Dɛn Na Wunim fa Abayisɛm ho?

ABAYISƐM! Dɛn na saa asɛm no ma wokae?

Wɔ nnipa pii fam no, ɛyɛ gyidihunu ne nsusuwii hunu a ɛho nhia sɛ wɔfa no aniberesɛm. Wɔn fam no, abayisɛm yɛ nsusuwii bi ara kwa—abayifo a wɔhyɛ ntade yuu fi wɔn ti kosi wɔn nan ase na wɔde ampan ntaban atuatua wɔn ntama hanahana mu, na wɔma nnipa dan mpɔtorɔ, na wɔtra prae so tu fa wim kɔ ayerɛ anadwo.

Afoforo fam no, abayisɛm nyɛ ade a wɔde di agoru. Nhwehwɛmufo binom kyerɛ sɛ bɛboro wiase nnipa mu fã na wogye di sɛ abayifo wɔ hɔ na wobetumi anya afoforo asetra so nkɛntɛnso. Nnipa pii gye di sɛ abayisɛm yɛ ade bɔne, ɛyɛ hu, na ɛsɛ sɛ wosuro. Sɛ nhwɛso no, Afrika nyamesom ho nhoma bi ka sɛ: “Dwuma a ntafowayi, abayigoru, ne abayisɛm di ne emu asiane ho gyidi agye ntini kɛse wɔ Afrikafo asetram . . . Nnipa a wɔmpɛ wɔn asɛm koraa wɔ wɔn man mu ne abayifo ne asumanfo. Ɛde besi nnɛ mpo, mmeae bi wɔ hɔ a, ɛtɔ mmere bi a, ebinom boro wɔn ma wowuwu.”

Nanso, wɔ Atɔe fam nsase so no, wɔabenya abayisɛm ho adwene foforo a obu wom. Wɔnam nhoma ahorow, television, ne sini ahorow so ama wonsuro abayifo te sɛ kan no. Anigyede ho nhwehwɛmufo David Davis ka sɛ: “Nea wubehu ara ne sɛ, abayifo adan mmerante ne mmabaa a wɔn ho yɛ fɛ ankasa. Ɛnkyɛ koraa na Hollywoodfo asuasua wɔn nneyɛe no. . . . Esiane sɛ wɔma abayifo ho yɛ fɛ na wɔn ho yɛ anika nti, nnipa pii a mmea ne mmofra nketewa ka ho bɛhwɛ wɔn.” Hollywoodfo nim sɛnea wobetumi adan tebea biara de apɛ sika.

Ebinom ka sɛ abayisɛm abɛyɛ ahonhonsɛmdi akuw a ɛrenya nkɔso ntɛmntɛm wɔ United States no mu biako. Wɔ aman a anya nkɔso nyinaa mu no, nnipa dodow no ara a mmea fekuw ahorow taa wɔn akyi ne nkurɔfo a wɔn ani nnye asɔre akɛse ho bio no hwehwɛ honhom fam mmoa denam abayisɛm ahorow a wɔde wɔn ho hyem so. Nokwasɛm ne sɛ, abayisɛm gu ahorow araa ma enti, nkurɔfo adwene nhyia mpo wɔ nea asɛmfua “bayi” kyerɛ no ho. Nanso, wɔn a wɔka sɛ wɔyɛ abayifo de wɔn ho bɔ Wicca—nea nsɛm asekyerɛ nhoma bi kyerɛ ase sɛ “abosonsom a efii ase ansa na Kristofo bere reba wɔ Europa atɔe fam, na afeha a ɛto so 20 yi mu no, wɔasan aka mu gya no.” * Ne saa nti, nnipa pii frɛ wɔn ho abosonsomfo anaa nnɛyi abosonsomfo.

 Efi teteete na wɔatan abayifo, ataa wɔn, ayɛ wɔn ayayade, na wɔakum wɔn mpo. Ɛnyɛ nwonwa sɛ wɔn a wɔde wɔn ho hyɛ abayisɛm mu nnansa yi no bɔ mmɔden sɛ wɔbɛma afoforo anya wɔn ho anigye. Wɔ nhwehwɛmu bi mu no, wobisabisaa abayifo pii nea wɔbɛpɛ paa sɛ wɔka kyerɛ ɔmanfo. Mmuae a wɔde mae a nhwehwɛmufo Margot Adler, bɔɔ no mua ne sɛ: “Yɛnyɛ abɔnefo. Yɛnsom Ɔbonsam. Yempira nkurɔfo na yɛnnaadaa wɔn. Yɛn ho nyɛ hu. Yɛyɛ nnipa te sɛ mo ara. Yɛwɔ mmusua, yɛyɛ adwuma, yɛwɔ anidaso ne botae ahorow. Yɛnyɛ sum ase kuw bi. Yɛnyɛ abusufo. Ɛnsɛ sɛ musuro yɛn. . . . Sɛnea mususuw no yɛnte saa koraa, yɛte sɛ mo ara.”

Nnipa pii na wɔakɔ so agye saa asɛm no atom. Nanso, so eyi kyerɛ sɛ enhia sɛ yɛma abayisɛm ho asɛm hia yɛn? Momma yensusuw saa asɛm no ho wɔ asɛm a edi hɔ no mu.

[Ase hɔ asɛm]