Tɔ Wo Bo Ase Twɛn!
Tɔ Wo Bo Ase Twɛn!
“Mɛtwɛn me nkwagye Nyankopɔn no; me Nyankopɔn no betie me.”—MIKA 7:7.
1, 2. (a) Ɔkwan bɛn so na subammɔne piraa Israelfo no wɔ sare so? (b) Dɛn na ebetumi aba Kristoni a ɔnna suban pa adi so?
YƐNAM adwene a yekura so betumi abu asetram nneɛma pii sɛ eye anaa enye. Bere a na Israelfo no nam sare so no, wɔnam anwonwakwan so maa wɔn mana. Na anka ɛsɛ sɛ wɔhwɛ asasenini a wɔwɔ so no na wɔkyerɛ anisɔ kɛse ma Yehowa sɛ wama wɔanya wɔn ano aduan. Anka ɛno bɛkyerɛ suban pa. Mmom no, wɔkaee nnuan pii a na wodi wɔ Misraim no, nwiinwii sɛ mana nyɛ akɔnnɔ. Subammɔne bɛn ara ni!—Numeri 11:4-6.
2 Adwene a Kristoni bi kura nnɛ betumi ama nneɛma ayɛ n’ani so sɛ nea eye anaa enye. Sɛ Kristoni annya adwempa a, ɛnyɛ den koraa sɛ obetumi asɛe n’anigye, na ɛno bɛyɛ aniberesɛm efisɛ, sɛnea Nehemia kae no: “[Yehowa anigye, NW] ne [yɛn] ahoɔden.” (Nehemia 8:10) Suban pa a ɛyɛ anigye boa yɛn ma yɛyɛ den na ɛboa ma asomdwoe ne biakoyɛ ba asafo no mu.—Romafo 15:13; Filipifo 1:25.
3. Ɔkwan bɛn so na adwempa boaa Yeremia wɔ mmere a emu yɛ den mu?
3 Ɛmfa ho sɛ na Yeremia te mmere a emu yɛ den mu no, ɔdaa suban pa adi. Bere mpo a ohuu ahude a esisii wɔ Yerusalem sɛe mu wɔ afe 607 A.Y.B. mu no, otumi nyaa nneɛma ho adwempa. Ná Yehowa werɛ remfi Israel, na na ɔman no begyina. Yeremia kyerɛwee wɔ Kwadwom nhoma no mu sɛ: “Ɛyɛ [Yehowa, NW] adɔeyɛ nti na yenwiee ɔsa ɛ, na ne mmɔborohunu to ntwae ɛ: Ɛyɛ foforo daa anɔpa; wo nokwaredi dɔɔso.” (Kwadwom 3:22, 23) Wɔ abakɔsɛm nyinaa mu no, Onyankopɔn asomfo abɔ mmɔden sɛ wobekura adwempa anaa anigye mu wɔ tebea horow a emu yɛ den sen biara mpo mu.—2 Korintofo 7:4; 1 Tesalonikafo 1:6; Yakobo 1:2.
4. Suban bɛn na Yesu kuraa mu, na ɔkwan bɛn so na ɛboaa no?
4 Yeremia akyi mfirihyia ahansia no, esiane adwempa a na Yesu wɔ nti, wɔboaa no ma ɔtɔɔ ne bo ase. Yɛkenkan sɛ: ‘Yesu hwɛɛ anigye a na ɛda n’anim no tɔɔ ne bo ase huu asɛndua ho amane, na wammu aniwu, na wakɔtra Onyankopɔn ahengua nifa.’ (Hebrifo 12:2) Ɔsɔretia anaa ɔtaa biara a Yesu hyiae no—asɛndua ho amane mpo mu no—ɔde n’adwene sii “anigye a ɛda n’anim” no so. Na saa anigye no ne hokwan a wanya sɛ ɔbɛsan Yehowa tumidi ho na watew ne din ho na ɔnam so ama adesamma asoɔmmerɛfo anya nhyira pii daakye.
Fa Boasetɔ Twɛn
5. Tebea bɛn ankasa mu na boasetɔ a yɛde bɛtwɛn bɛboa yɛn ma yɛanya nneɛma ho adwempa?
5 Sɛ yenya Yesu adwene no bi, na sɛ nneɛma ankɔ so sɛnea yɛhwɛ kwan bere nyinaa mpo a, Yehowa mu anigye a yɛwɔ no renyera. Odiyifo Mika kae sɛ: “Me de, [Yehowa, NW] na mehwɛ no kwan, mɛtwɛn me nkwagye Nyankopɔn no; me Nyankopɔn no betie me.” (Mika 7:7; Kwadwom 3:21) Yɛn nso yebetumi atɔ yɛn bo ase atwɛn. Ɔkwan bɛn so? Wɔ akwan pii so. Ade biako ne sɛ, yebetumi asusuw sɛ onua bi a ɔyɛ ɔpanyin adi mfomso na ehia sɛ wɔteɛ ne so ntɛm ara. Sɛ yɛtɔ yɛn bo ase twɛn a, ɛbɛma yɛasusuw nsɛm ho sɛ, ‘So odii mfomso ankasa, anaa me na meredi mfomso? Sɛ odii mfomso a, ebia nea enti a Yehowa rema nneɛma akɔ so ne sɛ ɔte nka sɛ onii no bɛsesa ma enti nteɛso a emu yɛ den ho nhia?’
6. Ɔkwan bɛn so na boasetɔ a obi a ɔrebɔ mmɔden sɛ obedi n’ankasa haw bi so benya de atwɛn no bɛboa no?
6 Sɛ yɛn ankasa nsɛm tebea bi rehaw yɛn anaasɛ yɛrebɔ mmɔden sɛ yebedi mmerɛwyɛ bi so a, ebehia sɛ yɛde boasetɔ twɛn. Fa no sɛ yɛabisa Yehowa hɔ mmoa, nanso ɔhaw no da so wɔ hɔ. Yɛbɛyɛ no dɛn? Ɛsɛ sɛ yɛkɔ so yɛ nea yebetumi biara de di ɔhaw no ho dwuma na afei yenya Yesu nsɛm yi mu gyidi: “Monkɔ so mmisa, na wɔbɛma mo; monkɔ so nhwehwɛ, na mubehu; monkɔ so mpem, na wobehiɛ mo.” (Luka 11:9, NW) Kɔ so bɔ mpae, na twɛn Yehowa. Wɔ bere a ɛfata mu ne Yehowa ankasa kwan so no, obebua wo mpaebɔ no.—1 Tesalonikafo 5:17.
7. Ɔkwan bɛn so na boasetɔ a yɛde twɛn no bɛboa yɛn wɔ adwene a yebenya wɔ Bible mu ntease a wɔma emu da hɔ nkakrankakra no ho?
7 Sɛ Bible nkɔmhyɛ ahorow renya mmamu a, ɛma Kyerɛwnsɛm mu ntease a yɛwɔ no mu da hɔ. Nanso, ɛtɔ mmere bi a yebetumi anya adwene sɛ asɛm bi ho nkyerɛkyerɛmu akyɛ. Sɛ amma wɔ bere a yɛpɛ mu a, so yebenya boasetɔ atwɛn? Kae sɛ, Yehowa hui sɛ ɛfata sɛ oyi “Kristo ahintasɛm no” adi nkakrankakra wɔ bɛyɛ mfirihyia 4,000 mu. (Efesofo 3:3-6) Enti, afei, so yɛwɔ biribi a yebegyina so afa abufuw? So yɛn adwenem yɛ yɛn nãã wɔ “akoa nokwafo ne ɔbadwemma” no a wɔapaw no sɛ ɔmma Yehowa nkurɔfo ‘aduan ɛbere a ɛsɛ mu’ no ho? (Mateo 24:45) Dɛn nti na ɛsɛ sɛ yɛma anigye a yɛwɔ wɔ Onyankopɔn mu no yera esiane sɛ yɛnte nneɛma nyinaa ase pɛpɛɛpɛ nti? Kae sɛ, Yehowa na osi bere ne ɔkwan a ɔnam so yi ‘n’agyina adi kyerɛ’ no ho gyinae.—Amos 3:7.
8. Ɔkwan bɛn so na Yehowa abodwokyɛre so aba nnipa pii mfaso?
8 Ebinom abam betumi abu esiane sɛ wɔte nka sɛ bere a wɔde mfe pii asom nokwaredi mu no, ebia ‘Yehowa da kɛse a ɛyɛ hu no’ mmɛto wɔn. (Yoel 2:30, 31) Nanso, sɛ wɔhwɛ nneɛma pa a afi mu aba no a, ebetumi ahyɛ wɔn nkuran. Petro tuu fo sɛ: “Mummu yɛn Awurade abodwokyɛre no sɛ nkwagye.” (2 Petro 3:15) Yehowa abodwokyɛre ama nnipa foforo ɔpepem pii a wɔwɔ koma pa abehu nokware no. So ɛnyɛ anigye? Afei nso, dodow a Yehowa tɔ ne bo ase no, dodow no ara na yenya bere de ‘yɛ yɛn ankasa nkwagye ho adwuma.’—Filipifo 2:12; 2 Petro 3:11, 12.
9. Sɛ yentumi nyɛ pii wɔ Yehowa som adwuma mu a, ɔkwan bɛn so na boasetɔ a yɛde twɛn bɛboa yɛn ma yɛatumi agyina tebea no ano?
9 Sɛ ɔsɔretia, ɔyare, onyin, anaa ɔhaw afoforo bi mma yentumi nyɛ pii wɔ Ahenni adwuma no mu a, boasetɔ a yɛde twɛn no boa yɛn na yɛn abam ammu. Yehowa hwɛ kwan sɛ yebefi yɛn koma nyinaa mu asom no. (Romafo 12:1) Nanso, Onyankopɔn Ba no a ohu “ɔbrɛfo ne ohiani mmɔbɔ” no nhwehwɛ nea ɛboro nea yebetumi ayɛ so mfi yɛn hɔ; Yehowa nso saa ara. (Dwom 72:13, NW) Enti, wɔhyɛ yɛn nkuran sɛ yɛnyɛ nea yebetumi, na yɛmfa boasetɔ ntwɛn nkosi sɛ nneɛma bɛsesa—sɛ́ ɛyɛ nneɛma nhyehyɛe yi mu anaa nea ɛbɛba no mu. Kae sɛ: “Onyankopɔn nyɛ nea ɔnteɛ a ne werɛ befi mo adwuma ne mo dɔ mmɔden a mobɔe ne din ho, sɛ mosom ahotefo na moda so som wɔn.”—Hebrifo 6:10.
10. Subammɔne bɛn na obi a ɔde boasetɔ twɛn no betumi akwati? Kyerɛkyerɛ mu.
10 Boasetɔ a yɛde twɛn nso boa yɛn ma yɛkwati ahantan. Ná ebinom a wɔabɛyɛ awaefo no mpɛ sɛ wɔtwɛn. Ebia wonyaa adwene sɛ ɛsɛ sɛ wɔyɛ nsakrae ahorow wɔ Bible mu ntease anaa ahyehyɛde no mu nneɛma mu. Nanso, wɔanhu sɛ Yehowa honhom no ma akoa nokwafo ne ɔbadwemma no yɛ nsakrae wɔ N’ankasa ne bere mu, na ɛnyɛ bere a ebia yɛte nka sɛ eyi ho hia no mu. Na ɛsɛ sɛ nsakrae biara a wɔbɛyɛ no ne Yehowa apɛde hyia, ɛnyɛ yɛn ankasa nsusuwii. Awaefo ma ahantan kyinkyim wɔn adwene na ɛto wɔn hintidua. Nanso, sɛ wonyaa Kristo adwene a, anka wokuraa wɔn anigye mu ne Yehowa nkurɔfo trae.—Filipifo 2:5-8.
11. Ɔkwan bɛn so na yebetumi de bere a yɛde retwɛn no adi dwuma ma mfaso aba so, na sɛ yɛyɛ saa a na henanom nhwɛso akyi na yɛredi?
11 Nokwarem no, boasetɔ a yɛde twɛn nkyerɛ sɛ yɛbɛyɛ akwadworɔ anaasɛ yɛbɛtra hɔ kwa. Yɛwɔ nneɛma a ɛsɛ sɛ yɛyɛ. Sɛ nhwɛso no, ɛsɛ sɛ yɛyɛ kokoam Bible adesua na yɛkyerɛ honhom fam nneɛma ho anigye ankasa te sɛ adiyifo anokwafo ne abɔfo no. Bere a Petro reka anigye a ɛte saa ho asɛm no, ɔkae sɛ: “Saa nkwagye no na adiyifo a wɔhyɛɛ ɔdom a ɛbɛba mo so no ho nkɔm de too hɔ no pepɛe na wɔpɛɛpɛɛ mu, . . . nsɛm a abɔfo po pɛ sɛ wɔhwehwɛ mu no.” (1 Petro 1:10-12) Ɛnyɛ kokoam adesua nko na ɛsɛ sɛ yɛyɛ na mmom asafo nhyiam ahorow a yɛbɛkɔ daa ne mpaebɔ nso. (Yakobo 4:8) Wɔn a wɔma wɔn honhom fam ahiade hia wɔn denam honhom fam aduan a wodi bere nyinaa so, na wɔne wɔn mfɛfo Kristofo bɔ fekuw no da no adi sɛ wɔafa Kristo adwene.—Mateo 5:3.
Nya Adwempa
12. (a) Ahofadi bɛn na Adam ne Hawa hwehwɛe? (b) Dɛn na afi Adam ne Hawa kwan no a adesamma adi akyi no mu aba?
12 Bere a Onyankopɔn bɔɔ nnipa baanu a wodi kan no, ɔdaa no adi sɛ ɔno na ɔwɔ hokwan sɛ ɔkyerɛ wɔn nea eye ne nea enye. (Genesis 2:16, 17) Adam ne Hawa pɛe sɛ wɔde wɔn ho fi Onyankopɔn akwankyerɛ ase, na eyi na ɛde wiase a yɛwom nnɛ yi bae. Ɔsomafo Paulo kae sɛ: “Ɛnam onipa biako so na bɔne baa wiase, na owu nam bɔne so bae . . , saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.” (Romafo 5:12) Adesamma abakɔsɛm a efi Adam bere so, a mfirihyia mpemnsia ni no, ama nokware a Yeremia nsɛm no yɛ no ada adi: “[Yehowa, NW], mahu sɛ onipa kwan nni ne nsam, enni ɔbarima nsam, sɛnea ɔnam a obetutu n’anammɔn.” (Yeremia 10:23) Yeremia nsɛm no a wubegye atom sɛ ɛyɛ nokware no mma wunni nkogu. Ɛyɛ nokwasɛm. Ɛkyerɛkyerɛ mfehaha pii a ɛnyɛ anigye a ‘onipa adi onipa so tumi ma adan no bɔne,’ esiane sɛ nnipa apo Onyankopɔn akwankyerɛ adi tumi nti no mu.—Ɔsɛnkafo 8:9.
13. Adwempa bɛn na Yehowa Adansefo wɔ wɔ nneɛma a nnipa betumi ayɛ ho?
13 Esiane tebea a adesamma wom nti, Yehowa Adansefo nim sɛ nneɛma a yebetumi ayɛ wɔ mprempren nhyehyɛe mu no wɔ anohyeto. Adwempa betumi aboa yɛn ma yɛakura yɛn anigye mu, nanso ɛnyɛ ɛno ne biribiara ano aduru. Wɔ 1950 mfe no mfiase no, Amerikani sɔfo bi kyerɛw nhoma bi a wɔtɔe kɛse a ɔtoo din The Power of Positive Thinking. Nhoma no kyerɛe sɛ sɛ yɛde adwempa di akwanside dodow no ara ho dwuma a, yebetumi adi so. Akyinnye biara nni ho sɛ adwempa ye. Nanso, osuahu da no adi sɛ nimdeɛ, nyansa, ahonyade, ne nneɛma foforo pii tumi siw nea yebetumi ayɛ sɛ ankorankoro no kwan. Na ɔhaw ahorow a ɛwɔ wiase nyinaa no yɛ kɛse dodo sen nea nnipa betumi adi ho dwuma yiye—ɛmfa ho adwempa a wɔwɔ!
14. So Yehowa Adansefo wɔ adwemmɔne? Kyerɛkyerɛ mu.
14 Esiane adwene a ɛfata a Yehowa Adansefo wɔ wɔ nneɛma a ɛtete saa ho nti, ɛtɔ mmere bi a wɔbɔ wɔn sobo sɛ wɔwɔ adwemmɔne. Nanso, wɔde anigye ka Onii a ne nkutoo na obetumi ama adesamma asetra ayɛ yiye daa no ho asɛm kyerɛ nkurɔfo. Eyi mu nso wosuasua Kristo adwene. (Romafo 15:2) Na wɔayere wɔn ho reboa nkurɔfo ma wɔne Onyankopɔn anya abusuabɔ pa. Wonim sɛ awiei koraa no, eyi de nea eye sen biara na ɛbɛba.—Mateo 28:19, 20; 1 Timoteo 4:16.
15. Ɔkwan bɛn so na Yehowa Adansefo adwuma no ma ankorankoro asetra tu mpɔn?
15 Yehowa Adansefo mmu wɔn ani ngu asetram haw ahorow—titiriw nneyɛe bɔne a ɛne Kyerɛwnsɛm nhyia—a atwa wɔn ho ahyia no so. Ansa na onigyeni bi bɛba abɛyɛ Yehowa Adansefo no mu biako no, ɔyɛ nsakrae ahorow, a mpɛn pii no ɛsɛ sɛ odi nneyɛe bɔne a aka ne hɔ a ɛnsɔ Onyankopɔn ani no so. (1 Korintofo 6:9-11) Enti, Yehowa Adansefo aboa wɔn a wɔyɛ osetie no ma wɔagyae asabow, nnubɔnenom, ɔbrasɛe, ne kyakyatow. Ankorankoro a wɔayɛ saa nsakrae no ahu sɛnea wɔbɛhwɛ wɔn mmusua wɔ ɔkwan a ɛfata na nidi wom so. (1 Timoteo 5:8) Sɛ wɔboa ankorankoro ne mmusua saa kwan yi so a, ɔman no haw ahorow so tew—nnipa kakraa bi na wɔnom nnubɔne, mmusua mu basabasayɛ so tew, ne nea ɛkeka ho. Yehowa Adansefo nam mmara a wɔn ankasa di so ne afoforo a wɔboa wɔn ma wɔsesa wɔn asetra so tew nnwumakuw a wodi asetram haw ahorow ho dwuma no adesoa so.
16. Dɛn nti na Yehowa Adansefo mfa wɔn ho nhyehyɛ wiase akuw a wɔhwehwɛ nsakrae no mu?
16 So Yehowa Adansefo asesa wiase no abrabɔ? Wiɛ, mfirihyia du a atwam mu no, wɔn a na wɔyɛ Adansefo dodow akɔ soro fi bere a na wonnu 3,800,000 abedu bɛyɛ 6,000,000. Ɛno yɛ dodow nkɔanim bɛyɛ 2,200,000, na wɔn mu pii gyaee nneyɛe a ɛnteɛ bere a wɔbɛyɛɛ Kristofo no. Nnipa pii asetra tuu mpɔn! Nanso, sɛ wɔde nnipa dodow yi toto sɛnea wiase nnipa dodow kɔɔ soro wɔ saa mfirihyia koro no ara mu—875,000,000—ho a, na wosua koraa! Ɛyɛ Yehowa Adansefo anigye sɛ wɔbɛboa ankorankoro a wɔn aso yɛ mmerɛw no, nanso wonim sɛ adesamma mu nnipa kakraa bi pɛ na wɔbɛfa nkwa kwan no so. (Mateo 7:13, 14) Bere a Adansefo no retwɛn wiase nyinaa nsakrae pa a Onyankopɔn nkutoo na obetumi de aba no, wɔmfa wɔn ho nhyehyɛ wiase akuw a wɔrehwehwɛ nsakrae, a mpɛn pii no wɔde adwempa na efi ase nanso ekowie abasamtu ne basabasayɛ mpo mu no mu.—2 Petro 3:13.
17. Dɛn na Yesu yɛ de boaa wɔn a na wɔatwa ne ho ahyia no, nanso dɛn na wanyɛ?
17 Yehowa Adansefo nam saa kwan yi a wɔafa so no so da ahotoso koro no ara a Yesu daa no adi wɔ Yehowa mu bere a na ɔwɔ asase so no bi adi. Wɔ afeha a edi kan no mu no, Yesu saa yare anwonwakwan so. (Luka 6:17-19) Onyanee awufo mpo. (Luka 7:11-15; 8:49-56) Nanso, wanyi yare anaa owu amfi hɔ. Na onim sɛ Onyankopɔn bere a ɔde bɛyɛ eyi no nnya nnui. Bere a na Yesu yɛ onipa a ɔyɛ pɛ no, ɛda adi sɛ na anka obetumi ayɛ nneɛma pii de ayi amammui ne asetram nsɛm a anibere wom no afi hɔ. Ɛte sɛ nea na Yesu bere sofo no binom pɛ sɛ odi tumi na ɔyɛ n’ade saa kwan yi so, nanso wampene. Yɛkenkan sɛ: “Afei nnipa no huu sɛnkyerɛnne a Yesu yɛe no, wɔkae sɛ: Ampa odiyifo a ɔreba wiase no ni! Ɛnna Yesu hui sɛ wɔrebɛba abɛfa no ahyɛ no de no akosi hene nti, ɔtwee ne ho, na ɔno nko ara kɔɔ bepɔw no so bio.”—Yohane 6:14, 15.
18. (a) Ɔkwan bɛn so na Yesu atɔ ne bo ase atwɛn bere nyinaa? (b) Ɔkwan bɛn so na Yesu dwumadi asesa fi afe 1914 reba no?
18 Yesu amfa ne ho anhyehyɛ amammuisɛm anaa asetram yiyedi nkutoo mu efisɛ na onim sɛ bere a ɔde bedi tumi sɛ ɔhene na wasa obiara yare wɔ baabiara no nnya nnui. Bere a ɔforo kɔɔ soro wɔ honhom mu asetra a owu nnim mu mpo no, na ɔwɔ ɔpɛ sɛ ɔbɛtwɛn bere a Yehowa ahyɛ no ansa na wayɛ biribi. (Dwom 110:1; Asomafo no Nnwuma 2:34, 35) Nanso, efi bere a wɔde no dii ade sɛ Onyankopɔn Ahenni so Hene wɔ afe 1914 mu no, wafi adi ‘redi nkonim na wakodi nkonim.’ (Adiyisɛm 6:2; 12:10) Hwɛ sɛnea ɛyɛ yɛn anigye sɛ yɛbɛbrɛ yɛn ho ase ahyɛ n’ahenni ase, bere a afoforo a wɔkyerɛ sɛ wɔyɛ Kristofo kɔ so bu wɔn ani gu Bible nkyerɛkyerɛ a ɛfa Ahenni no ho so!
Ɔtwɛn—Ɛma Abasamtu Anaa Anigye?
19. Bere bɛn na ɔtwɛn “ma koma yare,” na bere bɛn na ɛyɛ anigye?
19 Ná Salomo nim sɛ ɔtwɛn betumi ayɛ abasamtu. Ɔkyerɛwee sɛ: “Anidaso a ɛkyɛ muba ma koma yare.” (Mmebusɛm 13:12) Nokwarem no, sɛ obi rehwɛ anidaso a enni nnyinaso kwan a, huammɔdi betumi ama ne koma ayare. Nanso, nneɛma a ɛyɛ anigye a yɛtwɛn—te sɛ ebia ayeforohyia, abawo, anaa hyia a yɛbɛsan ne nnipa a yɛdɔ wɔn ahyia bio—betumi ama yɛn ani agye bere tenten ansa na ɛda a ɛbɛba so no adu. Sɛ yɛde bere a yɛde twɛn no di dwuma nyansam, siesie yɛn ho ma ade a ɛreba no a, saa anigye no mu yɛ den.
20. (a) Anwonwade bɛn na yɛde ahotoso hwɛ kwan sɛ yebehu? (b) Yɛbɛyɛ dɛn anya anigye bere a yɛretwɛn ma Yehowa atirimpɔw ahorow abam no?
20 Sɛ yɛwɔ ahotoso koraa sɛ nneɛma a yɛn ani da so bɛbam—na mpo yennim bere a ɛbɛbam—a, ɛnsɛ sɛ bere a yɛde twɛn no ‘ma yɛn koma yare.’ Onyankopɔn asomfo anokwafo nim sɛ Kristo Mfirihyia Apem Nniso no abɛn. Wɔwɔ ahotoso sɛ wobehu owu ne yare awiei. Bere a wɔde anigye hwɛ kwan no, wɔde anigye twɛn bere a wɔbɛma nnipa ɔpepepem pii akwaaba afi awufo mu, a wɔn adɔfo a wɔawuwu ka ho. (Adiyisɛm 20:1-3, 6; 21:3, 4) Saa bere yi a nneɛma a atwa yɛn ho ahyia asɛe no, ɛyɛ wɔn dɛ sɛ wobehu asase so Paradise no. (Yesaia 35:1, 2, 7) Ɛnde, hwɛ sɛnea nyansa wom sɛ yɛde bere a yɛde retwɛn no bedi dwuma yiye, na ‘yɛayɛ pii wɔ Awurade adwuma no mu daa’! (1 Korintofo 15:58) Kɔ so di honhom fam aduan. Wo ne Yehowa nnya abusuabɔ a emu yɛ den. Hwehwɛ afoforo a wɔn koma ka wɔn ma wɔsom Yehowa no. Hyɛ mfɛfo gyidifo nkuran. Fa bere biara a Yehowa bɛma ho kwan no di dwuma kosi ase. Sɛ ɛba saa a, twɛn a wobɛtwɛn Yehowa no remma wo ‘koma nyare’ da. Mmom no, ɛbɛma w’ani agye!
Wubetumi Akyerɛkyerɛ Mu?
• Ɔkwan bɛn so na Yesu tɔɔ ne bo ase twɛnee?
• Tebea horow bɛn mu na ɛsɛ sɛ Kristofo tɔ wɔn bo ase twɛn?
• Dɛn nti na Yehowa Adansefo de abotɔyam twɛn Yehowa?
• Ɔkwan bɛn so na twɛn a yɛbɛtwɛn Yehowa no betumi ayɛ anigye?
[Adesua no ho Nsɛmmisa]
[Mfonini ahorow wɔ kratafa 12]
Yesu hwɛɛ anigye a na ɛda n’anim no tɔɔ ne bo ase
[Mfonini wɔ kratafa 13]
Yebetumi akura yɛn anigye mu bere a yɛasom mfirihyia pii akyi mpo no
[Mfonini ahorow wɔ kratafa 15]
Nnipa ɔpepem pii abɛyɛ Yehowa Adansefo ama wɔn asetra atu mpɔn