‘Tete Wo Ho’

CITIUS, altius, fortius—ahoɔhare, kɛseyɛ, akokoduru! Eyinom ne botae ahorow a na tete Helafo ne Romafo agumadifo hwehwɛe sɛ wodu ho. Mfehaha pii a atwam no, wosii akan akɛse a anyame “hyira so” a na bɛhwɛadefo mpempem pii kɔhwɛ wɔ Olympia, Delphi, ne Nemea ne Korinto Asasekɔn no so. Nea na ɛma obi nya hokwan tumi si akan yi bi ne adwumaden a na ɔde mfirihyia pii yɛ no. Na wɔhyɛ wɔn a wodi nkonim no ne wɔn nkurow anuonyam pii.

Wɔ asetra a ɛte saa mu no, ɛnyɛ nwonwa sɛ Kristofo Hela Kyerɛwnsɛm no de mmirika a Kristofo retu wɔ honhom fam no totoo agumadi ho. Asomafo Petro ne Paulo nyinaa de mfatoho ahorow a egyina akansi so dii dwuma ahokokwaw so de nkyerɛkyerɛ a etu mpɔn mae. Yɛn bere yi so no, Kristofo retu mmirika a emu yɛ den saa ara. Ná ɛsɛ sɛ afeha a edi kan no mu Kristofo no ne Yudafo nneɛma nhyehyɛe no di asi; ɛsɛ sɛ yɛn a yɛwɔ hɔ nnɛ no ne wiase nyinaa nhyehyɛe a ɛrebɛkɔ ɔsɛe mu no ‘di ako.’ (2 Timoteo 2:5; 3:1-5) Ebia ebinom behu sɛ wɔn “gyidi ho mmirika” no mma awiei da na ɔbrɛ wom. (1 Timoteo 6:12, The New English Bible) Ɛbɛyɛ nea mfaso wɔ so kɛse sɛ yebesusuw agumadi a wɔde totoo nneɛma ho wɔ Bible mu no mu bi ho.

Obi a Onim Ntetee Yiye

Agumadifo nkonimdi gyina nea ɔde ntetee ma no no so kɛse. Ɛdefa tete agumadi ho no, Archaeologia Graeca ka sɛ: “Na wɔma akansifo no ka ntam sɛ wɔde asram du mũ nyinaa na asiesie wɔn ho.” Kristofo nso hia ntetee a emu yɛ den. Paulo tuu Timoteo a na ɔyɛ Kristoni panyin no fo sɛ: “Fa onyamesom pa tete wo ho.” (1 Timoteo 4:7, NW) Hena na ɔde ntetee ma Kristoni a ɔyɛ “ogumadifo” no? Ɛnyɛ obiara sɛ Yehowa Nyankopɔn ankasa! Ɔsomafo Petro kyerɛwee sɛ: ‘Ɔdom nyinaa Nyankopɔn no ankasa bewie mo ntetee no, ɔbɛma mo ase atim, ɔbɛhyɛ mo den, ɔbɛma moanya nnyinaso.’—1 Petro 5:10.

Asɛm ‘obewie mo ntetee no’ fi Hela adeyɛ asɛm a sɛnea Theological Lexicon of the New Testament kyerɛ no, nea ɛkyerɛ titiriw ne sɛ “wobɛma biribi [anaa obi] afata ama n’atirimpɔw, sɛ wubesiesie no na woama afata ne dwumadi.” Saa ara na Liddell ne Scott Greek-English Lexicon no ka sɛ yebetumi akyerɛ adeyɛ asɛm yi ase sɛ “siesie, tete, anaa hyehyɛ no yiye.” Akwan bɛn so na Yehowa ‘siesie, tete, anaa ɔhyehyɛ yɛn yiye’ ma Kristofo mmirikatu a ɛyɛ den no? Sɛ yɛbɛte mfatoho no ase a, ma yensusuw akwan a wɔn a na wɔde ntetee ma no faa so no bi ho nhwɛ.

The Olympic Games in Ancient Greece nhoma no ka sɛ: “Wɔn a na wɔde ntetee ma mmabun no faa akwan atitiriw abien so, a nea na edi kan botae ne sɛ wɔbɛhyɛ osuani no nkuran ma wayere ne ho asen biara sɛnea ɛbɛyɛ a wobetumi ayɛ nea ɛsen biara, na nea ɛto so abien botae ne sɛ wɔbɛma watu mpɔn wɔ nyansakwan a ɔfa so yɛ n’ade no mu.”

Saa ara na Yehowa hyɛ yɛn nkuran ne yɛn den ma yetumi yɛ nea ɛsen biara na yɛn ho akokwaw wɔ ɔsom adwuma no mu. Yɛn Nyankopɔn no nam Bible, n’asase so ahyehyɛde, ne mfɛfo Kristofo a wɔn ho akokwaw so hyɛ yɛn den. Ɛtɔ mmere bi a ɔnam nteɛso so na ɛtete yɛn. (Hebrifo 12:6) Mmere foforo nso otumi ma kwan ma sɔhwɛ ahorow ne ahokyere ba yɛn so sɛnea ɛbɛyɛ a yebenya boasetɔ. (Yakobo 1:2-4) Na ɔma yɛn ahoɔden a yehia no. Odiyifo Yesaia ka sɛ: “Wɔn a wɔtwɛn [Yehowa, NW] no nya ahoɔden foforo, wɔde ntaban foro sɛ  akɔre, wotu mmirika, na wɔmpa abaw, wɔnantew, na wɔmmrɛ.”—Yesaia 40:31.

Nea ɛsen ne nyinaa no, Onyankopɔn ma yɛn ne honhom kronkron a ɛhyɛ yɛn den ma yɛkɔ so de ɔsom a ɛsɔ n’ani ma no ma ɛboro so. (Luka 11:13) Mpɛn pii na Onyankopɔn asomfo de bere tenten agyina wɔn gyidi ho sɔhwɛ ahorow a emu yɛ den ano. Wɔn a wɔayɛ saa no yɛ mmarima ne mmea a wɔte sɛ yɛn mu biara. Nanso wɔn ho a wɔde ato Onyankopɔn so koraa no ama wɔatumi agyina. Nokwarem no, ‘tumi a ɛboro so no yɛ Onyankopɔn dea, na emfi wɔn ankasa mu.’—2 Korintofo 4:7.

Obi a Ɔde Ntetee Ma a Ɔwɔ Tema

Nhomanimfo bi ka sɛ, nnwuma a tete no na nea ɔde ntetee ma yɛ no mu biako ne sɛ “ɔbɛhwɛ agumadi ko a ogumadifo no di na wakyerɛ apɔw-mu-teɛteɛ ko ne dodow a obehia.” Bere a Onyankopɔn tete yɛn no, osusuw yɛn mu biara nsɛm tebea, yɛn dom akyɛde, sɛnea yɛte, ne yɛn sintɔ ahorow ho. Bere a Yehowa retete yɛn no, mpɛn pii na yɛsrɛ no sɛnea Hiob yɛe no: “Kae sɛ wonwenee me sɛ anwemmo.” (Hiob 10:9) Ɔkwan bɛn so na nea ɔde ntetee ma yɛn a ɔwɔ tema no yɛ n’ade? Dawid kyerɛw faa Yehowa ho sɛ: “Onim yɛn su, ɔkae sɛ yɛyɛ mfutuma.”—Dwom 103:14.

Ebia na ɔyare bi wɔ wo so a ɛmma wuntumi nyɛ pii wɔ ɔsom adwuma no mu, anaasɛ ebia wubu wo ho abomfiaa. Ebia worebɔ mmɔden sɛ wubegyae subammɔne bi, anaasɛ ebia wote nka sɛ wuntumi nnyina atipɛnfo nhyɛso ano wɔ wo mpɔtam hɔ, adwumam, anaa sukuu mu. Sɛnea wo nsɛm tebea te biara no, mma wo werɛ mfi sɛ Yehowa te wo haw ase sen obi foforo biara—a w’ankasa ka ho! Sɛ́ obi a ɔde ntetee ma a odwen wo ho no, sɛ wobɛn no a, ɔwɔ hɔ a wayɛ krado sɛ ɔbɛboa wo bere nyinaa.—Yakobo 4:8.

Na wɔn a wɔde ntetee ma tete hɔ no “tumi hu nsonsonoe a ɛwɔ ɔbrɛ anaa mmerɛwyɛ a emfi apɔw-mu-teɛteɛ ahorow na mmom efi adwene ne nneyɛe, subammɔne,  adwenemhaw, ne nea ɛkeka ho mu no. . . . Na tumi a [wɔn a wɔde ntetee ma] wɔ no kɔ akyiri yiye ma ekodu agumadifo no kokoam nsɛm mu mpo, na sɛ wohu sɛ ɛho hia a, na wɔde wɔn ho gye wɔn kokoam nsɛm mu mpo.”

So ɛtɔ mmere bi a wote nka sɛ woabrɛ na woayɛ mmerɛw esiane wiase yi nhyɛso ne sɔhwɛ ahorow a ɛkɔ so no nti? Sɛ́ obi a ɔde ntetee ma wo no, Yehowa dwen wo ho yiye. (1 Petro 5:7) Ohu honhom fam mmerɛwyɛ anaa ɔbrɛ biara a ɛda adi wɔ wo ho no ntɛmpa ara. Ɛwom sɛ Yehowa susuw yɛn ahofadi ne tumi a yɛwɔ sɛ yɛpaw nea yɛpɛ ho de, nanso esiane sɛ yɛn daa yiyedi ho hia no nti, ɔde mmoa ne nteɛso pii ma yɛn bere a yehia no. (Yesaia 30:21) Ɔkwan bɛn so? Ɛdenam Bible ne Bible ho nhoma, honhom fam mpanyimfo a wɔwɔ asafo no mu, ne yɛn nuanom a wɔwɔ ɔdɔ no so.

‘Ahosodi a Wɔda no Adi Ade Nyinaa Mu’

Nokwarem no, na pii ho hia na ama ogumadifo adi nkonim sen sɛ obenya obi a ɔde ntetee ma a onim adwuma ara kwa. Na pii gyina ogumadifo no ankasa, ne ntetee a emu yɛ den a ɔde ne ho behyem no so. Na akwankyerɛ a wodi akyi no mu yɛ den, efisɛ na nneɛma bi a wɔde bɛkame wɔn ho ne aduandi ho nhyehyɛe ka ho. Horace, afeha a edi kan A.Y.B. no mu anwensɛm kyerɛwfo bi, kae sɛ akansifo no “twee wɔn ho fii mmea ne nsa ho” na ama “wɔadu wɔn botae a wofi bere tenten pɛ sɛ wodu ho no ho.” Na sɛnea Bible ho ɔbenfo F. C. Cook kyerɛ no, na ɛsɛ sɛ agumadifo no “nya ahosodi [na] wodi aduan a eye ma wɔn apɔwmuden nkutoo . . . asram du.”

Paulo de mfatoho yi dii dwuma bere a ɔkyerɛw Kristofo a wɔwɔ Korinto, kurow a na emufo no nim Ismia Akansi a na ɛbɛn wɔn yiye no: “Obiara a osi agumadi kane no, ɔsɔre ne ho ade nyinaa mu.” (1 Korintofo 9:25) Nokware Kristofo kwati honam fam ade dodowpɛ, ɔbrasɛe, ne wiase no asetra kwan a ɛho ntew no. (Efesofo 5:3-5; 1 Yohane 2:15-17) Ɛsɛ sɛ woyi amumɔyɛ ne suban ahorow a ɛne Kyerɛwnsɛm no nhyia no nso gu hɔ na wɔde Kristo su ahorow hyɛ ananmu.—Kolosefo 3:9, 10, 12.

Wɔbɛyɛ dɛn atumi ayɛ eyi? Ade biako ni, hyɛ mfatoho a emu yɛ den a Paulo de maa mmuae no nsow: “Mehyɛ me nipadua ahometew, na midi no nya, na mereka asɛm makyerɛ ebinom yi, m’ankasa manyɛ nea ɔmfra.”—1 Korintofo 9:27.

Hwɛ asɛm a emu yɛ den a Paulo kae wɔ ha! Ná ɛnyɛ sɛ ɔrekamfo akyerɛ sɛ yɛnyɛ yɛn ho ayayade. Mmom no, ogye toom sɛ na akodi bi rekɔ so wɔ n’ankasa mu. Mmere bi wɔ hɔ a na ɔyɛ nneɛma bi a na ɔmpɛ sɛ ɔyɛ, na wannyɛ nneɛma bi a na ɔpɛ sɛ ɔyɛ no mmere bi. Nanso, ɔkoo denneennen sɛnea ɛbɛyɛ a ne mmerɛwyɛ ahorow no renni ne so. ‘Ɔhyɛɛ ne nipadua ahometew,’ koo denneennen dii honam akɔnnɔ ne su ahorow so.—Romafo 7:21-25.

Ɛsɛ sɛ Kristofo nyinaa yɛ saa ara. Paulo kaa nsakrae ahorow a Korintofo binom a na wɔde wɔn ho ahyɛ aguamammɔ, abosonsom, mmarima a wɔne wɔn ho da, awi, ne nea ɛkeka ho mu ayɛ no ho asɛm. Dɛn na ɛma wotumi yɛɛ nsakrae no? Onyankopɔn Asɛm mu tumi, honhom kronkron, ne ɔpɛ a na wɔwɔ sɛ wɔbɛsakra no. Paulo kae sɛ: “Afei wɔaguare mo, na wɔatew mo ho, na wɔabu mo bem Awurade Yesu Kristo din ne yɛn Nyankopɔn honhom mu.” (1 Korintofo 6:9-11) Petro kyerɛw biribi a ɛte saa faa wɔn a na wɔagyae subammɔne a ɛtete saa no ho. Sɛ́ Kristofo no, na wɔn  nyinaa ayɛ nsakrae ankasa.—1 Petro 4:3, 4.

Mmɔdenbɔ a Ɛfata

Paulo kyerɛkyerɛɛ n’adwene a na esi pi ne n’ani a na ɔde asi honhom fam botae ahorow so yiye no mu sɛ: “Kuturuku a meko yi, menko no sɛ nea ɔboro mframa.” (1 Korintofo 9:26) Ɔkwan bɛn so na obi a osi akan no bɛtoto ne nsa anaa ɔbɛbɔ akuturuku? The Life of the Greeks and Romans nhoma no bua sɛ: “Na ɛnyɛ ahoɔden kɛkɛ na ɛsɛ sɛ onya, na mmom na ɛsɛ sɛ ogyen n’ani yiye na ohu nea ɔne no redi asi no mmerɛwyɛ ahorow. Ade foforo a na mfaso wɔ so nso ne ɔkwan a wɔfa so de nsa yɛ adwuma ahokokwaw so a na wosua wɔ atentam sukuu mu, ɛne nyansakwan a na ɔbɛfa so adi nea ɔne no redi asi no so.”

Yɛn honam a ɛyɛ mmerɛw no yɛ yɛn asidifo no mu biako. So yɛahu yɛn ankasa “mmerɛwyɛ ahorow”? So yɛpɛ sɛ yehu yɛn ho sɛnea afoforo hu yɛn—titiriw sɛnea ebia Satan hu yɛn no? Ɛno hwehwɛ sɛ yefi nokwaredi mu hwehwɛ yɛn ho mu na yenya ɔpɛ sɛ yɛbɛyɛ nsakrae ahorow. Ɛnyɛ den koraa sɛ yebesisi yɛn ho. (Yakobo 1:22) Hwɛ sɛnea ɛyɛ mmerɛw koraa sɛ yebebu yɛn ho bem wɔ adeyɛ bi a nyansa nnim a yɛayɛ ho! (1 Samuel 15:13-15, 20, 21) Ɛno te sɛ nea ‘yɛreboro mframa.’

Wɔ nna a edi akyiri yi mu no, wɔn a wɔbɛsɔ Yehowa ani na wɔanya nkwa no ntumi ntwentwɛn wɔn nan ase wɔ nea ɛteɛ ne nea ɛnteɛ, Onyankopɔn asafo no ne wiase a aporɔw no a wɔbɛpaw emu bi no ho. Ɛsɛ sɛ wɔkwati sɛ wobehinhim, na ‘wɔn adwene ayɛ nta wɔn akwan nyinaa mu.’ (Yakobo 1:8) Ɛnsɛ sɛ wɔsɛe wɔn ahoɔden wɔ nneɛma a mfaso nni so ho. Sɛ obi fa ɔkwan tẽe yi so a, n’ani begye na ne ‘nkɔso bɛda adi ade nyinaa mu.’—1 Timoteo 4:15.

Yiw, yɛda so ara retu Kristofo mmirika no. Yehowa—Nea Ɔma Yɛn Ntetee a Ɛsen Biara no—fi ɔdɔ mu ma yɛn akwankyerɛ ne mmoa a ɛho hia na ama yɛagyina na yɛadi nkonim koraa. (Yesaia 48:17) Te sɛ tete agumadifo no, ehia sɛ yɛteɛ yɛn ho so, nya ahosodi, na yɛma yɛn adwene si yɛn pi wɔ yɛn gyidi ho akodi no mu. Yebenya mmɔden a yefi komam bɔ no so akatua pii.—Hebrifo 11:6.

[Adaka wɔ kratafa 31]

‘Sra No Ngo’

Ná ngosrafo ka ho bi na wɔde ntetee ma tete Helafo agumadifo. Ná n’adwuma ne sɛ ɔbɛsra mmarima a wɔrebɛteɛteɛ wɔn apɔw mu no ngo. The Olympic Games in Ancient Greece ka sɛ, wɔn a wɔde ntetee ma no “hui sɛ na mfaso wɔ so sɛ wobemiamia agumadifo no yiye ansa na wɔateɛteɛ wɔn apɔw mu, afei nso sɛ na wɔde ahwɛyiye miamia wɔn nkakrankakra bere a na ogumadifo no de bere tenten ateɛteɛ n’apɔw mu awie no a, na ɛboa ma ne ho tɔ no.”

Sɛnea sɛ wɔde ngo ankasa sra obi a etumi ma ne ho dwo no na ɛsa no yare no, saa ara na Onyankopɔn Asɛm a wɔde bɛma Kristoni “ogumadifo” a wabrɛ no tumi teɛteɛ no, kyekye ne werɛ, na ɛsa no yare. Enti, ɛdenam Yehowa akwankyerɛ so no, wotu asafo mu mpanyimfo fo sɛ wɔmmɔ mpae mma obi a ɔte saa, na ‘wɔnsra no ngo wɔ Yehowa din mu’ sɛnkyerɛnne kwan so, a ɛyɛ adeyɛ a ɛho hia ma honhom fam ayaresa.—Yakobo 5:13-15; Dwom 141:5.

[Mfonini wɔ kratafa 31]

Sɛ agumadifo bɔ afɔre wie a, na wɔka ntam sɛ wɔde asram du asiesie wɔn ho

[Asɛm Fibea]

Musée du Louvre, Paris

[Mfonini Fibea wɔ kratafa 29]

Copyright British Museum