“Nhyira Ne Onipa a Ohu Nyansa”

NÁ ƆYƐ anwensɛm kyerɛwfo, ɔdansifo, ne ɔhene. Akatua a na ogye afe biako a ɛboro dɔla ɔpepem 200 no ma ɔyɛɛ ɔdefo sen ɔhene foforo biara wɔ asase so. Na ɔbarima no nyansa nso ama wagye din. Ɔhemmaa bi a ɔbɛsraa no ho dwiriw no araa ma ɔteɛɛm sɛ: “Hwɛ, wɔanka me emu fã po: wo nyansa ne wo yiye sen nka a metee no.” (1 Ahene 10:4-9) Ná eyi ne tete Israel hene Salomo gyinabea.

Ná Salomo wɔ ahonyade ne nyansa. Na ɛno ma ɔyɛɛ obi a ɔfata koraa sɛ ɔkyerɛ nneɛma abien no mu nea ɛho hia ankasa. Ɔkyerɛwee sɛ: “Nhyira ne onipa a ohu nyansa, ne onipa a onya ntease. Na emu adenya ye sen dwetɛ de, na ne mfaso sen sika amapa. Ne bo yɛ den sen mmota, na afɛfɛde nyinaa, wɔmfa nto ho.”—Mmebusɛm 3:13-15.

Nanso, ɛhe na yebetumi ahu nyansa? Dɛn nti na ɛsom bo sen sika? Ɛho nneɛma a ɛyɛ fɛ no bi ne dɛn? Bible mu nhoma a ɛne Mmebusɛm a Salomo kyerɛwee no ti 8 bua saa nsɛmmisa yi wɔ ɔkwan a ɛyɛ anigye so. Wɔka nyansa ho asɛm wɔ hɔ sɛ onipa a otumi kasa na ɔyɛ ade. Na nyansa ankasa da n’ahoɔfɛ ne sɛnea ɛsom bo no adi.

‘Ɔteɛm Denneennen’

Mmebusɛm ti 8 de asɛmmisa a wɔnhwɛ kwan sɛ wɔbɛma ho mmuae na efi ase sɛ: “Ɛno ɛnyɛ nyansa na ɛteɛm, na [nhumu, “NW”] ma ne nne so?” * Yiw, nyansa ne nhumu kɔ so teɛm, nanso ɛnte sɛ ɔbea guamanfo a ɔtetɛw sum mu na ɔka nnaadaasɛm gu aberante atetekwaa a ɔno nko nam asom no. (Mmebusɛm 7:12) “Sorɔnsorɔn atifi, ɔkwan so, nkwanta so na ogyinae, na ɔteɛm aponkɛse ho, kurotia, abobowano.” (Mmebusɛm 8:1-3) Wɔte nyansa nne a ano yɛ den na ɛda akokoduru adi no pefee wɔ mmɔnten so—apon ano, nkwanta so, ne kurow pon ano. Nkurɔfo betumi ate ɛnne no ntɛm na wɔagye so.

Hena na obetumi agye kyim sɛ obiara a ɔwɔ asase so a ɔpɛ sɛ ne nsa ka Onyankopɔn nyansa a wɔayɛ ho kyerɛwtohɔ wɔ Onyankopɔn Asɛm a efi honhom mu, Bible mu, no nsa ntumi nka bi? The World Book Encyclopedia ka sɛ: “Bible ne abakɔsɛm mu nhoma a wɔakan no kɛse sen biara.” Ɛde ka ho sɛ: “Wɔakyekyɛ Bible no pii sen nhoma foforo biara. Wɔakyerɛ Bible no ase mpɛn pii, na wɔde kɔ kasa pii mu sen nhoma foforo biara.” Bere a Bible mũ no nyinaa anaa ne fã bi wɔ kasa bɛboro 2,100 mu no, adesamma abusua ɔha biara mu 90 na anyɛ yiye koraa no wobetumi anya  Onyankopɔn Asɛm no fã bi wɔ wɔn ankasa kasa mu.

Yehowa Adansefo reka Bible mu asɛm no wɔ baguam wɔ baabiara. Wɔde nnamyɛ reka Onyankopɔn Ahenni ho asɛmpa no na wɔde Onyankopɔn Asɛm mu nokware no rekyerɛkyerɛ nkurɔfo wɔ nsase 235 so. Wotintim wɔn nsɛmma nhoma ahorow a egyina Bible no so, Ɔwɛn-Aban, a wotintim no kasa 140 mu, ɛne Nyan!, a wotintim no kasa 83 mu no mu biara bɛboro ɔpepem 20 na wɔde mema. Akyinnye biara nni ho sɛ nyansa kɔ so teɛm denneennen mmɔnten so!

“Me Nne Gyigye Ma Nnipa Mma”

Nyansa a wɔaka ho asɛm sɛ onipa no fi ase kasa sɛ: “Mo mmarima na meteɛm mefrɛ mo, na me nne gyigye ma nnipa mma. Mo, ntetekwaa, momma mo ani ntew, na mo, nkwasea, munnya nhumu koma.”—Mmebusɛm 8:4, 5.

Nyansa teɛm wɔ mmaa nyinaa. Ɛto nsa frɛ adesamma nyinaa. Ɛka kyerɛ ntetekwaa mpo sɛ wɔmma wɔn ani ntew anaasɛ wɔnyɛ anifere, na nkwasea nnya nhumu. Nokwarem no, Yehowa Adansefo gye di sɛ Bible yɛ nhoma a eye ma nnipa nyinaa, na wɔbɔ mmɔden sɛ wɔbɛhyɛ obiara nkuran ma wɔahwɛ mu na wɔahu nyansasɛm a ɛwom no a wɔnyɛ nyiyim.

“Nokware Fi M’anom”

Bere a nyansa retrɛw nsa a ɔto frɛ no mu no, ɛtoa so sɛ: “Muntie, na merebɛka nsɛm a emu da hɔ, na m’anom bue de nsɛm a ɛteɛ ba; na nokware fi m’anom, na m’ano akyide ne abɔnefosɛm; m’anom nsɛm nyinaa nam trenee mu, ade a akyim anaasɛ ɛkyea nni mu.” Yiw, nyansa nkyerɛkyerɛ di mũ na ɛteɛ, ɛyɛ nokware ne trenee. Nkontompo anaa biribi a akyea biara nnim. “Ne nyinaa mu da hɔ ma nhumufo, na ɛteɛ ma wɔn a wɔahu nimdeɛ.”—Mmebusɛm 8:6-9.

Ɛfata sɛ nyansa hyɛ nkuran sɛ: “Momfa me nteɛso, na ɛnyɛ dwetɛ, na momfa nimdeɛ, na munnyaw sika a wɔayiyi mu.” Nyansa wɔ asɛm yi mu ‘efisɛ nyansa ye sen mmota, na afɛfɛde nyinaa, wɔmfa nto ho.’ (Mmebusɛm 8:10, 11) Dɛn ntia? Dɛn na ɛma nyansa som bo kɛse sen sika no?

“M’aba Ye Sen Sika”

Akyɛde ahorow a nyansa de ma n’atiefo no som bo koraa sen sika, dwetɛ, anaa mmota. Bere a nyansa rekyerɛ nneɛma ko a saa akyɛde ahorow yi yɛ no, ɛka sɛ: “Me, nyansa, me ne anitew na ɛte, na adwempa ne nimdeɛ na mihu. [Yehowa, “NW”] suro ne bɔne tan: ahokyerɛ ne ahantan ne ɔkwammɔne ne akɔntɔnkyesɛm ano na mikyi.”—Mmebusɛm 8:12, 13.

Nyansa ma ne wura anitew ne adwempa. Onipa a ɔwɔ Onyankopɔn nyansa no  bu Onyankopɔn na osuro no nso efisɛ “nyansa mfiase ne [Yehowa, NW] suro.” (Mmebusɛm 9:10) Enti, ɔtan nea Yehowa tan. Ahomaso, ahantan, ɔbrasɛe, ne akɔntɔnkyesɛm nni ne fam koraa. Tan a ɔtan nneyɛe bɔne no ma ɔtwe ne ho fi tumi a wɔde di dwuma ɔkwammɔne so ho. Hwɛ sɛnea ɛho hia sɛ wɔn a wɔwɔ dibea a asɛyɛde wom wɔ Kristofo asafo mu, ɛne mmusua ti, hwehwɛ nyansa!

Nyansa toa so sɛ: “Afotu ne nyansahu wɔ me, mene nhumu, mmaninyɛ wɔ me. Me so na ahene nam di hene, na atitiriw hyɛ mmara trenee; me so na mpanyimfo nam di panyin, na abirɛmpɔn, ne asase so atemmufo nyinaa.” (Mmebusɛm 8:14-16) Aba a nyansa sow no bi ne nhumu, ntease, ne mmaninyɛ—su ankasa a sodifo, aban mpanyimfo, ne atitiriw hia. Wɔn a wodi tumi ne wɔn a wotu afoforo fo no hia nyansa.

Nokware nyansa wɔ hɔ ma obiara, nanso ɛnyɛ obiara na ohu. Sɛ ɛba ebinom abobowano mpo a, wɔpo anaasɛ wɔkwati. Nyansa ka sɛ: “Me de, medɔ wɔn a wɔdɔ me, na wɔn a wɔhwehwɛ me ntɛm hu me.” (Mmebusɛm 8:17) Wɔn a wofi komam hwehwɛ nyansa nkutoo na wohu.

Nyansa akwan teɛ na ɛyɛ trenee. Wɔn a wɔhwehwɛ nya so mfaso. Nyansa ka sɛ: “Ahonyade ne anuonyam wɔ me hɔ, ahode a ɛkyɛ ne trenee. M’aba ye sen sika ne amapa, na me nnɔbae sen dwetɛ a wɔayiyi mu. Trenee tempɔn mu na menam, atemmu akwan so pɛ, sɛ merema m’adɔfo adi ade, na mahyɛ wɔn adekorabea amaama.”—Mmebusɛm 8:18-21.

Nea ɛka su a ɛkyɛn so saa ho ne anifere, adwempa, ahobrɛase, nhumu, nyansahu, ɛne ntease, na sika ne anuonyam ka nyansa akyɛde ahorow ho. Onyansafo betumi afa trenee kwan so anya ahode, na ebesi no yiye honhom fam nso. (3 Yohane 2) Nyansa nso ma obi nya anuonyam. Afei nso, n’ahode no ma onya abotɔyam, na onya asomdwoe ne ahonim pa Onyankopɔn fam. Yiw, anigye ne onipa a wahu nyansa. Nokwarem no, nyansa aba ye sen sika amapa ne dwetɛ a wɔayiyi mu.

Esiane sɛ yɛte honam fam ade dodowpɛ wiase a esi ahonyade a wɔbɛfa kwan biara so anya a nea ɛbɛba biara mfa ho so dua mu nti, hwɛ sɛnea afotu yi yɛ nea aba wɔ ne bere mu ama yɛn! Ɛmmra sɛ yɛn werɛ remfi mfaso a ɛwɔ nyansa so anaasɛ yɛremfa akwammɔne so mpɛ ahonyade da. Mommma yemmmu yɛn ani nngu nsiesiei a ɛma yenya nyansa—yɛn Kristofo nhyiam ahorow ne yɛn ankasa kokoam Bible adesua, ɛne nhoma ahorow a “akoa nokwafo ne ɔbadwemma” no de ma  yɛn—no so mmfa mmpɛ sika da.—Mateo 24:45-47.

“Ɔde Me Sii Hɔ Fii Tete Beeme”

Nyansa ho asɛm a wɔka no sɛ onipa a ɛwɔ Mmebusɛm ti 8 no nyɛ ɔkwan kɛkɛ a wɔfa so kyerɛkyerɛ biribi a enni nipasu mu. Wɔ sɛnkyerɛnne kwan so no, ɛfa Yehowa abɔde a ne ho hia sen biara no ho nso. Nyansa kɔ so ka sɛ: “[Yehowa, “NW”] bɔɔ me de fii n’adwuma ase, ne nnwuma a efi teteete no mu adikan, ɔde me sii hɔ fii tete beeme, fii mfiase ansa na asase reba. Abun nni hɔ no, na wɔawo me, nsuti a ɛba nsu pii nni hɔ no; wonnya mfaa mmepɔw nsisii hɔ, na nkoko nnya mmae no, na wɔawo me; onnya nyɛɛ asase ne wura, ne wiase mfutuma no.”—Mmebusɛm 8:22-26.

Hwɛ sɛnea nkyerɛkyerɛmu a ɛfa nyansa a wɔaka ho asɛm sɛnkyerɛnne kwan so ho no ne nea wɔaka afa “Asɛm no” ho wɔ Kyerɛwnsɛm mu no hyia! Ɔsomafo Yohane kyerɛwee sɛ: “Mfiase no na Asɛm no wɔ hɔ, na Asɛm no ne Nyankopɔn na ɛwɔ hɔ, na Asɛm no yɛ nyame.” (Yohane 1:1, NW) Wɔ sɛnkyerɛnne kwan so no, nyansa a wɔaka ho asɛm sɛ onipa no gyina hɔ ma Onyankopɔn Ba, Yesu Kristo, a na onnya mmɛyɛɛ ɔdesani no. *

Yesu Kristo yɛ “abɔde nyinaa abakan, efisɛ ɔno mu na wɔbɔɔ nneɛma nyinaa, nea ɛwɔ ɔsoro ne nea ɛwɔ asase so, nea wohu ne nea wonhu.” (Kolosefo 1:15, 16) Nyansa a wɔka ho asɛm sɛ onipa no toa sɛ: “[Yehowa siesiee, “NW”] ɔsoro no, na mewɔ hɔ, bere a otwaa abun ani kɔntɔnkrɔn no; ɔde amununkum sensɛn soro pintinn, na bun mu nsuaniwa paee dennen, otwaa ɛpo hye, na nsu antra, na ɔde asase nhyɛase too hɔ no, na mewɔ ne nkyɛn sɛ ne dɔba na meyɛ n’adɔde daa daa; m’ani gye n’anim bere nyinaa mu, m’ani gye ne wi yi ase asase so, na m’ani ka nnipa mma mu.” (Mmebusɛm 8:27-31) Ná Yehowa Abakan no wɔ N’agya nkyɛn ne no reyɛ adwuma denneennen—ɔsoro ne asase Bɔfo a obiara ne no nsɛ. Bere a Yehowa Nyankopɔn bɔɔ onipa a odi kan no, na Ne Ba no ne no na ɛreyɛ adwuma sɛ Odwumayɛni a Waben. (Genesis 1:26) Ɛnyɛ nwonwa sɛ Onyankopɔn Ba no ani gye adesamma ho na n’ani ka wɔn mu kɛse saa!

“Nhyira Ne Onipa a Otie Me”

Sɛ́ onipa a wɔka ne ho asɛm sɛ nyansa no, Onyankopɔn Ba no ka sɛ: “Afei, mma, muntie me, na nhyira ne wɔn a wodi m’akwan so. Muntie nteɛso na munhu nyansa, na monntew atua. Nhyira ne onipa a otie me na ɔwɛn m’apon ano daa daa, na ɔhwɛ m’abobowano apongua so: Na nea ohu me no hu nkwa, na onya [Yehowa, “NW”] anisɔ; na nea ɔfom me no di ne kra aboro, wɔn a wɔtan me nyinaa dɔ owu.”—Mmebusɛm 8:32-36.

Yesu Kristo yɛ Onyankopɔn nyansa ho nhwɛso ankasa. “Ɔno mu na wɔde nyansa ne nimdeɛ ademude nyinaa akora.” (Kolosefo 2:3) Ɛnde, momma yentie no yiye na yenni n’anammɔn akyi pɛpɛɛpɛ. (1 Petro 2:21) Sɛ yɛpo no a yebedi yɛn ankasa kra aboro na yɛadɔ owu, efisɛ “nkwagye nni obiara mu.” (Asomafo no Nnwuma 4:12) Nokwarem no, momma yennye Yesu ntom sɛ nea Onyankopɔn de no ama ama yɛn nkwagye. (Mateo 20:28; Yohane 3:16) Sɛ yɛyɛ saa a, yebenya anigye a wɔn a ‘wohu nkwa na wonya Yehowa anisɔ’ nya no bi.

[Ase hɔ nsɛm]

[Mfonini ahorow wɔ kratafa 26]

Wɔn a wɔwɔ dibea a asɛyɛde wom no hia nyansa

[Mfonini ahorow wɔ kratafa 27]

Mmu w’ani ngu nsiesiei ahorow a ɛma nyansa no so