Nokware No Som Bo Ma Wo Dɛn?
Nokware No Som Bo Ma Wo Dɛn?
‘Mubehu nokware no, na nokware no ayɛ mo adehye.’—YOHANE 8:32.
1. Nsonsonoe bɛn na ɛwɔ sɛnea Pilato de asɛmfua “nokware” dii dwuma ne sɛnea Yesu de dii dwuma no mu?
“DƐN ne nokware?” Bere a Pilato bisaa saa asɛm yi no, ɛwom sɛ na ɔrepɛ biribi pɔtee bi ahu de, nanso nea obisae no te sɛ nea na ɛfa nokware biara ho. Saa bere no nso na Yesu adi kan aka sɛ: “Eyi nti na wɔwoo me, na mebaa wi yi ase, sɛ merebedi nokware no ho adanse.” (Yohane 18:37, 38) Yesu anka n’asɛm no te sɛ Pilato, na mmom ɔde asɛm pɔtee bi kyerɛkyerɛɛ mu kae sɛ ‘nokware no.’ Ná ɔreka Onyankopɔn nokware ho asɛm.
Wiase Suban Wɔ Nokware no Ho
2. Asɛm bɛn na Yesu ka de kyerɛe sɛ nokware no som bo?
2 Paulo kae sɛ: “Ɛnyɛ nnipa nyinaa na wɔwɔ gyidi.” (2 Tesalonikafo 3:2) Yebetumi aka sɛ saa ara na nokware no nso te. Sɛ wɔka Bible mu nokware no kyerɛ nkurɔfo mpo a, wɔn mu pii hyɛ da bu wɔn ani gu so. Nanso, hwɛ sɛnea ɛsom bo fa! Yesu kae sɛ: ‘Mubehu nokware, no na nokware no ayɛ mo adehye.’—Yohane 8:32.
3. Nkyerɛkyerɛ a ɛdaadaa nnipa ho kɔkɔbɔ bɛn na ɛsɛ sɛ yetie?
3 Ɔsomafo Paulo kae sɛ ɛnyɛ nnipa nyansapɛ ne atetesɛm mu na yebehu nokware no. (Kolosefo 2:8) Nokwasɛm ne sɛ nkyerɛkyerɛ a ɛtete saa no daadaa nnipa. Paulo bɔɔ Efeso Kristofo no kɔkɔ sɛ, sɛ wogye saa nneɛma no di a, wɔbɛyɛ sɛ honhom mu mmotafowa a “ɔkyerɛ mframa biara . . . twe wɔn di akɔneaba nnipa kusumdi mu, anifere a ɛnam nnaadaa nnɛɛdɛe mu.” (Efesofo 4:14) Ɛnnɛ, wɔn a wɔsɔre tia Onyankopɔn nokware no na wɔnam nsɛnkeka so ‘di nnipa kusum.’ The New Encyclopædia Britannica kyerɛ “nsɛnkeka” a yɛreka ho asɛm wɔ ha yi ase sɛ “anifere a wɔde bɔ mmɔden nkakrankakra kasa tia ebinom gyidi ne wɔn suban anaa wɔn nneyɛe.” Nsɛnkeka a ɛte saa no kyinkyim nokware ma ɛbɛyɛ atoro ma atoro bɛyɛ sɛ nokware. Ɛsɛ sɛ yɛbɔ mmɔden paa hwehwɛ Kyerɛwnsɛm no mu ansa na yɛatumi afa nnaadaa nnɛɛdɛe yi mu ahu nokware no.
Kristofo ne Wiase
4. Nokware no wɔ hɔ ma henanom, na wɔn a wotie no asɛde ne dɛn?
4 Yesu Kristo kaa wɔn a na wɔabɛyɛ n’asuafo no ho asɛm kyerɛɛ Yehowa wɔ mpaebɔ mu sɛ: “Yɛ wɔn kronkron wɔ nokware no mu; w’asɛm yɛ nokware.” (Yohane 17:17) Ná wɔbɛyɛ saa nkurɔfo yi kronkron anaa wobeyi wɔn asi hɔ ama wɔasom Yehowa ada ne din ne N’ahenni adi akyerɛ nnipa nyinaa. (Mateo 6:9, 10; 24:14) Ɛnyɛ nnipa nyinaa na wɔwɔ Yehowa nokware no de, nanso ɛwɔ hɔ ma wɔn a wɔhwehwɛ akyi kwan no nyinaa sɛ akyɛde, a ɔman ne abusua ne amammerɛ a wofi mu mfa ho. Ɔsomafo Petro kae sɛ: “Mahu sɛ Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.”—Asomafo no Nnwuma 10:34, 35.
5. Adɛn nti na wɔtaa Kristofo mpɛn pii?
5 Kristofo ka Bible mu nokware no kyerɛ afoforo nanso ɛnyɛ baabiara na wogye wɔn. Yesu bɔɔ kɔkɔ sɛ: “Wobeyi mo ama ahohiahia, na wɔakum mo; na me din nti aman nyinaa bɛtan mo.” (Mateo 24:9) Irelandni sɔfo John R. Cotter kyerɛw nkyekyɛm yi ho asɛm wɔ 1817 mu sɛ: “Anka ɛsɛ sɛ mmɔden a [Kristofo] nam wɔn asɛnka so bɔ ma adesamma asetra yɛ yiye no ma nnipa da wɔn ase paa, nanso nea yehu ne sɛ nnipa nnebɔne a asuafo no ka ho asɛm nti, wokyi wɔn taa wɔn.” Wɔn a wɔtaa asuafo no saa no ‘nnye nokware no dɔ na wɔde agye wɔn nkwa.’ Enti, “Onyankopɔn bɛsoma nnaadaa a emu yɛ den aba wɔn mu ama wɔagye atoro adi, na wɔabu wɔn a wɔannye nokware anni na mmom wɔn ani asɔ nea ɛnteɛ no nyinaa atɛn.”—2 Tesalonikafo 2:10-12.
6. Nneɛma bɛn na ɛnsɛ sɛ Kristoni nya ho akɔnnɔ?
6 Ɔsomafo Yohane tu Kristofo a wɔte wiase bɔne yi mu no fo sɛ: “Monnnɔ wiase anaa nneɛma a ɛwɔ wiase. . . . Nea ɛwɔ wiase nyinaa, honam akɔnnɔ ne aniwa akɔnnɔ ne asetra mu ahohoahoa, emfi agya no, na mmom efi wiase.” (1 Yohane 2:15, 16) Sɛ Yohane ka sɛ nneɛma a ɛwɔ wiase “nyinaa” a, na ɛkyerɛ sɛ biribiara ka ho. Ɛno nti, sɛ yɛpɛ yɛn ho asɛm ma yɛn ani kogye biribi a wiase yi de ma ho a, ebetumi atwe yɛn afi nokware no ho. Sɛ yɛde Yohane afotu no yɛ adwuma a, ebenya yɛn asetra so nkɛntɛnso kɛse. Ɔkwan bɛn so?
7. Nokware no ho nimdeɛ ka komapafo dɛn?
7 Wɔ 2001 mu no, Yehowa Adansefo a wɔwɔ wiase nyinaa yɛɛ ofie Bible adesua bɛboro ɔpepem anan ne fã bosome biara de kyerɛkyerɛɛ ankorankoro ne nnipakuw nea ɛsɛ sɛ wɔyɛ na ama Onyankopɔn agye wɔn nkwa. Nea efii mu bae ne sɛ wɔbɔɔ nnipa 263,431 asu. Nokware no hann no bɛyɛɛ ade a ɛsom bo maa asuafo foforo yi, na wogyaee fekubɔne ne ɔbrasɛe a egu Nyankopɔn ho fĩ a abu so wɔ wiase yi mu no. Efi bere a wɔbɔɔ asu no, wɔakɔ so de Yehowa mmara a ɔde ama Kristofo nyinaa no atra ase. (Efesofo 5:5) Wugye di sɛ nokware no som bo ma wo saa?
Yehowa Hwɛ Yɛn
8. Ɔkwan bɛn so na Yehowa gye yɛn ahosohyira tom, na adɛn nti na nyansa wom sɛ ‘yɛbɛhwehwɛ ahenni no kan’?
8 Yɛ a yɛnyɛ pɛ nyinaa akyi no, Yehowa dom yɛn gye yɛn ahosohyira tom, na sɛnea yɛbɛka no no, ɔbrɛ ne ho ase ka yɛn bata ne ho. Ɔyɛ saa de kyerɛkyerɛ yɛn na ama yɛanya botae ne anidaso a ɛkorɔn. (Dwom 113:6-8) Saa bere no ara nso, Yehowa ma kwan ma yɛne no nya ayɔnkofa, na sɛ ‘yɛhwehwɛ ahenni no ne ne trenee kan’ a, ɔhyɛ bɔ sɛ, ɔbɛhwɛ yɛn. Sɛ yɛyɛ saa na yɛbɔ yɛn ho ban honhom fam a, ɔhyɛ bɔ sɛ: ‘Ɔde eyinom nyinaa bɛka yɛn ho.’—Mateo 6:33.
9. Hena ne “akoa nokwafo ne ɔbadwemma” no, na ɔkwan bɛn so na Yehowa nam “akoa” yi so hwɛ yɛn?
9 Yesu Kristo yii n’asomafo 12 no de wɔn too nhyɛase maa Kristofo a wɔasra wɔn asafo a wɔbɛfrɛɛ no “Nyankopɔn Israel” no. (Galatifo 6:16; Adiyisɛm 21:9, 14) Akyiri yi wɔkaa wɔn ho asɛm sɛ “Onyankopɔn teasefo asafo, nokware dum ne nnyinaso.” (1 Timoteo 3:15) Yesu frɛɛ asafo no mufo “akoa nokwafo ne ɔbadwemma” ne “ofiepanyin nokwafo ne ɔbadwemma.” Yesu kae sɛ akoa nokwafo no na ɔbɛma Kristofo “aduan a ɛyɛ wɔn de bere a ɛsɛ mu.” (Mateo 24:3, 45-47; Luka 12:42) Sɛ yɛannidi a ɔkɔm bekum yɛn. Saa ara nso na sɛ yɛanni honhom fam aduan a yɛbɛyɛ mmerɛw awu wɔ honhom fam. Enti “akoa nokwafo ne ɔbadwemma” a ɔwɔ hɔ no yɛ ade foforo a ɛkyerɛ sɛ Yehowa hwɛ yɛn. Ɛmmra sɛ honhom fam aduampa a wɔnam “akoa” no so de ma yɛn no bɛsom bo ama yɛn daa.—Mateo 5:3.
10. Adɛn nti na ehia sɛ yɛkɔ nhyiam daa?
10 Kokoam adesua ka honhom fam aduan a yebedi no ho. Nea ɛka ho bio nso ne sɛ yɛne Kristofo foforo bɛbɔ fekuw na yɛakɔ asafo nhyiam. Wugye di sɛ wokae aduan pɔtee a wudii bosome asia anaa nnawɔtwe asia a atwam no? Ebia wonkae. Nanso aduan biara a wudii no maa wunyaa ahoɔden a na wuhia. Efi saa bere no nso ebia woadi saa aduan no ara bi bio. Saa ara na honhom fam aduan a wɔde ma yɛn wɔ Kristofo nhyiam ase no nso te. Ebia yɛnkae nea yɛate wɔ asafo nhyiam ase no mu nneɛma nyinaa. Ebetumi nso aba sɛ yɛasua biribi a ɛte saa mpɛn pii. Sɛnea ɛte biara no, ɛyɛ honhom fam aduan a ehia ma yɛn nkɔso. Yɛn nhyiam ahorow no ma yenya honhom fam aduampa daa nyinaa wɔ bere a ɛsɛ mu.
11. Asɛyɛde bɛn na yɛwɔ bere a yɛkɔ Kristofo nhyiam no?
11 Yɛwɔ asɛyɛde bi nso wɔ Kristofo nhyiam a yɛkɔ no mu. Wɔhyɛ Kristofo nkuran sɛ ‘wontutu wɔn ho wɔn ho fo’ ntwetwe wɔn a wɔne wɔn wɔ asafo no mu no nkɔ “ɔdɔ ne nnwuma pa mu.” Sɛ yesiesie yɛn ho kɔ Kristofo nhyiam nyinaa na yɛde yɛn ho hyem a, ɛhyɛ yɛn gyidi den sɛ ankorankoro, na ɛhyɛ afoforo nso nkuran. (Hebrifo 10:23-25) Ebinom te sɛ mmofra nkumaa a wɔsa aduan mu no, na ebehia sɛ yɛhyɛ wɔn nkuran daa ansa na wɔadi honhom fam aduan. (Efesofo 4:13) Ɛkyerɛ ɔdɔ sɛ yɛde saa nkuranhyɛ no bɛma wɔn wɔ bere a ehia mu na ama wɔn a wɔte saa no abɛyɛ Kristofo a wɔn ho akokwaw sɛnea Paulo kyerɛwee no: “Aduan a ɛyɛ den no fata wɔn a wɔanyin [honhom fam] a anem nti wɔn nkatede akokwaw papa ne bɔne mu yiyi ho.”—Hebrifo 5:14.
Sɛnea Yɛbɛhwɛ Yɛn Ho Wɔ Honhom Fam
12. Sɛ yɛbɛkɔ so atra nokware no mu a, hena paa na ɛyɛ n’asɛde? Kyerɛkyerɛ mu.
12 Yɛn aware mu hokafo anaa yɛn awofo betumi ahyɛ yɛn nkuran ama yɛafa nokware no kwan so. Asafo mu mpanyimfo nso betumi ahwɛ yɛn sɛ nguan a wɔde yɛn ahyɛ wɔn nsa no bi. (Asomafo no Nnwuma 20:28) Nanso sɛ yɛbɛkɔ so atra nokware no mu a, hena paa na ɛyɛ n’asɛde? Nokwasɛm no ne sɛ, ɛyɛ yɛn mu biara asɛde. Ɛte saa wɔ bere pa ne bere bɔne nyinaa mu. Susuw asɛm a edi so yi ho hwɛ.
13, 14. Sɛnea oguammaa no asɛm no ma yehu no, yɛbɛyɛ dɛn anya honhom fam mmoa a ehia?
13 Ná nguammaa bi redidi wɔ wuram wɔ Scotland na biako twee ne ho kɔɔ pampa bi ho watiriw kɔtɔɔ ɔbotan bi so. Wampira, nanso ɔbɔɔ hu ma enti wantumi amforo bio. Enti ofii ase suu yayaayaw. Ne maame tee, na ɔno nso suu bi kosii sɛ oguanhwɛfo no ba beyii oguammaa no.
14 Hwɛ sɛnea nsɛm no totoaa so no. Oguammaa no teɛteɛɛm sɛ obi mmeyi no, ne maame de n’ano too mu suu bi, na oguanhwɛfo a n’ani da hɔ no de mmirika koyii no. Sɛ oguammaa ne ne maame mpo tumi hu asiane ho mpopoe su hwehwɛ mmoa a, wunnye nni sɛ ɛsɛ sɛ yɛn nso yɛyɛ saa ara bere a yɛawatriw wɔ honhom fam anaa bere a Satan wiase no mu asiane bi ato yɛn mpofirim no? (Yakobo 5:14, 15; 1 Petro 5:8) Ɛsɛ sɛ yɛyɛ saa, ɛnkanka mmofra ne wɔn a wɔbaa nokware no mu nkyɛe a wonni suahu no.
Sɛ Yedi Onyankopɔn Akwankyerɛ Akyi a Yɛn Ani Gye
15. Ɔbea bi tee nka dɛn bere a ofii ase de ne ho bɔɔ Kristofo asafo no?
15 Hwɛ sɛnea Bible mu ntease som bo na hwɛ asomdwoe a ɛde brɛ wɔn a wɔsom nokware Nyankopɔn no. Ɔbea bi a wadi mfe 70 a ɔde ne nkwa nna nyinaa akɔ Anglikan Asɔre no penee so sɛ Yehowa Dansefo bi ne no mmɛyɛ Bible adesua. Ankyɛ biara na ohui sɛ Onyankopɔn din de Yehowa, na bere a wɔbɔɔ mpae a efi komam wiei wɔ ɛhɔ Ahenni Asa so no, ɔno nso kaa “Amen” no bi. Ofi ne komam kae sɛ: “Ebinom ma ɛyɛ te sɛ nea nnipa abɔnefo ntumi mmɛn Onyankopɔn koraa, nanso mo de, moma ɛyɛ te sɛ nea Onyankopɔn ka yɛn ho wɔ ha sɛ adamfo pa no. Minhuu bi da.” Ebetumi aba sɛ onigyeni a yɛdɔ no no werɛ remfi nokware no ho nneɛma a odii kan hui no da. Ɛmmra sɛ yɛn nso, yɛn werɛ remfi sɛnea nokware no som bo maa yɛn bere a yedii kan gyei no.
16. (a) Sɛ yɛde sika yɛ yɛn asetra mu botae titiriw a, dɛn na ebetumi de aba? (b) Yɛbɛyɛ dɛn anya nokware anigye?
16 Nnipa bebree gye di sɛ sɛ wonya sika pii a wɔn ani begye paa. Nanso sɛ yɛde sika yɛ yɛn asetra mu botae titiriw a, “adwennwene bebree bɛhyɛ yɛn so.” (1 Timoteo 6:10, Phillips) Hwɛ nnipa dodow a wotwa loto, wɔn a wɔtow kyakya ne wɔn a wɔhaahaa wɔn ani ka adwumakuw mu kyɛfa a wɔwɔ ho asɛm sɛ wobenya wɔn ho da koro pɛ no. Nnipa mmiako mmiako pɛ na wonya wɔn ho saa. Mpɛn pii no wɔn a wonya wɔn ho da koro pɛ saa no mpo hu sɛ saa ahonyade no mfa anigye mmrɛ wɔn. Nea ɛma yenya anigye daa mmom ne sɛ yɛbɛyɛ Yehowa apɛde, ama Yehowa honhom kronkron ne n’abɔfo no aboa yɛn ma yɛne Kristofo asafo no ayɛ adwuma. (Dwom 1:1-3; 84:4, 5; 89:15) Sɛ yɛyɛ saa a, ebia yebenya nhyira a yɛn ani nna so. Nokware no som bo ma wo sɛnea ɛfata a ɛbɛma woanya nhyira a ɛte saa wɔ w’asetra mu anaa?
17. Tra a Petro traa Simon, nhomahyɛfo no nkyɛn no ma yehu sɛ na Petro yɛ onipa bɛn?
17 Susuw ɔsomafo Petro suahu bi ho hwɛ. Wɔ 36 Y.B. no, ɔkɔyɛɛ asɛmpatrɛw adwuma wɔ Saron Tataw so. Ogyinaa Lida saa obubuafo Enea yare, na afei ɔtoaa so kɔɔ Yopa po so hyɛn gyinabea. Ɛhɔ na onyanee Dorka. Asomafo no Nnwuma 9:43 ka kyerɛ yɛn sɛ: “Na ɛbae sɛ ɔtraa Yopa kyɛe kakra, Simon, nhomahyɛfo bi, nkyɛn.” Sɛnea na Petro tumi kɔ baabiara no kyerɛ sɛ bere a ɔreka asɛmpa no wɔ kurow no mu no, na onyiyi nnipa no mu. Yɛyɛ dɛn hu saa? Bible ho nimdefo Frederic W. Farrar kyerɛwee sɛ: “Biribiara nni hɔ a na ebetumi ama obi a odi [Mose] Mmara no so katee atra nhomahyɛfo fie. Nneɛma a na wɔde yɛ saa adwuma yi, ne hia a na ehia sɛ wosuso mmoa horow afunu ne wɔn nhoma mu daa nti, ɛbɛyɛɛ adwuma a ɛho ntew na ɛyɛ abofono wɔ wɔn a wodi mmara no so katee no nyinaa ani so.” Sɛ na Simon ‘fie a ɛwɔ mpoano’ no mmɛn baabi a ɔhyɛ nhoma no mpo a, Farrar kyerɛ sɛ ‘adwuma a na ɛyɛ nkurɔfo tan no nti, na wommu wɔn a wɔyɛ bi no sɛ wɔyɛ nnipa.’—Asomafo no Nnwuma 10:6.
18, 19. (a) Adɛn nti na anisoadehu bi a Petro nyae maa ne ho yeraw no? (b) Nhyira a na Petro ani nna so bɛn na onyae?
18 Petro a na onyiyi nnipa mu no penee so kɔtraa Simon fie maa Simon yɛɛ no hɔho, na ɛhɔ na Petro nyaa akwankyerɛ bi fii Onyankopɔn hɔ mpofirim. Onyaa anisoadehu bi, na emu na wɔka kyerɛɛ no sɛ onni nam a ɛho ntew wɔ Yudafo mmara mu no. Petro kae sɛ ‘onnii biribi a wokyi anaasɛ ɛho ntew da.’ Nanso wɔka kyerɛɛ no mprɛnsa sɛ: “Nea Onyankopɔn atew ho no, mmu no akyide!” Ntease wom sɛ “na Petro regye ne mu akyinnye sɛ anisoade a ohui no ase ne dɛn no.”—Asomafo no Nnwuma 10:5-17; 11:7-10.
19 Ná Petro nnim sɛ da a etwaa mu no, ná Amanaman muni bi a wɔfrɛ no Kornelio nso anya anisoadehu bi wɔ Kaesarea a ɛbɛyɛ kilomita 50 kwan no. Ná Yehowa bɔfo aka akyerɛ Kornelio sɛ ɔnsoma nkohyia Petro wɔ Simon, nhomahyɛfo no fie. Kornelio somaa ne nkoa kɔɔ Simon fie, na Petro san ne wɔn baa Kaesarea. Ɛhɔ na ɔkaa asɛmpa no kyerɛɛ Kornelio ne n’abusuafo ne ne namfonom. Nea efii mu bae ne sɛ, wɔn na wɔbɛyɛɛ Amanaman mufo gyidifo momonotofo a wodii kan nyaa honhom kronkron bɛyɛɛ Ahenni adedifo. Ɛwom sɛ na mmarima no yɛ momonotofo, nanso wɔbɔɔ wɔn a wotiee Petro asɛm no nyinaa asu. Eyi buee kwan maa amanaman mufo a na Yudafo bu wɔn sɛ wɔn ho ntew no bɛkaa Kristofo asafo no ho. (Asomafo no Nnwuma 10:1-48; 11:18) Hwɛ hokwan soronko koraa a Petro nyae—ne nyinaa fi sɛ ná nokware no som bo ma no, na ɛmaa no dii Yehowa akwankyerɛ so de gyidi yɛɛ adwuma!
20. Sɛ yɛde nokware no di kan wɔ yɛn asetra mu a, mmoa bɛn na Onyankopɔn de ma yɛn?
20 Paulo tu yɛn fo sɛ: ‘Momma yenni nokware mfa ɔdɔ mu nnyin nneɛma nyinaa mu Kristo a ɔne eti no ho.’ (Efesofo 4:15) Yiw, sɛ yɛde nokware no di kan wɔ yɛn asetra mu, na yɛma Yehowa fa ne honhom kronkron no so kyerɛ yɛn kwan a, yebenya anigye a ɛso bi nni nnɛ. Afei nso kae sɛ abɔfo no gyina yɛn akyi wɔ asɛnka adwuma no mu. (Adiyisɛm 14:6, 7; 22:6) Hwɛ hokwan a yɛanya sɛ abɔfo gyina yɛn akyi wɔ adwuma a Yehowa de ahyɛ yɛn nsa no mu! Sɛ yegyina pintinn a, ɛbɛma yɛayi Yehowa, nokware Nyankopɔn no ayɛ daa nyinaa. Dɛn na ɛsom bo kyɛn saa?—Yohane 17:3.
Dɛn na Yɛasua?
• Adɛn nti na nnipa bebree mpɛ nokware no?
• Ɛsɛ sɛ Kristofo bu Satan wiase yi mu nneɛma dɛn?
• Suban bɛn na ɛsɛ sɛ yenya wɔ asafo nhyiam ho, na dɛn ntia?
• Asɛde bɛn na yɛwɔ sɛ yɛhwɛ yɛn ho wɔ honhom fam?
[Adesua no ho Nsɛmmisa]
[Asase mfonini/Mfonini wɔ kratafa 18]
(Wopɛ nsɛm a wɔahyehyɛ awie no a, hwɛ nhoma no mu)
POKƐSE
SARON TATAW
Kaesarea
Yopa
Lida
Yerusalem
[Mfonini]
Petro dii Onyankopɔn akwankyerɛ akyi nyaa nhyira a na n’ani nna so
[Asɛm Fibea]
Map: Mountain High Maps® Copyright © 1997 Digital Wisdom, Inc.
[Mfonini wɔ kratafa 13]
Yesu dii nokware no ho adanse
[Mfonini wɔ kratafa 15]
Sɛnea honam fam aduan ma yenya ahoɔden no, saa ara na honhom fam aduan nso ma yenya nkɔso