura abusuafo mu. Ɔkwan bɛn so na na obetumi ayɛ saa adwumaden yi?

NÁ ELIASAR gye tumi a ɛwɔ mpaebɔ mu no di. Te sɛ abofra no, ofi ahobrɛase mu de gyidi srɛe sɛ: “[Yehowa, NW], me wura Abraham Nyankopɔn, mesrɛ wo, ma emmehyia me nnɛ, na yɛ me wura adɔe. Hwɛ, migyina asubura yi so ha yi, na kurom hɔfo mmabea befi abɛsaw nsu, na ma ɛmmra sɛ ababaa a mese no sɛ: Soɛ wo kuruwa ma mennom nsu no bi, na ɔbɛka sɛ: Nom, na mɛma wo yoma no anom bi no, ma ɔno ara nyɛ nea woayi no ama w’akoa Isak, na ɛno mu na mehu sɛ woayɛ me wura adɔe.”—Genesis 24:12-14.

Ahotoso a na Eliasar wɔ wɔ nea mpaebɔ tumi yɛ mu no anyɛ kwa. Hwɛ, ababaa a odii kan baa asubura no ho no yɛ Abraham nuabarima nana! Ne din de Rebeka, na na ɔyɛ ɔhokwafo, n’abrabɔ ho tew, na ne ho yɛ fɛ. Ɛda adi sɛ, ɛnyɛ sɛ ɔmaa Eliasar nsu no bi nomee nko na mmom ofi ayamye mu maa ne yoma a na sukɔm de wɔn no nso nsu nomee. Akyiri yi, bere a abusua no asusuw ho awie no, Rebeka fii ne pɛ mu ne Eliasar kɔɔ akyirikyiri asase bi so kɔyɛɛ Abraham ba Isak yere. Hwɛ sɛnea ɛyɛ anigye sɛ Eliasar nsa kaa ne mpaebɔ no ho mmuae maa ɛyɛɛ fɛ wɔ tete bere a ɛtɔ mmere bi a na Onyankopɔn de ne ho gye nsɛm mu anwonwakwan so no mu!

Yebetumi asua pii afi Eliasar mpaebɔ no mu. Ɛda ne gyidi a ɛda nsow, ahobrɛase, ne sɛnea afoforo ahiade ho hia no adi. Mpae a Eliasar bɔe no daa ahobrɛase a na ɔwɔ ma sɛnea Yehowa ne adesamma di no adi. Akyinnye biara nni ho sɛ na onim abusuabɔ a emu yɛ den a na ɛda Onyankopɔn ne Abraham ntam, ne afei Ne bɔhyɛ a ɛne sɛ ɛnam Abraham so na wobehyira asase so mmusua nyinaa no. (Genesis 12:3) Enti, Eliasar de nsɛm yi na efii ne mpaebɔ no ase sɛ: “[Yehowa, NW], me wura Abraham Nyankopɔn.”

Yesu Kristo ne Abraham aseni a wɔnam ne so behyira adesamma asoɔmmerɛfo nyinaa. (Genesis 22:18) Sɛ yɛpɛ sɛ Onyankopɔn tie yɛn mpaebɔ nnɛ a, ɛsɛ sɛ yɛbrɛ yɛn ho ase hyɛ ɔkwan a ɔnam ne Ba no so ne adesamma di no ase. Yesu Kristo kae sɛ: “Sɛ motra me mu na me nsɛm tra mo mu a, mobɛsrɛ biribiara a mopɛ, na ɛbɛyɛ ama mo.”—Yohane 15:7.

 Kristo kyidini a ohuu sɛnea Yesu asɛm yi yɛ nokware ne ɔsomafo Paulo. Ne gyidi a na ɔwɔ wɔ nea mpaebɔ tumi yɛ mu no anyɛ kwa. Ɔhyɛɛ ne mfɛfo Kristofo nkuran sɛ wɔmfa wɔn dadwen ne wɔn haw nyinaa nto Onyankopɔn so wɔ mpaebɔ mu na ɔkae sɛ: “Mitumi ade nyinaa yɛ, nea ɔhyɛ me den no mu.” (Filipifo 4:6, 7, 13) So eyi kyerɛ sɛ mpae ahorow a Paulo bɔe nyinaa na Onyankopɔn penee so? Ma yɛnhwɛ.

Ɛnyɛ Nea Yɛsrɛ Nyinaa na Yɛn Nsa Ka

Wɔ ne som adwuma a na pɛsɛminkominya nnim mu no, Paulo huu amane wɔ nea ɔkyerɛkyerɛɛ mu sɛ “ɔhonam mu nsɔe” no mu. (2 Korintofo 12:7) Ná eyi betumi ayɛ nkate ne adwenem ahometew a “anuanom atorofo” ne asɔretiafo de baa ne so no. (2 Korintofo 11:26; Galatifo 2:4) Anaasɛ ebia ebetumi ayɛ honam mu ahoyeraw a efi n’ani yare a ɔko a na ɛnko no mu. (Galatifo 4:15) Sɛnea ɛte biara no, saa “honam mu nsɔe” no miaa Paulo. Ɔkyerɛwee sɛ: ‘Mesrɛɛ Awurade mprɛnsa sɛ emfi me so.’ Nanso wɔanni Paulo adesrɛ no ho dwuma amma no. Wɔkyerɛkyerɛɛ mu kyerɛɛ Paulo sɛ honhom mu nhyira a wanya afi Onyankopɔn hɔ dedaw, te sɛ tumi a wɔde gyina ɔtaa ano no ara dɔɔso. Afei nso Onyankopɔn kae sɛ: “Me tumi wie pɛyɛ wɔ mmerɛwyɛ mu.”—2 Korintofo 12:8, 9.

Dɛn na yesua fi Eliasar ne Paulo nhwɛso horow no mu? Nokwarem no, Yehowa Nyankopɔn tie wɔn a wofi ahobrɛase mu hwehwɛ sɛ wɔbɛsom no no mpaebɔ. Nanso eyi nkyerɛ sɛ ɔyɛ wɔn abisade ma wɔn bere nyinaa, efisɛ Onyankopɔn hwɛ nneɛma kɔ akyiri. Ɔno na onim nea eye ma yɛn. Nea ehia sen biara no, bere nyinaa ɔyɛ nea ɛne n’atirimpɔw hyia sɛnea wɔayɛ ho kyerɛwtohɔ wɔ Bible no mu no.

Honhom Mu Ayaresa Bere

Onyankopɔn ahyɛ bɔ sɛ ɔbɛsa adesamma nyarewa nyinaa wɔ honam, adwene, ne nkate fam wɔ Mfe Apem Ahenni a ne Ba no bedi so wɔ asase so no mu. (Adiyisɛm 20:1-3; 21:3-5) Kristofo komapafo de ahopere retwɛn saa daakye bɔhyɛ yi, a wɔwɔ gyidi koraa wɔ Onyankopɔn mu sɛ ɛbɛbam ampa. Bere a wɔnhwɛ saa anwonwakwan so ayaresa kwan seesei no, wɔbɔ Onyankopɔn mpae sɛ ɔmma wɔn awerɛkyekye na ɔnhyɛ wɔn den na wɔatumi agyina sɔhwɛ mu. (Dwom 55:22) Sɛ wɔyare a, wobetumi abɔ mpae asrɛ Onyankopɔn sɛ ɔmma wɔn akwankyerɛ a wobetumi de adi wɔn yare no ho dwuma sɛnea wɔn sikasɛm te.

Nyamesomfo binom twe adwene si anwonwakwan so ayaresa a Yesu ne asomafo no yɛe so, na wɔhyɛ ayarefo nkuran sɛ wɔmmɔ mpae ma wɔnsa wɔn yare seesei. Nanso atirimpɔw titiriw bi nti na wɔyɛɛ saa anwonwade no. Ɛkyerɛe sɛ Yesu Kristo ne nokware Mesia no, na Onyankopɔn dom afi Yudafo man no so kɔ Kristofo asafo a na ɛnkyɛe no so. Saa bere no, na anwonwakwan so ayaresa ho hia na Kristofo asafo a na wɔahyehyɛ no foforo no gyidi ayɛ den. Sɛnkyerɛnne kwan so no, bere a enyini sɔre gyinaa ne nan so bɛyɛɛ ɔpanyin no, anwonwakwan so akyɛde no ‘to twae.’—1 Korintofo 13:8, 11.

Saa bere titiriw yi mu no, Yehowa Nyankopɔn rekyerɛ n’asomfo kwan wɔ honhom fam ayaresa adwuma a ɛsen biara mu. Bere a bere wɔ hɔ ma wɔn no, ɛsɛ sɛ nkurɔfo de ahopere gye saa asɛm yi so: “Monhwehwɛ [Yehowa, NW], bere a ɔma wohu no no, momfrɛ no bere a ɔbɛn no. Ma ɔbɔne nnyaw ne kwan na onipa huhuw mpa n’adwene, na ɔnsan mmra [Yehowa, NW] nkyɛn, na ne yam bɛhyehye no ama no, ne yɛn Nyankopɔn no nkyɛn, na ne firi a ɔde befiri dɔɔso.”—Yesaia 55:6, 7.

Wɔnam Onyankopɔn Ahenni ho asɛmpaka adwuma no so resa abɔnefo a wɔanu wɔn ho no yare wɔ honhom fam. (Mateo 24:14) Ɛdenam tumi a ɔde ama ne nkoa ma wɔde reyɛ saa nkwagye adwuma yi so no, Yehowa Nyankopɔn reboa nnipa ɔpepem pii a wofi aman nyinaa mu ma wɔasakra afi wɔn bɔne ho na wɔne no abenya abusuabɔ pa ansa na nneɛma nhyehyɛe bɔne yi aba n’awiei. Nokwarem no, wɔn a wofi koma pa mu bɔ mpae hwehwɛ honhom mu ayaresa yi ne wɔn a wɔbɔ mpae hwehwɛ mmoa sɛnea ɛbɛyɛ na wɔatumi ayɛ ayaresa adwuma yi bi no benya wɔn mpaebɔ no ho mmuae.

[Mfonini Fibea wɔ kratafa 3]

Eliasar ne Rebeka/The Doré Bible Illustrations/Dover Publications