“Dɛn Na Ɛrekɔ so Wɔ France?”

“Ahofadi, ahofadi a yɛn ani gye ho,” yɛ “La Marseillaise,” Francefo man dwom, mu nsɛm. Akyinnye biara nni ho sɛ ahofadi yɛ biribi a ɛsɛ sɛ obiara ani gye ho. Nanso, nsɛm a asisi France nnansa yi rehaw adwene na ɛresɛe ahofadi atitiriw. Ɛno nti na Fida, November 3, 2000 no, Yehowa Adansefo ɔpedudu pii kyekyɛɛ nkratawa titiriw bi a na n’asɛmti ne “Dɛn na Ɛrekɔ so Wɔ France? So Wobetumi Asiw Ahofadi Ano?” mmiako mmiako ɔpepem 12.

MFE dodow bi a atwam ni no, amammuifo ne akuw a wɔsɔre tia ɔsom nketewa no ako atia Yehowa Adansefo wɔ France. Eyi ama Adansefo no, sɛ ankorankoro, asafo, ne anuanom a wɔwɔ ɔman no mu nyinaa ho akyere wɔn. Nanso, wɔ June 23, 2000 no, Conseil d’État, France asɛnnibea kɛse no, sii gyinae titiriw bi de foaa gyinae a asɛnnibea nketewa 31 sisii wɔ nsɛm 1,100 ho no so. Asɛnnibea Kɛse no sii no pi sɛ Yehowa Adansefo som ne Francefo mmara hyia koraa, na ɛnsɛ sɛ wogye wɔn Ahenni Asa ahorow ho tow sɛnea wonnye ɔsom afoforo no ara pɛ.

Nanso, France Asoɛe a Ɛhwɛ Sikasɛm So no abu ani agu saa gyinaesi yi so koraa, na wɔkɔ so gye Yehowa Adansefo tow a mmara kyerɛ sɛ ɛnsɛ sɛ wogye nyamesom ahyehyɛde ahorow no. Asoɛe no gye ntoboa ahorow a Adansefo no ne wɔn nnamfonom a wɔwɔ asafo ahorow 1,500 a ɛwɔ France mu yi no ho tow ɔha biara mu 60. Wogu so redi saa asɛm yi.

Ná ɔsatu a yɛadi kan aka ho asɛm no botae ne sɛ wɔde bɛpa saa anwonwasɛm yi ho ntama, na wɔasi asiane ahorow a ɛwɔ towgye a ɛte saa a enni nnyinaso no ne mmara  horow a wɔahyehyɛ a ɛbɛsɛe ɔsom ahorow nyinaa ahofadi mu no so dua. *

Ɛda Tenten

Adansefo a wɔwɔ asafo bi mu fii ne kyekyɛ ase wɔ keteke gyinabea, nnwinnan mu, ne wimhyɛn gyinabea anɔpa nnɔnabien. Nnɔnsia no, na Paris ayɛ hyew. Wɔde atuhoamafo bɛyɛ 6,000 gyinagyinaa mmeae a ɛfata a ɛbɛma wɔahyia wɔn a wɔrebɛforo keteke akɔ adwuma no. Ababaa bi kae sɛ: “Nyamesom mu ahofadi ho ade a moreyɛ yi fata. Ɛmfa Yehowa Adansefo nkutoo ho.” Wɔ Marseilles no, Adansefo bɛboro 350 de kratawa no memae wɔ asase ase keteke gyinabea ne mmɔnten so. Dɔnhwerew biako mu no, na ɔman no radio rebɔ ɔsatu no ho amanneɛ akyerɛ n’atiefo sɛ sɛ Yehowa Adansefo ba wɔn nkyɛn a wɔmmma ɛnnyɛ wɔn nwonwa. Wɔ Strasbourg, baabi a Europa Asɛnnibea Ma Nnipa Hokwan Ahorow wɔ no, akwantufo a na wɔwɔ keteke gyinabea kɛse hɔ no de boasetɔ too santen gyee wɔn de. Mmaranimfo bi kae sɛ, bere a ɔne yɛn nyɛ adwene wɔ yɛn gyidi ahorow ho no, yɛn asɛm no ho hia no, efisɛ apere a yɛredi no ho hia na ɛteɛ.

Ɛbɔɔ nnɔnwɔtwe no, ɛmfa ho osu kɛse a na ɛretɔ no, Adansefo 507 a wɔwɔ Alpine kurow a ɛne Grenoble mu no kyinkyin mmɔnten so anaasɛ wɔde nkratawa no guguu nkurɔfo afie apon ano nkrataa nnaka mu. Bere a Karkafo ne keteke nketewa kafo hui sɛ biribi rekɔ so no, wogyina gyee kratawa no bi. Wɔ atɔe fam kurow Poitiers mu no, na akwantufo a wofi keteke mu sisii nnɔnkron no anya kratawa no bi dedaw wɔ baabi a wɔforoo keteke no. Wɔ Mulhouse, a ɛbɛn German hye so no, na wɔakyekyɛ 40,000 dedaw.

Ɛbɔɔ nnɔndu no, na asafo ahorow pii akyekyɛ wɔn nkratawa no bɛboro fã. Ɛrekɔ awiabere no, nnipa kakraa bi pɛ na wɔannye kratawa no bi, na na wɔabɔ nkɔmmɔ a ɛhyɛ nkuran pii. Wɔ Besançon, a efi hɔ rekɔ Switzerland hye so bɛyɛ kilomita 80 pɛ no, aberante bi kyerɛɛ Bible no ho anigye bisaa nea enti a Onyankopɔn ma amanehunu ho kwan no ho asɛm. Ɔdansefo no too nsa frɛɛ no kɔɔ Ahenni Asa bi a ɛbɛn hɔ so ne no kɔtoaa nkɔmmɔbɔ no so, na wofii Bible adesua ase ntɛm ara wɔ Dɛn na Onyankopɔn Hwehwɛ Fi Yɛn Hɔ? nhomawa no mu.

Awiabere no, Adansefo pii de wɔn adidibere kaa asɛm no dɔnhwerew biako anaa abien. Wɔkɔɔ so kyekyɛɛ nkratata awia no nyinaa, na asafo ahorow pii wiei awia nnɔnabiɛsa anaa nnɔnan. Wɔ Reims kurom no, ebinom a wɔne Yehowa Adansefo asua ade bere bi a atwam anaasɛ wɔne wɔn abɔ pɛn no daa no adi sɛ wɔpɛ sɛ wɔsan ne asafo no bɔ bio. Wɔ Bordeaux no, wofii ofie Bible adesua abiɛsa ase. Wɔ saa kurow no ara mu no, Ɔdansefo bi kɔɔ adetɔnbea sɛ ɔrekɔtɔ atesɛm krataa, na ohui sɛ nkratawa no bi sum ɔpon bi so. Ná ɔdetɔnfo no a bere bi na ɔyɛ Ɔdansefo no nsa aka kratawa no bi, na bere a ohuu sɛnea ɛho hia no, ɔhwɛɛ so yɛɛ pii sɛ ɔno ankasa bɛkyekyɛ.

Wɔ Le Havre, Normandy no, bere a Protestantni bea bi tee no radio so sɛ wogye ntoboa a Yehowa Adansefo yi ho tow no, ne ho dwiriw no. Ɔde anigye gyee kratawa no daa Adansefo no ase sɛ wɔakasa atia atɛnkyea a ɛte saa. Anwummere 7:20 no, Lyons mantam TV adwumayɛbea  no bɔɔ nkratawa no kyekyɛ ho amanneɛ sɛ: “Anɔpa yi na ɛyɛ mmerɛw sɛ wubeguan osu a ɛretɔ no sen sɛ wubeguan Yehowa Adansefo.” Wobisabisaa Adansefo baanu nsɛm ma wɔkyerɛkyerɛɛ nea enti a wɔretu sa no mu.

Adansefo a na wɔpɛ sɛ wonya mu kyɛfa bere a wɔapɔn adwuma no kyekyɛɛ nkratawa no bi maa wɔn a wɔrebɛfro keteke na wɔde bi guguu nkurɔfo afie apon ano nkrataa nnaka mu. Wɔ nkurow te sɛ Brest ne Limoges—a agye din wɔ dɔtebo ho—mu no, nkurɔfo a na wɔakɔhwɛ sini apɔn anadwo 11:00 no ka wɔn a wogyee nkratawa no bi ɛda no awiei koraa no ho. Wogyee nkratawa no nkae kyekyɛɛ no ɛda a edi hɔ anɔpa.

Nea Efii Mu Bae

Ɔdansefo biako kyerɛwee sɛ: “Yɛn atamfo no susuw sɛ wɔrema yɛayɛ mmerɛw. Nanso, wɔahyɛ yɛn den mmom.” Wɔ asafo dodow no ara mu no, Adansefo bɛboro ɔha biara mu 75 na wonyaa mu kyɛfa saa da no, ebinom de nnɔnhwerew 10, 12, anaa 14 na ɛyɛɛ adwuma yi. Wɔ Hem, a ɛwɔ France atifi fam no, bere a Ɔdansefo bi kɔɔ adwuma anadwo pɔnee no, ɔkyekyɛɛ kratawa no fii anɔpa nnɔnnum kosii awia nnɔnabiɛsa. Wɔ Denain a ɛbɛn hɔ, a wɔhyehyɛɛ asafo wɔ hɔ fi afe 1906 no, Adansefo 75 de nnɔnhwerew 200 kyekyɛɛ kratawa no Fida no. Ɛmfa ho onyin, yare, ne wim tebea a na ɛnyɛ papa no, na afoforo nso asi wɔn bo sɛ wobenya mu kyɛfa. Sɛ nhwɛso, wɔ Le Mans no, nnipa baasa a wɔwɔ wɔn mfirihyia 80 mu de nnɔnhwerew abien de nkratawa no guguu nkurɔfo afie apon ano nkrataa nnaka mu, na Ɔdansefo bi a na ɔte mmubuafo akongua mu de nkratawa no memae wɔ keteke gyinabea bi anim. Na hwɛ sɛnea na ɛhyɛ nkuran sɛ wubehu sɛ Adansefo a na anka wɔayɛ mmerɛw no pii renya dwumadi titiriw yi mu kyɛfa!

Akyinnye biara nni ho sɛ nkratawa kyekyɛ yi dii adanse kɛse. Nnipa ahorow nyinaa, wɔn a ɛyɛ den sɛ yɛbɛto wɔn mu pii wɔ fie no, nsa kaa kratawa no bi. Nnipa pii tee nka sɛ adeyɛ yi dii dwuma pii sen Adansefo no ahiade ho dwuma kɛkɛ a edii. Nnipa pii buu no sɛ ɛyɛ ahofadi a wɔperee a ɛbɛma Franceni biara anya hokwan de n’ahonim adi dwuma na ɔde ne ho ahyɛ ɔsom biara a ɔpɛ mu. Nea edi eyi ho adanse ne sɛ ɔmanfo no pii hwehwɛɛ nkratawa no foforo sɛ wɔde bɛma wɔn nnamfo, wɔn yɔnkonom, anaa wɔn abusuafo.

Yiw, ɛyɛ Yehowa Adansefo a wɔwɔ France anigye kɛse sɛ wɔbɛma nkurɔfo ahu Yehowa din na wɔabɔ Ahenni nneɛma ho ban. (1 Petro 3:15) Wofi koma nyinaa mu hwɛ kwan sɛ wobetumi ‘atra ase komm, na wɔn ho adwo wɔn, onyamesom pa ne abrabɔ a ɛho yɛ nyam nyinaa’ mu, ɛne sɛ nnipa mpempem pii bɛba abɛka wɔn ho na wɔne wɔn ayi wɔn soro Agya, Yehowa, ayɛ.—1 Timoteo 2:2.

[Ase hɔ asɛm]