Wɔasiesie Yɛn Koraa Sɛ Onyankopɔn Asɛm Akyerɛkyerɛfo
Wɔasiesie Yɛn Koraa Sɛ Onyankopɔn Asɛm Akyerɛkyerɛfo
‘Onyankopɔn na wama yɛafata ayɛ asomfo.’—2 KORINTOFO 3:5, 6.
1, 2. Asɛnka ho mmɔden bɛn na ɛtɔ da a wɔbɔ, nanso dɛn nti na ɛntaa nyɛ yiye?
SƐ WƆMA wo adwuma bi a womfata sɛ woyɛ a, wote nka dɛn? Susuw ho hwɛ: Wɔde nneɛma a wuhia no abegu w’anim, na nnwinnade a wubehia no nyinaa wɔ hɔ. Nanso wunnim ɔkwan a wobɛfa so ayɛ adwuma no. Nea ɛhaw adwene koraa ne sɛ, adwuma yi gye ntɛmpɛ. Nkurɔfo ani da wo so. Hwɛ abasamtu ara a ɛbɛyɛ!
2 Asɛnnennen a ɛte saa nyɛ nsusuwii hunu ara kwa. Susuw nhwɛso bi ho hwɛ. Ɛtɔ mmere bi a, Kristoman asɔre ahorow no bi bɔ mmɔden sɛ wɔbɛyɛ nhyehyɛe ayɛ afie afie asɛnka adwuma no bi. Nanso, mpɛn pii no wɔn mmɔdenbɔ no nkosi hwee, na ɛba awiei wɔ adapɛn anaa asram kakraa bi mu. Dɛn ntia? Kristoman mmoaa wɔn akyidifo mma wɔmfata mmaa adwuma no. Mfe pii a asɔfo no de asua ade wɔ wiase ne nyamekyerɛ sukuu ahorow mu nyinaa akyi no, wɔmfata mma saa asɛnka adwuma no mpo. Dɛn nti na yebetumi aka saa?
3. Asɛm bɛn na wɔde dii dwuma mprɛnsa wɔ 2 Korintofo 3:5, 6, na ɛkyerɛ dɛn?
3 Onyankopɔn Asɛm kyerɛkyerɛ nea ɛma obi fata sɛ Kristoni ɔsɛmpakafo no mu. Honhom kaa ɔsomafo Paulo ma ɔkyerɛwee sɛ: “Ɛnyɛ sɛ yefi yɛn ankasa mu fata sɛ yebesusuw ahu biribi sɛ efi yɛn mu, na mmom yɛn fata a yɛfata no fi Nyankopɔn mu. Ɔno na wama yɛafata ayɛ . . . asomfo.” (2 Korintofo 3:5, 6) Hyɛ asɛm a wɔde dii dwuma mprɛnsa wɔ ha no nsow—“fata a yɛfata.” Dɛn na ɛkyerɛ? Vine’s Expository Dictionary of Biblical Words ka sɛ: “Sɛ wɔde ka nneɛma ho asɛm a, [mfitiase Hela asɛmfua no] kyerɛ ‘eye’. . . ; sɛ ɛfa nnipa ho a, ɛkyerɛ ‘ahokokwaw,’ ‘fata a wɔfata.’” Enti obi a “ɔfata” no ho akokwaw na ɔfata sɛ ɔyɛ adwuma a wɔde ahyɛ no nsa. Yiw, asɛmpa no ho asomfo anokwafo no fata sɛ wɔyɛ adwuma yi. Wɔn ho akokwaw, na wɔfata sɛ wɔka asɛm no.
4. (a) Ɔkwan bɛn so na Paulo nhwɛso no kyerɛ sɛ ɛnyɛ nnipa atitiriw kakraa bi na wotumi fata sɛ wɔbɛyɛ Kristofo som adwuma no? (b) Dɛn ne akwan abiɛsa a Yehowa nam so ma yɛfata sɛ asomfo no?
4 Nanso ɛhefa na fata a wɔfata no fi? Efi wɔn dom akyɛde a wɔwɔ mu? Ɛyɛ wɔn adwene a ɛkorɔn? Ɛyɛ biribi a wosuae wɔ sukuu ahorow a ɛwɔ din mu? Ɛda adi sɛ na ɔsomafo Paulo wɔ eyinom nyinaa bi. (Asomafo no Nnwuma 22:3; Filipifo 3:4, 5) Nanso, ɔde ahobrɛase gye toom sɛ fata a ɔfata sɛ ɔsomfo no mfi sukuupɔn bi mu adesua, na mmom efi Yehowa Nyankopɔn. So nnipa atitiriw kakraa bi na wotumi fata? Paulo kyerɛwee ‘yɛn fata a yɛfata’ no ho asɛm kɔmaa Korintofo asafo no. Ɛda adi sɛ ɛno kyerɛ sɛ Yehowa hwɛ ma n’asomfo anokwafo nyinaa ho kokwaw, na wotumi yɛ adwuma a ɔde ahyɛ wɔn nsa no. Ɔkwan bɛn so na Yehowa ma nokware Kristofo fata nnɛ? Ma yensusuw akwan abiɛsa a ɔfa so yɛ saa no ho: (1) N’asɛm, (2) ne honhom kronkron no, ne (3) n’asase so ahyehyɛde no.
Yehowa Asɛm Ma Yɛfata
5, 6. Nkɛntɛnso bɛn na Kyerɛwnsɛm no wɔ wɔ nokware Kristofo so?
5 Nea edi kan no, ɔkwan bɛn so na Onyankopɔn Asɛm boa yɛn ma yɛfata sɛ asomfo? Paulo kyerɛwee sɛ: “Kyerɛw nyinaa fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn. Na Onyankopɔn nipa ayɛ pɛ a wɔasiesie no koraa ama nnwuma pa nyinaa.” (2 Timoteo 3:16, 17) Enti Kyerɛw Kronkron no ‘siesie yɛn, ɛma yɛfata’ sɛ yɛbɛyɛ ‘adwuma pa’ a ɛne sɛ yɛbɛkyerɛkyerɛ nkurɔfo Onyankopɔn Asɛm. Na Kristoman asɔre ahorow no akyidifo no nso ɛ? Wɔwɔ Bible. Ɔkwan bɛn so na nhoma biako betumi aboa nnipa binom ma wɔn ho akokwaw sɛ asomfo, nanso entumi mma afoforo nyɛ saa? Mmuae no gyina su a yekura wɔ Bible no ho so.
6 Awerɛhosɛm ne sɛ, wɔn a wɔkɔ asɔre no pii nnye Bible mu asɛm no nni “sɛ Onyankopɔn asɛm, sɛnea ɛte ampa.” (1 Tesalonikafo 2:13) Kristoman agu wɔn ho anim ase wɔ eyi mu. Bere a asɔfo de mfe pii sua ade wɔ nyamekyerɛ sukuu ahorow mu no, so asiesie wɔn koraa ma wɔayɛ Onyankopɔn Asɛm akyerɛkyerɛfo? Ɛnte saa ankasa. Nea ɛte ne sɛ, ansa na adesuafo no binom befi wɔn nyamekyerɛ sukuu ase no na wogye Bible di, nanso wobewie no, na wɔadan akyinnyegyefo! Ɛno akyi no, sɛ́ anka wɔbɛka Onyankopɔn Asɛm—a wɔn mu dodow no ara nnye nni bio—no, nneɛma foforo na wɔde yɛ wɔn som adwuma, de wɔn ho gyigye amammuisɛm mu akyinnyegye mu gyina afã bi akyi, hyɛ asɛmpa a egyina honam fam nneɛma so ho nkuran, anaasɛ wosi nnipa nyansapɛ so dua wɔ wɔn asɛnka mu. (2 Timoteo 4:3) Nanso, nokware Kristofo di Yesu Kristo nhwɛso akyi.
7, 8. Ɔkwan bɛn so na sɛnea Yesu yɛɛ n’ade wɔ Onyankopɔn Asɛm ho no ma ɔdaa nsow wɔ ne bere so nyamesom akannifo no ho?
7 Yesu amma ne bere so nyamesom akannifo no annan n’adwene. Sɛ́ ebia na Yesu rekyerɛkyerɛ nnipakuw ketewaa bi, te sɛ n’asomafo no, anaa nnipadɔm pii no, ɔde kyerɛw kronkron no dii dwuma yiye. (Mateo 13:10-17; 15:1-11) Ɔkwan a ɔfaa so yɛɛ ade yi ma ɔdaa nsow wɔ ne bere so nyamesom akannifo no ho. Wɔampene so koraa sɛ mpapahwekwaa no bɛhwehwɛ Onyankopɔn nneɛma a emu dɔ no mu. Nokwarem no, na ɛnyɛ den saa bere no sɛ ɔkyerɛkyerɛfo bi bɛka sɛ Bible mu nsɛm bi wɔ hɔ a emu dɔ a enti gye sɛ osuani a ɔbɛn no paa nkutoo na ɛsɛ sɛ ɔne no ka ho asɛm—na ɛno mpo no, na wɔkasa brɛoo bere a wɔakata wɔn ti. Na saa nyamesom akannifo no kura gyidihunu wɔ Bible no afã horow bi a wobesusuw ho no ho te sɛ nea na wɔyɛ wɔ Onyankopɔn din a wɔbɛbɔ ho no ara pɛ!
8 Ná Kristo nte saa. Na ogye di sɛ ɛnyɛ nnipa kakraa bi na ɛsɛ sɛ wosusuw ‘asɛm biara a efi Yehowa anom’ ho, na mmom nnipa nyinaa. Ná Yesu ani nnye ho sɛ ɔbɛma nhomanimfo kuw titiriw bi nkutoo ate Kyerɛwnsɛm no ase. Ɔka kyerɛɛ n’asuafo no sɛ: “Nea meka mekyerɛ mo esum mu no, monka no hann mu, na nea mote no mo asom no, mompae mu nka no adan atifi.” (Mateo 4:4; 10:27) Ná Yesu wɔ ɔpɛ a emu yɛ den sɛ ɔbɛka Onyankopɔn ho nimdeɛ a ɔwɔ no ho asɛm akyerɛ nnipa dodow biara a obetumi.
9. Ɔkwan bɛn so na nokware Kristofo de Bible no di dwuma?
9 Ɛsɛ sɛ yɛn nkyerɛkyerɛ gyina Onyankopɔn Asɛm so titiriw. Sɛ nhwɛso no, sɛ yɛma ɔkasa wɔ Yehowa Adansefo Ahenni Asa so a, mpɛn pii no ɛnyɛ nea ehia ara ne sɛ yɛbɛkenkan nsɛm bi a wɔapaw afi Bible mu kɛkɛ. Ebehia sɛ yɛkyerɛkyerɛ mu, ma nhwɛso, na yɛde kyerɛwsɛm a yɛreka ho asɛm no di dwuma. Yɛn botae ne sɛ yebeyi nkrasɛm no afi Bible no mu na yɛde adua yɛn atiefo no komam. (Nehemia 8:8, 12) Sɛ ehia sɛ yɛde afotu anaa nteɛso ma a, ɛsɛ sɛ yɛde Bible no di dwuma. Ɛwom sɛ Yehowa nkurɔfo ka kasa horow pii na wofi aman horow so de, nanso wɔn nyinaa kyerɛ obu ma Nhoma a ɛsen biara—Bible no.
10. Nkɛntɛnso bɛn na Bible mu nsɛm a efi honhom mu no betumi anya wɔ yɛn so?
10 Sɛ yɛde Bible nkrasɛm no di dwuma saa kwan no so a, enya tumi. (Hebrifo 4:12) Ɛka nkurɔfo ma wɔyɛ nsakrae wɔ wɔn asetra mu, te sɛ nneyɛe a ɛne Kyerɛwnsɛm nhyia a ɛne aguamammɔ, awaresɛe, abosonsom, asabow, ne korɔnbɔ a wogyae no. Aboa nnipa pii ma wɔayi nipasu dedaw no agu hɔ ahyɛ nipasu foforo no. (Efesofo 4:20-24) Yiw, sɛ yɛkyerɛ obu ma Bible no sen nnipa nsusuwii anaa atetesɛm biara, na yefi nokwaredi mu de di dwuma a, ebetumi ama yɛafata a wɔasiesie yɛn koraa sɛ Onyankopɔn Asɛm akyerɛkyerɛfo.
Yehowa Honhom Ma Yɛfata
11. Dɛn nti na wɔka Onyankopɔn honhom kronkron no ho asɛm sɛ “okyigyinafo” ma ɛfata?
11 Nea ɛto so abien no, ma yensusuw dwuma a Yehowa honhom kronkron, anaa adeyɛ tumi no di, na ama yɛafata no ho nhwɛ. Ɛnsɛ sɛ yɛma yɛn werɛ fi da sɛ Yehowa honhom no wɔ tumi sen honhom biara. Yehowa ama ne Dɔba no tumi sɛ ɔmfa tumi kɛse yi nni dwuma mmoa nokware Kristofo nyinaa. Sɛnea ɛfata no, Yesu kaa honhom kronkron no ho asɛm sɛ “okyigyinafo.” (Yohane 16:7) Ɔhyɛɛ n’akyidifo nkuran sɛ wommisa Yehowa na ɔmma wɔn saa honhom no, na ɔmaa wɔn awerɛhyem sɛ Yehowa bɛma wɔn nea ɛsɛ.—Luka 11:10-13; Yakobo 1:17.
12, 13. (a) Dɛn nti na ehia sɛ yɛbɔ mpae ma honhom kronkron no boa yɛn wɔ yɛn som adwuma mu? (b) Ɔkwan bɛn so na Farisifo no daa no adi sɛ na honhom kronkron no nyɛ adwuma wɔn mu?
12 Ehia sɛ yɛbɔ mpae de bisa honhom kronkron da biara, na aboa yɛn wɔ yɛn som adwuma no mu titiriw. Nkɛntɛnso bɛn na saa adeyɛ tumi no betumi anya wɔ yɛn so? Ebetumi ayɛ yɛn adwene ne yɛn koma mu adwuma, aboa yɛn ma yɛayɛ nsakrae, anyin honhom fam, na yɛde nipasu foforo no asi dedaw no ananmu. (Kolosefo 3:9, 10) Ebetumi aboa yɛn ma yɛanya su horow a ɛsom bo te sɛ Kristo de no bi. Yɛn mu pii betumi afi yɛn tirim aka asɛm a ɛwɔ Galatifo 5:22, 23 no. Saa nkyekyɛm no bobɔ Onyankopɔn honhom aba no din. Nea edi kan ne ɔdɔ. Saa su no ho hia ma yɛn som adwuma no. Dɛn ntia?
13 Ɔdɔ ne ade kɛse a ɛkanyan yɛn. Ɔdɔ ma Yehowa ne mfɛfo nnipa na ɛka nokware Kristofo ma wɔka asɛmpa no kyerɛ. (Marko 12:28-31) Sɛ yenni saa ɔdɔ no bi a, yɛrentumi mfata ankasa sɛ Onyankopɔn Asɛm akyerɛkyerɛfo. Hyɛ nsonsonoe a na ɛda Yesu ne Farisifo no ntam no nsow. Mateo 9:36 ka Yesu ho asɛm sɛ: “Na ohuu nkurɔfo akuwakuw no, ne yam hyehyee no maa wɔn, efisɛ na wɔabrɛ, na wɔsam hɔ sɛ nguan a wonni hwɛfo.” Na Farisifo no bu mpapahwekwaa no dɛn? Wɔkae sɛ: ‘Nkurɔfokuw yi a wonnim Mmara no, wɔadome wɔn!’ (Yohane 7:49) Ná saa Farisifo no nni ɔdɔ mma nkurɔfo no, na mmom animtiaa nkutoo na na wobu wɔn. Ɛda adi pefee sɛ na Yehowa honhom nyɛ adwuma wɔ wɔn mu.
14. Ɔkwan bɛn so na ɛsɛ sɛ ɔdɔ ho nhwɛso a Yesu daa no adi wɔ ne som adwuma mu no kanyan yɛn?
14 Ná Yesu wɔ tema ma nkurɔfo. Ná onim yaw a wodi no. Ná onim sɛ wɔayɛ wɔn ayayade, adidi wɔn ho, abɔ wɔn apansam sɛ nguan a wonni ɔhwɛfo. Yohane 2:25 ka kyerɛ yɛn sɛ Yesu “ankasa nim nea ɛwɔ onipa mu.” Esiane sɛ na Yesu yɛ Yehowa Dwumayɛni a Waben wɔ adebɔ mu nti, na ɔte onipa su ase yiye. (Mmebusɛm 8:30, 31) Saa ntease no maa ne dɔ no mu dɔe. Ɛmmra sɛ ɔdɔ a ɛte saa bɛkanyan yɛn asɛnka dwumadi no! Sɛ yɛte nka sɛ ɛsɛ sɛ yenya nkɔanim wɔ eyi mu a, momma yɛmmɔ mpae nsrɛ Yehowa honhom kronkron na yɛnyɛ ade ma ɛne yɛn mpaebɔ nhyia. Yehowa betie yɛn. Ɔbɛsoma ne honhom a biribiara ntumi nsianka no no ma aboa yɛn ma yɛayɛ te sɛ Kristo a ɔfatae koraa sɛ ɔbɛka asɛmpa no.
15. Ɔkwan bɛn so na nsɛm a ɛwɔ Yesaia 61:1—3 fa Yesu ho na bere koro no ara nso ɛpa kyerɛwfo ne Farisifo no ho ntama?
15 Yesu fata a na ɔfata no fi he? Ɔkae sɛ: “[Yehowa, NW] honhom wɔ me so.” (Luka 4:17-21) Yiw, Yehowa ankasa na ɔnam ne honhom kronkron so paw Yesu. Ná Yesu nhia adansedi foforo biara. So honhom kronkron no na ɛpaw ne bere so nyamesom akannifo no? Dabi. Na saa ara nso na na wonsiesiee wɔn sɛ wɔbɛma Yesaia 61:1-3, a Yesu kenkanee kyerɛe sɛ ɛfa n’ankasa ho no, aba mu. Yɛsrɛ sɛ kenkan nkyekyɛm no na w’ankasa hwɛ ahwehwɛde a na kyerɛwfo ne Farisifo no ntumi nnu ho no. Ná wonni asɛmpa biara a wɔbɛka akyerɛ ahiafo. Na ɔkwan bɛn so na na wɔbɛpae ahofadi akyerɛ nnommum na wɔabue anifuraefo aniwa? Honhom fam no, wɔn ankasa aniwa afura na na nnipa atetesɛm afa wɔn nnommum! Nea ɛnte sɛ saa nnipa no, so yɛfata sɛ yɛkyerɛkyerɛ nkurɔfo?
16. Ahotoso bɛn na Yehowa nkurɔfo a wɔwɔ hɔ nnɛ wɔ wɔ fata a wɔfata sɛ asomfo no ho?
16 Ɛwom, yensuaa ade wɔ Kristoman sukuu akɛse mu. Nyamekyerɛ sukuu bi mpaw yɛn sɛ akyerɛkyerɛfo. Ɛnde so eyi nti yɛmfata? Ɛnte saa koraa! Yehowa apaw yɛn sɛ N’adansefo. (Yesaia 43:10-12) Sɛ yɛbɔ mpae srɛ ne honhom na yɛyɛ ade ma ɛne no hyia a, na yɛfata sen biara. Ɛwom, yɛnyɛ pɛ na yentumi nnu nhwɛso a Ɔkyerɛkyerɛfo Kɛse, Yesu Kristo yɛe no ho koraa. Nanso, so ɛnsɛ sɛ yɛde aseda ma sɛ Yehowa de ne honhom di dwuma ma yɛfata na osiesie yɛn sɛ N’asɛm no akyerɛkyerɛfo?
Yehowa Ahyehyɛde no Ma Yɛfata
17-19. Ɔkwan bɛn so na nhyiam ahorow anum a Yehowa ahyehyɛde no ayɛ no boa ma yɛfata sɛ asomfo?
17 Afei ma yensusuw ɔkwan a ɛto so abiɛsa a Yehowa nam so siesie yɛn sɛ N’asɛm no akyerɛkyerɛfo—n’asase so asafo, anaa ahyehyɛde a ɛtete yɛn ma yɛyɛ asomfo no ho. Ɔkwan bɛn so? Wode susuw nkyerɛkyerɛ ho nhyehyɛe a yenya mu kyɛfa no ho hwɛ! Dapɛn biara no, yɛkɔ Kristofo nhyiam anum. (Hebrifo 10:24, 25) Yehyiam wɔ akuw nketewa mu wɔ Asafo Nhoma Adesua ase nya Bible adesua a emu dɔ mu kyɛfa denam adesua nhoma a Yehowa ahyehyɛde no de ama so. Ɛdenam tie a yebetie na yɛama mmuae so no, yesua biribi fi adesua no mu na yɛhyɛ yɛn ho yɛn ho den. Afei nso, nhoma adesua sohwɛfo no kyerɛkyerɛ yɛn sɛ ankorankoro na ɔma n’ani ku yɛn ho. Yedi honhom fam aduan pii wɔ Baguam Nhyiam ne Ɔwɛn-Aban Adesua ase.
18 Wɔayɛ yɛn Teokrase Ɔsom Sukuu no sɛ ɛmma yɛn sɛnea yɛbɛkyerɛkyerɛ ho akwankyerɛ. Sɛ yesiesie asuafo kasa ahorow a, ɛma yehu sɛnea yɛde Onyankopɔn Asɛm di dwuma kyerɛkyerɛ nsɛm ahorow mu. (1 Petro 3:15) So wɔama wo dwumadi sɛ ma ɔkasa wɔ asɛmti bi a ɛte sɛ nea wowɔ ho nimdeɛ dedaw, nanso wuhui sɛ woresua biribi foforo wɔ ho pɛn? Ɛtaa si. Biribiara nni hɔ a ɛma nimdeɛ a yɛwɔ wɔ asɛm bi ho no mu dɔ sen sɛ yɛbɛkyerɛkyerɛ afoforo. Sɛ wɔamma yɛn dwumadi bi mpo a, yebetumi asua sɛ yɛbɛyɛ akyerɛkyerɛfo pa ara. Yebetumi ahu su pa bi wɔ osuani biara ho, na yebetumi asusuw ɔkwan a yɛbɛfa so asuasua su horow a ɛtete saa no ho.
19 Wɔayɛ Ɔsom Nhyiam no nso na asiesie yɛn sɛ Onyankopɔn Asɛm akyerɛkyerɛfo. Dapɛn biara yetie ɔkasa ahorow a ɛyɛ dɛ, nsɛm ho nkɔmmɔbɔ, ne ɔyɛkyerɛ a ɛfa yɛn som adwuma no ho. Nsɛm bɛn na yɛbɛka akyerɛ? Ɔkwan bɛn so na yebetumi adi nsɛnnennen soronko ho dwuma wɔ yɛn baguam asɛnka mu? Asɛnka adwuma no afã bɛn na abue ama yɛn a ebia ebehia sɛ yɛfa so hwehwɛ nnipa pii? Dɛn na ɛbɛboa yɛn ma yɛatu mpɔn kɛse sɛ akyerɛkyerɛfo bere a yɛyɛ sankɔhwɛ ne Bible adesua ahorow no? (1 Korintofo 9:19-22) Wobua nsɛmmisa a ɛtete saa kyerɛkyerɛ mu yiye wɔ Ɔsom Nhyiam ase. Nhyiam no afã pii gyina Yɛn Ahenni Som, adwinnade foforo a wɔde ama yɛn a esiesie yɛn ma yɛn adwuma a ɛho hia no.
20. Ɔkwan bɛn so na yebetumi anya asafo nhyiam ne nhyiam akɛse so mfaso?
20 Sɛ yesiesie yɛn ho kɔ yɛn nhyiam ahorow, na afei yɛde nea yesua no yɛ adwuma sɛ akyerɛkyerɛfo a, yenya ntetee a ɛkɔ akyiri. Nanso ɛnyɛ ne nyinaa ne no. Yɛwɔ nhyiam akɛse—amansin ne amantam nhyiam—a wɔayɛ sɛ ensiesie yɛn sɛ Onyankopɔn Asɛm akyerɛkyerɛ. Na hwɛ sɛnea yɛhwɛ kwan sɛ yɛbɛyɛ komm atie asɛm no na yɛde afotu a ɛte saa no adi dwuma!—Luka 8:18.
21. Adanse bɛn na ɛkyerɛ sɛ yɛn ntetee no atu mpɔn, na ɛho anuonyam no yɛ hena dea?
21 So ntetee a Yehowa de ama no tu mpɔn? Ma nokwasɛm no ankasa nna no adi. Afe biara wɔboa nnipa ɔpehaha pii ma wosua Bible mfitiase nkyerɛkyerɛ ma wɔtra ase ma ɛne nea Onyankopɔn hwehwɛ fi wɔn hɔ hyia. Yɛredɔɔso, nanso yɛn mu biara rentumi mfa nkɔso no ho anuonyamhyɛ mma ne ho. Ɛsɛ sɛ yehu nsɛm sɛnea Yesu hui no. Ɔkae sɛ: “Obi ntumi mma me nkyɛn, gye sɛ agya a ɔsomaa me no twe no.” Te sɛ tete asomafo no, yɛn mu dodow no ara nyɛ nhomanimfo na yɛyɛ mpapahwekwaa. (Yohane 6:44; Asomafo no Nnwuma 4:13) Yɛn nkonimdi gyina Yehowa a ɔtwetwe nnipa komapafo ba nokware no mu no so. Ɔsomafo Paulo kaa no yiye sɛ: “Miduae, Apolo guguu so nsu, na Onyankopɔn na ɔma enyinii.”—1 Korintofo. 3:6.
22. Dɛn nti na ɛnsɛ sɛ yɛma yɛn abam bu tra so da wɔ Kristofo som adwuma no a yɛde yɛn ho behyem no ho?
22 Yiw, Yehowa Nyankopɔn de ne ho agye adwuma a yɛyɛ sɛ N’asɛm akyerɛkyerɛfo no mu denneennen. Ɛnyɛ bere nyinaa na yɛbɛte nka sɛ yɛfata sɛ akyerɛkyerɛfo. Kae, Yehowa na ɔtwetwe nkurɔfo ba n’ankasa ne ne Ba no nkyɛn. Yehowa na ɔnam N’asɛm, ne honhom kronkron, ne n’asase so ahyehyɛde no so ma yɛfata sɛ asomfo. Momma yɛmfa Yehowa ntetee no nni dwuma denam nneɛma pa a mprempren ɔde rema yɛn na asiesie yɛn koraa sɛ Onyankopɔn Asɛm akyerɛkyerɛfo no so!
Wubebua Dɛn?
• Ɔkwan bɛn so na Bible no siesie yɛn ma asɛnka adwuma no?
• Dwuma bɛn na honhom kronkron no di wɔ fata a yɛfata sɛ asomfo no mu?
• Akwan bɛn so na Yehowa asase so ahyehyɛde no boaa wo ma wofatae sɛ asɛmpa no ho sɛnkafo?
• Dɛn nti na sɛ yɛreyɛ ɔsom adwuma no a, yebetumi anya ahotoso?
[Adesua no ho Nsɛmmisa]
[Mfonini wɔ kratafa 25]
Sɛ́ Onyankopɔn Asɛm kyerɛkyerɛfo no, Yesu daa nnipa ho dɔ adi