Wogyinaa Wɔn Honam Mu Nsɔe Ano
Wogyinaa Wɔn Honam Mu Nsɔe Ano
“Wɔama me ɔhonam mu nsɔe, Satan bɔfo, sɛ ɔmmɛbɔ me akuturuku.”—2 KORINTOFO 12:7.
1. Nsɛnnennen bɛn na nnipa binom rehyia nnɛ?
SO WOREHYIA sɔhwɛ bi? Sɛ ɛte saa a, ɛnyɛ wo nko. Wɔ “mmere a emu yɛ den” yi mu no, Kristofo anokwafo regyina ɔsɔretia a ano yɛ den, mmusua mu nsɛnnennen, ɔyare, sikasɛm mu dadwen, nkate fam ahohia, wɔn adɔfo a wowuwu, ne nsɛnnennen afoforo ano. (2 Timoteo 3:1-5) Wɔ aman bi so no, aduankɔm ne akodi de nnipa pii nkwa ato asiane mu.
2, 3. Adwene a ɛmfata bɛn na yebetumi anya wɔ ɔhaw ahorow a yehyia a ɛte sɛ nsɔe no ho, na ɔkwan bɛn so na ebetumi ayɛ asiane?
2 Nsɛnnennen a ɛtete saa betumi abunkam obi so, ne titiriw, sɛ ohyia ɔhaw ahorow wɔ bere koro mu a. Hyɛ nea Mmebusɛm 24:10 ka no nsow: “Wo nsa mu gow ahohia da mu a, w’ahoɔden sua.” Yiw, yɛn sɔhwɛ ahorow a yɛbɛma abu yɛn abam no betumi ama yɛn ahoɔden so atew na ebetumi ama yɛn bo a yɛasi sɛ yebegyina akodu awiei no mu agow. Ɔkwan bɛn so?
3 Wiɛ, abasamtu betumi ama yɛayɛ nkurɔfo a yɛnhwehwɛ nneɛma mu yiye. Sɛ nhwɛso no, ɛnyɛ den sɛ yebegugu yɛn ahokyere mu na yɛasu yɛn ho mmɔbɔ. Ebinom mpo betumi asu agu Onyankopɔn so sɛ, “Dɛn nti na woama asɛm yi ato me?” Sɛ adwene a ɛnteɛ yi gye ntini wɔ obi komam a, ebetumi asɛe n’anigye ne n’ahotoso. Onyankopɔn somfo abam betumi abu araa ma wɔagyae sɛ ɔbɛko “gyidi ko pa” no.—1 Timoteo 6:12.
4, 5. Wɔ nsɛm bi mu no, ɔkwan bɛn so na Satan ho wɔ yɛn haw ahorow mu, nanso ahotoso bɛn na yebetumi anya?
4 Ɛda adi pefee sɛ ɛnyɛ Yehowa Nyankopɔn na ɔma yehyia sɔhwɛ. (Yakobo 1:13) Esiane mmɔden a yɛbɔ sɛ yebedi no nokware nti na ɛma yehyia sɔhwɛ ahorow bi. Nokwarem no, Yehowa tamfo kɛse, Satan Ɔbonsam, de n’ani asi wɔn a wɔsom Yehowa nyinaa so. ‘Nneɛma nhyehyɛe yi nyame’ no rebɔ mmɔden sɛ ɔde ne bere tiaa a aka ama no no bɛma obiara a ɔdɔ Yehowa no agyae Yehowa apɛdeyɛ. (2 Korintofo 4:4) Satan bɔ mmɔden biara sɛ ɔde amanehunu bɛba yɛn nuanom a wɔwɔ wiase nyinaa no so. (1 Petro 5:9) Nokwarem no, ɛnyɛ Satan na ɔde yɛn haw nyinaa ba, nanso obetumi afa ɔhaw ahorow a yehyia no so ako atia yɛn, sɛnea ɛbɛyɛ a yɛn abam bebu kɛse.
5 Nanso ɛmfa ho sɛnea Satan anaa n’akode no te biara no, yebetumi adi no so nkonim! Yɛbɛyɛ dɛn atumi ahu saa? Efisɛ Yehowa ko ma yɛn. Wahwɛ ahu sɛ n’asomfo behu Satan akwan nyinaa. (2 Korintofo 2:11) Nokwarem no, Onyankopɔn Asɛm ka sɔhwɛ ahorow a nokware Kristofo hyia no ho nsɛm pii. Wɔ ɔsomafo Paulo fam no, Bible no de asɛm “honam mu nsɔe” na edii dwuma. Dɛn ntia? Ma yɛnhwɛ sɛnea Onyankopɔn Asɛm kyerɛkyerɛ saa kasasin no mu nhwɛ. Ɛno ansa na yebehu sɛ ɛnyɛ yɛn nko na yehia Yehowa mmoa na ama yɛadi sɔhwɛ ahorow so nkonim.
Nea Enti a Sɔhwɛ Ahorow Te sɛ Nsɔe
6. Dɛn na “honam mu nsɔe” a Paulo kaa ho asɛm no kyerɛ, na na nsɔe no yɛ dɛn?
6 Honhom kaa Paulo a na wɔasɔ no ahwɛ pii no ma ɔkyerɛwee sɛ: “Wɔama me ɔhonam mu nsɔe, Satan bɔfo, sɛ ɔmmɛbɔ me akuturuku, na mamma me ho so.” (2 Korintofo 12:7) Ná dɛn ne Paulo honam mu nsɔe yi? Wiɛ, akyinnye biara nni ho sɛ nsɔe a ɛhyɛ were mu bɛyɛ yaw. Enti kasakoa no betumi akyerɛ biribi a na ɛma Paulo di yaw—sɛ ebia honam mu, nkate fam, anaa n’abien nyinaa. Ebetumi aba sɛ na Paulo wɔ aniyare, anaa honam mu mmerɛwyɛ bi. Anaasɛ nsɔe no betumi ayɛ nkurɔfo a wɔkasa tiaa fata a na Paulo fata sɛ ɔsomafo, na wogyee ne nkyerɛkyerɛ ne n’adwuma ho akyinnye no. (2 Korintofo 10:10-12; 11:5, 6, 13) Sɛnea ɛte biara no, nsɔe no kɔɔ so hyɛɛ hɔ, a wɔantumi anyi.
7, 8. (a) Dɛn na asɛm ‘bɔ akuturuku’ no kyerɛ? (b) Dɛn nti na ehia sɛ yegyina nsɔe biara a ɛwowɔ yɛn no ano mprempren?
7 Hyɛ no nsow sɛ nsɔe no kɔɔ so wowɔɔ Paulo. Nea yebetumi ahyɛ no nsow no, wonyaa Hela adeyɛ asɛm a Paulo de dii dwuma wɔ ha no fii asɛmfua a wɔkyerɛ ase “akuturuku” mu. Wɔde saa asɛmfua no dii dwuma sɛnea ɛte wɔ Mateo 26:67, na wɔde dii dwuma sɛnkyerɛnne kwan so wɔ 1 Korintofo 4:11. Ɛda adwene a ɛne sɛ wɔbɔ obi akuturuku adi wɔ saa nkyekyɛm no mu. Esiane sɛ Satan anya Yehowa ne n’asomfo ho nitan kɛse nti, ɛsɛ sɛ yɛhwɛ kwan sɛ Ɔbonsam ani begye sɛ na nsɔe bi kɔ so bobɔ Paulo akuturuku. Saa ara na sɛ ɔhonam mu nsɔe bi haw yɛn nnɛ a, Satan ani gye.
8 Enti, te sɛ Paulo no, ehia sɛ yehu sɛnea yebegyina nsɔe a ɛte saa ano. Yɛn nkwa gyina saa a yɛbɛyɛ no so! Kae sɛ Yehowa pɛ sɛ ɔma yɛn nkwa a enni awiei wɔ ne wiase foforo no mu, faako a ɔhaw ahorow a ɛte sɛ nsɔe renhaw yɛn bio. Nea ɛbɛboa ma yɛn nsa aka nkonim bo a ɛyɛ anigye yi no, Onyankopɔn ama yɛn nhwɛso pii wɔ N’asɛm kronkron, Bible no mu, a ɛkyerɛ sɛ n’asomfo anokwafo atumi agyina wɔn honam mu nsɔe ahorow ano. Ná wɔyɛ nnipa a wɔnyɛ pɛ te sɛ yɛn ara. “Adansefo mununkum” yi binom a yebesusuw wɔn ho no betumi aboa yɛn ma ‘yɛde boasetɔ atu aperepere a ɛda yɛn anim no mu mmirika.’ (Hebrifo 12:1) Nneɛma a wogyinaa ano a yebesusuw ho no betumi ama yɛanya ahotoso sɛ yebetumi agyina nsɔe biara a ebia Satan de bɛko atia yɛn no ano.
Nsɔe a na Ɛhaw Mefiboset
9, 10. (a) Ɛyɛɛ dɛn na Mefiboset benyaa honam mu nsɔe? (b) Adɔe bɛn na Dawid yɛɛ Mefiboset, na ɔkwan bɛn so na yebetumi asuasua Dawid?
9 Susuw Mefiboset, Dawid adamfo Yonatan ba no ho hwɛ. Bere a Mefiboset dii mfe anum no, wɔde amanneɛbɔ bae sɛ n’agya, Yonatan, ne ne nanabarima, Ɔhene Saulo, awu. Ehu kaa abarimaa no gyigyefo no. ‘Na ɔmaa no so. Nanso ɔreyɛ ntɛm aguan no, ɔhwee ase, ma ɔtɔɔ apakye.’ (2 Samuel 4:4) Ɛbɛyɛ sɛ dɛmdi yi yɛɛ nsɔe kɛse maa Mefiboset sɛ obedi so bere a na ɔrenyin no.
10 Mfe bi akyi no, Ɔhene Dawid nam ɔdɔ kɛse a na ɔwɔ ma Yonatan so yɛɛ Mefiboset adɔe. Dawid dan Saul nsase nyinaa maa no, na ɔmaa Saul somfo, Siba hwɛɛ asase yi so. Afei Dawid ka kyerɛɛ Mefiboset sɛ: ‘Wubedidi me pon so daa.’ (2 Samuel 9:6-10) Akyinnye biara nni ho sɛ adɔe a Dawid yɛɛ Mefiboset no boaa no dwudwoo ne dɛmdi ho yaw no ano. Asuade a mfaso wɔ so bɛn ara ni! Ɛsɛ sɛ yɛn nso, yɛda ayamye adi kyerɛ wɔn a wɔne ɔhonam mu nsɔe redi apere no.
11. Dɛn na Siba kae sɛ Mefiboset ayɛ, nanso yɛyɛ dɛn hu sɛ asɛm a ɔkae no nyɛ nokware? (Hwɛ ase hɔ asɛm no.)
11 Akyiri yi, na ɛsɛ sɛ Mefiboset ne honam mu nsɔe foforo di asi. Ne somfo, Siba twirii no wɔ Ɔhene Dawid a saa bere no na ɔreguan afi Yerusalem, esiane Absalom, Dawid ba, no atuatew nti no anim. Siba kae sɛ esiane sɛ Mefiboset pɛ sɛ ɔfa ahenni no nti na wahyɛ da aka Yerusalem no. * Dawid gyee Siba ntwiri no dii, na ɔdan Mefiboset nsase nyinaa de maa saa ɔtorofo no!—2 Samuel 16:1-4.
12. Dɛn na Mefiboset yɛe wɔ ne tebea no ho, na ɔkwan bɛn so na ɔyɛ nhwɛso pa ma yɛn?
12 Nanso bere a awiei koraa no Mefiboset hyiaa Dawid no, ɔkaa nea esii ankasa kyerɛɛ ɔhene no. Bere a na ɔreyɛ ahoboa akɔka Dawid ho no na Siba daadaa no sɛ, ɔbɛkɔ ama no. So Dawid siesiee mfomso yi? Ɛnyɛ ne nyinaa. Ɔkyɛɛ asase no mu maa mmarima baanu yi. Yehu nsɔe foforo wɔ Mefiboset honam mu wɔ ha nso. So ɛhaw no kɛse? So ɔkasa tiaa Dawid gyinaesi no, kae sɛ ɔne no anni no yiye? Dabi, ofi ahobrɛase mu penee ɔhene apɛde no so. Ɔde n’adwene sii nneɛma pa so, dii ahurusi sɛ Israel hene a ɔfata no asan aba asomdwoe mu. Nokwarem no, Mefiboset daa nhwɛso pa adi denam apakye, ntwiri, ne huammɔdi a otumi gyinaa ano no so.—2 Samuel 19:24-30.
Nehemia Gyinaa Ne Sɔhwɛ Ahorow Ano
13, 14. Nsɔe bɛn na na ɛsɛ sɛ Nehemia gyina ano bere a ɔsan bae sɛ ɔrebesi Yerusalem fasu no?
13 Susuw sɛnkyerɛnne kwan so nsɔe a Nehemia gyinaa ano bere a ɔsan baa Yerusalem a na afasu nni ho mu wɔ afeha a ɛto so anum A.Y.B. no ho hwɛ. Ɔbɛtoo kurow no a na enni ahobammɔ biara, na Yudafo a na wɔasan aba a wɔwɔ hɔ no atu nneɛma afra, wɔn abam abu, na wɔagu wɔn ho fĩ wɔ Yehowa ani so. Ɛwom mpo sɛ na Ɔhene Artasasta ahyɛ sɛ wɔnsan nsi Yerusalem afasu no de, nanso ankyɛ na Nehemia behui sɛ na aman a ɛbemmɛn hɔ no amradofo ani nnye adwuma a ɔrebɛyɛ no ho. “Ɛyɛɛ wɔn yaw kɛse, sɛ onipa bi aba rebɛhwehwɛ yiyedi ama Israelfo.”—Nehemia 2:10.
14 Saa asɔretiafo a wofi amannɔne nsase so yi yɛɛ nea wobetumi biara sɛ wɔbɛma Nehemia agyae adwuma no yɛ. Wɔn ahunahuna, nseku, apoobɔ—ne akwansrafo a wɔsomaa wɔn ma wobebuu n’abam—no betumi ayɛ sɛ ɔhonam mu nsɔe a na ɛkɔ so wowɔ no. So ogyaee ne ho mu maa saa atamfo no mfiri yii no? Dabi! Ɔde ne ho nyinaa too Nyankopɔn so, a wamma ne nsam angow. Enti bere a awiei koraa wɔsan too Yerusalem fasu no wiei no, ɔdɔ mu a Yehowa fi boaa Nehemia no bɛyɛɛ adanse kɛse.—Nehemia 4:1-12; 6:1-19.
15. Nsɛm a na ɛkɔ so wɔ Yudafo no mu bɛn na na ɛhaw Nehemia paa?
15 Sɛ́ amrado no, na ɛsɛ sɛ Nehemia san gyina ɔhaw pii a na ɛwɔ Onyankopɔn nkurɔfo ntam no ano. Na nsɛnnennen a ɛtete sɛɛ yi te sɛ nsɔe a na ɛwowɔ no paa efisɛ enyaa nkurɔfo no ne Yehowa ntam abusuabɔ so nkɛntɛnso. Na wɔn mu adefo gye mfɛntom akɛse, na wɔn nuanom ahiafo no, nea ɛbɛyɛ na wɔatumi atua ho aka anaa Persiafo tow no, na wɔde wɔn nsase si awowa na mpo wɔtɔn wɔn mma ma wɔsom sɛ nkoa. (Nehemia 5:1-10) Ná Yudafo pii bu Homeda so, na na wonnyi ntoboa mmoa Lewifo ne asɔrefie no. Afei nso na wɔn mu binom awareware “Asdod mmea ne Amon mmea ne Moab mmea.” Hwɛ sɛnea na eyi bɛhaw Nehemia! Nanso nsɔe yi mu biara amma n’abam ammu. Bere nyinaa na ɔda ne ho adi sɛ obi a ɔde nsi kura Onyankopɔn trenee mmara mu. Te sɛ Nehemia no, ɛmmra sɛ yɛremma afoforo nneyɛe bɔne mma yennyae ɔsom a yefi nokwaredi mu de ma Yehowa no.—Nehemia 13:10-13, 23-27.
Anokwafo Afoforo Gyinaa Ano
16-18. Ɔkwan bɛn so na abusua mu nsɛmnsɛm haw Isak ne Rebeka, Hana, Dawid, ne Hosea?
16 Nnipa a wotumi gyinaa tebea horow a na ɛhaw adwene ano no ho nhwɛso pii wɔ Bible mu. Ade biako a na ɛtaa de ɔhaw a ɛte saa ba ne abusua mu nsɛmnsɛm. Esau yerenom baanu no ‘hyɛɛ Isak ne Rebeka,’ Esau awofo no “awerɛhow.” Na mpo Rebeka kae sɛ saa mmea no ama n’asetra afono no. (Genesis 26:34, 35; 27:46) Afei susuw Hana ne sɛnea ne kora Penina ‘huruu ne bo’ esiane sɛ na ɔyɛ obonin nti no ho hwɛ. Ebetumi aba sɛ na Hana taa hyia ɔhaw yi bere a wɔwɔ fie no. Afei nso Penina yii no ahi wɔ baguam—ɛda adi sɛ wɔ abusuafo ne nnamfonom anim—bere a abusua no kɔ afahyɛ wɔ Silo no. Ná eyi te sɛ nea wɔrepia nsɔe no so ma awowɔ Hana kɛse.—1 Samuel 1:4-7.
17 Susuw nea Dawid gyinaa ano esiane n’ase, Ɔhene Saul, ninkuntwe a na ntease nnim no ho hwɛ. Nea ɛbɛyɛ na Dawid abɔ ne nkwa ho ban no, ɔkɔtraa abodan mu wɔ En-gedi sare so, faako a ɔforoo abotan ne mmepɔw atenten a ɛyɛ hu no. Na atɛnkyea no betumi ayɛ abufuw efisɛ na ɔnyɛɛ Saul bɔne biara. Nanso Dawid kɔɔ so guanee mfe pii—esiane Saul ninkuntwe nti.—1 Samuel 24:14, 15; Mmebusɛm 27:4.
18 Twa abusua mu nsɛmnsɛm a ɛtoo odiyifo Hosea no ho mfonini hwɛ. Ne yere bɛyɛɛ ɔwaresɛefo. Ná ne brasɛe no betumi ayɛ sɛ nsɔe bi a wɔde awɔ ne komam. Na hwɛ sɛnea ɛbɛyɛ sɛ ne ho yeraw no kɛse bere a ɔbea no aguamammɔ ma ɔwoo mpena mma baanu no!—Hosea 1:2-9.
19. Ɔtaa bɛn na odiyifo Makaia hyiae?
19 Ɔhonam mu nsɔe foforo ne ɔtaa. Susuw odiyifo Mikaia suahu no ho hwɛ. Hu a ohui sɛ Ɔhene Ahab ne atoro adiyifo na ɛbɔ, ne sɛ na Ahab gye wɔn atosɛm no di no, haw Mikaia kra yiye. Afei bere a Mikaia ka kyerɛɛ Ahab sɛ saa adiyifo no nyinaa nam “atoro honhom” so na ɛkasa no, dɛn na amimfo no kannifo no yɛe? Ɔbɔɔ “Mikaia sotɔre”! Nea na enye koraa ne nea Ahab yɛe wɔ kɔkɔbɔ a Yehowa de mae wɔ mmɔden a na ɔrebɔ sɛ obegye Ramot-gilead no mu no. Ahab hyɛe sɛ wɔmfa Mikaia nto nneduadan mu, na wɔntew n’aduan so. (1 Ahene 22:6, 9, 15-17, 23-28) Afei nso kae Yeremia ne ɔkwan a n’ataafo atirimɔdenfo no de no faa so no.—Yeremia 20:1-9.
20. Nsɔe bɛn na na ɛsɛ sɛ Naomi gyina ano, na ɔkwan bɛn na onyaa so akatua?
20 Ɔdɔfo bi wu nso yɛ tebea a ebetumi ayɛ sɛ honam mu nsɔe. Ná ɛsɛ sɛ Naomi gyina ne kunu ne ne mma wu a ɛyɛ yaw no ano. Bere a na ɔda so ara di saa yaw no, ɔsan kɔɔ Betlehem. Ɔka kyerɛɛ ne nnamfonom sɛ wɔmmfrɛ no Naomi, na mmom wɔmfrɛ no Mara, edin a na ɛne yaw a na ɔredi no hyia no. Awiei koraa no, Yehowa tuaa ne boasetɔ no so ka denam banana bi a akyiri yi Mesia no befii n’asefo mu a ɔma onyae so.—Rut 1:3-5, 19-21; 4:13-17; Mateo 1:1, 5.
21, 22. Ɔkwan bɛn so na Hiob hweree ne nneɛma, na ɔyɛɛ n’ade dɛn?
21 Sɛ Hiob mmoa ne ne nkoa a ɔhweree da nkyɛn a, susuw sɛnea ɛbɛyɛ sɛ ne ho dwiriw no, bere a ɔtee mpofirim sɛ ne mma du a ɔdɔ wɔn no awuwu yayaayaw no ho hwɛ. Ɛte sɛ nea n’anidaso sae prɛko pɛ! Afei bere a na Hiob nhu ne ho ano wɔ akuturuku yi ho no, Satan de yare bɔɔ no. Ebetumi aba sɛ na Hiob susuw sɛ yare bɔne yi na ebekum no. Ne yaw no ano yɛɛ den araa ma ɔtee nka sɛ sɛ owui a anka ne ho bɛtɔ no.—Hiob 1:13-20; 2:7, 8.
22 Te sɛ nea na eyinom nyinaa nnɔɔso no, ne yere de ahometew ne awerɛhow bɛka kyerɛɛ no sɛ: “Dome Onyankopɔn, na wu!” Hwɛ sɛnea na nsɔe yi ano bɛyɛ yaw wɔ ne honam a na ɛyɛ yaw no mu! Afei sɛ́ anka Hiob nnamfonom baasa no bɛkyekye ne werɛ no, wɔkataa wɔn ani kasa tiaa no sɛ wayɛ bɔne bi asie, susuwii sɛ ɛno nti na ɔrehu amane no. Sɛ yɛbɛka a, wɔn adwemmɔne no piaa nsɔe no so wɔɔ ne honam mu kɔɔ akyiri. Afei kae sɛ, na Hiob nnim nea enti a na nsɛm a ɛyɛ hu sa reto no; na saa ara nso na na onnim sɛ obefi mu afi. Nanso “eyi nyinaa mu no, Hiob anyɛ bɔne, na wammu asɛm a enni aso amma Onyankopɔn.” (Hiob 1:22; 2:9, 10; 3:3; 14:13; 30:17) Ɛmfa ho sɛ na nsɔe pii wowɔ no bere koro mu no, wannyae ne mudi mu da. Hwɛ sɛnea ɛhyɛ nkuran!
23. Ɛyɛɛ dɛn na anokwafo a yɛasusuw wɔn ho yi tumi gyinaa wɔn honam mu nsɔe ahorow ano?
23 Akyinnye biara nni ho sɛ yɛwɔ nhwɛso pii te sɛ nea yɛasusuw ho yi. Emu pii wɔ Bible no mu. Ná ɛsɛ sɛ anokwafo yi nyinaa gyina wɔn ankasa sɛnkyerɛnne kwan so nsɔe ano. Na hwɛ ɔhaw ahorow araa a wohyiae! Nanso wɔn nyinaa daa su biako adi. Wɔn mu biara annyae Yehowa som. Ɛmfa ho sɔhwɛ a na ɛyɛ ahometew a wohyiae nyinaa no, wɔnam tumi a Yehowa de ma so dii Satan so nkonim. Ɔkwan bɛn so? Asɛm a edi hɔ no bebua asɛmmisa yi na akyerɛ yɛn ɔkwan a yebetumi afa so agyina biribiara a ɛte sɛ yɛn honam mu nsɔe ano.
[Ase hɔ asɛm]
^ nky. 11 Na ɛbɛyɛ den sɛ Mefiboset ɔhobrɛasefo a n’ani sɔ ade yi benya anuonyampɛ nsusuwii a ɛte saa. Akyinnye biara nni ho sɛ na onim nokwaredi ho nhwɛso a n’agya, Yonatan, ayɛ no yiye. Ɛwom sɛ na Yonatan yɛ Ɔhene Saul ba de, nanso ofi ahobrɛase mu gyee Dawid toom sɛ nea Yehowa apaw no sɛ onni Israel so hene. (1 Samuel 20:12-17) Sɛ́ Mefiboset agya a osuro Nyankopɔn na ɔsan yɛ Dawid adamfo no, na Yonatan ntumi nkyerɛkyerɛ ne ba mma ɔmpere tumidi.
Wubebua Dɛn?
• Dɛn nti na yebetumi de ɔhaw ahorow a yehyia no atoto honam mu nsɔe ho?
• Dɛn ne honam mu nsɔe a na ɛsɛ sɛ Mefiboset ne Nehemia gyina ano no bi?
• Kyerɛwnsɛm mu nhwɛso ahorow a ɛfa mmea ne mmarima a wogyinaa honam mu nsɔe ahorow ano no mu nea ɛwɔ he na ɛkaa wo paa, na dɛn ntia?
[Adesua no ho Nsɛmmisa]
[Mfonini ahorow wɔ kratafa 15]
Na ɛsɛ sɛ Mefiboset gyina dɛmdi, ntwiri, ne huammɔdi ano
[Mfonini wɔ kratafa 16]
Nehemia ampa abaw ɛmfa ho ɔsɔretia