Wɔannyaw Yɛn Nko Bere a Wɔsɔɔ Yɛn Gyidi Hwɛe No

Ná Vicky yɛ abeawa a ne ho yɛ fɛ—ɔte apɔw, n’adwenem da hɔ, na ɔwɔ anigye. Yiw, bere a wɔwoo no fefɛw bere mu wɔ afe 1993 mu no, yɛn ani gyee kɛse. Ná yɛte Sweden anafo fam kurow ketewaa bi mu, na na asetra yɛ anigye.

NANSO, bere a Vicky dii afe biako ne fã no, na ɛte sɛ nea yɛn asetra resɛe. Na wayare nna kakra, enti yɛde no kɔɔ ayaresabea bi. Yɛn werɛ remfi bere a oduruyɛfo no ka kyerɛɛ yɛn sɛ yɛn babea no anya mogya mu kokoram, mmofraase kokoram a ɛka mogya mu nkwammoaa fitaa no, da.

Na ɛyɛ den sɛ yebegye atom sɛ ɔyare a ɛyɛ hu yi aka yɛn babea kumaa no. Afei ara na na wafi ase rehu wiase, na ɔrebewu yi. Bere a oduruyɛfo no bɔɔ mmɔden sɛ ɔbɛkyekye yɛn werɛ no, ɔkae sɛ ɔkwan bi wɔ hɔ a obetumi afa so asa no yare ma ayɛ yiye, na ɔnam nnuru a ano yɛ den a wɔde kunkum ɔyare mmoawa ne mogya a wɔde bɛma no mpɛn pii so na ɛbɛyɛ saa. Eyi yɛ asɛm foforo a ɛmaa yɛn ho dwiriw yɛn.

Wɔsɔ Yɛn Gyidi Hwɛ

Na yɛdɔ yɛn babea no yiye, na na yɛpɛ sɛ yenya ayaresa a eye sen biara ma no. Nanso, na yɛrentumi mma kwan mma wɔmma no mogya ɔkwan biara so. Yegye Onyankopɔn Asɛm, Bible, a ɛka pefee sɛ ɛsɛ sɛ Kristofo ‘twe wɔn ho fi mogya ho’ no di koraa. (Asomafo no Nnwuma 15:28, 29) Na na yenim nso sɛ asiane wɔ mogya a wɔde ma no mu ankasa. Nnipa mpempem pii na wɔanya nyarewa afi mogya a wɔde ma mu ma wɔawuwu. Ɔkwan foforo a na wobetumi afa so ne ayaresa a edi mu a wɔmma mogya wɔ mu. Eyi mu no, afei na na yɛn gyidi ho ko no afi ase.

Dɛn na na yebetumi ayɛ? Yɛne Ayaresabea Ho Nsɛm Dwumadibea a ɛwɔ Yehowa Adansefo  baa dwumadibea a ɛwɔ Sweden no dii nkitaho hwehwɛɛ mmoa. * Ntɛm ara na wɔde asɛm no faa nkrasɛm mfiri so kɔɔ ayaresabea horow a ɛwɔ Europa hwehwɛɛ ayaresabea ne oduruyɛfo a ɔbɛpene so de nnuru a ano yɛ den a wɔde kunkum ɔyare mmoawa asa no yare a ɔremma no mogya. Nsi ne ɔdɔ a yɛn nuanom Kristofo daa no adi na wɔnam so bɔɔ mmɔden sɛ wɔbɛboa yɛn no hyɛɛ yɛn den yiye. Wɔannyaw yɛn nko amma yɛanko yɛn gyidi ho ko no.

Nnɔnhwerew kakraa bi mu no, yenyaa ayaresabea ne oduruyɛfo bi wɔ Homburg/Saar, Germany. Wɔyɛɛ nhyehyɛe maa yɛn ma yɛde wimhyɛn kɔɔ hɔ n’adekyee na ama wɔakɔyɛ Vicky nipadua mu nhwehwɛmu. Bere a yedui no, na yɛn nuanom Kristofo a wɔwɔ Homburg hɔ Yehowa Adansefo asafo mu, ne yɛn abusuafo bi wɔ hɔ a wɔrebehyia yɛn kwan. Ɛhɔnom Ayaresabea Ntam Nkitahodi Boayikuw no nanmusifo bi gyee yɛn fɛw so. Ɔkaa yɛn ho ne yɛn kɔɔ ayaresabea hɔ, na ɔyɛɛ nea obetumi biara de boaa yɛn. Yenyaa awerɛkyekye sɛ yehui sɛ bere mpo a na yɛwɔ amannɔne no, yenyaa yɛn honhom fam anuanom gyinaa yɛn akyi.

Bere a yehyiaa Oduruyɛfo Graf wɔ ayaresabea hɔ no, yenyaa awerɛkyekye bio. Na ɔwɔ ntease yiye, ɔmaa yɛn awerɛhyem sɛ ɔbɛyɛ nea obetumi biara de asa Vicky yare a ɔremma no mogya. Sɛ ne mogya nkwammoaa ba fam kodu 5g/dl mpo a, na ɔbɛkɔ so asa no yare a ɔremma no mogya. Ɔkae nso sɛ Vicky nipaduam nhwehwɛmu a wɔyɛɛ no ntɛm ne ahoɔhare so a wɔde no bae no bɛma watumi asa no yare ama ayɛ yiye. Ɔkae sɛ eyi bɛyɛ nea edi kan koraa a ɔde nnuru a ano yɛ den a wɔde kunkum ɔyare mmoawa resa yare a ɔremma mogya wɔ tebea a ɛte sɛ Vicky de no mu. Yɛn ani sɔe kɛse na yɛn ani gyee Oduruyɛfo Graf akokoduru ne gyinae a osii sɛ ɔbɛboa yɛn no ho.

Sika Fam Ahokyere

Afei na asɛm a ɛda hɔ ne sɛ, Yɛbɛyɛ dɛn atua Vicky ayaresa no ho ka? Yɛn ho dwiriw yɛn bere a wɔka kyerɛɛ yɛn sɛ mfirihyia abien a wɔde bɛsa no yare no ho ka bɛyɛ deutsche mark 150,000 no. Na yɛn sika mmɛn saa sika no ho hwee, nanso na ɛho hia sɛ wofi Vicky ayaresa no ase ntɛm ara. Esiane sɛ na yɛafi Sweden akɔ Germany ayaresa nti na yɛn nsa renka ɔmanfo ayaresa ho insurance biara. Afei yɛn na yɛwɔ hɔ yi, a yɛn babea kumaa yare denneennen na oduruyɛfo a waben asiesie ne ho sɛ ɔbɛboa yɛn, nanso na yenni sika a ɛbɛso.

Ayaresabea no boaa yɛn ka kyerɛɛ yɛn sɛ sɛ yedi kan tua mark 20,000, na yɛde yɛn nsa hyɛ krataa bi ase de kyerɛ sɛ yebetua nea aka no a, wobefi ayaresa no ase ntɛm ara. Na yɛasie sika kakra, na ɛdenam mmoa a efi ɔdɔ mu a yɛn nnamfonom ne yɛn abusuafo de maa yɛn so no, yetumi tuaa mark 20,000 no—nanso na nea aka no ɛ?

Wɔsan kaee yɛn bio sɛ ɛnkaa yɛn nko wɔ yɛn gyidi ho ko no mu. Honhom fam onua bi a saa bere no na yennim no pɛe sɛ otua ɛka a aka no. Nanso, na enhia sɛ yɛma otua, efisɛ yetumi yɛɛ nhyehyɛe foforo.

Aduruyɛ Mu Ahokokwaw a Wɔde Yɛ Adwuma

Wofii ase de nnuru a ano yɛ den a wɔde kunkum ɔyare mmoawa no maa no. Nna ne adapɛn twaa mu. Ɛtɔ mmere bi a na ɛyɛ den yiye ma yɛn babea kumaa no ne yɛn nyinaa. Nanso, bere biara a onyaa nkɔso no, yɛn ani gyei kɛse. Wɔde nnuru a ano yɛ den a wɔde kunkum ɔyare mmoawa no maa no asram awotwe. Bere a Vicky mogya nkwammoaa baa fam sen biara no yɛ bere a eduu 6 g/dl no, na Oduruyɛfo Graf dii ne bɔhyɛ so.

Bɛboro mfirihyia asia atwam, na wɔanhu mogya mu kokoram ho biribiara wɔ ne hon ntini kɛse no mu wɔ nhwehwɛmu a etwa to a wɔyɛe no mu. Mprempren ɔyɛ abeawa a ɔwɔ anigye a ne ho nsɛ ɔyarefo. Yiw, ɛte sɛ nea Vicky ho a atɔ no koraa no yɛ anwonwade.  Yenim sɛ mmofra pii a wonya saa yare yi wuwu ɛmfa ho nnuru a ano yɛ den a wɔde kunkum ɔyare mmoawa ne mogya a wɔde ma wɔn no.

Yɛadi nkonim wɔ yɛn gyidi ho ko no mu, nanso sɛ yɛn abusuafo, Kristofo anuanom mmarima ne mmea, ne nnuruyɛfo abenfo ammoa yɛn a, anka ɛremma saa. Ayaresabea Ho Nsɛm Dwumadibea no maa yɛn mmoa nnɔnhwerew 24 da biara. Oduruyɛfo Graf ne ne mfɛfo no de wɔn nyansa nyinaa dii dwuma de boae maa Vicky ho tɔɔ no. Yɛda wɔn ase wɔ eyi nyinaa ho.

Yɛn Gyidi Ayɛ Den

Nanso, nea ɛsen ne nyinaa no, yɛda yɛn Nyankopɔn, Yehowa, ase wɔ n’adɔe ne ahoɔden a yenya fii N’asɛm, Bible, mu no ho. Sɛ yɛhwɛ yɛn akyi a, yehu nneɛma pii a yɛasua, ɛne sɛnea yɛn asetram osuahu a ɛyɛ den yi ahyɛ yɛn gyidi den no.

Afei yɛn komam ade a yɛpɛ ne sɛ yebekura yɛne Yehowa Nyankopɔn ntam abusuabɔ a ɛyɛ den no mu na yɛakyerɛkyerɛ yɛn babea no ma wahu mfaso a ɛwɔ so sɛ ɔbɛtra ase ma ɛne Onyankopɔn ahwehwɛde ahyia. Yiw, yɛpɛ sɛ yɛma no honhom fam agyapade a ɛyɛ papa a ɛbɛma wanya daa nkwa wɔ Paradise a ɛreba asase so ha no.—Wɔkyerɛw mae.

[Ase hɔ asɛm]