Nsonsonoe a Ɛda Sodikuw no ne Mmara Kwan so Ahyehyɛde Ntam

WƆAYƐ Watch Tower Bible and Tract Society of Pennsylvania no afe afe nhyiam no fi January 1885. Bere a na wɔreboaboa Kristofo a wɔasra wɔn ano wɔ afeha a ɛto so 19 awiei mu no, na saa adwumakuw yi akwankyerɛfo ne mpanyimfo no wɔ ɔsoro anidaso. Nokwarem no, ɛkame ayɛ sɛ saa na akɔ so bere nyinaa.

Gye pɛnkoro pɛ. Wɔ afe 1940 mu no, wɔpaw Hayden C. Covington—a saa bere no na ɔyɛ Asafo ti no mmaranimfo a na ɔyɛ “nguan foforo” no muni a ɔwɔ asase so anidaso—sɛ Asafo ti no kwankyerɛfo. (Yohane 10:16) Ɔsomee sɛ Asafo ti no titrani abadiakyiri fi afe 1942 besii afe 1945. Saa bere no, Onua Covington twee ne ho sɛ ɔkwankyerɛfo de dii nea saa bere no na wobu no sɛ Yehowa apɛde—a na ɛne sɛ ɛsɛ sɛ Pennsylvania adwumakuw no akwankyerɛfo ne mpanyimfo nyinaa yɛ Kristofo a wɔasra wɔn no—so. Wɔde Lyman A. Swingle hyɛɛ Hayden C. Covington ananmu wɔ akwankyerɛfo no mu, na wɔpaw Frederick W. Franz sɛ otitrani abadiakyiri.

Dɛn nti na na Yehowa asomfo gye di sɛ ɛsɛ sɛ Watch Tower Bible and Tract Society of Pennsylvania no akwankyerɛfo ne mpanyimfo nyinaa yɛ Kristofo a wɔasra wɔn? Efisɛ saa bere no, ɛkame ayɛ sɛ na wobu Pennsylvania adwumakuw no akwankyerɛfo ne mpanyimfo no sɛ wɔne Yehowa Adansefo Sodikuw a emufo nyinaa yɛ mmarima a wɔasra wɔn no bere nyinaa.

Afe Afe Nhyiam Titiriw

Wɔ afe afe nhyiam a wɔyɛe wɔ October 2, 1944, wɔ Pittsburgh ase no, Pennsylvania adwumakuw no mufo gyee tirimbɔ asia bi toom de yɛɛ nsakrae wɔ adwuma no nhyehyɛe mu. Na nhyehyɛe no ama wɔn a woyi ntoboa de boa Asafo ti no adwuma no kwan ma wotumi tow aba dodow bi a na egyina ntoboa dodow a woyi so, nanso nsakrae a ɛto so abiɛsa no yii saa nhyehyɛe no fii hɔ. Saa afe afe nhyiam no ho amanneɛbɔ bi daa no adi sɛ: “Wɔbɛtew nnipa a wɔbɛyɛ Asafo ti no mufo dodow so ama ayɛ nea ɛremmoro nnipa 500 . . . Ɛsɛ sɛ obiara a wɔbɛpaw no no yɛ Asafo no bere nyinaa somfo anaa Yehowa adansefo adwumakuw [asafo] no bere fã somfo, na na ɛsɛ sɛ ɔyɛ obi a ɔda Awurade honhom adi.”

Ɛno akyi no, nnipa a wɔde wɔn ho ama Yehowa som koraa na na ɛsɛ sɛ wɔtow aba paw Asafo ti no akwankyerɛfo no, ɛmfa ho sika dodow a woyi de boa Ahenni adwuma no. Eyi bɛyɛɛ nea na ɛne nyiyim a wɔkaa ho asɛm siei wɔ Yesaia 60:17 sɛ na ɛbɛba nkakrankakra no hyia, baabi a yɛkenkan sɛ: “Kɔbere ananmu na mede sika mesi maba, na dade ananmu na mede dwetɛ mesi maba, na kɔbere asi nnua ananmu, na dade asi abo ananmu. Na mɛma asomdwoe [ayɛ wo ahwɛfo na trenee ayɛ wo adwuma mafo, NW].” Bere a saa nkɔmhyɛ yi reka “ahwɛfo” ne “adwuma mafo” ho asɛm no, ɛtwee adwene sii nkɔso a na ɛbɛba Yehowa nkurɔfo ahyehyɛde no nhyehyɛe mu no so.

Saa adeyɛ a ɛho hia a ɛde ahyehyɛde no bɛbɛn teokrase nhyehyɛe ho no bae “anadwofa ne anɔpa mpennu ahasa” a wɔkaa ho asɛm wɔ Daniel 8:14 no. Saa bere no na ‘wɔyɛɛ kronkronbea hɔ yiye.’

Nanso, 1944 afe afe nhyiam titiriw no akyi no, na asɛmmisa bi a ɛho hia da so wɔ hɔ. Esiane sɛ ɛkame ayɛ sɛ saa bere no na wobu Pennsylvania adwumakuw a emu akwankyerɛfo no yɛ nnipa baason no sɛ Sodikuw no ara nti, so na eyi kyerɛ sɛ wɔrentumi mma Sodikuw no mufo dodow mmoro Kristofo a wɔasra wɔn baason no da? Afei nso, esiane sɛ na adwumakuw no mufo na wɔpaw akwankyerɛfo no  nti, so adwumakuw no mufo na na wɔpaw Sodikuw no mufo afe biara wɔ afe afe nhyiam no ase? So Watch Tower Bible and Tract Society of Pennsylvania mu akwankyerɛfo ne mpanyimfo ne Sodikuw no mufo yɛ biako, anaasɛ na nsonsonoe da wɔn ntam?

Afe Afe Nhyiam Foforo a Werɛ Remfi Da

Wobuaa saa nsɛmmisa yi wɔ afe afe nhyiam a wɔyɛɛ no October 1, 1971 no ase. Saa da no, akasafo no mu biako daa no adi sɛ “akoa nokwafo ne ɔbadwemma” no sodikuw no dii Watch Tower Bible and Tract Society of Pennsylvania no anim kan mfehaha pii. (Mateo 24:45-47) Wɔhyehyɛɛ sodikuw no wɔ Pentekoste afe 33 Y.B., bɛboro mfeha 18 ansa na wɔrehyehyɛ Pennsylvania adwumakuw no. Mfiase no, na sodikuw no mufo nyɛ mmarima 7, na mmom asomafo 12. Ɛda adi sɛ, wɔtrɛw mu akyiri yi, efisɛ ‘asomafo ne mpanyimfo a na wɔwɔ Yerusalem’ no na na wodi anim.—Asomafo no Nnwuma 15:2.

Wɔ afe 1971 mu no, ɔkasafo koro no ara kyerɛkyerɛɛ mu sɛ Ɔwɛn Aban Asafo no mufo ntumi ntow aba mpaw Sodikuw no mufo a wɔasra wɔn no. Dɛn ntia? Ɔkae sɛ: “Efisɛ ɛnyɛ onipa bi na ɔpaw ‘akoa’ kuw no sodikuw no. Yesu Kristo a ɔyɛ nokware Kristofo asafo no Ti no na ɔyɛ ‘akoa nokwafo ne ɔbadwemma’ kuw no Awurade ne Owura, . . . na ɔno na ɔpaw wɔn.” Ɛnde, ɛda adi pefee sɛ mmara kwan so adwumakuw mufo biara nni hɔ a wobetumi atow aba apaw Sodikuw no mufo.

Bere a ɔkasafo no retoa so no, ɔkaa saa asɛntitiriw yi: “Sodikuw no nni mpanyimfo te sɛ nea Asafo ti no Baguafo wɔ bi a wɔne otitrani, otitrani abadiakyiri, ɔkyerɛwfo ne ɔfotosanfo, ɔkyerɛwfo ne ɔfotosanfo abadiakyiri no. Oguamtrani kɛkɛ na wɔwɔ.” Mfe pii a atwam no, na Pennsylvania adwumakuw no titrani no nso na odi Sodikuw no mufo anim. Eyi renkɔ so saa bio. Bere a Sodikuw no mufo nyɛ pɛ wɔ osuahu ne nimdeɛ mu no, wɔde asɛyɛde bɛhyehyɛ wɔn nsa pɛpɛɛpɛ a ebi nsen bi. Ɔkasafo no de kaa ho sɛ: “Efi nnɛ rekɔ no, sodikuw no muni biara betumi ayɛ guamtrani a bere koro no ara ɔnyɛ . . . Asafo ti no titrani . . . Ne nyinaa gyina sodikuw no guamtrani ho nhyehyɛe a obiara tumi nya mu kyɛfa no so.”

Wɔ afe afe nhyiam a werɛ remfi da a wɔyɛe wɔ afe 1971 ase no, wɔmaa nsonsonoe daa Sodikuw no mufo a wɔde honhom asra wɔn no ne Pennsylvania adwumakuw no akwankyerɛfo no ntam. Nanso, Sodikuw no mufo kɔɔ so somee sɛ Asafo ti no akwankyerɛfo ne mpanyimfo. Nanso, ɛnnɛ, asɛmmisa a ɛsɔre ne sɛ: So Kyerɛwnsɛm mu nnyinasosɛm bi wɔ hɔ a enti ɛsɛ sɛ Watch Tower Bible and Tract Society of Pennsylvania no mu akwankyerɛfo no yɛ Sodikuw no mufo?

Mmuae no yɛ dabi. Ɛnyɛ Pennsylvania adwumakuw no nkutoo ne mmara kwan so adwumakuw a Yehowa Adansefo de di dwuma. Afoforo wɔ hɔ. Biako ne Watchtower Bible and Tract Society of New York, Incorporated no. Ɛno na ɛboa yɛn adwuma no wɔ United States. Ɛwom sɛ emu akwankyerɛfo ne mpanyimfo yɛ “nguan foforo” titiriw de, nanso ɛda adi pefee sɛ Yehowa ahyira saa adwumakuw no. Yɛde International Bible Students Association na edi dwuma wɔ Britain. Yɛde mmara kwan so ahyehyɛde afoforo di dwuma de ma Ahenni nneɛma nya nkɔso wɔ nsase foforo so. Wɔn nyinaa de biakoyɛ boa na wɔwɔ adwuma a ɛsɛ sɛ wɔyɛ de boa ma wɔka asɛmpa no wɔ asase nyinaa so no mu kyɛfa. Ɛmfa ho mmeae a mmara kwan so adwumakuw ahorow no wɔ anaa akwankyerɛfo anaa mpanyimfo a wɔsom wom no, Sodikuw no na ɛma wɔn teokrase akwankyerɛ na wɔde wɔn di dwuma. Enti, saa nnwumakuw yi wɔ nnwuma a wɔde ama wɔn a ɛsɛ sɛ wɔyɛ ma Ahenni nneɛma nya nkɔso.

Mfaso wɔ so sɛ yɛwɔ mmara kwan so ahyehyɛde ahorow no. Yɛnam so di ɔman mu mmara ne amanaman ntam mmara horow so, sɛnea Onyankopɔn Asɛm hwehwɛ sɛ yɛyɛ no. (Yeremia 32:11; Romafo 13:1) Mmara kwan so ahyehyɛde ahorow no boa yɛn ma yɛtrɛw Ahenni asɛm no mu denam Bible, nhoma, nsɛmma nhoma, nhomawa, ne nneɛma foforo a  yetintim so. Yɛde mmara kwan so ahyehyɛde ahorow a ɛtete saa nso di dwuma sɛ mmara kwan so adwinnade a yɛde di nneɛma te sɛ nsase ne adan a yɛtɔ, mmoa a yɛde ma wɔ asiane bere mu, mmeae a yɛyɛ nhyiam ho nhyehyɛe, ne nea ɛkeka ho ho dwuma. Yɛn ani gye mmara kwan so ahyehyɛde ahorow a ɛte saa dwumadi ho yiye.

Yehowa Din a Yɛde Bedi Kan

Wɔ afe 1944 mu no, wɔyɛɛ nsakrae wɔ Watch Tower Bible and Tract Society of Pennsylvania no nhyehyɛe no Fã Titiriw a Ɛto so II no mu ma edii saa adwumakuw yi botae ahorow ho dwuma. Sɛnea nhyehyɛe no kyerɛ no, nea ɛka Asafo ti no atirimpɔw ahorow ho ne saa atirimpɔw titiriw yi: “Sɛ wɔbɛka Onyankopɔn ahenni ho asɛmpa wɔ Kristo Yesu akwankyerɛ ase wɔ amanaman nyinaa mu de adi YEHOWA Ade Nyinaa so Tumfoɔ Nyankopɔn tumidi, ne din, ne n’asɛm ho adanse.”

Efi afe 1926 no, ‘akoa kuw’ no de Yehowa din adi kan. Afe a ɛsɛ sɛ yɛkae titiriw ne afe 1931, bere a Bible Asuafo no faa din Yehowa Adansefo too wɔn ho so no. (Yesaia 43:10-12) Asafo ti no asi Onyankopɔn din so dua titiriw wɔ nhoma ahorow te sɛ Jehovah (1934), “Let Your Name Be Sanctified” (1961), ne “The Nations Shall Know That I Am Jehovah”—How? (1971) mu.

Ɛsɛ sɛ yɛka New World Translation of the Holy Scriptures, a wotintim ne mũ nyinaa wɔ Engiresi mu wɔ afe 1960 mu no ho asɛm titiriw. Yehowa din no wom wɔ baabiara a Tetragrammaton no pue wɔ Hebri Kyerɛwnsɛm mu no. Onyankopɔn din no wɔ saa nkyerɛase yi Kristofo Hela Kyerɛwnsɛm no mu wɔ mmeae 237 a nhwehwɛmu a wɔde ahwɛyiye yɛe kyerɛe sɛ na eyi ho hia no nso. Hwɛ sɛnea ɛyɛ yɛn anigye sɛ akwan pii so no, Yehowa ama “akoa” no ne ne Sodikuw no kwan ma wɔde nhoma tintim mfiri a wɔwɔ ne mmara kwan so ahyehyɛde ahorow adi dwuma de abɔ ne din no ho dawuru wɔ asase nyinaa so!

Wɔahyɛ Onyankopɔn Asɛm Kyekyɛ Ho Nkuran

Yehowa nkurɔfo akɔ so adi ne din ho adanse, na wɔnam Bible ho nhoma ne Bible no ankasa a wɔatintim ɔpepem pii akyekyɛ so agyina N’asɛm no akyi. Wɔ 1900 mfe no mfiase no, Ɔwɛn Aban Asafo no nyaa hokwan tintim The Emphatic Diaglott, Benjamin Wilson Hela ne Engiresi Kristofo Hela Kyerɛwnsɛm no. Asafo ti no tintim King James Version, a na ɛyɛ Bible Asuafo no de a na nkekaho a ɛyɛ nkratafa 500 ka ho no. Wɔ afe 1942 mu no, wontintim King James Version a nsɛm a wɔatwe adwene asi so wɔ anoano no. Afei wɔ afe 1944 mu no, Asafo ti no fii ase tintim afe 1901 American Standard Version a ɛde Onyankopɔn din di dwuma no. Yehowa din no nso wɔ The Bible in Living English, a Stephen T. Byington, yɛe a Asafo ti no tintimii wɔ afe 1972 mu no mu.

Mmara kwan so ahyehyɛde ahorow a Yehowa Adansefo de adi dwuma no na aboa ma wɔatintim saa Bible nkyerɛase ahorow yi nyinaa akyekyɛ. Nanso, nea ɛsen ne nyinaa ne biakoyɛ a emu yɛ den a ɛda Ɔwɛn Aban Asafo no ne Yehowa Adansefo a wɔasra wɔn kuw a New World Bible Translation Boayikuw no ka ho no ntam no. Ɛyɛ yɛn anigye sɛ ɛde besi nnɛ no, wɔatintim saa nkyerɛase yi mũ nyinaa anaa ne fã bi bɛboro 106,400,000 wɔ kasa horow 38 mu. Nokwarem no, Watch Tower Bible and Tract Society of Pennsylvania no yɛ Bible asafo ampa!

‘Wama akoa nokwafo’ no ‘redi owura no nneɛma nyinaa so.’ Adan a ɛwɔ adwumayɛbea ti wɔ New York Mantam mu wɔ U.S.A., ne baa dwumadibea 110 a ɛreyɛ adwuma wɔ wiase nyinaa  nnɛ no ka ho. Akoa kuw no mufo nim sɛ wɔbɛma wɔabu akontaa wɔ ɔkwan a wɔfaa so de nea wɔde hyɛɛ wɔn nsa no dii dwuma no ho. (Mateo 25:14-30) Nanso, eyi nsiw ‘akoa’ no kwan sɛ ɔbɛma ahwɛfo a wɔfata a wɔwɔ “nguan foforo” no mu adi mmara kwan ne ɔhwɛ nnwuma no ho dwuma. Nokwarem no, eyi ma Sodikuw no mufo nya bere pii de ‘bɔ asɛm no ho som ho mpae.’—Asomafo no Nnwuma 6:4.

Bere tenten a saa wiase yi mu nsɛm tebea bɛma ho kwan no, Sodikuw a ɛyɛ “akoa nokwafo ne ɔbadwemma” no ananmusifo no de mmara kwan so ahyehyɛde ahorow bedi dwuma. Saa ahyehyɛde ahorow yi ho hia, nanso ɛnyɛ nea enni hɔ a yentumi nyɛ adwuma no. Sɛ aban bi hyɛ mmara de gu mmara kwan so ahyehyɛde bi a, asɛnka adwuma no bɛkɔ so ara. Mprempren mpo, wɔ nsase a anohyeto wɔ hɔ na yenni mmara kwan so ahyehyɛde ahorow no, yɛka Ahenni asɛm no wɔ hɔ, na yɛreyɛ asuafo, na teokrase nneɛma renya nkɔso. Eyi rekɔ so efisɛ Yehowa Adansefo dua na wogugu so, na ‘Onyankopɔn ma ɛkɔ so nyin.’—1 Korintofo 3:6, 7.

Bere a yɛhwɛ daakye kwan no, yɛwɔ ahotoso sɛ Yehowa bɛhwɛ adi ne nkurɔfo honhom fam ne honam fam ahiade ho dwuma. Na ɔno ne ne Ba, Yesu Kristo, bɛkɔ so de ɔsoro akwankyerɛ ne mmoa a ehia ama ma yɛde awie Ahenni asɛnka adwuma no. Nokwarem no, biribiara a yɛyɛ sɛ Onyankopɔn asomfo no, ‘ɛnyɛ yɛn tumi so, ɛnna ɛnyɛ yɛn ahoɔden so, na mmom Yehowa honhom so.’ (Sakaria 4:6) Enti yɛbɔ mpae hwehwɛ Onyankopɔn mmoa, a yenim sɛ ɛdenam ahoɔden a Yehowa de ma so no, yebetumi awie adwuma a ɔde ahyɛ yɛn nsa sɛ yɛnyɛ wɔ awiei bere yi mu no!