Mmabun—Yehowa Werɛ Remfi Mo Adwuma!
Mmabun—Yehowa Werɛ Remfi Mo Adwuma!
“Onyankopɔn nyɛ nea ɔnteɛ a ne werɛ befi mo adwuma ne mo dɔ mmɔden a mobɔe ne din ho, sɛ mosom ahotefo na moda so som wɔn.”—HEBRIFO 6:10.
1. Ɔkwan bɛn so na Bible mu nhoma a ɛne Hebrifo ne Malaki no da no adi sɛ Yehowa ani sɔ wo som adwuma?
SO WOAYƐ adepa bi ama w’adamfo bi a wanna wo ase pɛn? Sɛ obu ayamyede bi a woyɛ adewa anaasɛ nea enye koraa no, sɛ ne werɛ fi koraa a, ebetumi ayɛ yaw yiye. Nanso, sɛ yefi yɛn koma nyinaa mu som Yehowa a, hwɛ sɛnea ɛyɛ soronko koraa! Bible ka sɛ: “Onyankopɔn nyɛ nea ɔnteɛ a ne werɛ befi mo adwuma ne mo dɔ mmɔden a mobɔe ne din ho, sɛ mosom ahotefo na moda so som wɔn.” (Hebrifo 6:10) Susuw nea ɛno kyerɛ no ho hwɛ. Sɛ Yehowa werɛ fi nea woayɛ ne nea wugu so reyɛ wɔ ne som adwuma mu no a, obebu no sɛ ade a ɛnteɛ—sɛ bɔne—ankasa. Onyankopɔn a ɔkyerɛ nneɛma ho anisɔ bɛn ara ni!—Malaki 3:10.
2. Dɛn na ɛma Yehowa a wobɛsom no no yɛ ade titiriw ankasa?
2 Woanya hokwan soronko sɛ wobɛsom Onyankopɔn a ɔkyerɛ nneɛma ho anisɔ yi. Esiane sɛ sɛ yɛde toto ho a, wo mfɛfo gyidifo bɛyɛ ɔpepem asia na wɔwɔ wiase nnipa a wɔn dodow bɛyɛ ɔpepepem asia mu nti, hokwan a wowɔ no yɛ nea ɛho yɛ na ankasa. Afei nso, nokwasɛm a ɛyɛ sɛ woretie asɛmpa no na wode redi dwuma no yɛ adanse a ɛkyerɛ sɛ wo ho hia Yehowa, efisɛ Yesu kae sɛ: “Obi ntumi mma me nkyɛn, gye sɛ agya a ɔsomaa me no twe no.” (Yohane 6:44) Yiw, Yehowa boa ankorankoro ma wonya Kristo afɔrebɔ no so mfaso.
Hokwan Kɛse a Wowɔ Ho Anisɔ a Wobɛkyerɛ
3. Ɔkwan bɛn so na Kora mma no kyerɛɛ hokwan a wɔanya resom Yehowa no ho anisɔ?
3 Sɛnea yesusuw ho wɔ asɛm a edi kan no mu no, wowɔ gyinabea soronko a wode bɛma Yehowa koma ani agye. (Mmebusɛm 27:11) Eyi yɛ ade a ɛnsɛ sɛ wubu no adewa da. Wɔ nnwom a efi honhom mu biako mu no, Kora mma no kyerɛɛ hokwan a wɔanya resom Yehowa no ho anisɔ. Yɛkenkan sɛ: “Wo fi dakorodi ye sen nna apem. Mepɛ me Nyankopɔn fi nammɔnnampan mu tra mmom sen sɛ mɛtra abɔnefo ntamadan mu.”—Dwom 84:10.
4. (a) Dɛn na ebetumi ama ebinom abu Yehowa som sɛ ade a ɛyɛ den? (b) Ɔkwan bɛn so na Yehowa da no adi sɛ n’ani gye ho sɛ obehu n’asomfo na watua wɔn ka?
4 So saa na wote nka wɔ hokwan a woanya resom wo soro Agya no ho? Nokwarem no, ɛtɔ mmere bi a ebetumi ayɛ sɛ nea Yehowa som siw w’ahofadi ho kwan. Ɛyɛ nokware sɛ Bible nnyinasosɛm ahorow a wode bɛbɔ wo bra no hwehwɛ sɛ wode nneɛma bi bɛbɔ afɔre. Nanso, ne nyinaa mu no, nea Yehowa hwehwɛ fi wo hɔ biara yɛ nea ɛso wɔ mfaso ma wo. (Dwom 1:1-3) Afei nso, Yehowa hu wo mmɔdenbɔ, na ɔkyerɛ wo nokwaredi ho anisɔ. Nokwarem no, Paulo kyerɛwee sɛ, Yehowa ‘yɛ wɔn a wɔhwehwɛ n’akyi kwan no katuafo.’ (Hebrifo 11:6) Yehowa rehwehwɛ hokwan a ɔde bɛyɛ eyi. Odiyifo treneeni bi a ɔtraa ase tete Israel no kae sɛ: “[Yehowa, NW] de n’aniwa kyini fa asase nyinaa so, sɛ ɔde ne denyɛ bedi ama wɔn a wɔn koma di mũ wɔ ne ho no.”—2 Beresosɛm 16:9.
5. (a) Dɛn ne akwan a eye sen biara a wubetumi afa so ada no adi sɛ wo koma di mu wɔ Yehowa ho no mu biako? (b) Dɛn nti na wo gyidi ho asɛm a wobɛka akyerɛ afoforo no betumi ayɛ sɛ nea ɛyɛ den?
5 Akwan a eye sen biara a wubetumi afa so ada no adi sɛ wo koma di mu wɔ Yehowa ho no mu biako ne sɛ wobɛka ne ho asɛm akyerɛ afoforo. So woanya hokwan sɛ wobɛka wo gyidi ho asɛm akyerɛ wo mfɛfo sukuufo no bi pɛn? Mfiase no, eyi a wobɛyɛ no betumi ayɛ sɛ nea ɛyɛ den, na ɛho adwene a wubenya no betumi abɔ wo hu kakra. Ebia wobɛka sɛ, ‘Na sɛ wɔserew me ɛ? Na sɛ wosusuw sɛ me som yɛ soronko ɛ?’ Yesu gye toom sɛ ɛnyɛ obiara na obetie Ahenni asɛm no. (Yohane 15:20) Nanso, eyi nkyerɛ sɛ wobedi wo ho fɛw apo wo wɔ w’asetram bere nyinaa. Mmom no, Adansefo mmabun pii anya nkurɔfo ma wotie wɔn, na wɔnam nea wogye di a wokura mu pintinn so anya obu kɛse afi wɔn atipɛnfo hɔ.
“Yehowa Bɛboa Wo”
6, 7. (a) Ɔkwan bɛn so na abeawa bi a wadi mfirihyia 17 tumi dii ne mfɛfo sukuufo adanse? (b) Dɛn na woasua afi Jennifer suahu no mu?
6 Na wobɛyɛ dɛn atumi anya akokoduru aka wo gyidi ho asɛm akyerɛ? Dɛn nti na wunsi wo bo sɛ sɛ nkurɔfo bisa wo wo som ho asɛm a, wubesi no pi aka ho asɛm akyerɛ wɔn pefee? Susuw Jennifer a wadi mfirihyia 17 no suahu no ho hwɛ. Ɔka sɛ: “Na meredidi awia wɔ sukuu mu. Mmeawa a na me ne wɔn te pon ho no bɔɔ nyamesom ho nkɔmmɔ, na mmeawa no mu biako bisaa me ɔsom ko a mewom.” So Jennifer bɔɔ hu sɛ ɔbɛma no mmuae? Ɔka sɛ: “Yiw, efisɛ na minhu sɛnea wɔbɛyɛ wɔn ade wɔ ho.” Enti dɛn na Jennifer yɛe? Ɔtoa so sɛ: “Meka kyerɛɛ mmeawa no sɛ meyɛ Yehowa Dansefo. Mfiase no, ɛte sɛ nea wɔn ho dwiriw wɔn. Ɛda adi sɛ na wɔwɔ adwene sɛ Yehowa Adansefo yɛ nnipa soronko. Eyi ma wobisabisaa me nsɛm, na mitumi kyerɛkyerɛɛ adwene a ɛnteɛ a na wokura no pii mu. Saa da no akyi mpo no, mmeawa no bi baa me nkyɛn bere ne bere mu bebisaa me nsɛm.”
7 So Jennifer nuu ne ho sɛ ɔde hokwan no kaa ne gyidi ho asɛm kyerɛe? Dabida! Ɔka sɛ: “Bere a yedidi wiei no, m’ani gyei kɛse. Afei saa mmeawa no anya sɛnea Yehowa Adansefo te ankasa ho adwene a ɛfata.” Afei Jennifer afotu a ɔde ma no yɛ tiawa: “Sɛ ɛyɛ den ma wo sɛ wubedi wo mfɛfo sukuufo ne akyerɛkyerɛfo adanse a, bɔ mpae tiawa. Yehowa bɛboa wo. W’ani begye sɛ wode hokwan a wunyae sɛ wudi adanse no dii dwuma yiye.”—1 Petro 3:15.
8. (a) Ɔkwan bɛn so na mpaebɔ boaa Nehemia bere a ohyiaa tebea bi a ɔnhwɛ kwan no? (b) Dɛn ne tebea horow bi a sɛ wuhyia wɔ sukuu mu a ɛho behia sɛ wobɔ Yehowa mpae tiawa komm?
8 Hyɛ no nsow sɛ Jennifer hyɛ nyansa sɛ, sɛ wunya hokwan sɛ wubedi wo gyidi ho adanse a, ‘bɔ mpae tiawa’ kyerɛ Yehowa. Eyi pɛpɛɛpɛ na Nehemia, Persia hene Artasasta nsahyɛfo no yɛe, bere a ohyiaa tebea bi a na ɔnhwɛ kwan no. Na Nehemia ayɛ bosaa efisɛ na wɔaka tebea a Yudafo no wom ho asɛm akyerɛ no, na na wate sɛ Yerusalem afasu ne ne kurow apon abubu. Ɔhene no hui sɛ Nehemia ho yeraw no, enti obisaa Nehemia nea ɛhaw no no ho asɛm. Ansa na Nehemia rebua no no, ɔbɔɔ mpae hwehwɛɛ akwankyerɛ. Afei ɔde akokoduru srɛɛ kwan a ɔde bɛkɔ Yerusalem akɔboa ma wɔakyekye kurow a na wɔasɛe no no. Artasasta maa Nehemia kwan. (Nehemia 2:1-8) Asuade bɛn na ɛwom? Sɛ wobɔ hu bere a hokwan bi abue sɛ wubedi wo gyidi ho adanse a, mmu w’ani ngu hokwan a wowɔ sɛ wobɛbɔ mpae komm no so. Petro kyerɛwee sɛ: “Momfa mo dadwen ne haw nyinaa nto [Yehowa] so, efisɛ odwen mo ho.”—1 Petro 5:7; Dwom 55:22.
‘Siesie Wo Ho sɛ Wobɛkyerɛkyerɛ’
9. Ɔkwan bɛn so na Leah a wadi mfirihyia 13 no tumi maa Young People Ask no 23?
9 Susuw osuahu foforo ho hwɛ. Na Leah a wadi mfirihyia 13 no rekenkan Questions Young People Ask—Answers That Work * nhoma no wɔ awia adidi bere wɔ sukuu mu. Ɔka sɛ: “Na afoforo rehwɛ me, na ankyɛ na nnipa pii begyinaa me kɔn so. Wofii ase bisaa nea nhoma no reka ho asɛm.” Eduu bere a wɔpɔnee no na mmeawa baanan akyerɛ sɛ Leah mmrɛ wɔn Young People Ask nhoma no bi. Ankyɛ na saa mmeawa yi kaa nhoma no mu nsɛm kyerɛɛ afoforo, na wɔn nso hwehwɛɛ bi. Adapɛn kakraa bi mu no, Leah maa ne mfɛfo sukuufo ne wɔn nnamfonom Young People Ask nhoma no 23. Bere a afoforo bisaa Leah nhoma a na ɔrekenkan no ho asɛm no, so ɛyɛɛ mmerɛw maa no mfiase sɛ ɔbɛka ho asɛm? Dabida! Ɔka sɛ: “Mfiase no, ehu kaa me. Nanso, mebɔɔ mpae, na na minim sɛ Yehowa ka me ho.”
10, 11. Ɔkwan bɛn so na Israelni abeawa kumaa bi tumi boaa Siriani sraani panyin bi ma osuaa Yehowa ho ade, na nsakrae bɛn na ɔyɛe wɔ ɛno akyi?
10 Ebia Leah suahu no bɛkae wo tebea bi a ɛte saa ara a Israelni abeawa kumaa bi a na wɔafa no dommum kɔ Siria no hyiae no. Na Naaman, Siriani sraani panyin no yare kwata. Ebetumi aba sɛ ne yere na ofii nkɔmmɔ a ɛmaa abeawa kumaa no kaa ne gyidi ho asɛm kyerɛe no ase. Ɔkae sɛ: “Sɛ anka me wura wɔ odiyifo a ɔwɔ Samaria no anim a, ɛnde anka ɔbɛsa ne kwata yi ama no.”—2 Ahene 5:1-3.
11 Esiane abeawa kumaa yi akokoduru nti, Naaman behui sɛ “Onyankopɔn bi nni asase nyinaa so sɛ Israel nko.” Osii gyinae mpo sɛ ‘ɔremmɔ ɔhyew afɔre anaa afɔre biara mma onyame biara bio sɛ Yehowa nko.’ (2 Ahene 5:15, 17) Akyinnye biara nni ho sɛ Yehowa hyiraa abeawa kumaa no akokoduru no so. Obetumi ayɛ na ɔbɛyɛ saa ara ama mmofra nnɛ. Leah hui sɛ ɛte saa. Bere bi akyi no, ne mfɛfo sukuufo no baa ne nkyɛn bɛka kyerɛɛ no sɛ Young People Ask nhoma no reboa wɔn wɔ wɔn abrabɔ mu. Leah ka sɛ: “M’ani gyei, efisɛ mihui sɛ mereboa afoforo ma wɔasua Yehowa ho ade pii, na na mereboa wɔn ma wɔasakra wɔn asetra.”
12. Dɛn na ebetumi ahyɛ wo den ma woaka wo gyidi ho asɛm akyerɛ?
12 Wubetumi anya osuahu ahorow a ɛte sɛ Jennifer ne Leah de no bi. Di Petro a ɔkyerɛwee sɛ sɛ́ Kristoni no ɛsɛ sɛ ‘wusiesie wo ho daa sɛ wobɛkyerɛ obiara a obisa wo anidaso a ɛwɔ mo mu no ase’ no afotu no akyi. (1 Petro 3:15) Wobɛyɛ dɛn atumi ayɛ saa? Suasua afeha a edi kan no mu Kristofo a wɔbɔɔ Yehowa mpae sɛ ɔmmoa wɔn mma wɔmfa “nnam nyinaa nka” asɛm no. (Asomafo no Nnwuma 4:29) Afei ka wo gyidi ho asɛm kyerɛ afoforo akokoduru so. Nea ebefi mu aba no bɛyɛ wo nwonwa. Afei nso, wobɛma Yehowa koma ani agye.
Video ne Dwumadi Atitiriw
13. Hokwan ahorow bɛn na mmabun bi de adi dwuma de adi adanse? (Hwɛ nnaka a ɛwɔ nkratafa 20 ne 21 no.)
13 Mmabun pii nam video ahorow so aka wɔn gyidi ho asɛm akyerɛ wɔn mfɛfo sukuufo anaa wɔn akyerɛkyerɛfo. Ɛtɔ mmere bi a sukuu dwumadi ahorow nso ma wonya hokwan yi Yehowa ayɛ. Sɛ nhwɛso no, mmarimaa baanu a wɔn mu biara adi mfirihyia 15 a wɔyɛ Yehowa Adansefo nyaa sukuu dwumadi bi a ɛfa wiase abakɔsɛm ho, na wɔkae sɛ wɔnkyerɛw wiase nyamesom ahorow no mu biako ho asɛm. Wɔn baanu yɛɛ biako gyinaa Jehovah’s Witnesses—Proclaimers of God’s Kingdom nhoma no so kyerɛw Yehowa Adansefo ho asɛm. * Na ɛsɛ sɛ wɔde simma anum nso ka ho asɛm. Ɛno akyi no, ɔkyerɛkyerɛfo no ne sukuufo no bisaa mmarimaa a na wogyina adesuakuw no anim no nsɛm pii simma 20 kaa ho. Ɛno akyi adapɛn pii no, wɔn mfɛfo sukuufo no kɔɔ so bisaa Yehowa Adansefo ho nsɛm pii!
14, 15. (a) Dɛn nti na onipa ho suro yɛ afiri? (b) Dɛn nti na ɛsɛ sɛ wode ahotoso ka wo gyidi ho asɛm kyerɛ afoforo?
14 Sɛnea osuahu ahorow a yɛaka ho asɛm yi kyerɛ no, yɛnam yɛn gyidi sɛ Yehowa Adansefo no ho asɛm a yɛbɛka akyerɛ afoforo no so betumi anya nhyira pii. Mma onipa ho suro mmma hokwan ne anigye a wubenya sɛ wobɛboa afoforo ma wɔabehu Yehowa no mmmɔ wo. Bible ka sɛ: “Onipa ho suro sum afiri, na nea ɔde ne ho to [Yehowa, NW] so no ho bɛyɛ sonn.”—Mmebusɛm 29:25.
15 Kae sɛ, sɛ́ Kristoni babun no, wowɔ biribi a w’atipɛnfo hia paa—asetra kwan a eye sen biara nnɛ ne daa nkwa a ɛbɛba daakye ho bɔhyɛ no. (1 Timoteo 4:8) Anigyesɛm ne sɛ, wɔ United States no—baabi a ebia wubesusuw sɛ ɛhɔ nnipa dodow no ara yɛ anibiannaso anaasɛ wokura wiase adwene no—nhwehwɛmu bi a wɔyɛe daa no adi ankasa sɛ mmabun no mu fã na wɔfa nyamesom aniberesɛm paa, na nkyekyɛm abiɛsa mu biako na wɔka sɛ nyamesom ne ‘ade a ɛwɔ wɔn asetra so nkɛntɛnso sen biara.’ Ɛda adi sɛ tebea no te saa ara wɔ wiase afã foforo pii. Ɛnde, ɛda adi sɛ w’atipɛnfo a wɔwɔ sukuu mu no ani begye ho sɛ wobetie Bible mu asɛm a wobɛka akyerɛ wɔn no.
Bɛn Yehowa, Bere a Woyɛ Ɔbabun No
16. Yehowa ho asɛm a wobɛka akyerɛ afoforo akyi no, dɛn na ɛsɛ sɛ woyɛ na ama woasɔ n’ani?
16 Nokwarem no, Yehowa a wobɛma ne koma ani agye no hwehwɛ pii sen ne ho asɛm a wobɛka akyerɛ afoforo kɛkɛ. Ɛsɛ sɛ woma w’abrabɔ ne ne gyinapɛn ahorow nso hyia. Ɔsomafo Yohane kyerɛwee sɛ: “Eyi ne Nyankopɔn dɔ, sɛ yebedi n’ahyɛde so, na n’ahyɛde no nyɛ den.” (1 Yohane 5:3) Sɛ wobɛn Yehowa a, wubehu sɛ eyi yɛ nokware. Wobɛyɛ dɛn atumi ayɛ saa?
17. Wobɛyɛ dɛn atumi abɛn Yehowa?
17 Gye bere fa kenkan Bible ne Bible ho nhoma ahorow. Dodow a wusua Yehowa ho ade no, dodow no ara na ɛbɛyɛ mmerɛw ama wo sɛ wubetie no na woaka ne ho asɛm akyerɛ afoforo. Yesu kae sɛ: “Onipa pa fi nnepa a waboaboa ano ne koma mu no mu na oyi adepa adi, . . . na efi nea ayɛ koma ma aboro so no mu na n’ano ka.” (Luka 6:45) Enti fa nneɛma pa hyɛ wo koma mu. Dɛn nti na womfa botae ahorow bi nsisi w’anim wɔ eyi mu? Ebia wubetumi anya nkɔso wɔ wo ho a wubesiesie ama asafo nhyiam ahorow mu wɔ dapɛn a ɛreba yi mu. Botae a edi hɔ a wubetumi de asi w’anim betumi ayɛ mmuae tiawa a ɛka koma a wobɛma. Nokwarem no, ɛho hia nso sɛ wode nneɛma a wusua no bedi dwuma.—Filipifo 4:9.
18. Sɛ wuhyia ɔsɔretia bi mpo a, dɛn ho ahotoso na wubetumi anya?
18 Nokwarem no, Yehowa som mu nhyira yɛ nea ɛtra hɔ daa—afebɔɔ. Ɛwom, wubetumi ahyia ɔsɔretia anaa fɛwdi bere ne bere mu esiane sɛ woyɛ Yehowa Dansefo nti. Nanso, susuw Mose ho hwɛ. Bible ka sɛ “ɔhwɛɛ akatua no.” (Hebrifo 11:24-26) Wo nso wubetumi anya ahotoso sɛ Yehowa betua wo ka wɔ mmɔden a wobɔ sɛ wubesua ne ho ade na woaka ne ho asɛm akyerɛ afoforo no ho. Nokwarem no, ne ‘werɛ remfi w’adwuma ne wo dɔ mmɔden a wobɔe ne din ho’ no da.—Hebrifo 6:10.
[Ase hɔ nsɛm]
^ nky. 9 Yehowa Adansefo na wotintimii.
^ nky. 13 Yehowa Adansefo na wotintimii.
So Wokae?
• Dɛn nti na wubetumi anya awerɛhyem sɛ Yehowa ani sɔ wo som adwuma?
• Akwan a wɔfa so di adanse wɔ sukuu bɛn na ebinom ahu sɛ ɛyɛ adwuma yiye?
• Dɛn na ebetumi ahyɛ wo den ma woadi wo mfɛfo sukuufo adanse?
• Wobɛyɛ dɛn atumi abɛn Yehowa?
[Adesua no ho Nsɛmmisa]
[Adaka/Mfonini wɔ kratafa 20]
Mmofra Nkumaa Mpo Yi Yehowa Ayɛ!
Mmofra nkumaa mpo atumi adi adanse a etu mpɔn wɔ sukuu mu. Susuw osuahu ahorow yi ho hwɛ.
Ná Amber a wadi mfirihyia du a ɔwɔ ne sukuu afe a ɛto so anum no adesuakuw rekenkan nhoma bi a ɛka ntua a Nasifo de baa Yudafo so wɔ Wiase Ko II mu ho asɛm. Amber sii gyinae de Purple Triangles video no kɔmaa ne kyerɛkyerɛfo no. Ɛyɛɛ ɔkyerɛkyerɛfo no nwonwa sɛ ohui sɛ wɔtaa Yehowa Adansefo nso wɔ Nasi nniso ase. Ɔkyerɛkyerɛfo no yii video no kyerɛɛ adesuakuw no nyinaa.
Alexa a wadi mfirihyia awotwe no kyerɛw krataa kɔmaa n’adesuakuw mufo kyerɛkyerɛɛ nea enti a ontumi mfa ne ho nhyɛ Buronyadi mu no mu. Ɛyɛɛ Alexa kyerɛkyerɛfo no nwonwa araa ma ɔmaa ɔkenkan krataa no den kyerɛɛ n’ankasa adesuakuw no ne adesua akuw foforo abien nso! Ɛreba awiei no, ɔkae sɛ: “Wɔakyerɛkyerɛ me sɛ menkyerɛ obu mma afoforo a wɔne me nkura gyidi biako no, na meda mo ase sɛ moakyerɛ obu ama gyinae a masi sɛ merenni Buronya no.”
Bere a Eric fii sukuu ase bere tiaa bi akyi no, ɔde Me Nhoma a Ɛka Bible Mu Nsɛm kɔɔ sukuu, na obisaa ho kwan de kyerɛɛ ne mfɛfo sukuufo no. Ne kyerɛkyerɛfo no kae sɛ: “Mewɔ nyansahyɛ bi. Dɛn nti na wonkenkan emu asɛm bi nkyerɛ adesuakuw no.” Eric yɛɛ saa. Ɛno akyi no, ɔkae sɛ wɔn a wɔpɛ nhoma no bi nyinaa mma wɔn nsa so. Nnipa dunwɔtwe—a ɔkyerɛkyerɛfo no ka ho—na wɔmaa wɔn nsa so! Eric te nka seesei sɛ wanya n’ankasa asasesin soronko a odi mu adanse.
Whitney a wadi mfirihyia akron no ani gye Yehowa Adansefo ne Nhomasua nhomawa no ho. * Ɔka sɛ: “Me maame taa de nhomawa yi bi ma m’akyerɛkyerɛfo afe biara, nanso afe yi de m’ankasa na meyɛɛ saa. Saa nhomawa yi nti, me kyerɛkyerɛfo no paw me sɛ ‘sukuuni a ɔyɛɛ nhwɛso pa dapɛn no.’”
[Ase hɔ asɛm]
^ nky. 56 Yehowa Adansefo na wɔyɛɛ nhoma ahorow a yɛaka ho asɛm no nyinaa.
[Adaka/Mfonini wɔ kratafa 21]
Tebea Ahorow a Ebinom Afa so Aka Wɔn Gyidi Ho Asɛm Akyerɛ
Bere a wɔka sɛ ebinom nyɛ sukuu kyerɛwtohɔ anaa dwumadi bi no, wɔpaw asɛm bi a ɛma wotumi di adanse
Mmabun bi ama wɔn kyerɛkyerɛfo video anaa nhoma bi a ɛka biribi fa asɛm a wɔresusuw ho wɔ sukuu mu ho
Bere a mmabun bi rekenkan Bible anaa Bible ho nhoma bi ahomegye bere mu no, mmabun foforo akɔ wɔn nkyɛn akobisabisa wɔn nsɛm
[Mfonini wɔ kratafa 18]
Wɔn a wɔn ho akokwaw betumi aboa atete mmabun ma wɔasom Yehowa