So Ɛsɛ Sɛ Me Ba Kɔ Sukuu?

SƐ WUNTUMI nkenkan nsɛm a ɛwɔ kratafa yi a, anka wobɛte nka dɛn? Na sɛ wuntumi nka wo man mu kasa titiriw nso ɛ? Na sɛ woantumi ankyerɛ faako a wo man hyɛ wɔ asase ho mfonini so nso ɛ? Mmofra pii benyin a wɔwɔ tebea a ɛte saa ara mu. Na wo ba no nso ɛ?

So ɛsɛ sɛ wo ba kɔ sukuu? Wɔ aman pii mu no, ɛyɛ nhyɛ sɛ obiara bɛkɔ mfitiase ne ntoaso sukuu, na mpɛn pii no wontua hwee. Hokwan a Mmofra Wɔ Ho Apam no bu sukuukɔ sɛ ɛyɛ hokwan titiriw. Saa ara na Amansan Nyinaa Mpaemuka a Ɛfa Hokwan a Nnipa Wɔ Ho nso bu no. Nanso, wɔ aman horow bi so no, ebia wotua sika ansa na wɔakɔ sukuu ma enti ebetumi ama sikasɛm ho ayɛ den ama awofo. Ma yensusuw asɛm yi ho sɛ Kristofo a wɔyɛ awofo a wɔpɛ sɛ wɔn mma hu nhoma, denam ebia sukuu ankasa a wɔbɛkɔ anaasɛ denam ɔkwan foforo so ho nhwɛ.

Bible Mu Nhwɛso Horow a Ɛfa Akenkan ne Akyerɛw Ho

Ná Onyankopɔn asomfo dodow no ara a wɔka wɔn ho asɛm wɔ Bible mu no nim akenkan ne akyerɛw. Ná Yesu asomafo Petro ne Yohane yɛ Yudafo apofofo nanso wɔkyerɛw Bible mu nhoma wɔ Hela kasa mu, ɛnyɛ Galileafo kasa mu. * Ɛda adi sɛ wɔn awofo hwɛ hui sɛ wɔbɛma wɔn mma no anya nhomasua a ɛho hia. Bible akyerɛwfo foforo a wɔn tebea te saa ara ne oguanhwɛfo Dawid, okuafo Amos, ne Yesu nuabarima Yuda, a ɛbɛyɛ sɛ na ɔyɛ duadwumfo no.

Ná ɔbarima Hiob nim akenkan ne akyerɛw, na Bible mu nhoma a ne din da so no da no adi sɛ na ɔwɔ adebɔ ho nyansahu ho nimdeɛ bi. Ná ɛbɛyɛ sɛ ɔwɔ nhomakyerɛw nso ho nimdeɛ, efisɛ ne nsɛm a wɔafa mu asɛm aka wɔ Hiob nhoma no mu no yɛ anwensɛm. Na yenim sɛ ná tete Kristofo no nim akenkan ne akyerɛw efisɛ wɔahu nea ɛbɛyɛ sɛ na ɛyɛ Kyerɛwnsɛm mu kyerɛwtohɔ ahorow a na wɔyɛ wɔ kyɛmfɛre a ɛyɛ nkuku a abubu so.

Nhomasua Ho Hia Ma Kristofo

Sɛ Kristofo nyinaa bɛsɔ Onyankopɔn ani a, ehia sɛ wonya nkɔso wɔ Bible mu nimdeɛ mu. (Filipifo 1:9-11; 1 Tesalonikafo 4;1) Kyerɛwnsɛm no ne adesua nhoma horow a egyina Bible so a yɛde bedi dwuma anibere so no betumi ama yɛanya honhom fam nkɔso. Esiane sɛ Onyankopɔn de N’asɛm a wɔakyerɛw ama nti, ɔhwɛ kwan sɛ n’asomfo behu nhoma. Sɛ yɛkenkan Bible no na yɛte ase a ɛma ɛyɛ mmerɛw sɛ yɛde n’afotu bɛyɛ adwuma. Ɛwom, ebetumi aba sɛ yɛbɛkenkan afã horow bi mpɛn pii ansa na yɛate aba a ɛwom no ase na yɛatumi adwennwen ho.—Dwom 119:104; 143:5; Mmebusɛm 4:7.

Afe biara, Yehowa nkurɔfo nya nhoma a mfaso wɔ so a ekura nkratafa ɔhaha pii a wɔasiesie wɔ “akoa nokwafo ne ɔbadwemma” no akwankyerɛ ase. (Mateo 24:45-47) Nhoma a ɛte saa no ka abusua asetra, amanne ahorow, nyamesom, abɔde mu nyansahu, ne nsɛm foforo  pii ho asɛm. Nea ehia sen biara no, ekura Kyerɛwnsɛm mu afotusɛm a ɛfa honhom fam nneɛma ho. Sɛ wo mma ntumi nkenkan a, wɔbɛhwere nsɛm a ɛho hia pii.

Adesamma abakɔsɛm a yesua no ho hia efisɛ ɛboa yɛn ma yɛte nea enti a yehia Onyankopɔn Ahenni ase. Asase ho nsɛm ho nimdeɛ kakra a yebenya nso ho hia. Bible no ka mmeae pii te sɛ Israel, Misraim, ne Hela ho asɛm. So wo ba tumi kyerɛ faako a eyinom hyɛ wɔ asase ho mfonini so? So obetumi ahu n’ankasa ne man wɔ so? Sɛ obi ntumi nhu asase ho mfonini ho asɛm a, ebetumi ayɛ den ama no sɛ obetumi ayɛ ne som adwuma wɔ asasesin bi a wɔde ama no mu.—2 Timoteo 4:5.

Hokwan Ahorow a Ɛwɔ Asafo no Mu

Kristofo mpanyimfo ne asafo mu asomfo wɔ asɛyɛde ahorow pii a egye akenkan. Sɛ nhwɛso no, ɛsɛ sɛ wosiesie wɔn ho ma dwumadi ahorow wɔ asafo nhyiam ahorow ase. Ɛho hia sɛ wɔyɛ nhoma a wonya ne ntoboa ho kyerɛwtohɔ ahorow. Sɛ obi ansua nhoma kakra a, ɛbɛyɛ den paa sɛ obedi asɛyɛde ahorow yi ho dwuma yiye.

Adwumayɛfo a wɔatu wɔn ho ama som wɔ Betel afie a ɛwɔ wiase nyinaa mu. Sɛnea ɛbɛyɛ na atuhoamafo yi atumi adi nkitaho yiye na wɔayɛ wɔn nnwuma, te sɛ nhoma a wɔbɛkyerɛ ase ne mfiri a wobesiesie no, ɛsɛ sɛ wotumi kenkan ɔman a wɔte mu no kasa titiriw na wotumi kyerɛw. Sɛ wo mma benya hokwan ahorow a ɛte saa da bi a, ɛtaa hwehwɛ sɛ wonya nhomasua a ehia. Nneɛma foforo a mfaso wɔ so bɛn nti na ɛsɛ sɛ wo ba kɔ sukuu?

Ohia ne Gyidihunu

Ebia wɔ tebea horow bi mu no nnipa a wodi hia no rentumi nyɛ ho hwee. Nanso, wɔ tebea afoforo mu no, ebia nhomasua a ɛfata betumi aboa yɛne yɛn mma ma yɛakwati amanehunu a ɛnsɛ. Ɛyɛ den ma nnipa a wonnim nhoma pii sɛ wobenya asetra pa. Ɛtɔ mmere bi a mmofra ne awofo mpo wuwu efisɛ wɔn akatua a ɛnso wɔn no ma ɛyɛ den sɛ wobenya ayaresa. Mpɛn pii no nnipa a wɔnkɔɔ sukuu ahe biara anaa wɔnkɔɔ bi koraa no nnya aduan pa nni, na wɔntra adan pa mu. Nhomasua anaa anyɛ yiye koraa no, akenkan ne akyerɛw a wobehu no betumi aboa kakra wɔ tebea horow yi mu.

Akenkan ne akyerɛw nso ma gyidihunu a obi bekura mu no brɛ ase. Nokwarem no, gyidihunu abu so wɔ nhomanimfo ne wɔn a wonnim nhoma nyinaa mu. Nanso ebia ɛbɛyɛ mmerɛw kɛse sɛ wɔbɛdaadaa wɔn a wonnim nhoma no na wɔadaadaa wɔn asen afoforo esiane sɛ wontumi nkenkan nneɛma a ɛpa saa nnaadaa no ho ntama nti. Ɛno nti na wɔtaa kura gyidihunu mu paa na wogye di sɛ ɔkɔmfo bi betumi afa anwonwakwan so asa yare no.—Deuteronomium 18:10-12; Adiyisɛm 21:8.

Nhomasua Ho Nhia Mma Adwumayɛ Nkutoo

Nnipa pii susuw sɛ nhomasua atirimpɔw titiriw ne sɛ ɛbɛma wɔanya sika. Nanso, nhomanimfo binom nnya adwuma nyɛ anaa wonnye akatua a ɛsɛ a ebetumi ama wɔanya wɔn ahiade titiriw. Ɛno nti awofo binom betumi asusuw sɛ mfaso nni so sɛ wɔde abofra bɛkɔ sukuu. Nanso sukuukɔ boa pii sen sɛ ebesiesie obi ma wanya sika; esiesie mmofra ma  asetram biribiara. (Ɔsɛnkafo 7:12) Sɛ obi tumi ka ne man mu kasa titiriw, na otumi kenkan, na ɔkyerɛw a, ɛyɛ mmerɛw sɛ ɔne ayaresabea adwumayɛfo, ɔman mpanyimfo, anaa sikakorabea adwumayɛfo bedi nkitaho, na mpo ɛbɛyɛ ade a otumi yɛ no daa sen sɛ ebeyi no hu.

Wɔ mmeae bi no, ebia wɔbɛma mmofra a wonsuaa nhoma asua adwuma sɛ abantofo, mpataayifo, adepamfo, anaa nnipa a wɔyɛ nsaanodwuma foforo. Adwumasua yɛ ade pa, nanso sɛ mmofra yi ankɔ sukuu a, anhwɛ a wɔrentumi nhu akenkan ne akyerɛw yiye. Akyinnye biara nni ho sɛ, sɛ wodi kan nya nhomasua a ehia ansa na wɔasua adwuma a, wobetumi akwati nsisi na wɔanya asetra a abotɔyam wom.

Ná Nasareni Yesu yɛ duadwumfo, na ɛda adi sɛ osuaa adwuma wɔ Yosef, ne papa a ɔyɛn no no hɔ. (Mateo 13:55; Marko 6:3) Na Yesu nim akenkan ne akyerɛw nso, efisɛ bere a odii mfe 12 mpo no, na otumi ne mmarima nhomanimfo a wɔwɔ asɔrefie hɔ bɔ nkɔmmɔ a ntease wom. (Luka 2:46, 47) Wɔ Yesu fam no, adwuma a osuae no antwitware nneɛma foforo a osuae no mu.

So Ɛsɛ sɛ Mmabea Nso Kɔ Sukuu?

Ɛtɔ mmere bi a awofo de wɔn mmabarima kɔ sukuu na wogyaw wɔn mmabea. Ebia awofo binom susuw sɛ wɔn mmabea sukuukɔ ho ka so dodo, na wogye di sɛ mfaso pii wɔ so sɛ mmabea bɛtra fie bere nyinaa na wɔaboa  wɔn maame. Nanso akenkan ne akyerɛw a ɔbabea nnim no betumi ayɛ akwanside ama no. Amanaman Nkabom Mmofra Foto (UNICEF) nhoma bi ka sɛ: “Nhwehwɛmu ahorow ada no adi sɛ mmabea a wɔde wɔn kɔ sukuu no yɛ akwan a eye sen biara a ebetumi agye nnipa afi ohia mu no biako.” (Poverty and Children: Lessons of the 90s for Least Developed Countries) Mmea a wɔakɔ sukuu tumi di asetra mu nsɛm ho dwuma yiye, na ɛma wosisi gyinae ahorow a nyansa wom ma abusua no mufo nyinaa nya so mfaso.

Nhwehwɛmu bi a wɔyɛe wɔ Benin, Afrika Atɔe fam, a ɛfa mmofra a wowu ho no daa no adi sɛ, sɛ kuw no, ɛnanom a wɔnkɔɔ sukuu da mma a wonnya nnii mfe anum no 1,000 biara mu 167 wuwu, bere a mmea a wɔakɔ ntoaso sukuu no mma 1,000 biara mu 38 na wowu. UNICEF de asɛm no ba awiei sɛ: “Enti wɔ Benin ne sɛnea ɛte wɔ wiase nyinaa no, mmofra dodow a wowu no gyina sɛnea nhomasua te so.” Enti, afei, wo mmabea a wode wɔn bɛkɔ sukuu no betumi de mfaso horow pii aba.

So Akenkan ne Akyerɛw Ho Adesua Ara Dɔɔso?

Baabi a ɛho hia no, Yehowa Adansefo yɛ akenkan ne akyerɛw ho sukuu ma asafo no mufo a wontumi nkenkan ade no. * Saa nsiesiei a mfaso wɔ so yi boa nkurɔfo ma wɔtaa sua akenkan wɔ wɔn ankasa kasa mu. So ɛfata sɛ  wɔde eyi si sukuukɔ ankasa ananmu? Sɛ sukuu ankasa wɔ hɔ mpo a, so ɛsɛ sɛ wohwɛ kwan sɛ asafo no na ɛbɛkyerɛ wo mma ade?

Ɛmfa ho sɛ akenkan ne akyerɛw sukuu no yɛ nhyehyɛe a ayamye wom a Yehowa Adansefo asafo ahorow no ayɛ no, atirimpɔw no ne sɛ ɛbɛboa mpanyimfo a esiane ahokyere bi nti wɔankɔ sukuu da bere a na wɔyɛ mmofra no. Ebetumi aba sɛ na wɔn awofo nnim sɛnea nhomasua ho hia anaasɛ na sukuu ahorow biara nni hɔ. Wobetumi aboa nnipa a wɔtete saa no denam akenkan ne akyerɛw sukuu a wɔyɛ wɔ asafo no mu a wɔbɛkɔ bi so. Nanso adesua horow yi nyɛ sukuukɔ ankasa nsiananmu, na wɔnyɛe sɛ ɛmfa mfitiase sukuu ho nkyerɛkyerɛ mma. Wɔnkyerɛ nsɛm te sɛ adebɔ ho nyansahu, nkontaabu, ne abakɔsɛm ho ade wɔ akenkan ne akyerɛw sukuu yi mu. Nanso, ebia na wɔkyerɛ ka nneɛma a wosua wɔ sukuu ankasa mu no ho.

Wɔ Afrika no, wɔyɛ akenkan ne akyerɛw sukuu dodow no ara wɔ kasa a mmusua horow ka mu sen sɛ wɔbɛyɛ wɔ ɔman no kasa titiriw a wɔka mu. Nanso wɔtaa de ɔman no kasa titiriw na ɛkyerɛ ade wɔ sukuu ankasa mu. Eyi ma mmofra nya mfaso horow efisɛ nhoma no pii ne nneɛma foforo a wɔkenkan no pii wɔ kasa titiriw yi mu. Asafo akenkan ne akyerɛw sukuu betumi aboa abofra wɔ ne sukuukɔ mu de, nanso ɛrentumi nsi ananmu. Ɛnde, sɛ ɛbɛyɛ yiye nkutoo a, so ɛnsɛ sɛ wɔma mmofra kɔ sukuu ankasa?

Ɛyɛ Awofo Asɛyɛde

Ɛsɛ sɛ mmarima a wodi anim wɔ asafo no honhom fam ahiade ho dwumadi mu no yɛ Kristofo a wɔyɛ nhwɛso pa. Ɛsɛ sɛ wodi wɔn ankasa fie ne wɔn mma so “yiye.” (1 Timoteo 3:4, 12) Nea ɛka yɛn fie a yebedi so “yiye” ho ne mmɔden biara a yɛbɛbɔ de aboa yɛn mma ma wɔakwati tebea a ɛbɛma wɔakɔ ahokyere mu daakye.

Onyankopɔn ama Kristofo awofo asɛyɛde kɛse. Ɛsɛ sɛ wɔde N’asɛm tete wɔn mma na wɔboa wɔn ma wɔbɛyɛ nnipa a ‘wɔdɔ nimdeɛ.’ (Mmebusɛm 12:1; 22:6; Efesofo 6:4) Ɔsomafo Paulo kyerɛwee sɛ: “Na sɛ obi nhwɛ n’ankasa ne nnipa ne, ne titiriw no, ne fifo a, wapa gyidi, na ɔyɛ onipa bɔne sen nea onnye nni.” (1 Timoteo 5:8) Ɛsɛ sɛ yɛma yɛn mma nya nhomasua a ɛfata nso.

Ɛtɔ mmere bi a sukuu nhyehyɛe a ɛwɔ hɔ no ntumi mfa nhomasua a edi mu mma esiane sɛ nnipa kyere so, wonni sika pii, anaasɛ ebia wontua akyerɛkyerɛfo no ka yiye nti. Ɛno nti ɛho hia sɛ awofo ma wɔn ani ku nea wɔn mma resua wɔ sukuu no ho yiye. Nyansa wom sɛ wobehu akyerɛkyerɛfo no, titiriw bere biara a wobebue sukuu foforo no, na mpo wɔabisa wɔn ma wɔakyerɛ wɔn adwene wɔ ɔkwan a mmofra no betumi afa so abɛyɛ adesuafo papa ho. Sɛ ɛba no saa a, akyerɛkyerɛfo bɛte nka sɛ wɔkyerɛ wɔn ho anisɔ, na ɛbɛkanyan wɔn ma wɔabɔ mmɔden kɛse sɛ wɔbɛkyerɛ mmofra no ade yiye.

Nhomasua ka nneɛma a ɛboa ma abofra nyin no ho. Mmebusɛm 10:14 ka sɛ: “Anyansafo kora nimdeɛ.” Eyi yɛ nokware titiriw wɔ Bible mu nimdeɛ ho. Ɛsɛ sɛ Yehowa nkurɔfo—mmofra ne mpanyin nyinaa—nya nimdeɛ sɛnea ɛsɛ sɛnea ɛbɛyɛ a wobetumi aboa afoforo wɔ honhom fam, na ama ‘wɔagyina Onyankopɔn anim sɛ nnipa a wɔfata, a enhia sɛ wɔfɛre, na wokura nokwasɛm no mu pɛpɛɛpɛ.’ (2 Timoteo 2:15; 1 Timoteo 4:15) Enti, afei, so ɛsɛ sɛ wo mma kɔ sukuu anaa? Ɛmfa ho sɛ fa kɛse no begyina nea ɛwɔ wo man mu so no, akyinnye biara nni ho sɛ wobɛka sɛ ɛsɛ sɛ wɔkɔ. Nanso ɛsɛ sɛ Kristofo a wɔyɛ awofo bua asɛmmisa a ɛho hia paa yi, ‘So ɛsɛ sɛ me mma kɔ sukuu?’ Wunnye ntom sɛ ɛmfa ho baabi a wote no, ɛsɛ sɛ mmuae no yɛ yiw?

[Ase hɔ nsɛm]

[Adaka/Mfonini wɔ kratafa 12, 13]

Sɛ Sukuukɔ Renyɛ Yiye a

Wɔ tebea horow bi mu no wontumi nkɔ sukuu. Sɛ nhwɛso no, Refugees nsɛmma nhoma no bɔɔ amanneɛ sɛ mmofra 5 mu 1 pɛ na obetumi akɔ sukuu wɔ aguanfo atrae ahorow. Wɔ tebea horow bi mu no, akyerɛkyerɛfo atuatew ma wɔto sukuu ahorow bi mu bere tenten. Wɔ ɔmantam bi mu no ebia na sukuu ahorow no wɔ akyirikyiri anaasɛ ebi nni hɔ koraa. Ɔtaa a wɔde ba Kristofo so nso tumi ma woyi mmofra adi fi sukuu mu.

Dɛn na wobɛyɛ de aboa wo mma wɔ tebea horow a ɛte saa mu? Sɛ wowɔ mma pii na sɛ wote baabi a sikasɛm nti ɛyɛ den sɛ wɔn nyinaa bɛkɔ sukuu a, dɛn na wubetumi ayɛ? Wiɛ, wubetumi de wo mma no mu biako anaa baanu akɔ sukuu bere a womfa wɔn nto honhom fam asiane mu? Sɛ saa a, ebia wobetumi de nea wɔresua wɔ sukuu no akyerɛkyerɛ wo mma a aka no.

Wɔ aman bi so no, wɔwɔ nea wɔfrɛ no ofie sukuu. * Wɔ nhyehyɛe yi mu no, da biara awofo no mu biako de nnɔnhwerew kakra kyerɛkyerɛ abofra no. Wɔ tete agyanom bere so no, na awofo tumi kyerɛkyerɛ wɔn mma ma ɛyɛ yiye. Ɛda adi sɛ esiane awofo ntetee pa a Yakob ba Yosef nyae nti, otumi hwɛɛ adwuma so bere a na ɔyɛ aberante no.

Ebia ɛbɛyɛ den sɛ awofo benya nneɛma a wosua a wɔahyɛ da ayɛ ho nhyehyɛe anaa nhyehyɛe a wɔde kyerɛ ade wɔ baabi te sɛ aguanfo atrae, nanso awofo betumi de nhoma a Yehowa Adansefo atintim akyerɛ ade. Sɛ nhwɛso no, Me Nhoma a ɛka Bible Mu Nsɛm betumi aboa ma wɔakyerɛ mmofra nkumaa ade. Nyan! nsɛmma nhoma no ka nneɛma pii ho asɛm. Wobetumi de Life—How Did It Get Here? By Evolution or by Creation? nhoma no akyerɛ adebɔ ho nyansahu ho ade. Asase ho mfonini ketewa bi wɔ Yearbook of Jehovah’s Witnesses mu, na ɛka sɛnea asetra ne asɛnka adwuma no te wɔ aman horow so ho asɛm.

Sɛ wosiesie wɔn ho yiye de nkyerɛkyerɛ ma, na wɔma ɛfata mmofra no ntease a, ebetumi aboa pii. Sɛ wɔkɔ so kenkan ade na wosua ade a, sɛ daakye hokwan ba sɛ wɔbɛkɔ sukuu a, ɛbɛyɛ mmerɛw ama wɔn. Wubetumi aboa wo mma ma wɔahu nhoma yiye denam anammɔn a wubedi kan atu ne wo mmɔdenbɔ so. Hwɛ sɛnea ɛno betumi ayɛ mfaso!

[Ase hɔ asɛm]

[Mfonini]

Sɛ wote baabi a wo mma ntumi nkɔ sukuu ankasa a, dɛn na wubetumi ayɛ?