Nsɛmmisa a Efi Akenkanfo Hɔ

Mesia ho nkɔmhyɛ titiriw bi wɔ Yesaia ti 53. Nkyekyem 10 ka sɛ: “Ɛsɔɔ [Yehowa, NW] ani sɛ ɔdwerɛw no bɔɔ no yare.” Dɛn na eyi kyerɛ?

Ɛnyɛ den sɛ wubehu nea enti a asɛmmisa bi betumi asɔre wɔ Yesaia 53:10 ho no. Nokware Kristofo nnye nni sɛ yɛn Nyankopɔn a ɔwɔ mmɔborohunu ne tema no ani begye ho sɛ ɔbɛdwerɛw obi anaa ɔbɛma wayare. Bible ma yenya biribi a yebegyina so anya ahotoso sɛ Onyankopɔn ani nnye ho sɛ ɔbɛyɛ nnipa a wɔn ho nni asɛm ayayade. (Deuteronomium 32:4; Yeremia 7:30, 31) Ebia mfehaha pii a atwam no, esiane nneɛma bi a ɛne Yehowa nyansa ne ne dɔ hyia nti, ɔmaa amanehunu ho kwan bere bi. Nanso, ɛdaa adi pefee sɛ ɛnyɛ ɔno na ɔmaa ne Dɔba, Yesu, huu amane. Enti dɛn na saa asɛm yi rekyerɛ ankasa?

Sɛ yesusuw nkyekyem no nyinaa ho a, ebetumi aboa yɛn ma yɛahu nea ɛkyerɛ, bere a yɛhyɛ asɛm ‘ɛsɔ ani’ a epue mprenu no nsow no. Yesaia 53:10 kenkan sɛ: “Ɛsɔɔ [Yehowa, NW] ani sɛ ɔdwerɛw no bɔɔ no yare. Sɛ onya de ne kra to hɔ yɛ asodi afɔre a, obehu asefo, ne nna bɛware, na nea ɛsɔ [Yehowa, NW] ani afa ne nsa so ayɛ yiye.”

Bible mu nsɛm nyinaa kyerɛ sɛ ‘ɛsɔ Yehowa ani’ a wɔkae wɔ nkyekyem no awiei no si n’atirimpɔw ho dwuma a wɔnam Ahenni no so bedi no so dua. Eyi a Yehowa yɛ no bɛsan ne tumidi ho na abɔ kwan ma wɔayi bɔne a wɔde woo yɛn—yɛn bɔne—no afi hɔ ama adesamma asoɔmmerɛfo. (1 Beresosɛm 29:11; Dwom 83:18; Asomafo no Nnwuma 4:24; Hebrifo 2:14, 15; 1 Yohane 3:8) Nea edi eyinom nyinaa mu akoten ne sɛ na ɛsɛ sɛ Onyankopɔn Ba no bɛyɛ onipa na ɔbɔ agyede afɔre no. Sɛnea yenim no, ne yɛ mu no, Yesu huu amane ampa. Bible ka kyerɛ yɛn sɛ “osuaa amane a ohui no mu osetie.” Enti Yesu nyaa mfaso fii saa amanehunu no mu.—Hebrifo 5:7-9.

Yesu dii kan hui sɛ ɛyaw bi wɔ ɔkwampa a ɔrebɛfa so no mu. Ɛno da adi pefee wɔ ne nsɛm a wɔayɛ ho kyerɛwtohɔ wɔ Yohane 12:23, 24 no mu, baabi a yɛkenkan sɛ: “Dɔn no adu sɛ wɔbɛhyɛ onipa no anuonyam. Nokware, nokware, mise mo sɛ awifua antɔ fam anwu a, ɛwɔ hɔ koro no ara; na sɛ ewu a, ɛsow aba pii.” Yiw, na Yesu nim sɛ ɛsɛ sɛ okura ne mudi mu kodu owu amanehunu mpo mu. Kyerɛwtohɔ no toa so sɛ: “Afei me kra ho yeraw no; na ɛdɛn na menka? Agya, gye me fi dɔn yi mu! Nanso eyi nti na mebaa dɔn yi mu. Agya, hyɛ wo din anuonyam! Ɛnna ɛnne bi fi soro bae sɛ: Mahyɛ no anuonyam dedaw, na mɛhyɛ no bio!”—Yohane 12:27, 28; Mateo 26:38, 39.

Ɛyɛ saa kwan yi so na yebetumi ate Yesaia 53:10 ase. Na Yehowa nim yiye sɛ nea ne Ba no bɛfam no bɛma wɔadwerɛw no wɔ ɔkwan bi so. Nanso, bere a na Yehowa nim anigye ne adepa ankasa a ebefi mu aba no, ɔmaa nea na ɛbɛba Yesu so no sɔɔ n’ani. Saa kwan no so na Yehowa ‘ani sɔɔ ɔdwerɛw no,’ Mesia no dwerɛw no. Na Yesu nso ani sɔɔ nea na obetumi ayɛ na ɔyɛe no. Nokwarem no, sɛnea Yesaia 53:10 de ba awiei no, ‘nea ɛsɔ Yehowa ani faa ne nsa so yɛɛ yiye.’